كۆكيار : كوچىدىكى موزدوز بالا

كۆكيار

كوچىدىكى موزدوز بالا


يالغۇزلۇق ئوخشايدۇ قەبرە تېشىغا
كوچىدىكى موزدوز بالا
چىققاندا تۆت يولنىڭ دوقمۇشىغا .
كېلەر ئەتراپتىن يامغۇرنىڭ ھېدى
غىرىپلىق ياماشقاندا ئۇچىسىغا .

ئەخمەتجان
كوچىدىكى موزدوز بالا
چېچى قارا ، كۆزلىرى قارا
قارىساڭ شۇ غەمكىن كىرپىكلىرىدىن
ھەرلەھزە تۆكۈلۈپ تۇرىدۇ يارا .

ئۇ
مايلاشقان قولىدا تىرەپ بېشىنى
ساقلايدۇ ئاق تىرەك ئاستىدا جىمجىت
ئۆزىمۇ تونىمايدىغان نۇرغۇن كىشىنى .

ئەخمەتجان
توپا ئاياقلارنى مايلايدۇ
يىرتىلغان ئاياقلارنى يامايدۇ
توپا كۆڭۈللەرنى مايلايدۇ
يىرتىلغان قەلىبلەرنى يامايدۇ
سەن ئۇنىڭ ئالدىدا ئولتۇرۇپ
ھىس قىلىسەن نەقەدەر گادايلىقىڭنى
تاپقان تەرگىنىڭنى بەرمەكچى بولۇپ
سۇنىسەن ئالقىنىڭدا بايلىقىڭنى
لىكىن ئۇ ئالمايدۇ
ئالىدۇ قەلبىڭدىكى يايلىقىڭنى .

ئۇ گەپ قىلالمايدۇ
بىراق چۈشىنىسەن ئۇنىڭ تىلىنى .
ئۇ شېئىر يازمايدۇ
ئەمما ئۇنتالمايسەن شېئىرلىرىنى .

ئەخمەتجان
كوچىدىكى موزدۇز بالا.
جىمجىتلىققا پىچىرلاۋاتقان
شۇ ئاددى بەختىيارلىقنى كۈيلەۋاتقان...

halisbay

بىزنىڭ كوچا دوقمۇشتىكى موزدۇز بالا شۇمۇ-نىمە؟ بەك ئوخشايدىكەن جۇمۇ.

huxhuy

ئۇ گەپ قىلالمايدۇ
بىراق چۈشىنىسەن ئۇنىڭ تىلىنى .
ئۇ شېئىر يازمايدۇ
ئەمما ئۇنتالمايسەن شېئىرلىرىنى .
_________________________
تاتلىق مىسرا دېگەن شۇ-دە!

سەزگۈر

توپا ئاياقلارنى مايلايدۇ
يىرتىلغان ئاياقلارنى يامايدۇ
توپا كۆڭۈللەرنى مايلايدۇ
يىرتىلغان قەلىبلەرنى يامايدۇ
سەن ئۇنىڭ ئالدىدا ئولتۇرۇپ
ھىس قىلىسەن نەقەدەر گادايلىقىڭنى
تاپقان تەرگىنىڭنى بەرمەكچى بولۇپ
سۇنىسەن ئالقىنىڭدا بايلىقىڭنى
لىكىن ئۇ ئالمايدۇ
ئالىدۇ قەلبىڭدىكى يايلىقىڭنى .
ھالال ئەجىر بىلەن ھەممە سۈيۈنىدۇ.ئادىمىيلىك كوچىسىدىكى ھالال مېھنەتلىك بالىنىڭ بۇ تەسۋىرى تولىمۇ تەبئى چىقىپتۇ.

ablatahmat

ئەخمەتجان
توپا ئاياقلارنى مايلايدۇ
يىرتىلغان ئاياقلارنى يامايدۇ
توپا كۆڭۈللەرنى مايلايدۇ
يىرتىلغان قەلىبلەرنى يامايدۇ
سەن ئۇنىڭ ئالدىدا ئولتۇرۇپ
ھىس قىلىسەن نەقەدەر گادايلىقىڭنى
تاپقان تەرگىنىڭنى بەرمەكچى بولۇپ
سۇنىسەن ئالقىنىڭدا بايلىقىڭنى
لىكىن ئۇ ئالمايدۇ
ئالىدۇ قەلبىڭدىكى يايلىقىڭنى .
.............
مۇشۇ كۇبلىتنى قايتا بىر ئىشلەپ باقسىڭىز بولغۇدەك،تەكرار سۆزلەرنى ئىخچاملاپ،بۇ مىسرالاردىكىدەك؛

قارىساڭ شۇ غەمكىن كىرپىكلىرىدىن
ھەرلەھزە تۆكۈلۈپ تۇرىدۇ يارا

begturk

ئېنىم كۆكيار،تۇرمۇشقا چۆككىنىڭىزدىن،شېئىردىكى تىل،تىلدىكى مۇزىكىدىن،شېئىردىكى ھىسسىاتنىڭ شېئىرى ئوبرازغا سىڭىششىدىن زوق ئالدىم.كۆپ تىرىشىڭ،سىزدىن چوڭ ئۈمدلەرنى كۈتىمەن!