زاڭ كېجيا:بەزىلەر

huxhuy

بەزىلەر
ــ لۇ شۈن ۋاپاتىنىڭ 13 يىللىقىنى خاتىرىلەپ

زاڭ كېجيا

بەزىلەر دۇنيادا تۇرسىمۇ تېمەن،
ئاۋامنىڭ كۆڭلىدە بولغان ئۇ ۋاپات؛
بەزىلەر بۇرۇنلا كەتسىمۇ ئۆلۈپ،
قەلبلەر تۆرىدە تۇرماقتا ھايات.

بەزىلەر ئاۋامنىڭ بېشىغا مىنىپ،
دەيدۇ: «پاھ، يار بولدى ئۇلۇغلۇق ماڭا!»
بەزىلەر قەددىنى ئېگىپ مۇلايىم،
ئىشلەيدۇ ئەل ئۈچۈن بولۇپ ئات-كالا.

بەزىلەر ئىسمىنى ئويىدۇ تاشقا،
ساقلىنىپ قالسۇن دەپ دۇنيادا ئەبەت؛
بەزىلەر ئايلىنىپ ياۋا ئوت-چۆپكە،
يانغىندا كۆيۈشنى خالايدۇ پەقەت.

بەزىلەر ياشايدۇ ئۆز غېمىنى يەپ،
ئۆزگىگە ھەمىشە تىلەپلا قازا؛
بەزىلەر ياشايدۇ كۆزلەپ بىر ئۆمۈر
ئەلنىڭ قۇت-بەختىنى ھەم تارتىپ جاپا.

ئاۋامنىڭ بېشىغا مىنگەننى چوقۇم
ئىرغىتىپ يىراققا تاشلايدۇ ئاۋام؛
ئەل ئۈچۈن ئات-كالا بولغاننى بىراق
ياد ئېتەر، روھىغا بېغىشلار ئارام.

ئىسمىنى تاشلارغا ئويغاننىڭ نامى ــ
سېسىيدۇ جەسىتى سېسىشتىن بۇرۇن؛
باھارنىڭ شامىلى سۆيگەن دالىدىن
ياپيېشىل ئوت-چۆپلەر ئالىدۇ ئورۇن.

ئۆزگىگە قازانى تىلىگەن كىشى
ئەڭ مۇدھىش قىسمەتتىن قالمايدۇ ئامان؛
ئەلنىڭ قۇت-بەختىنى كۆزلىگەنلەرنى
ئەل ئېگىز كۆتۈرۈپ ئۆتىدۇ ھامان.
                               جاسارەت تاش تەرجىمىسى