نۇر سائادەتتۇر بىلىم(قادىر بۇلاق)

yadikar

بىلىم

قادىر بۇلاق

ئەقىل-ئىدراكنىڭ چىراغى نۇر سائادەتتۇر بىلىم،
چامدىغان ھىكمەت قەدەملەرگە ئىنايەتتۇر بىلىم.

غەيرى يوللاردا يۈرۈپ پىكرى خىيالى مەس بولۇپ
بىلمىگەنلەرگە پۇشايمانۇ نادامەتتۇر بىلىم.

گۈلنى ساقلايدۇ تىكەن، بۇلبۇل ساڭا شەيدا ئىكەن،
ئىزلىنىپ تاپماقچى بولساڭ يول رىيازەتتۇر بىلىم.

تۈگىمەس-پۈتمەس غەزىنە ئادىمى پەرزەنتىگە
قەدىرىگە يەتسەڭ بۇرادەر تاجى دۆلەتتۇر بىلىم.

قۇتقۇزار غەپلەتتە ياتقاننى نادانلىق ئىلىكىدىن،
قان تومۇردا ئۇرغىغان ئوتلۇق ھارارەتتۇر بىلىم.

ئاز-تولا بىلدىم دىبان ئەلگە تەمەننا  ئەيلىمە،
يەتمىگىڭ مۈشكۈلسېرى چوڭقۇر كارامەتتۇر بىلىم.

بوۋىمىز قىلىپ خىتاپ«پۇل تاپقۇچە يول تاپ»دېگەن،
نەۋقىران چاغىڭدا ئالساڭ زور غەنىمەتتۇر بىلىم.

پۇلنى سەن بايلىق دىمە ، ئەسلا بىلىمگە يەتمىگەي،
يەتتە ئىقلىمگە ئۇچۇپ، قىلساڭ ساياھەتتۇر بىلىم.

تىتىرىتىپ تاغلارنى زىلزىل كەلتۈرۈپ باش ئەگدۈرۈپ،
كۆزلىگەن مەنزىلگە يەتمەكتىن بىشارەتتۇر بىلىم.

ئويلىنىپ ئەتراپقا باقسام چىقتى ئايا باشقىلار،
تىلسىماتلارنىڭ سىرىن ئاچقان ماھارەتتۇر بىلىم.

بىل، نادانلىق ئەل ئارىسىدا داۋسىز بىر كېسەل،
مۇپتىلا بولغان كېسەللەرگە تىبابەتتۇر بىلىم.

بىر دېڭىز دىسەم ئۇنى ، تەكتىگە يەتمەك قىيىن،
يول تېپىپ يۈرسەڭ ساڭا ئەقلۇ-پاراسەتتۇر بىلىم.

مىڭ بىلىمسىز تەڭ كېلەلمەس بىر بىلىملىك ئالدىدا،
تەڭدىشى   يوقتۇر   بۈيۈك   جاسارەتتۇر   بىلىم.

تەغدىرىڭنى ھەرقاچان تەدبىر ئۆزى ھەل قىلغۇسى،
«قىل ھۈنەر،تېرىساڭ ھۈنەر»زەپمۇ ھالاۋەتتۇر بىلىم.

كىم بىلىم پەرۋانىسى بولسا ئىشى تاپقاي روناق،
ئىزلىگىن قادىر بۇلاق تەۋپىق ھىدايەتتۇر بىلىم.
مەنبە:ئۇيغۇر شېئىرىيەت مۇنبىرى