شەھەرلىكلەر سەھرالارغا بېرىپ كېلىڭلار

yadikar

شەھەرلىكلەر سەھرالارغا بېرىپ كېلىڭلار!

مەھەممەتجان راشىدىن

شەھەرلىكلەر سەھرالارغا بېرىپ كېلىڭلار ،
ئېتىزلارنى كۆرمىگەنلەر كۆرۇپ كېلىڭلار .
سىلەرنىڭمۇ ئەجدادىڭلار دېھقاندۇر بەلكىم،
سەھرالاردىن تەكتىڭلارنى بىلىپ كېلىڭلار .

شەھەر ھايات چىنارىنىڭ ئەڭ ئىگىز شېخى،
تەكتى سەھرا شۇندىن ئۇچۇر ئېلىپ كېلىڭلار .
بىللە بارسۇن نان ئىلغىغان بالىلىرىڭلار،
ئېڭىزلاردىن كۈزدە باشاق تېرىپ كېلىڭلار .

چىشىڭلارغا دورا بەلكىم دېھقاننىڭ نېنى ،
ئۆيلىرىدە قورۇنماستىن قونۇپ كېلىڭلار .
سەھرا كۆرمەي شەھەرلىكلەر شۈكۈرلۈك بولماس،
ھەر يىللىقى ھەپتە ئون كۈن تۇرۇپ كېلىڭلار .

يېڭى باشتىن ئەسكە چۈشكەي ئۇنتۇلغان دىيار ،
سەھرالارنى دىلغا دەستۇر قىلىپ كېلىڭلار .
كونا تاملار يادىڭلاردىن چىققاندۇ بەلكىم ،
بىنەملەردە تۆت، بەش زامان يۈرۈپ كېلىڭلار .

ئەپسوس، ئۇندا ئىگىز بىنا، رېستۇرانلار يوق.
پاكار-پاكار كەپىلەرگە كۆنۇپ كېلىڭلار .
سىلەر يىگەن ئاق نان ئەسلى تومۇزدا پىشقان .
سىلەرمۇ شۇ تومۇزلاردا كۆيۇپ كېلىڭلار.

ئاندا-ساندا روناق تاپقان بايلىرىمۇ بار ،
ئۇلارغىمۇ ئەزىز مېھمان بولۇپ كېلىڭلار .
كۆرۇپ كېلىڭ نامرات دىگەن بولىدۇ قانداق؟،
بۇمۇ بىلىم ،شۇ بىلىمگە بېيىپ كېلىڭلار .

قولۇڭلارغا تەلمۈرىدۇ خولۇم-خوشناڭلار ،
خالتاڭلارغا بىرەر زاغرا سېلىپ كېلىڭلار .
ھەشەمەتلىك شەھەرلەردە شەيتاندىن يۇققان.
قەلبىڭلارنىڭ كىرلىرىنى يۇيۇپ كېلىڭلار .

ئىگىز شاختا پەيدا بولغان كىبىرنى خۇينى،
پايانى يوق دالىلارغا قويۇپ كېلىڭلار .
شەھەرلەردە ئۇنتۇلمىسۇن ئەسلى زاتىڭلار،
دېھقان دىگەن كىم بولىدۇ تونۇپ كىلىڭلار.