توۋا دەيمەن يات ياخشى
( مۇخەممەس)
قېرىنداش دەپ ھاياتلىق ،ئۆتەر ئىكەن يۈرىكى ،
لېكىن باغرى تاش يۈرەك، سوقمايدىكەن تىلىكى ،
دەردى يامان بولاركەن ، مېھرى ئاتەش كۆۋرىكى ،
خۇدا قوشقان ئاسماقنىڭ، يات كىشىدەك كېرىكى ،
پېتىشمايدۇ تۇغقانلار ، توۋا دەيمەن يات ياخشى .
ياتنىڭ بىر تال دامدىمى ، تۈگىمەيدۇ ئاغزىدىن ،
لېكىن ئۆزنىڭ ئالتۇنى، چىقىپ كېتەر باغرىدىن ،
مېھنىتى بار تۇغقانغا ، بەرگەن قاتتىق زاغرىدىن ،
گېپى يوغان ، بېلى بوش، داپ چالىدۇ ناغرىدىن ،
ھۆرمىتى يوق تۇغقانلار ، توۋا دەيمەن يات ياخشى .
ئۆزنى كۆرسە بۇتنايدۇ ، ياتنى كۆرسە ئېغىنايدۇ ،
ئەگەر بولسا باي- غوجام،پارىسىنى قوغلايدۇ ،
مۇشكۇل چۈشسە بېشىغا، ياۋاش بولۇپ يىغلايدۇ ،
دەردى بالا ئىچىدە ، غەم باسقاندا ئۇخلايدۇ ،
ساختا ئۆتكەن تۇغقانلار ،توۋا دەيمەن يات ياخشى .
تۇغقان مېھرى بولمىسا ، مەخلۇقاتتىن نېمە پەرقى ؟
ئەقىلسىزنىڭ قەلبىدە ، گۆھەرنىڭ نە قىممىتى ؟
ئاق-قارىنى بىلەلمەس، ھەتتا ئالتۇن نە نەرقى ؟
بۇندا بولماس مىللەتنىڭ، زەررە خىسلەت چىرىقى ،
نادان ئۆتكەن تۇغقانلار ، توۋا دەيمەن يات ياخشى .
باي- غوجامنى تارتىدۇ ، يات بولسىمۇ تۇغقانلار ،
ھەيران قالماس بۇنىڭغا، كارامەتنى ئۇققانلار ،
پۇلنى تۇغقان قىلىدۇ، يۈرەكلىرى سوققانلار ،
ۋىجدان ئازاب تارتىدۇ ، ئىمانى بار تۇغقانلار ،
ئىنسابى يوق تۇغقانلار، توۋا دەيمەن يات ياخشى .
پۇل تالىشىپ تۇغقاننى، يات قىلىدۇ تىللايدۇ ،
يالغان گەپنى ئويدۇرۇپ، بىر -بىرىگە يوللايدۇ ،
ئېغىز–بۇرۇن يالىشىپ، ئۆزىدەكلەرنى قوللايدۇ ،
ياخشى گەپمۇ كار قىلماس، نۇمۇس قىلماي گوللايدۇ ،
رەزىل ئىكەن تۇغقانلار ، توۋا دەيمەن يات ياخشى .
ئۆزنى دغشمەن چاغلايدۇ ، ياتنى باغقا باشلايدۇ ،
يېتىمسىراپ قالغاندا ، ئاندىن باشنى قاشلايدۇ ،
تۇغقان لازىم بولمايدۇ ، خىيالىدىن تاشلايدۇ ،
باغرى تاشقا ئامال يوق، ئارتىس كەبى ياشنايدۇ ،
مېھرى رەزىل تۇغقانلار ، توۋا دەيمەن يات ياخشى .
ياتنىڭ ھۆرمىتى تاغدەك، ئۆزنىڭ نە ئۈچۈن بولماس ؟
ئۆزلەرگە مۈشۈك بولغان، تۇغقانغا نە ئۈچۈن يولۋاس؟
باغرىم دەپ قىلار دائىم ، كەسكىن بولىدۇ ئالماس ،
بۇ يولدا چېپىپ ئاتنى ، نادانلار تېخى ھارماس !
ئەقلى يوق بۇ تۇغقانلار، توۋا دەيمەن يات ياخشى .
ئاپتۇرى: يۇسۇپجان سابىر ئوتياق | 
يوللانغان ۋاقتى 2011-2-7 18:27
يوللانغان ۋاقتى 2011-2-7 19:20
