مۇھەببەتلا يالغاندۇر-يالغان !

yadikar

مۇھەببەتكە ھۇجۇم

غېنى سەمەت

ۋىسال دېگەن سىرلىق بىر ئەپسۇن،
ئادەم بىلەن ھەۋۋادىن قالغان.
جۇدالىق ئۇ گۈزەل تەسەۋۋۇر،
ئىچى پۇشقان شائىر تۇقىغان.

مەۋجۇت ئەمەس نازۇك جانانلار،
مەۋجۇت ئەمەس تاغيۈرەك پالۋان.
يېتىش ئۈچۈن شېرىن ۋەسلىگە ،
پەرھاد ھەرگىز سۇ باشلىمىغان.

بارچە كۈيگە چالغاندۇر تاشۋاي،
‹‹ يارۇ ›› غىلا چېلىپ باقمىغان.
ھەممە يەردە  كاززاپ مەدداھلار-
ئىشىق سۆزلەپ تىلى ھارمىغان .

شوخ بۇلبۇلنىڭ شەيداسى گۈلمۇ،
ئەخلەتچىلىك پۇراق چاچمىغان.
ناز-كەرەشمە، ئوتلۇق تىنىقلار،
چۆچەكتىلا ئېيتىلغان ئارمان .

ياخشى كۆرۈش - ئەجەپ تاتلىق سۆز،
سېنى پەقەت مەن ئالدايدىغان.
كۆيدۈم دېيىش- ئۆزىنى بەزلەش،
بىر ئىسمىلا كىتابتا قالغان.

قاغجىرىغان زىلۋا بەدەنلەر،
تەشنالىقتىن بولمىغان گۈلخان.
ئەجدادلاردىن تارالغان قىسسە،
يۈرەكلەرنى قىلغاندۇر پايخان.

ئەسلى قانداق يارالغان بولسا،
ئۆزگەرمەيلا تۇرۇپتۇ جاھان.
باشقىسىغۇ بەرھەقتۇر بەلكىم،
مۇھەببەتلا يالغاندۇر-يالغان !