ئىپادىلەشكە دىققەت قىلىڭ

udun

ئىپادىلەشكە دىققەت قىلىڭ

بىر ئادەم 40 ياشقا كىرگەن تۇغۇلغان كۈنىدە تۆت دوستىنى ئۆيىگە مېھمانغا چاقىرىپتۇ. ئۈچ دوستى دەل ۋاقتىدا يېتىپ كەلگەن بولسىمۇ بىر دوستى يېتىپ كېلەلمەپتۇ. بۇ چاغدا ساھىپخان بىر ئاز خاپا بولۇپ:
_ ئادەمنى تازىمۇ ساقلاتتىغۇ، كېلىشكە تېگىشلىك ئادەم نېمىشقا كەلمەيدىغاندۇ؟- دەپتۇ. بۇنى ئاڭلىغان بىرەيلەن خاپا بولۇپ:
_ دېمەكچى بولغىنىڭ، كېلىشكە تېگىشلىك ئادەم كەلمەي، كەلمەيدىغان ئادەم كېلىپ قاپتۇ-دە؟ ئۇنداقتا مەن قايتاي، خوش،- دەپتۇ ۋە ئورنىدىن تۇرۇپ سىرتقا مېڭىپتۇ.
بىر ئادەمنىڭ كەلمىگىنىنى ئاز دەپ يەنە بىرىنىڭ كېتىپ قالغانلىقىنى كۆرگەن ساھىپخان تېخىمۇ خاپا بوپتۇ ۋە:
_ تازىمۇ بىر، كېتىشگە تېگىشلىك بولمىغان ئادەم كېتىپ قالدىغۇ،-دەپتۇ. بۇنى ئاڭلىغان يەنە بىر دوستى غەزەپكە كېلىپ:
_ گېپىڭگە قارىغاندا كېتىشكە تېگىشلىك ئادەم بىز ئىكەنمىز-دە؟ ماقۇل، مەن كېتەي،-دەپتۇ-دە، پىشىنى قېقىپ كېتىپ قاپتۇ. يەنە بىر دوستىنىڭ كېتىپ قالغانلىقىنى كۆرگەن ساھىپخان قازانغا چۈشكەن چۆمۈلىدەك نېمە قىلارىنى بىلەلمەي قاپتۇ. بۇ چاغدا يالغۇز قالغان دوستى ئۇنىڭغا نەسىھەت قىلىپ:
_ دوستلارنىڭ ھەممىسېنى خاپا قىلىپ كەتكۈزۋەتتىڭ، گەپ قىلغاندا دىققەت قىلساڭ بولمامدۇ؟-دەپتۇ. ساھىپخان نېمە دىيىشىنى بىلەلمەي:
_ ئۇلار مېنى خاتا چۈشىنىپ قالدى، مەن ھەرگىزمۇ ئۇلارنى دېمىگەن ئىدىم،-دەپتۇ. بۇنى ئاڭلىغان ئەڭ ئاخىرىقى دوستى ئۆزىنى زادىلا باسالماپتۇ.
_ نېمە؟ سەن ئۇلارنى دېمەي، ئەسلىدە مېنى دەپتىكەنسەن-دە؟- دەپتۇ-دە كەينىگىمۇ قارىماي كېتىپ قاپتۇ.
ھېكمەت: سۆز قىلىش بىرخىل سەنئەت. ئوخشاش بولمىغان سۆز-ئىبارىلەر، ئوخشاش بولمىغان تەلەپپۇزلار ئوخشاش بولمىغان نەتىجىلەرنى كەلتۈرۈپ چىقىرىدۇ. ھەتتا ئوخشاش سۆز – ئىبارىلەرمۇ ئوخشىمىغان مۇھىتتا ئوخشاش بولمىغان مەنىلەرنى ئىپادىلەپ قويىدۇ. شۇڭا  كىشىلىك تۇرمۇشتا ھەرگىزمۇ بۇ ساھىپخاندەك خاتالىقلارنى سادىر قىلىپ قويماڭ.