ئۈمىدجان قادىرى:قوش مېغىز

تىمسال

قوش مېغىز


ئۈمىدجان قادىرى


دىل كۈيى


ئىزدىبان تەسكىن-تەسەللى زارىقىش بىسيارغا مەن،
بەل چىگىپ چىقتىم سەپەرگە،ئاھ مېنىپ «تۇلپارغا»غامەن.

ئىچ قويۇن بولساقمۇ ئەمما مۇڭدىشىپ سىملار ئارا،
ھېيىقىش قىستار دىلىمنى،ناتونۇش دىدارغا مەن.

مەنزىلىم پۈتكەندە توختاپ،رەستىدىن تاپتىم ئۇنى،
كۆز ئەمەس كۆردۈم يۈرەكتە،ئوخشىدىم دىلتارغا مەن.

ياشىدىن قالدىمكى مەڭدەپ،نىم يېشىمكەنغۇ ئۆزى،
روھىدىن چاقنايدۇ ئەختەر،بى ئامال ئىزھارغا مەن.

داخىلى بولدۇمكى نېئمەت «داستىخانىدۇر ئېچىل»،
ئەڭ لەزىز تەمدۇر بۇدورەم داخىلىم ئەشئارغا مەن.

كۆچمىگەي ئەستىن ئەبەدكە شۇل ئەزىم دەريا بويى،
«مۇنچىسى شاھ»تا يۇيۇندۇق،دىل قېنىپ ئەسرارغا مەن.

لەۋزىدىن تامغاي ئۈمىدجاننىڭ ساداقەت كەۋسىرى،
ئىككىلا ئالەمدە تەييار دوست ئۈچۈن ھەمكارغا مەن.


قوش مېغىز


سىماھىڭ ماھىدۇر نۇرلۇق،جۇلالاپ پارلىغاي دىلدا،
مۇرادىم ئىستىمەك ۋەسلىڭ،كېزىپ ھېچ ھارمىغاي دىلدا

چۈشۈمنى ئىزگۈلۈك كۆرگەن،نىگاھىڭ مۆلدۈرى بۇزسا،
خىيالىم باشلىغان سۆھبەت تىلەككە يامرىغاي دىلدا.

«جاۋاب»ىڭ نەشتىرى تىلغاپ يۈرەكنى،قانچىلىك ئەزسە،
قېنىمدىن ئۇخچىغان ئىشقىم ئۈمىدسىز قالمىغاي دىلدا.

كۆيۈشنى ئىمتېھان ئەيلەپ،مۇھەببەت تەختىنى كۈتتۈم،
ھاياتىم گۈلشىنى رەڭدار،خۇناپنى يالمىغاي دىلدا.

ئىشەنچ ھەم ئېتىقاد بىرلە ئۈمىدجان كۆزلىگەي مەنزىل،
بولۇرمىز«قوش مېغىز»بىر كۈن،ئەقىدەم تايمىغاي دىلدا.
2013.يىل 23.ئىيۇل پىيالما.

udun

يېڭى غەزەللىرىڭىزگە مۇبارەك. ياخشى چىقىپتۇ. سالامەت بولغايسىز

yadikar

ئۈمىدجاننىڭ ئىلھام قۇشلىرى پەرۋاز قىلماقتا،ۋەزنى ئارۇز گۈللىرى پورەكلىمەكتە. قايناق ھېسيات ئىچىدە ئۆتكەن دەقىقىلىرىڭىز داۋام قىلغاي!

زۇلھايا

كۆز تەگمىسۇن.ياخشى يىزىپسىز. ئىلھاملىرىڭىز بەركەتكە تولسۇن.........

ئادىلجان

مانا بۇ ھەقىقى غەزەل بوپتۇ . بارىكاللا !