ئىز تورى-爱智网

　　  جۇڭگو ئۇيغۇرچە رادىيو تورى 9-نويابىر بېيجىڭ خەۋىرى: جۇڭگونىڭ بىرلەشكەن دۆلەتلەر تەشكىلاتىدا دائىمىي تۇرۇشلۇق مۇئاۋىن ۋەكىلى ۋاڭ مىن تۈنۈگۈن نيۇ يوركتىكى بىرلەشكەن دۆلەتلەر تەشكىلاتىنىڭ باش ئورگىنىدا مۇنداق دېدى: جۇڭگو ھۆكۈمىتى جۇڭگو كارخانىلىرىنىڭ يەر شارى توختامى تەشكىلاتى شۇنداقلا بىرلەشكەن دۆلەتلەر تەشكىلاتى ئىمكانىيەتلىك سىجىل تەرەققىيات يىغىنىغا قاتنىشىپ، خەلقئارالىق ئالاقىنى كېڭەيتىپ، ئەمەلىيەتچىل ھەمكارلىق شېرىكلىك مۇناسىۋىتى ئورنىتىپ، يەر شارىنىڭ ئىمكانىيەتلىك سىجىل تەرەققىياتىغا تېخىمۇ زور تۆھپە قوشۇشىنى قوللايدۇ. ۋاڭ مىن مۇنداق دەپ كۆرسەتتى: بىرلەشكەن دۆلەتلەر تەشكىلاتى ئىمكانىيەتلىك سىجىل تەرەققىيات يىغىنىدا ھەرىكەت قىلىشقا جۈرئەت قىلىشتەك ئەمەلىيەتچىل پوزىتسىيە بىلەن، ئېنىق ۋە كونكرېت يولغا قويۇش پىلانى تۈزۈلۈشى بولۇپمۇ تەرەققىي قىلغان دۆلەتلەرنىڭ مەبلەغ بىلەن قوللاش، تېخنىكا ئۆتۈنۈپ بېرىش، ئىقتىدار قۇرۇلۇشى قاتارلىق ئىجرا قىلىش تەدبىرلىرى ئېنىق بېكىتىلىپ، يەر شارىنىڭ ئىمكانىيەتلىك سىجىل تەرەققىياتى ھەقىقىي تېزلىتىلىشى كېرەك. «يەر شارى توختامى» تەشكىلاتى 2000-يىلى رەسمىي قۇرۇلغان. ئۇ كارخانىلارنىڭ بىرلەشكەن دۆلەتلەر تەشكىلاتى ئورگىنى، ئەمگەكچىلەر تەشكىلاتى ۋە ئەل ئارا تەشكىلاتلار بىلەن بىرلىكتە، يەرشارىلىشىۋاتقان سەلبىي تەسىرنى تۈگىتىشنىڭ ئۈنۈملۈك يولىنى تېپىپ چىقىشىغا ئىلھام بېرىشنى مەقسەت قىلغان. ھازىر 130 نەچچە دۆلەتنىڭ 7 مىڭدىن ئارتۇق كارخانىسى بۇنىڭغا قاتناشتى.