ئۈندىدارغا ئورتاقلىشىڭ|تېلېفوندا كۆرۈڭ
سىرت شۇنداق قاتتىق سوغۇق بولسىمۇ ، ئەمما ئۈرۈمچى شەھەرلىك ئۆسۈملۈك باغچىسى ‹‹ باھار تۈسى ›› گە كىرگەن ئىدى . 25 خىل سورتتىكى 300 نەچچە تەشتەك مودەنگۈل پەسىلگە قارشى پورەكلەپ ئېچىلىپ كەتكەن بولۇپ ، قەھرىتان قىشقا بۆلەكچە رەڭ قوشقانىدى .
12-يانۋار، ئۈرۈمچى ئۆسۈملۈك باغچىسىنىڭ مۇئاۋىن مۇدىرى زېڭ دې مۇنداق دېدى : 2013-يىلى ئۆكتەبىردە، ئۆسۈملۈك باغچىسى شەندۇڭ ئۆلكىسىنىڭ خېزې ناھىيەسىدىن ‹‹كۆك تارغاق قىسقان خان ئايىم ››، ‹‹گۈلئەنبەر››، ‹‹قارا ئالتۇن جۇلاسى›› قاتارلىق مودەنگۈل سورتلىرىنى كىرگۈزدى ، يەنە شۇ يەردىن ئىككى نەپەر يېتىشتۈرۈش مۇتەخەسسىسىنى تەكلىپ قىلىپ، باغچىدىكى پەسىلگە قارشى مودەنگۈللەرنىڭ ئۆستۈرۈلۈشىگە مەسئۇل قىلدى . مۇتەخەسسىسلەر جەمئىي 25 خىل سورتتىكى 1100 تەشتەك مودەنگۈلنى يېتىشتۈردى ، نۆۋەتتە بىرىنچى تۈركۈمدە 300 نەچچە تەشتەك مودەنگۈل ئېچىلدى ، يەنە ئىككى تۈركۈم مودەنگۈل يانۋارنىڭ ئاخىرى ۋە ئاپرېلدا ئارقا-ئارقىدىن ئېچىلىدۇ .
نۆۋەتتە، ئۆسۈملۈك باغچىسى پۈتۈن شىنجاڭ بويىچە تۇنجى قېتىملىق چوڭ كۆلەملىك قىشلىق گۈل كۆرگەزمىسىنى پىلانلاۋاتىدۇ، كۆرگەزمە ۋاقتى 31-يانۋاردىن فېۋرالنىڭ ئاخىرىغىچە قىلىپ بېكىتىلدى. ۋاقتى كەلگەندە 1100 تەشتەك مودەنگۈلدىن باشقا، يەنە 3000 تەشتەك كۈركۈمگۈل، 500 تەشتەك ئەتىرگۈل، 14 تەشتەك خېنومېل گۈلى، 10 تەشتەك شەپەقگۈل قاتارلىق 6000 تەشتەكتىن ئارتۇق گۈل تەڭلا كۆرگەزمە قىلىنىدۇ.
