ئاپتۇر:كامىلجان ناسىر(دىلداش)
خۇددى مەن« مەشرەپ» كەبى ئىشقىم بىلەن،
يولدامەن ئويلاردىمەن مەنزىل تامان.
بىر ئۈمۈد دەملەردە ھەمرادۇر ماڭا ،
يار ئۈچۈن كۆيگەچكە قەلبىم ھەر قاچان.
(1)
خەيرىيەت بۇ كۆڭۈل چۈشۈپتۇ ساڭا،
ھىجراننىڭ دەشتىدە نەچچە يىل يۈرۈپ.
مۇھەببەت ئوتلىرى كۈل قىلدى مېنى،
يۈرەكنى شەپقەتسىز ئوتتا كۆيدۈرۈپ.
تارتىنما، ئەي لىۋەن چۆككىن باغرىمغا،
سۇمبۇلدەك چىچىڭنى سىلىسۇن قۇلۇم.
ئۆتمۈشۈم ئۇنتۇلسۇن سۇغۇق چۈش بۇلۇپ،
يۇرۇسۇن سۆيگۈدىن بۇ ھايات يولۇم.
ساداقەت پەخىردە ئۇلۇقلاپ سېنى،
ياش تۆكۈپ ئولتۇرۇپ سۆيەي ئېچىرقاپ.
ئۆمرۈمنى يىرىمى ئۆتتى ئارماندا،
بولدى بەس يۈرمىگىن ئەمدى يىتىرقاپ.
(2)
سۆيگۈڭدىن لاتاپەت تاپقاچ ياشلىغىم،
ئۆزەمنى بەختىيار سەزدىم ھەر قاچان.
ۋىسالىڭ جەننەتنىڭ بەرگەچ بەھرىنى،
گۈل كەبى پورەكلەپ بارماقتا ئارمان.
زوقلاندىم شەربەتتەك پاك ئەقىدەڭدىن،
تەلمۈرگەن ئاشىققا قىلمىدىم پەرۋا.
مېھرىڭدىن ئالەمچە سەزگەچ ھاياجان،
بۇلىمەن ھەر قاچان بىر ساڭا شەيدا.
مەمنۇنمەن سۆيگۈڭدىن تاپقاچ بەختىمنى،
پەخرىمدۇر ھەر قاچان سېنى سۆيگۈنۈم.
جۇدالىق تەشۋىشى يىراق قەلبىمدىن ،
رىغبىتىم بولغاچ سەن،ئاسان مۈشكۈلۈم.
( 3)
ھايات يولى شۇنداق ئۇزاق يول،
گاھى داۋان ، گاھىدا راۋان ،
تۇرمۇش بەرسە بەزىدە كۆز ياش.
شادلىقنىمۇ بىرىدۇ ھامان .
ھايات پەسلى ھەر بىر جان ئۈچۈن،
سۆيگۈ ئارمان قوزغاپ ئۆتىدۇ.
جانا ئۈچۈن زارىقسا بىرى ،
بىرى ھامان كۈلۈپ ئۆتىدۇ.
شۇنداق يۇسۇن دەۋرىيلكىدە،
سېنىڭ ئۈچۈن ناخشا پۈتىمەن.
ئۈنسىز كۈتۈش، ھالسىز سۈكۈتتە،
بىر سېنىلا ھامان كۈتىمەن.
سېنىڭ ئۈچۈن ئاتالغا كۆڭلۈم،
سەن قەلبىمدە ھامان بىر قۇياش.
ئارمىنىم شۇ جۈپلەشسە يۈرەك،
تۈگەپ كەتسە بىزدە يادسىراش.
ئاپتۇرنىڭ ئەسكەرتمىسى - مىنىڭ تىمىلىرىمنى رۇخستىمسىز باشقا مۇنبەرگە كۈچۈرۈشكە،خالىغانچە ئۆز نامىدا كۈچۈرۋىلىشقا بولمايدۇ. | 
يوللانغان ۋاقتى 2011-5-9 17:03
