ياپۇنىيەنىڭ ئارال سېتىۋېلىشى - خەتەرگە تەۋەككۈل قىلغانلىق - huxhuy online----Sports|world News|it News|china News|Local News Business

شىنخۇا تورى بېيجىڭ تېلېگراممىسى: ياپونىيە ھۆكۈمىتى 10-سېنتەبىر چۈشتىن كېيىن يىغىن ئېچىپ، دياۋيۈ ئارىلىنى «دۆلەت ئىختىيارىغا ئېلىش» فاڭجېنىنى بېكىتىپ، جۇڭگو-ياپونىيە مۇناسىۋىتى ئومۇمىيىتىگە زىيان يەتكۈزىدىغان خاتا يولدا داۋاملىق مېڭىپ، دياۋيۈ ئارىلى مەسىلىسىنى ئىنتايىن خەتەرلىك ھالغا كەلتۈرۈپ قويدى.
ياپونىيە ھۆكۈمىتى ئېلىمىزنىڭ قەتئىي قارشى تۇرۇشى ۋە رەئىس خۇ جىنتاۋنىڭ يېقىندا ئېچىلغان APEC يىغىنىدىكى جىددىي ئاگاھلاندۇرۇشىغا پىسەنت قىلماستىن، «ئارال سېتىۋېلىش» ئويۇنىنى جاھىللىق بىلەن داۋاملاشتۇرۇپ، جۇڭگونىڭ زېمىن ئىگىلىك ھوقۇقىغا، مىللىي ھېسسىياتىغا ئېغىر زىيان يەتكۈزدى، جۇڭگو-ياپونىيە مۇناسىۋىتى يېڭى ئەسىر كىرگەندىن بۇيان ئەڭ كەسكىن خىرىسقا دۇچ كەلدى.
نودا يوشىخىكو ھۆكۈمىتى دياۋيۈ ئارىلىنى «دۆلەت ئىختىيارىغا ئېلىشى» دىكى باھانىسى «داۋاملىق مۇقىم، تىنچ باشقۇرۇش» ئۈچۈن دېدى. كىم باشقۇرىدۇ؟ نېمىنى باشقۇرىدۇ؟ ياپونىيە ھۆكۈمىتى ئېلىمىزنىڭ مۇقەددەس زېمىنىنى نېمىگە ئاساسەن «باشقۇرىدۇ»؟ بۇنى قانداقسىگە «مۇقىم، تىنچ باشقۇرۇش» دېگىلى بولىدۇ؟ ئەمەلىيەتتە، ياپونىيە ھۆكۈمىتى «دۆلەت ئىختىيارىغا ئۆتكۈزۈش»نى باھانە قىلىپ، دياۋيۈ ئارىلىنى تىزگىنلەش ھوقۇقىنى كۈچەيتمەكچى بولۇۋاتىدۇ، ئۇلار 40 يىل ئىلگىرى جۇڭگو بىلەن ياپونىيەنىڭ دىپلوماتىك مۇناسىۋىتى نورماللاشقاندا ھاسىل قىلغان «ئىختىلاپنى بېسىپ قويۇش» ئورتاق قارىشىدىن ئۆز ئالدىغا ۋاز كەچتى.
نودا يوشىخىكو ھۆكۈمىتى يەنە توكيو يەرلىك ھۆكۈمەت ئەمەلدارىنىڭ «ئارال سېتىۋېلىشى»نى توسۇيالمايمىز، مەركىزىي ھۆكۈمەتنىڭ «ئارال سېتىۋېلىشى» يەرلىك ھۆكۈمەتنىڭ «ئارال سېتىۋېلىشى»دىن ياخشى، شۇڭا «دۆلەت ئىختىيارىغا ئېلىش» فاڭجېنىنى بېكىتتۇق، جۇڭگو ھۆكۈمىتى بۇنى چۈشەنسە، دېدى. ئەمەلىيەتتە، ئۇلارنىڭ بۇ سەپسەتىسى باھانىدىن باشقا نەرسە ئەمەس. تەرەققىي قىلغان زامانىۋى دۆلەتنىڭ مەركىزىي ھۆكۈمىتى يەرلىك ئەمەلدارلارنى باشقۇرالمايدۇ، يەرلىك سىياسەتۋاز دۆلەتنىڭ دىپلوماتىيە سىياسىتى ۋە تاشقى مۇناسىۋىتىنى خالىغانچە ئىدارە قىلالايدۇ، دېسە ھېچكىم ئىشەنمەيدۇ.
توكيو شەھىرىنىڭ باشلىقى شىنتارو ئىشخارا بۇ يىل 4-ئاينىڭ 16-كۈنى ۋاشىنگتوندىكى ئاقىللار ئامبىرىنىڭ مۇھاكىمە يىغىنىدا دياۋيۈ ئارىلىنى «سېتىۋالىمەن»، دەپ تۇنجى قېتىم جار سالغان ئىدى.ياپونىيە-ئامېرىكا ھەربىي ئىتتىپاقىغا تايىنىپ، توكيو يەرلىك ھۆكۈمىتى بىلەن ئېغىز-بۇرۇن يالىشىپ، «ئارال سېتىۋېلىش» ئويۇنى ئوينىدى. شىنتارو ئىشخارا قاتارلىق چېكىدىن ئاشقان ئوڭچى سىياسەتۋازلار ياپونىيە مەركىزىي ھۆكۈمىتىنىڭ «ئارال سېتىۋېلىش» ئويۇنىنى باشلىغۇچىلاردىن بولدى.
جۇڭگو بىلەن ياپونىيەنىڭ دياۋيۈ ئارىلى توغرىسىدىكى تالاش-تارتىشى نوقۇل زېمىن تەۋەلىكى مەسىلىسى ئەمەس. ياپونىيە دياۋيۈ ئارىلىنى جۇڭگوغا تاجاۋۇز قىلىپ جياۋۇ دېڭىز ئۇرۇشى قوزغىغاندا زورلۇق بىلەن ئىگىلىۋالغان، ياپونىيە 2-دۇنيا ئۇرۇشىدا مەغلۇپ بولۇپ تەسلىم بولغاندا قورال كۈچى ياكى باشقا ۋاسىتىلەر بىلەن ئىگىلىۋالغان.ئۇلارنىڭ بۇ ھەركىتى رايون ۋە دۇنيا تىنچلىقىغا ئېغىر تەھدىت پەيدا قىلىدۇ.