سايىم نوچى بولغان خوپ

قىززىق ئىشتە بەزىلەر قورقىشىدۇ خوتۈندىن،
قولى نېرى كەلمەيدۇ كۆمۈر بىلەن ئوتۈندىن.
‹‹سايىم نوچى›› ئاتلىقلار شۇنداقمۇ يا بىلمىدىم،
قۇتۇلمايدۇ مۈرىسى خوتون ئاسقان خورجۇندىن.


بىزدەكلەرنى شۇنداقلار دوراپ باقسا بولمامدۇ؟
ئەر بولۇشنىڭ يولىنى سوراپ باقسا بولمامدۇ؟
نىمە دىسە ماقول دەپ خوتۇن بولماي خوتونغا،
مۇش -پەشۋادا ئاغزىنى توساپ باقسا بولمامدۇ؟


ئۆيىگە بارساڭ،بىمالال بىر بوتولكا قۇيالماس،
خوتۇنىدىن بى سوراق بىرەر توخۇ سويالماس.
سورۇنلاردا زىقلانسا چاقچاق ئاتلىق زىق بىلەن.
كۈلۈپ تۇرار بىر خىلدا يا قىزارماس ئۈيالماس.


بىزنى كۆرسۇن ئەردىگەن مانا بىزدەك بولمامدۇ،
خوتۈنلارنىڭ ئالدىدا خۇددى تۇزدەك بولمامدۇ.
ئارا كۈندە ئالتە رەت شامىلىنى پاكىزلاپ،
قارياغدۇرۇپ قاپاقتىن چېھرى مۇزدەك بولمامدۇ.


سايىملارغا قارىسام كۆكلەپ كەتكەن تۇرمۇشى،
بىزنىڭ ئۆيدە ساڭگىلار ئۆگزىمىزنىڭ قۇمۇچى.
خوتۈن تۇرماس ئاجىرشىپ يىرتىق يوتقان ھەمراھىم،
نەدە قالدى بىلمەيمەن ئۆينىڭ قازان -چۆمىچى.


ئەمدى بىلدىم خوتۈننى ھۆرمەت قىلىش ياخشىكەن،
تىنىچ ئۆتكەن شۇ تۇرمۇش يېقىملىق بىر ناخشىكەن.
باش-باشتاقلىق ئەر ئۈچۈن نادانلىقنىڭ ئىنكاسى،
شۇنداق ئىشلار تۇرمۇشنى قىرقىپ تاشلار قايچىكەن.


سوراپ كەلدىم شۇلاردىن تىنىچ تۇرمۇش ۋەجىنى،
چۈنكى ئۆزەم جاق تويدۇم تارتىپ ‹‹ئەرلىك›› دەردىنى.
ئۆرمەت كۇلگەن ئائىلىدە ياشنار ئىكەن مۇھاببەت،
گۇل ئالدىدا باغۋەن بوپ قىلماق خوپكەن ئەجىرىنى.


ئاياللارنى ئايىماق سۇننەت ئىكەن ئەسلىدە،
زالىملىققا مۇھاببەت يوقكەن ئىنسان نەسلىدە.
خاتا قىلغان ئىشلاردىن چىقتى يامان نەتىجە،
شەيتان ماراپ يۇرگەنكەن ئۆي بۇزۇشنىڭ قەستىدە.


‹‹سايىم››دەپتۇق ئايانماي توغرا يولنى تۇتقاننى،
مېھر بىلەن جۇپتىنىڭ سۆيگۈسىنى ئۇتقاننى.
ۋاپادارلىق ئەسلىدە بەركەت ئىكەن قۇت ئىكەن،
ناچار خۇيلار تەزدۇرەر ھاتتا ئۇرۇق-تۇققاننى.


‹‹سايىم نوچى ›› بولغانلار راس نوچىكەن ئەمەسمۇ،
ماڭا چۈشتى بۇگۇندە شۇلاردىكى ھەۋەسمۇ.
بوران ئۈچقان شۇ تۇرمۇش،ئەمدى كۆرەر كۆزۈم يوق،
چىن سۆيگۇدە باغ بولار  زىندان ياكى قەپەزمۇ.