سارى ھىندىستاننىڭ ھەرقايسى قاتلاملىرىدىكى ئاياللارنىڭ قارشى ئېلىشىغا ئېرىشكەن بولۇپ، مەيلى يۇقىرى قاتلامدىكى مەرتىۋىلىك ئاياللار بولسۇن ياكى كۈن بويى ئالدىراش يۈرىدىغان يېزا ئاياللىرى بولسۇن ئوخشاشلا بىر خىل پاسوندىكى سارىنى كىيىپ يۈرىشىدۇ، ئوخشىمايدىغىنى پەقەت سۈپىتى. گەرچە تويدىن كېيىن ھىندىستان ئاياللىرى ئومۇميۈزلۈك ھالدا بارا-بارا سەمىرىپ كېتىدىغان بولسىمۇ، ئەمما يېرىم ئوچۇق يېرىم يېپىق ھالەتتىكى سارىغا ئورىنىۋالسىلا يەنىلا شۇنداق گۈزەل، كىشىنى مەھلىيا قىلىدىغان ھالىتىگە قايتىدۇ.
ھىندىستانلىقلارنىڭ يۈرۈش-تۇرىشىغا مىللىيچە تۈس، مىللىيچە ئالاھىدىلىك چوڭقۇر سىڭگەن بولۇپ، باشقا مىللەتلەردىن پەرقلىنىپ تۇرىدۇ. سىز قايسى بىر رەسىمدىكى ھىندىستان نازىنىنلىرىنىڭ قىسقا كۆينەك كىيىپ پاچىقىنى ئېچىۋالغانلىقىنى ئەسلىيەلەيسىز؟ ھەقىقەتەنمۇ يوق دېيەرلىك. چۈنكى ھىندىستاننىڭ ئەنئەنىۋىسىدە ئاياللار كىندىكىنى ئېچىشقا، ئەمما پاچىقىنى ئېچىشقا بولمايدۇ.
ھىندىستان ئاياللىرىنىڭ ئەڭ ياقتۇرىدىغان كىيىمى سارى، سارىنى كىيگەن ۋاقىتتا ئەڭ ئاۋۋال تار مايكا كىيىپ مۈرە ۋە كۆكرەك قىسمىنى چىڭ ئورىۋالىدۇ، بىلەك ۋە بەل قىسمى پۈتۈنلەي ئېچىپ قويىلىدۇ، ئاستىغا قىسقا ئىشتان ياكى ئىچ كۆينەك كىيىپ، ئاندىن ئوشۇقىغا كەلگۈدەك ئۇزۇن سارىنى ئۈستىگە يېپىۋالىدۇ.
سارى ھىندىستان ئاياللىرىنىڭ ئەنئەنىۋى كىيىمى، ئەمما پاسون ۋە سۈپەت جەھەتتە ناھايىتى چوڭ پەرق بار، گۈللىرىمۇ ئوخشاش بولمايدۇ. ئادەتتىكى سارىغا ئۆسۈملۈك يوپۇرمىدا رەڭ بېرىلىدۇ، گۈلىمۇ ناھايىتى ئاددىي، قىممەت باھالىق سارىلارغا گىئومېترىيىلىك شەكىل، ھەرخىل گۈللەرنىڭ رەسىملىرى چۈشۈرۈلگەن بولۇپ، بەزىلىرى كەشتىلەنگەن، بەزىلىرى ماشىنىدا تىكىلگەن.
ھىندىستان ئاياللىرىنىڭ يەنە بىر خىل مىللىيچە كىيىمى بولۇپ، مايكىسى كەڭتاشا، ئۇزۇنلۇقى تىزىغا كېلىدۇ، ئاستىغا بولسا ئۇزۇن ئىشتان كىيىدۇ، ئاندىن بوينىغا ئۇزۇن شارپا ئارتىۋالىدۇ.
