جۇڭگو بىلەن ئاۋسترالىيە بىرلىكتە يېڭى تىپتىكى تىتانىك ياساپ چىقماقچى - huxhuy online----Sports|world News|it News|china News|Local News Business

مۇھىم مەزمۇنى: ئاۋسترالىيەدىكى كانچىلىق ماگناتى كلىۋې پالمېر شىركىتى جۇڭگودىكى كېمىسازلىق شىركىتى جىنلىڭ كېمە زاۋۇتى بىلەن چۈشىنىش باياناتنامىسى ئىمزالاپ، بىرلىكتە 2- ئەۋلاد تىتانىك ناملىق پاراخوت ياسايدىغانلىقىنى ئېلان قىلدى.
ئاۋسترالىيە «يېڭى تېز گېزىت» ىنىڭ 30- ئاپرېلدىكى سانىدا «جۇڭگو بىلەن ئاۋسترالىيە بىرلىكتە ‹21- ئەسىردىكى تىتانىك ناملىق پاراخوت› ياسىماقچى» دېگەن تېمىدا ماقالە ئېلان قىلىندى، ماقالىدە مۇنداق دېيىلدى: ئاۋسترالىيەدىكى كانچىلىق ماگناتى كلىۋې پالمېر شىركىتى بىر تۈركۈم دۇنياۋى ھەشەمەتلىك پاراخوت ياساشنى پىلانلىدى، بۇنىڭ ئىچىدە 21- ئەسىردىكى تىتانىك ناملىق پاراخوتمۇ بار.
كلىۋې پالمېر شىركىتى دۈشەنبە كۈنى جۇڭگودىكى كېمىسازلىق شىركىتى جىنلىڭ كېمە زاۋۇتى بىلەن چۈشىنىش باياناتنامىسى ئىمزالاپ، بىرلىكتە 2- ئەۋلاد تىتانىك ناملىق پاراخوت ياسايدىغانلىقىنى ئېلان قىلدى. 2- ئەۋلاد تىتانىك ناملىق پاراخوت ئەڭ ئىلغار يول باشلاش ۋە بىخەتەرلىك سىستېمىسىغا تايىنىدىغان بولۇپ، ئاساسلىقى شىمالىي يېرىم شاردا پائالىيەت قىلىدۇ. بۇ پاراخوت پۈتكەندىن كېيىن، تۇنجى قېتىملىق دېڭىز قاتنىشى 2016- يىلى باشلىنىپ، ئەنگلىيەدىن شىمالىي ئامېرىكىغا قاتنايدۇ.
كلىۋې پالمېر شىركىتىنىڭ برىسباندىكى تاراتقۇدا ئېيتىشىچە، بۇ پوچتا پاراخوتىنى ياساشتا ئاساسلىقى ئىلگىرى تىتانىك ناملىق پاراخوتتا خىزمەت قىلغان ئەر- ئاياللارغا ھۆرمەت بىلدۈرۈش مەقسەت قىلىنغان.
1912- يىلى 4- ئاينىڭ 15- كۈنى، تىتانىك ناملىق پاراخوت مۇز تاغقا سوقۇلغاندىن كېيىن چۆكۈپ كەتكەن. تىتانىك ناملىق پاراخوتنىڭ چۆكۈپ كەتكەنلىكىنىڭ 100 يىللىق خاتىرە كۈنىدە، ھادىسىگە ئۇچرىغان پاراخوت ۋە پاراخوتتىكى 1514 نەپەر يولۇچى ۋە ماتروسقا دۇنيا بويىچە تەزىيە بىلدۈرۈلدى.
يېڭىدىن ياسىلىدىغان تىتانىك ناملىق پاراخوت چۆكۈپ كېتەمدۇ دەپ سورالغاندا، كلىۋې پالمېر شىركىتىدىكىلەر مۇنداق دېدى: ئەگەر سىز پاراخوتنىڭ ئۈستىدىن تۈشۈك ئېچىپ قويسىڭىز پاراخوت ئەلۋەتتە چۆكۈپ كېتىدۇ، ئەمما تېخنىكلار پاراخوتنى ئالاھىدە لايىھەلىگەن، شۇڭا چۆكۈپ كەتمەيدۇ. 2- ئەۋلاد تىتانىك ناملىق پاراخوت زامانىۋى كېمىسازلىق تېخنىكىسى بويىچە ياسىلىدىغان بولۇپ، تۈرلۈك پەن- تېخنىكا ئارقىلىق پاراخوتنىڭ بىخەتەرلىكىگە كاپالەتلىك قىلىنىدۇ. ئەمما سىز تولىمۇ خۇراپىي بولسىڭىز، نېمە ئىش يۈز بېرىدىغانلىقىنى بىلەلمەي قالىسىز.