ئەھەدى:غەزەللەر

ئەھەدى

	غەزەللەر ئەھەدى (1)    بۇ ئەجەپ دۇنياكى، كۇللى مەۋجۇداتقا جان    شىرىن ، جان تۈگۈل ، جانغا ئۇزۇق ھەرتامچە ئىسسىق قان شىرىن . ئوت شىرىن  پەرۋانىگە-يۇ   بۇلبۇلى  شەيداغا  گۈل ، مەن كەبى مەجنۇنغا ھەرئان لەيلىدەك جانان شىرىن . يار ئۈچۈن جاننى تەسەددۇق ئەيلىمەك باردۇر ، لېكىن چۈش ئارا كۆرگەن ۋىسالدىن بىقارار ھىجران شىرىن . ئوۋچىنىڭ قەستى ئىپاردا، ئاھۇنىڭ كۆزىدە ياش... قارنى توققا ئەيشى- ئىشرەت، ئاچقا بۇردا نان شىرىن . جان ئەزىزدۇر ، جان شىرىن ھەم  يەتتى كىملەر قەدرىگە ؟ كىم چۈشەر سەكراتقا ئاندىن  بىر نەپەس ئىمكان شىرىن . نە ئەجەپكىم ، تاش يېرىپ بىخ سۈرسە يۇمران بىر گىياھ، تەقدىرى قىسمەتكە ھەركىم بولسا گەر سۇلتان ، شىرىن ... ئالتە كۈنلۈك   پانى ئالەم   رەقسىگە   قىلما    ھەۋەس، سەن ئۈچۈن ئەي تەلۋە نىمجان ھەممىدىن ۋىجدان شىرىن ! (2)   بىر كۆرۈپ سەۋدايى مەپتۇن  قىلدى دىلدار سۈرىتىڭ، قىلغىلى بىھۇش مېنى   تۇرغانمۇ   تەييار    سۈرىتىڭ ؟ غۇنچە قامەت تەسۋىرىڭگە  سۆز تاپالماي لال تىلىم ، سەن تولۇن ئايمۇ،  كۆزۈڭ نۇرانە ئەنۋار سۈرىتىڭ ؟ نە سىھىر باركىن ئەشۇ بىر جۈپ كۆزۇڭدە ، بىلمىدىم ئۇ ئىشىق ئوقياسىمۇ  ۋەياكى خۇنخار سۈرىتىڭ ؟ تەلمۇرۇپ چېھرىڭگە باقسام ، كەتتى جان مۇلكۇمگە ئوت، ئېيتقىنا، كۆيدۈرگىلى نېمانچە خۇشتار سۈرىتىڭ ؟ ئالمىدەك مەڭزىڭ ئارا گۈلدەك ئېچىلغان جۈپ زىناق ، قىلدى رام ئەلنى ، مېنىڭ ھالىمنى دىشۋار ... سۈرىتىڭ . سۈرىتىڭ شۇنچە ، ئۆزۇڭدىن ماڭا كەلمىش نە كۆرۇم ، ناتىۋان  ئاشىققا  دارمۇ  ياكى  زۇننار    سۈرىتىڭ ؟ ئەي پەرى،نىمجانغا ۋەسلىڭ جامىدا مەي سۇنمىساڭ ، ئاي جامالىڭ شەرھىگە بولماسمۇ ئىنكار سۈرىتىڭ ؟ (3) ئەي پەرى ، ئىشقىڭدا ئۆچمەس چوغ بولۇپ ياندى يۈرەك ، زار بولۇپ ۋىسالغا ، ھىجران  ۋەسلىگە  قاندى   يۈرەك . جۈپ ئانار مەي باغلىغان ئالتۇن لىگەندۇر  كۆكسىڭىز ، بۇندا باغرىم بىر قەپەس، تۇتقۇنغا   ئايلاندى  يۈرەك . بىر دەقىق جىم تۇرسا كاشكى ، يۇلقۇنۇپ بەرمەس ئارام ، قانچە كىشنەپ چاپچىغانچە  شۇنچە داغلاندى يۈرەك . تاش كۆمۇرگە ئوتنى ياقسا كۈل بىلەن داشقال قالۇر ، بىقەدىر جىسمىمدا ئوت كۆيگەنچە چوغلاندى يۈرەك . مەن تۆرەلدىم قايسى كۈن ئىشقى -پىراق سەيناسىدا، سۆڭرى ھىجرانغا بەنت - زەنجىردە باغلاندى يۈرەك . نە ئەجەپتۇر ئەيلىسەڭ كۆكسۈمنى خۇمدانغا قىياس ، شۇ ئەزىم خۇمدان ئارا يالقۇنغا ئايلاندى يۈرەك . بەس!كۆتۇر باشىڭنى نىمجان  ياتما غەپلەت ئۇيقىدا ، چاچ ، ساقالىڭغا  قىرو قۇنغاندا ئويغاندى يۈرەك !

huxhuy

	ئەسسالامۇ ئەلەيكۇم ئۇستاز،‹‹غەزەللەر››دىن قەلب سادالىرىنى تىڭشاپ ‹‹ھىجران››چۆللىرىدە مۇڭلاندىم. غەزەللەرگە بولغان قەلب چاڭقاقلىقىم بېسىلدى.تەنلىرى ساق،ئىجادىيەتلىرى بەرىكەتلىك بولغاي! ********* ھە، راست. مۇنبەردىكى ئىسىملىرى ئۇيغۇرچە‹‹ئەھەدى››گە ئۆزگەرتىپ قويۇلدى. ئەمما مەخپىي نومۇر ئۆزگەرمىدى. ۋاقىپلىنىپ قالغايلا.

HOJAKABIZ

	چاچ ، ساقالىڭغا  قىرو قۇنغاندا ئويغاندى يۈرەك ! ئەسلىمۇ ئويغاق ئېدى گەرچە "نىمجان" بولسىمۇ، بۇ ھايات كەچمىشلىرى ئىچرە تولغاندى يۈرەك!

ئەھەدى

	ئەسلىمۇ ئويغاق ئېدى گەرچە "نىمجان" بولسىمۇ، بۇ ھايات كەچمىشلىرى ئىچرە تولغاندى يۈرەك! كاج پەلەك قىسمەت ئارا روھىمنى ‹ نىمجان› ئەيلىگەچ، بىرمەھەل غەپلەتتە ئاھ،‹بوز يەر›گە قوغلاندى يۈرەك...

ئۈمىدجان قادىرى

	سۆڭرى ھىجرانغا بەنت - زەنجىردە باغلاندى يۈرەك .   بۇ مىسرادا ۋەزىن بۇزۇلدىمۇ-قانداق؟!

halisbay

	ئېسىل غەزەللەرگە مەرھابا! بەرىكەتلىك بولغايلا...

yultuz

	ئالتە  كۈنلۈك   پانى  ئالەم   رەقىسگە   قىلما     ھەۋەس ، سەن ئۈچۈن ئەي تەلۋە نىمجان سەن ئۈچۈن ۋىجدان  شىرىن !    ئەجەپ  بەلەن يىزىۋىتىپتىلا !    ئىلھام بۇلاقلىرى    تاشقىنلاپ  تۇرغاي !    ئەزىز تەنلىرى گە ساغلاملىق  يار بولغاي !

ئەھەدى

	ئۈمىدجان قادىرى يوللىغان ۋاقتى  2015-6-21 17:34 سۆڭرى ھىجرانغا بەنت - زەنجىردە باغلاندى يۈرەك .   بۇ مىس ... ‹بەنت › دېگەن سۆزنى قىسقا بوغۇم بۇيىچە ئوقۇپ باقسىڭىز ۋەزىن بۇزۇلماسمىكى...