تۇرپاندىكى تۇيغۇلار
بۇ يازمىنى ئاخىرىدا 129 تەھرىرلىگەن. ۋاقتى 2014-12-8 23:19يارغول
تۇرپاندىكى تۇيغۇلار
1
يوچۇن بىر ئاۋاز مېنى يېمەكتە،
قىزىرىپ پىشقان بۇ دۈشەنبىدە.
2
ياشاۋاتىمەن چۈشلەردىكىدەك،
ياكى ياشاشنى چۈشەۋاتىمەن.
رىئاللىقىمدا بىر قورام تاش بار،
ئەلھەمدۇلىللا، كۈچەۋاتىمەن.
3
تۇرمۇش تونۇرى كۆيەر يالقۇنلاپ،
سويۇپ ئالماق تەس ئىسسىق بىر ناننى.
مەن ئاشۇ رايىش،سوزۇلغان جۈپ قول،
تىلىدىم ئاخىر گۈزەل ئىماننى.
4
تالاي ئادەملەر ئۆتتى زىمىندىن،
مەڭگۈلۈك ۋەتەن قىلغىنى قەبرە.
بىز قۇش ئەمەسمىز،ياكى گۈل ئەمەس،
بەلكى سىناققا يارالغان بەندە.
5
ھەر ھەپتىدە بىر جۈمئەدىن چىقىپ،
كاتتا دېڭىزغا كىرىمىز ئېقىپ.
بىر تال ئۇچقۇنمىز،بىز ۋاقىتتىكى،
ئۆچۈرەر بىر كۈن پەرىشتە كېلىپ.
6
يالماپ تۈگەتتۇق باھارنى،يازنى،
قارلار سۆيمەكتە تۈندەك بۇ چاچنى.
بىر قەدەھ كەلتۈر تىمتاس شەنبىدە،
بىزگە كېرىكى ۋەھدەت شارابى.
7
ھەپتە ياشىدىم يۇرتۇم قوينىدا،
مۇساپىر بولۇپ تۇيغۇلىرىمغا.
يامغۇر چۈشمەكتە،يامغۇر چۈشمەكتە،
دالدىسىز تۇرغان ئويغۇرلىرىمغا.
ئۆچۈرۈلۈش
تېلفونىمىزنى
خالىساقلا ئۆچۈرۋېتىمىز،
يوق قىلىمىز ياكى ئۈنىنى.
جۈپ كۆزلىرىم ئۆچۈرۋېتىلدى،
سەھەر يەنە يېقىلدى خالاپ.
ھايات ئۇچقۇن بىر لەھزىدىكى.
يانفون،مەن ۋە دۇنيا ئۈچىمىز،
ئوچۇق تۇرۇپ،يوپيورۇق تۇرۇپ،
بىر خالاشتا تامان ئۆچىمىز.
ئالەمدىكى ھەممە شەيئىنىڭ،
بىر ئۆچۈشتە ئوخشاش تەقدىرى.
نۇر تارقىتىش، مەڭگۈ ئۆچمەسلىك،
ئاللاھقىلا خاستۇر ئاخىرى.
مۇساپە
يەتتە كۈن ياشىدىم يۇرتۇم قوينىدا،
مۇساپىر بولۇپ مەن ئۆز يۈرۈگۈمگە.
گۈل- ئېگىسى گۈل ئەمەس،
ئاي نۇرى ئاينىڭ ئەمەس.
يوپۇرماقمۇ شاختىكى،
سەرگەرداندۇر بولدى بەس.
پارلىغان قۇياش،
كىرپىكتىكى ياش،
يومۇلاق ياشاش،
ھەممىگە ئوخشاش،
باردۇر بىر توختاش.
مەن زىمىندا كېتىۋېتىپ،
باقتىم جىمجىت ئاسمانغا.
سەجدە بىلەن يەتمىسەك،
ئەقىل يەتمەس سۇبھانغا.
تەۋەككۈل
دوستلىرىم
ئالقانلىرىدا چوغ،يۈزلىرى يورۇق،
مەن تېخىچە نۇرسىز،قۇپقۇرۇق.....
شاماللارغا ئايلىنالايتتىم،
ئەركە قۇشتەك ياشىيالايتتىم.
مەن نەفسىمنى يۈك قىلىپ ئاخىر،
بۇ دۇنياغا سۇ بولۇپ ئاقتىم.
ھەقىقەت
تاشتۇر گويا سۈكۈناتتىكى،
يا تاشتىكى سۈكۈت ئېھتىمال.
پات-پات ئۇندىن قاچماق بولىمىز،
تۇرۇپ تولۇق قىلىنغان قامال.
بىز گۈل ۋاقىتتىكى،
بىر ئېچىلىپ بولارمىز غازان.
بىز قۇل مەڭگۈلۈككە،
ئاگاھ بولغىن،ئاگاھ بول ئىنسان.
ئابدۇۋەلى چوغ تۇت بىر دەقىق،
دىلىڭغا نۇر بەرگەي ئەرراھمان.
يارا
كۈتىۋاتسام سۈبھى پەيتىنى،
ئەڭ ئاخىرقى بىر تال شام بىلەن.
تۈن باغرىدا پورەكلىگىنى،
مېنىڭ گۈلدەك دىل يارام ئىكەن.
سۇ يارىسى-دەريادا،
قۇش يارىسى-سامادا.
ئېگىمىزنى قانداق تونۇيتتۇق،
گۈزەل ھەسرەتكە بولماي مۇپتىلا.
ساڭا سېغىنسام ئەي ئاللاھ
تاڭ ئېتىپ كەتتى بىردىنلا.
ئۇسساۋاتقان ئادەم
ئۇسساپ كەتكەن بىر ئادەم
سۇ ئىچىشنى ئويلىدى
ئەمما ئىچمىدى
چۆلنى كەزگەن بىر چاڭقاق
ئۇچۇپ كېلىپ قۇشلاردەك لەرزان
ئىچ-باغرىنى سۇغا چىلىدى
تەشنا بولغان بىر ئادەم
سۇنى ئويلىمىدى ياكى ئىچىمىدى
ئۇ سۇدا ئىدى.
ۋىسالسىز ئادەم
قىش ئۇشتۇمتۇت كېلىدۇ
ئازابتەك
ئازاب شېرىن بولىدۇ
ناۋاتتەك
ناۋات ئاچچىق كۈلىدۇ
زەرداپتەك...
ھەج
بىر ئادەم سۇدا تۇغۇلدى
سۇنى كۆرۈپ باقمىدى
بىرى،چۆللەر كېزىپ بۇلاقنى تاپتى
زۇمرەتكە لېۋىنى ياقتى
ئۈچىنچىسىگە سۇغا يېتىش نېسىپ بولمىدى
سۇ بولۇپ ئاقتى.
قالتىسقۇ مەرھابا قېرىندىشىم،شېرلىرىڭىزغا ھەم مەرھابا...شۇنداق گۈزەل شېئىرلاركەن،ھەممىدىنمۇ شېئىردىكى تۇيغۇ،پاكىزە قەلبنىڭ تىۋىشلىرى ،چوڭقۇر مەنالار مېنى تەسىرلەندۈردى.ئىككى قېتىم ئوقىۋېتىپتىمەن.ئادىل تۇنىيازنىڭ شېئىرلىرىنى شۇنداق قانماي ئوقۇپ كېتەتتىم.تۇرپاندىكى تۇيغۇلارنى ئەڭ ياقتۇردۇم.تونۇش كوچىلارنى كەزگەندىكى تونۇش تۇيغۇلىرىڭىزنى سېزىپ قالدىم... ھارماڭ قېرىندىشىم...مۇشۇنداق شېئىرلىرىڭىزنى دائىم مۇنبەردە كۆرۈپ تۇرۇشنى ئۈمۈد قىلىمىز.شېئىرلارغا جىق ئىنكاس چۈشمىگەن بىلەن،جىمجىت ھالدا شېئىرلارنى ئوقۇپ مەنىۋى زوق ئالدىغان،يوقاتقان تۇيغۇلىرىنى شۇ گۈزەل مىسرالاردىن تېپىۋالىدىغان،ئېسىل شېرلارنى تونۇيدىغان پاكىزە يۈرەكلەر بۇ مۇنبەردە بەك كۆپ...
تەكلىۋىم:بولسا ئەمدى شېرلىرىڭىزنى بىرەرتەخەللۇس بىلەن بىلەن بەرسىڭىز،129 ياكى ئابدۇۋەلىنىڭ شېئىرى دەمدۇقيا؟:)
يارغولمىدى يە؟:$ ئېسىل! ئېسىل چىقىپتۇ تېخىمۇ تىرىشىڭ
gulmisal يوللىغان ۋاقتى 2014-12-9 09:56 static/image/common/back.gif
ھارماڭ قېرىندىشىم...مۇشۇنداق شېئىرلىرىڭىزنى دائىم مۇن ...
ئەسسالامۇ ئەلەيكۇم قېرىندىشىم.ئىنكاسىڭىزدىن تولىمۇ خۇرسەن بولدۇم.ئىزدىنىشقا بۇرۇنلا ئەزا بولۇشنى ئويلىغان بولساممۇ بىراق
بىر خىل ئىككىلىنىش ئىسكەنجىسىدىن ئەمدى قۇتۇلالىدىم.قىسقىسى، بۇ مۇنبەرنى مۆھتىرەملەر تۈپەيلى چوڭ كۆرۈمەن.
يارغول دېگەن ئىسىممۇ بولىۋېرىدۇ دەپ ئويلىدىم.
يارغول
خۇددى نۇردەك بىر ئادەم
[ ئابدۇۋەلى مىرزايوف قارىيغا ئاتاپ]
ئۆتكەن ئەسىردە
ئەنجاندىكى نامسىز قەسىردە،
كۈندەك گۈزەل ياندى بىر چىراغ.
يارالغاننى كۈيلەۋاتاتتىم،
بىر ھارارەت چۈشتى توساتتىن،
ئەڭ غايىۋىي خىيالغا پاتتىم.
ئۇنىڭ
ئورنى مېھراپ
ئەمرى ھىجاپ.
ياشاۋاتقىنى
ئاسماندىن چۈشكەن بىر كىتاب.
ئۇ كۆيدۈرمەيدۇ،ئۆگىتىدۇ،
زۇلمەتلەرنى يورۇتىدۇ.
ئۆرنەك ئۈچۈن ئەسھابلارنى،
ئۆزبېك تىلىدا ئويغىتىدۇ.
ئۇ سۆزلەۋاتقاندا
ئۇچۇپ كىرەر مەدرىسكە قۇشلار.
قەلىبلەرنىڭ پىنھانلىرىدىن،
كۆك قەھرىگە ئېشىك ئېچىلار.
ئۇشتۇمتۇت
بىر يىگىت تەكبىر توۋلايدۇ،
ئەتراپقا بىردىن،
تەۋھىد ھىدلىرى تارايدۇ...
بىر نۇر
ئۆچۈرۋېتىلدى.
بىر ئىنسان
كۆچۈرۋېتىلدى،
ئۆزى سۆيگەن زاتنىڭ ئالدىغا.
ئۇ ياشىماس كۆرۈمىدە،
مەڭگۈ ياشار ئۆلۈمىدە.
كىمنى كۈيلەش كېرەكلىكىنى،
تۇنۇپ يەتتىم بەرگەن ئىلمىدە.
تۈز سىزىق
ھاياتىڭنىڭ يولىدا
ئۆلگۈچىنىڭ پۇتى بىلەن ماڭ.
نامازشامدەك قىسقا پەيىتسەن،
ئەزىنىڭمۇ توۋلىنىپ بولغان.
بىراۋنى كۈتىۋاتقان بولساڭ،ئۇ سەن،
بار مەنانى ئوراپ تۇرغىنى يوق تەن.
يوللار سەندە كېتىۋاتقاندا،
نىشانىڭدىن ئازغان بولىسەن.
بۇرادەر شۇنى ساڭا دەپ قوياي..
يىلدا بىر تۇغۇلساڭ ئىزدىمە مېنى،
بىر قېتىم ئۆلسەڭلا دوستۇم سەن چوقۇم.
كۈندە بىر ئۆلسەڭمۇ يىراق يۈر مەندىن،
بىر دېگەن نەقەدەر چوڭقۇر بىر ئۇقۇم.
چېنىقىش
يىغلاش باشقا بىرخىل كۈلۈشتۇر،
ياشاش ئۆلۈم تامان يۈرۈشتۇر.
ئايلىنىۋاتقان ئىستىرىلكىدەك،
قايتىپ كېلىمىز ئۆز-ئۆزىمىزگە.
سۈزۈك نۇرنى كۆرەتتۇق بەلكىم،
باقالىساق تۈننىڭ كۆزىگە.
بىز سۈكۈتكە پېتىپ باقىمىدۇق،
قەلبىمىزگە ئېقىپ باقمىدۇق.
ئادەملىكنىڭ ئېغىرلىقىنى،
تېخىچىلا تېتىپ باقىمىدۇق.
قېچىش بىر خىل يېقىنلىشىشتۇر،
كېچىش بەلكىم چىن ئېرىشىشتۇر.
بىر ھەممىمىز بىلىپ بولۇپتۇق،
ياشىماقنىڭ ئاسانلىقىنى.
قىيامەتنىڭ
قاچانلىقىنى..
مەن چېنىقىۋاتىمەن
ياشارتىدىغان مېۋىلەرنى يەۋاتىمەن،
ناھايىتى تېز قېچىۋاتىمەن....
ھۇجرامدىكى سائەتنىڭ
ئايلانماقتا ئىستىرىلكىسى.
داپ،دۇتار ۋە ئۇسسۇل
1
سەن
بىر پارچە تېرە
بىر پارچە ياغاچ،
مەن
ئەرزىمەس تامچە
ئاجىز لەختە قان.
ئىككىمىز لەۋھۇلمەھپۇزدا
تۇنۇشۇپ بولغان.
شۇندىن بېرى
كۆپ ۋاقتىمنى قىپكەلدىڭ قامال،
بەلكىم مېنى غەيۋەتتىن
يىراقلاشتۇرغۇڭ باردۇر قىلىپ بىر ئامال.
مەن
ئەزىز يارىتىلغان
بىرخار ئىنسان
سەن
ئىگەم مەن ئۈچۈن ئەۋەتكەن تەسەللىي،
ئەڭگۇشتەر ئېھتىمال...
2
سەن
قوشۇققىلا ئوخشىغان.
ئىككى تال تار
تەمتىرەيمەن ئالدىڭدا
تىترەيمەن غال-غال.
بىرىڭلار تارىخ
بىرىڭلار كەلگۈسى
مېنىڭ شۇ قەدەرھازىربولغۇم بار.
3
لاپ-لۇپ چىراق
ئېچىلغان غۇلاچ
قېنىق گىرىم...
بۇلارنى ئۇسسۇل دەپ كەلدۇق.
بۇ پەقەت بىر مۇبالىغە
ياكى ئالماشقان ئىسىم.
ماڭا يەنە بىر قاراپ باق
ئۆزۈڭ ھەققىدە قايتا ئويلىنىپ باق
مېڭىشىمىز ئۇسۇل ئەمەسمۇ؟
يېتىشىمىز ئۇسۇل ئەمەسمۇ؟
تۈز يوللاردا
ئېزىشىمىز ئۇسۇل ئەمەسمۇ؟
ئەمەلىيەتتە بىز ھەممىمىز ئۇسۇلچى،
باردۇر بىرلا كۆرۈپ تۇرغۇچى.
ئۆزۈمگە سۆزلەش
كۈلەلمەيمەن
چۈنكى مەن يىغلاشنى ئۆگىنەلمىگەن.
سېنىڭ ماڭا دۈشمەن بولۇشقا سالاھىيىتىڭ توشمايدۇ
چۈنكى مېنىڭ ئەزەلدىنلا دوستۇم بولۇپ باقمىغان.
جىمجىتلىقنىڭ ئاۋازى نېمىدىگەن قاتتىق
يوقۇتۇش بەلكىم ئېرىشىشتىن تاتلىق.
شىلدىر-شىلدىر ئاقماقتا يالقۇن،
كۆيىۋاتقان مەن ئەمەس سۇلار .
تاجاۋۇزنى باشلىدى ئەرگە،
ئۆز قەلبىگە پاتمىغان ئايال.
خىيالىم خىيال سۈرىۋاتىدۇ ...
دۇنيا
يىگىرمە تۆت يىل بۇرۇن تۇيۇقسىز پەيدا بولۇپ قالغان ماڭا قاراپ
يەنە بىر ۋاقىتلاردىن كېيىن يوقاپ كېتىدىغانلىقىمنى ئويلاپ
كۈلمەكتە،
شۇنداق بارچە ئۆلمەكتە
پەقەت بىرلا دەۋران سۈرمەكتە.
يارغول
سېنى ئۆلتۈرىۋەتكۈم بار
ياق..
سەن ئۆلۈمگە ھۆكۈم قىلىنىپ بولغان
ئەمەلىيەتتە تۇيۇقسىز يۈتۈپ كەتكۈم بار،
ھېسابى بار دۇنيادىن....
ئاتام نەگە كەتتى
يارغول
ھەر قېتىم
مەن چوڭ بولغان بۇ كوچىغا كەلسەم،
تۇيۇقسىز ئېرىشىپ قالىمەن بالىلىقىمغا.
سەلتەنىتىم،خانلىقىم،بارلىقىمغا.
تەختىم
قۇلدەك رايىش بىر كىشىنىڭ مۈرىسى ئىدى.
بۇلتۇر رامىزاننىڭ ئون ئالتىنچى كۈنى،
ئۇ ئەيتاۋۇر ھېرىپ قالدى بولغاي يا قېرىپ قالدى،
مېنى چۈشۈرۈپ قويۇپ ئاستا ۋە گۈزەل،
نەلەرگىدۇر كېتىپ قالدى.
مەن شۇ كىشىنى ئىزلەيمەن،
كۈچۈمنىڭ بارىچە ئىزلەيمەن،
تاقىتىمنىڭ ئاخىرىغىچە ئىزلەيمەن...
قۇشلار[ئۇ قانداق ئادەمتى؟] دەپ سورىسا
نېمە دېيىشنى بىلمەيمەن،بەلكىم ئۇنىڭ قانىتى يوقتى دەرمەن.
گۈللەر مەندىن ئۇنى سورىسا،
توپىدەك پۇرايتتى دەيمەن.
ئۇ ھەققىدە سوراپ قالسا سۇ،
مەندىن كېيىن ئۇسسايتتى دەيمەن.
يۇلتۇز سورىسا،
سەندىن كېيىن ئۇخلايىتتى دەيمەن.
قۇياش مەندىن سورىسا ئۇنى،
ئېتىز-قىردا يۈرەتتى دەيمەن،
گىياھلارنى سۆيەتتى دەيمەن.
بىرلا چۆچەك بىلەتتى دەيمەن،
بىرلا كېيىم كېيەتتى دەيمەن.....
شۇنداق،شۇ كىشىنى ئىزلەيمەن.
ئۇ ئالىم ئەمەس،ياكى مەشھۇر زات.
ئۇ مەندەك شېئىر يازالمايدۇ،
ئۇ شۇ بىر ناخشىدىن باشقا ناخشىمۇ ئېيتالمايدۇ،
[سۆيۈپ قانماي سېنى ئوغلۇم]دەيدىغان.
مەن شۇ كىشىنى ئىزلەيمەن.
ئۇنى كۆردۈڭلارمۇ؟
ئۇ نەگە كەتكەندۇ؟
ئۇنى كۆردۈڭلارمۇ؟
ئەجەبا مېنى ئۇسىز يەرگە كۆمدۈڭلارمۇ؟
يەنە سوئال
تاڭنىڭ نەملىك چېچەكلىرىدە،
غېرىبلىقنىڭ ئېتەكلىرىدە،
چاقنىماقتا ئامالسىزلىقىم.
ئاز قېلىۋاتىمەن،
خورىماقتىمەن،
قۇرىۋاتقان كۆلنىڭ سۈيىدەك،
ئاندا-ساندا بەخىت گۈلىدەك
ئاستا ۋە مەيۈس..
ئۇلار
قايرىپ ئاينىڭ چۈمپەردىسىنى،
نېمىلەرنى كۆرمەكچى؟
تىكىنى يوق تەن شاخلىرىدىن،
قاي مېۋىنى ئۈزمەكچى؟
مەن چوڭ بىلگەن جان ئاكىلىرىم،
ئۇكىلىرىم ئەي سىڭىللىرىم.
يۈزىمىزگە كۆز ياشتىن باشقا،
ئەجەب بىر رەت سۆيمىدى ھېچكىم.
قانداق قىلىمىز؟
زۇمرەتنىڭ قوينىدا چۆلدەك ئۇسسىساق.
قانداق قىلىمىز؟
ئىسمىمىز نېلۇفەر تۇرۇپ قۇرىساق.
قانداق قىلىمىز؟
قانداق ياشاش ئەمەس يېڭىلىق،
قانداق ئۆلىمىز؟
قانداق ئۆلىمىز؟
سەن ئۆزۈڭ بولغىن
تۇغۇلمىغان بالامغا
ساڭا نە نەسىھىتىم بولسۇن
دىداكتىكىنىڭ تەسىرسىزلىكىنى ۋە
قۇياشنىڭ ھەر كۈنى يېڭىلىقىنى بىلىمەن.
ئۆمۈر ھەققىدە نە تەجرىبەم بولسۇن
بىر دەريادىن ئىككى مەرتە ئۆتكىلى بولمايدىغانلىقىنى چۈشىنىمەن.
يىغلا ، كۈچۈڭنىڭ بارىچە يىغلا،
كۆز ياشلارغا ئەرزىيدۇ دۇنيا.
كۈل ، تېلىققىچە كۈل،
بەرىبىر سەن يالغۇز ھەم تەنھا.
چىنلىق پىنھانلاردا مۆكۈنۈپ ياتار،
ۋەتەن،خەلقىم دەپ توۋلىما،
گۇمانلان ياڭرىغان بارچە ئاۋازدىن،
باشلىساڭ ئۆزۈڭنىڭ كۈيىدىن باشلا،
مېنى ئاتا دەپ چاقىرساڭ مەيلى،
ئىككى ئىنسانمىز شۇنى ئۇنۇتما،
بىر گۈلنى سۆيسەڭ گەر سۆيگىن ئۆلگۈدەك،
نەزىرىڭ ئاغدۇرما قۇشقا ،شامالغا...
مۇھەببەت ئېرىشىشنىڭ ئەكسىدۇر
ئېرىشىشكە تېگىشلىكى ئازاب،توغرا،ئازاب تۇيغۇسىدۇر.
مەندىن؛ مەن كىم؟ دەپ سورىما
سەن بىر رەسسام ياكى بىر قاتىل
يۈرۈكۈڭگە سادىق بولساڭلا.
ھاياتنى سۆيۈشۈڭنى ئۈمۈد قىلىمەن،بىراق
ئۇنى چەكلىك بولغانلىقىنى ئۈچۈن ئەمەس،
ئاتا قىلىنغانلىقى ئۈچۈن سۆيگەيسەن.
سەمىمىي بول،ئۆزۈڭگە ئوخشىغىچە سەمىمىي بول،
ئوغۇل بولساڭ؛قىزلارغا تەشنالىقىڭنى يوشۇرما،
ئاخىر ئۆزۈڭ بىر دانەدۇرسەن،
ھېچكىشىگە ئوخشىما.
ساڭا نە نەسىھىتىم بولسۇن
دىداكتىكىنىڭ تەسىرسىزلىكىنى ۋە
مۇھەببەتنىڭ چەكسىزلىكىنى بىلىمەن،
پەقەت؛سېنى سۆيۈدىغانلىقىمنى ئۇنۇتما.
غېرىبلەر ھەققىدە
يارغول
غېرىبلەر كىملەر؟
غېرىبلەر تۈن زۇلمىتىدە ئۈشتۇمتۇت
ئاخىرەتنى ئويلاپ سالغانلار.
غېرىبلەر،تەشەھھۇدنىڭ تىمتاسلىقىدا
بىر شەپىنى تۇيۇپ قالغانلار.
غېرىبلار،دەججال كەلگەندىن كېيىن،تالايلاردىن قارشى مەنزىلگە
يەك- يېگانە قەدەم ئالغانلار.
غېرىبلار،ئۇۋەيىستەك يۈرۈكى بىلەن بىر كۆرمىگەن رەسۇلۇللاھچۇن
بار ۋەسلىدىن تامان تانغانلار.
غېرىبلار نەدە؟
غېرىبلار،بىلال ھەبەشىنىڭ ئەزىنى بار يەردە.
غېرىبلار،فاتىمە ئانىمىزنىڭ چاپىنى بار يەردە.
غېرىبلار،سەجدە ئۈچۈن تام تورۇسى يوق،
ئىسسىق سوغۇق شامىلى بار يەردە.
غېرىبلارنىڭ سۈپەتلىرىچۇ؟
غېرىبلار
تۇپراققا ئەڭ يېقىن
تۈنلەردە ئوت-چېقىن
ۋەھدانىيەت دېڭىزىغا،
قۇيىلىۋاتقان ئېقىن.
ئۇلارنى
مۇتەسسىپ دېيىشەر
ئالدى-كەينىدىن كۈلۈشەر،
ياشلىرىنى ئىچىشەر،
يۈرۈكىنى يېيىشەر.
بىر ناخشىچى كاككۇكقا قاراپ[سەن مۇساپىر مەن غېرىپ] دەيدىغۇ
ئۇمۇ غېرىبمۇ؟
-بىلمەيمەن.ئەمما مەن بىلىدىغان غېرىبلار ناخشىنى قۇشلارغا
ئېيىتمايدۇ.
شائىرلار غېرىبلىق ھەققىدە شېئىرلارنى يېزىشىدۇ،ئۇلار ھەققىي
غېرىبكەندە؟
-ياق.ئۇلارنىڭ غېرىبلىقىنى باشقىلارغا بىلدۈرەلىگىنىنىڭ ئۆزىلا
ھەرگىز غېرىپ ئەمەسلىكىنى بىلدۈرىدۇ.
قارا ئاۋۇ كىشىگە غېرىبلىققا چىلىشىپ ئولتۇرۇپتۇ.
-ئۇنىڭ ئېرىشىدىغان سۆڭەكلىرىنى خىيالەن ساناپ ئولتۇرۇپ
جانىۋارغا ئايلىنىپ قالغانلىقىنى كۆرمىدىڭمۇ؟
غېرىبلىقنىڭ نېمە پايدىسى بار‹؟
دۇنيادا ھېچقاندق پايدىسى بولمىسا كېرەك
ئۇنداقتا نېمە ئۈچۈن غېرىبلىققا يەتمەك بولۇپ قالدى؟
ئاخىرەت ئۈچۈن.
ئاخىرەت.ئاخرەت قانداق جاي.
غېرىبلارمۇ،غېرىب ئەمەسلەرمۇ بارىدىغان جاي.
غېرىبلار غېرىب ئەمەس،غېرىب ئەمەسلەر غېرىب بولىدىغان جاي
چامغۇرلۇق
يارغول
چۇرقىرىشىپ قۇشتەك بالىلار،
توپ تەپمەكتە ئېتىزىمىزنىڭ،
چامغۇر كۆكى ئۈنگەن يېرىدە.
قامچام بىلەن ئات ساۋايدىغان،
چەكسىز ماڭسام ئۇلار تەرەپكە.
بوۋام دېدى؛سەبىر،تېرىكمە،
چاڭ قونمىدى ئەقىدىمىزگە.
ھەج
بىر ئادەم سۇدا تۇغۇلدى
سۇنى كۆرۈپ باقمىدى
بىرى،چۆللەر كېزىپ بۇلاقنى تاپتى
زۇمرەتكە لېۋىنى ياقتى
ئۈچىنچىسىگە سۇغا يېتىش نېسىپ بولمىدى
سۇ بولۇپ ئاقتى.
ۋۇييۇ، شېئىر بولا مۇشتا بولا.... مەن شېئىردىن ھۇزۇرلىنىشنى بىلمەيمەن، شۇنداقتىمۇ ماڭا بەك ياخشى يېزىلغاندەك بىلىندى...{:112:}
بۇ يازمىنى ئاخىرىدا 129 تەھرىرلىگەن. ۋاقتى 2014-12-12 22:56
ئۆي سېلىش
يارغول
دېگەر پەيتىدە
قۇياش تەپتىدە،
ئېچىلماقتىمەن تۇپراق رەڭگىدە.
ئانامغا ئۆي سېلىۋاتاتتىم
كۆرۈنگەندەك ئاتام قەبرىسى،
ئەڭ غايىۋىي خىيالغا پاتتىم.
قەبرە
ئۆيدۇر گويا دېرىزىسى يوق،
تۈڭلىكى بار قەبرىدۇر ئۆيلەر.
بەزەن چۈشكە ئوخشار بۇ ھايات،
ئۆلمىگەندەك يەنە ئۆلگەنلەر.
سۈبھىدۇرمىز ئاستا ۋە ئاستا،
بىزنى زۇلمەت يۇتىۋاتىدۇ.
بىلمەيمىزكى پۈتكەن ئۆيلەردە،
بىزنى نېمە كۈتىۋاتىدۇ.
يەنە سوئال
يارغول
گۈللەر نېچۈن ياشايدۇ؟
- تەبىئەت ئۈچۈن.
قۇشلار نېچۈن سايرايدۇ؟
- مۇھەببەت ئۈچۈن.
قۇياش نېچۈن چاقنايدۇ؟
-ھەقىقەت ئۈچۈن.
شۇنچە گۈزەل دۇنيادا،
شائىر نېچۈن يىغلايدۇ؟
غېرىبلىقنىڭ ئاخىرى
يارغول
بۈگۈن مەن ھېچكىمنى ئىزدەپ بارمىدىم،
ماڭىمۇ ھېچيەردىن كەلمىدى سالام.
غېرىبلىق دەرىخى ئېگىزدۇر-ئېگىز،
شاخلاردىن ساڭگىلاپ تۇرار دىل يارام.
ياشىدىم بەك تىمتاس بىر قاقاسلىقتا،
سايە بار ئۇندا بىر، ئۇ مېنىڭ سايەم.
جۈپتى بار ھەركىمنىڭ ھەممە-ھەممىنىڭ،
ۋە يەنە تەنھادۇر ھەر قانداق ئادەم.
خەت كېلىپ باقمىدى ئاسماندىن ماڭا،
مەنمۇ ھەم قۇشلاردىن سالالمايمەن خەت.
ئوقۇغان كەبى مەن كىتابۇللاھنى،
ئۇزاقتىن ئۆزۈمنى ئوقۇدۇم پەقەت.
چېچەكلەر ئېچىلىپ باقمىدى نەۋاق،
كۈزدىكى دەرەختۇر مېنىڭ بۇ قەلبىم.
كۆزۈمدە پارلىغان بىر قەترە ياشتىن،
قۇدرىتىڭ ئاياندۇر رەھمانۇ-رەھىم.
بۇ يازمىنى ئاخىرىدا 129 تەھرىرلىگەن. ۋاقتى 2014-12-17 07:21
ئاشىق
پۈتمىگەن ئۆيلەردەك ئاۋارە باغرىم،
كەچكۈزدەك سوغۇق ھەم يېقىمسىز ئەتراپ.
كۆزلىرىم دەريادۇر،ئۇندا تاشقىنلار،
مىڭ يىللىق ھاياجان مىڭ يىللىق ئازاب.
شۈبھىدە كۆزىتەر پۇچۇق ئاسمىنىم،
قەلبىمدە يوچۇن بىر مەھبۇسمەن گويا.
باياۋان چۆللەردە ئېچىرقاپ تۇرۇپ،
ھاياتنى يېشىل دەپ كۈيلىدىم راسا.
بىر مىسكىن ئاشىقمەن،ئالقىنىمدا چوغ،
باغرىمدا بىر كۈي بار توۋلاپ ماڭىمەن،
ئىچىمدىن تۈگىشىپ كەتمەسلىك ئۈچۈن،
دوستلىرىم،تىنماستىن شېئىر يازىمەن.
بۈگۈن ۋە باشقىلار
بۈگۈنمۇ سۇدەكلا ئېقىپ تۈگىدى،
بىر دەريا ئاقماقتا جېنىمنى بويلاپ.
ھاياتنىڭ ئۆركىشى سىڭمەكتە مەيۈس.
ئۆلۈمنىڭ بىپايان چۆلىگە قاراپ.
بىر چۈشنى ئەسلىتەر ئۆتكەن كۈنلىرىم،
ئىچىمدە چاراسلاپ گۈلخان يانىدۇ.
نە قالۇر ۋاقىتنىڭ سېخىي باغرىدىن،
چەكسىز بىر يېگانە ئىنسان قالىدۇ.
قۇشلارنىڭ ئۈنى يوق ئەتەمدە بەلكىم،
كۈي- ناخشا ئېيىتمىدىم كېلەچىكىمگە.
يۈزلەندىم ئەڭ رايىش بەندىلەرگە خاس،
بۈگۈن ۋە ئۇندىكى ھەممە ھەممىگە.
ئەگرى قوۋۇرغا
يارغول
ئاتەش رەڭ گۈللەرگە بوپقالدىم خۇمار،
گۈزەل بىر غالجىرلىق قۇترار كۆكسۈمدە.
قەلبىمنىڭ ئايالغا مۇھتاجلىقىدىن،
كۆرۈنمەي قالىمەن ئۆزۈم ئۆزۈمدە.
بۈگۈنمۇ يۇلتۇزدەك تامچىلىمىدىم،
مېھىرلىك ئالەمنىڭ مۇزدەك قوينىغا.
تىرىكتەك ئۆلۈشنىڭ نېمىدۇر ۋەجى،
بارچىنى تەڭ قىلماي بىرنىڭ ئورنىغا.
دەرەخ ھەم قۇشلارغا ھەۋەس قىلىمەن،
ئۇلارغا ئېگىسى ئەمەس مۇئەمما.
ئۇنۇتتۇڭ ئۆزۈڭنى ئۇنتۇلدى ئېگەڭ،
رەستىدە يالىڭاچ يۈرگەن قوۋۇرغا.
سۈرگۈنگاھتىن يىراق
يارغول
1
ھەممىگە قەدەر تۇتاشقانمەن.
تەنھالىقىم،چاچلارنىڭ ئارىسىدىن سامان يولىغىچە يېيىلغان.
ئۇلار ماڭا ئىسىم قويىشىدۇ،بىراق،مېنىڭ ھەممە ئىكەنلىكىمنى
قارچۇغۇمدىكىسى روھىمنىڭ ئەكسى ئىكەنلىكىنى ئۇنتۇشقان.
سارغايغان ئاۋازلىرىم
كۆرۈنۈپ قېلىۋاتقان سۆڭەكلىرىم
يىرتىلغان ياقىلىرىم
ھارغىنلىق ئولتۇراقلاشقان چاچلىرىم
ئۆلۈم پۇراپ تۇرغان قانلىرىم...
مېنىڭ مەنلىكىمدىن بىخەۋەر.
قۇياشسىز ئاسماندىكى يىتكەن قۇشنى
قاراڭغۇ ئورماندىكى ئۇنتۇلغان ئاۋازنى
ئۆلتۈرۈلگۈچىنىڭ كۆزىدىكى قاتقان سىمانى ئەسلەۋاتامسىلەر؟
بىراق، باشقا بىرىمەن.
قايناق رەستىلەر،يۇقتۇرىۋالغان ئىدىيەلەر ۋە
ئادەملەرنى تاشلىۋەتكۈچىمەن.
ھەقىقىتىمنىڭ پايانىدا
مەنلىكىمنى داۋام ئەتكۈچىمەن.
تۇيغۇم ئارا،ھېسسىياتىم ئارا
سوئالىم ھەم جاۋابىم ئارا
گۇناھىم ھەم ساۋابىم ئارا..
2
ھايات تەشۋىش بىلەن تۈگەللىنىدۇ
شېئىر بىلەن داۋام ئېتىدۇ.
شېئىر نېمە؟
شېئىر،تەشۋىشنىڭ يەنە بىر شەكلى،
غېرىبلىقنىڭ ئومۇرتقىسى.
ئۇ قىتئەلەرنى كېسىپ ئۆتىدۇ
چۈمۈلىگە چۈمۈلىنى،ساڭا سېنى ئەسلىتىدۇ،
كۆپۈك ھەقىقەتلەردىن ئولۇغ يالغانلارغا تۇتىشىدۇ.
ئۇنىڭدىن بىراۋلارنىڭ پىغانلىرى
شائىرلانىڭ ئېسيانلىرى
ھايۋانلارنىڭ چۇقانلىرى
ھەقىقەتنىڭ سۈكۈتلىرى
قەلىبلەرنىڭ پىنھانلىرى تامچىلايدۇ.
ئۇ ئىدراكنى رەت قىلىدۇ،
ۋاقىتنى قېرىتىدۇ
ئۆلچەملەرنى ئېرىتىدۇ...
ئويغانمىسا تاڭ ئاتمايدىغانلىقىنى چۈشەنگەن شائىرنىڭ
ئېرىشىدىغىنى قۇياشلىق زۇلمەتتۇر بەرىبىر.
ئاخىر ئۇ
قاراڭغۇلۇقنىڭ كۆزىدۇر
تىمتاسلىقنىڭ ئۈنىدۇر
ئىنساننىڭ دەل ئۆزىدۇر.
قارمۇ-قارشى
يارغول
ئازاب ئازابسىزلىقتۇر
بايلىق،نامراتلىقنىڭ باشقا بىر شەكلى.
كۆپۈك ھەقىقەتلەر پورەكلىگەن گۈل،
ئۇلۇغ يالغاننىڭ قۇرىغان نەسلى.
بەخت بەخىتسىزلىكتۇر
كېتىش،كەتمەسلىكنىڭ يەنە بىر شەكلى.
كېچىنىڭ كۆزىدۇر پارقىراۋاتقان،
غايىب بىر كۈي تۆكەر تىمتاسلىق پەسلى.
كۆرۈش كۆرمەسلىكتىندۇر،
بىلىش بىلمەسلىكتىندۇر،
ئاق قارلارنىڭ كۆچۈشى،
يۇلتۇزلارنىڭ ئۆچۈشى،
كۆچمەسلىكتىندۇر،
ئۆچمەسلىكتىندۇر...
بەت:
[1]
2