روزىھاجى تۇرسۇن 2011- يىلى 10- ئاينىڭ مەلۇم بىر كۈنى بىر قېتىملىق قاتناش ھادىسىسىگە ئۇچراش سەۋەبلىك، نەق مەيداندىلا ئىككى پۇتىنىڭ گۆشلىرى تىتىلىپ، سۆڭەكلىرى سۇنۇپ كەتكەن. ئىككى پۇتىنى ساقلاپ قېلىش ئىمكانىيىتى بولمىغانلىقتىن، پۇتلىرى يوتىسىدىن كېسىۋېتىلگەن. ھازىر ئاپتونۇم رايۇنلۇق جۇڭگو تىبابىتى دوختۇرخانىسىدا داۋالانماقتا. روزىھاجى دوختۇرخانىدا يېتىۋاتقىلى 50 نەچچە كۈن بولغان بولۇپ، ئائىلىسىدىكىلەر پۈتۈن بىساتلىرىنى سېتىپ داۋالاتقان بولسىمۇ، يارا ئېغىر بولغانلىقتىن، تېخىچە ياخشى بولۇپ كېتەلمىگەن. ئۇنىڭ ئۈستىگە ئوپىراتسىيەدىن كېيىنكى داۋالىتىشقا پۇل يەتمىگەنلىكى ئۈچۈن، دوختۇرخانا داۋاملىق داۋالىتىشنى توختىتىپ قويغان، ھازىر پۇتىنىڭ كېسىلگەن يېرى يېرىڭداپ كېتىۋاتماقتا. بۇ كېسەل ۋاقتىدا داۋالىتىلمىسا ئاقىۋىتى ناھايتتى خەتەرلىك.
دۇنيا مېھىر- مۇھەببەت بىلەن تولغان، ھايات_ قېرىنداشلارنىڭ ھېسداشلىقى، سەمىمىي دوستلىقى، مىننەتسىز ياردىمى بىلەن ئىللىق بولۇپ كەلگەن. ئىنسان ئىنسانغا موھتاج بولمىسۇن. ئەمما، ئىنسان ئىنسانغا ياردەم قولىنى سۇنۇپ، يىقىلغانلارنى يۆلەپ قويۇش، سەكراتتا ياتقان، قىممەتلىك ھاياتقا ئۈمۈد بىلەن قاراۋاتقان ئاجىزلارغا يار- يۆلەكتە بولۇش ئەڭ ساۋابلىق ئىشتۇر ۋە ئىنسانىي پەزىلەت، بۇرۇچتۇر!
ئەي قېرىنداشلار، مۇسۇلمانلار، ئۇيغۇرلار، كۆرۈپ تۇرۇپسىلەر ئەنە بىر قېرىندىشىمىز سەكراتتا ئىكەن. تېخى ئەمدىلا 20 ياشقا كىرگەن بىر ئوغلانىمىز ئەزرائىلنىڭ چاڭگىلىدا جان تالىشىۋېتىپتۇ. جان ئاللاھنىڭ ئىلكىدە، بىز بەندىلەرنىڭ قولىدىن كېلىدىغىنى پەقەت نىجادلىق تىلەش ۋە ئىمكانىيتىمىزنىڭ بارىچە سەۋەب قىلىش ئىكەن. مۇشۇ قېرىندىشىمىزغا بىر ياردەم قىلايلى. كوچىلىرىمىزدا ساختا مۇراجىئەتنامىنى كۆتۈرىۋېلىپ تىلەمچىلىكنى كەسىپ قىلىۋالغانلار كۆپەيمەكتە. بىز ھەقىقىي ياردەمگە موھتاج بولىۋاتقانلارنى پەرقلەندۈرەيلى، بۇ مۇراجەتنامىنى كۆرگەن ھەر بىر قېرىندىشىمىزنىڭ، ھاياتقا تەلپۈنۈپ تۇرغان بىر ياش يىگىتكە ياردەم قىلىشىنى سەمىمىيلىك بىلەن سورايمىز.
خالىغانلار بىمارنىڭ ئانىسىغا تېلىفۇن قىلساڭلار، دوختۇرخانىغا بېرىپ بىمارنى يوقلاپ قويساڭلار. ھەممىمىز تەڭ ھەرىكەتكە كەلسەك، تاما- تاما كۆل تولار دېگەندەك، سىزنىڭ قىلغان كىچىككىنە بىر ياردىمىڭىز قېرىندىشىمىزنىڭ داۋالىنىپ ساقىيىپ كېتىشىگە سەۋەب بولۇپ قېلىشى مۈمكىن. ياردىمىمىزنى ئايىمايلى، بىر يۈەن بولسىمۇ ياردەم قىلايلى. اللاھ ھەممىمىزگە سالامەتلىك، ۋە خاتىرجەملىك ئاتا قىلسۇن!
ئىمكان بولسا باشقا مۇنبەر، بلوگلاردىمۇ تەۋسىيە قىلىپ قويۇشىڭلارنى ئۈمۈد قىلىمىز!!!
قولىمىزدىن قانچىلىك كەلسە ياردەم قىلىپ قويايلى.
مەنبە ئىزدىنىش تورى
