ئەبۇ ھۇرەيرە رەزىيەللاھۇ ئەنھۇ رىۋايەت قىلىپ مۇنداق دەيدۇ: پەيغەمبەر ئەلەيھىسسالام مۇنداق دېگەن: «بىر ئادەم چوڭ گۇناھلارنى قىلمىغانلا بولسا، بەش ۋاخ ناماز ۋە جۇمە نامىزى بىر جۈمەدىن يەنە بىر جۈمەگىچە، روزا بۇ رامزاندىن يەنە بىر رامزانغىچە بولغان ئارىلىقتىكى گۇناھلىرىنى يوققا چىقىرىدۇ». (مۇسلىم رىۋايەت قىلغان.) ھەدىسنىڭ مۇھىم نۇقتىسى: ھەدىستە ئېيتىلغان ئىشلارنى تولۇق رەۋىشتە ئادا قىلىش ئاللاھ تائالانىڭ پەزلى، رەھمىتى بىلەن بەندىنىڭ كىچىك گۇناھلىرىنى مەغفىرەت قىلىشنىڭ سەۋەبى ئىكەنلىكى، ئەگەر بەندە كىچىك گۇناھتىن باشقا چوڭ گۇناھلارنىمۇ قىلغان بولسا، ئاللاھ تائالانىڭ يەڭگىللىتىشىنى ئۈمىد قىلىشى كېرەكلىكى، چۈنكى چوڭ گۇناھلارنىڭ مەغفىرەت قىلىنىشى ئۈچۈن بەندىنىڭ چىن ئىخلاسى بىلەن قىلغان تەۋبىسىنىڭ شەرت قىلىنىدىغانلىقى. ــ «ياخشىلار باغچىسى». ئەسكەرتىش: بۇ ھەدىستا دېيىلگىنى داۋاملىق بەش ۋاقىت نامىزىنى ئۆز لايىقىدا ئوقۇيدىغان، روزىسىنىمۇ تەلەپكە لايىق تۇتىدىغان كىشلەرنىڭ بىلىپ - بىلمەي ئۆتكۈزۈپ سالغان گۇناھلىرىغا كاپارەت بولۇشىنى كۆرسىتىدۇ. چۈنكى بىر مۇسۇلمان ئۈچۈن ناماز، روزا دېگەنلەر بىر مۇسۇلمان ئۈچۈن كۈندىلىك قىلىشقا تىگىشىلىك ئىبادەتلەردۇر.
