ئۆمەر باتۇر


<تارىخىي داستان>




يالغۇز  تۇيۇن پارچە تاغ،
بولۇپتۇ قورغان.
ئاتمىش ئالتە گۆدەكنى ،
بوغدايدەك ئورغان.

ئاتمىش ئالتە گۆدەكمۇ،
ئەلنى دەپ ياتقان.
يارەنلىرى قول كۆتۈرۈپ،
لەھەتكە قويغان.

كەر بالادا شىھىت بولغان ،
ئىمامزادىلەر.
ئىماملارنى شىھىت قىلغان،
ھارامزادىلەر.

لاچىن غولدىن چۈشۈپ كەلدى،
ئاتلار ئوينۇتۇپ.
ئوڭ قولىدا كۈمۈش نەيزە،
قۇلانلار ئاتىپ.

لاچىن غولدىن چۈشۈپ كەلدى ،
بىر ھاشىم ئولان.
قىزىل-يىشىل تون كىيىپتۇ،
ياقىسى بۇلغۇن.

ئۆمەر باتۇر تاينى مىنىپ،
ئۇچتى پەلەككە.
يالغۇز تويۇن ئارقىسىدا،
قوندى تىرەككە.

يالغۇز تۇيۇن،يالغۇز قاڭزا،
زېمىن كەڭتاشا.
ئۆمەر باتۇر خۇش ئەر ئىدى،
قىلدى تاماشا.

يالغۇز تويۇننىڭ ئارقىسى،
قاپقارا سايدۇر.
ئۆمەر باتۇر مىنگەن ئاتى،
كۆك ئالا تايدۇر .

كۆك تالا تاينى مىنىپ،
غول تۆۋەن چاپقان.
مەنمەن دىگەن يارەنلەرنىڭ،
ئالدىدا ماڭغان.

ئۆمەر باتۇر يىتىپ كەلدى،
يالغۇز تۇيۇن تېغىغا.
ماراپ يېتىپ چىرىكلەر،
قىستاپ كىردى يىنىغا.

ئوينۇتۇپ ئوقيا- قىلىچ،
تەرەپتىن قىرغىن سالدى.
ئۆمەر باتۇر مەردلەرچە،
غالىب تۇغىنى ئالدى.

ئۆمەر جەڭگە ئاتلىنىپ،
ياۋ ئاغزىنى قان ئەتتى.
بولۇپ بەر بات دۈشمەنلەر،
قۇيرۇقىن تىكىۋەتتى.

ئۆمەر باتۇر دەسلەپتە،
باتۇر چىقتى ئۇ جەڭدە.
مەغرۇرلۇقتىن ئاخىرى،
پۇشمان يىدى ئەلەمدە.

ياۋلار كىردى توساتتىن،
ھۇجۇم قىلدى ئۆمەرگە.
ئاتمىش ئالتە گۆدەكنى،
مۇپتىلا قىلدى ئەجەلگە.

ئۆمەر باتۇر خوش ئەر ئىدى،
ئالەمدىن ئاشقان.
بىر مىڭ بىريۈز چىرىك كەلسە،
نەيزىدە چاپقان.

كۆك ئالا تاينى مىنىپ،
ئۇزۇن يول باسقان.
ئۆمەرنى كۆرگەن چىرىكلەر،
ئارقىغا قاچقان.

يالغۇز تويۇننىڭ ئارقىسى،
تۈپتۈز بىر ئالقان.
بىرمىڭ بىريۈز چىرىك چىقىپ،
ئۆرۈلۈپ يانغان.

چىرىكلەرنى توقاي سۈرۈپ،
تاغلاردىن ئاشقان.
دۈشمەن جەڭدە يىڭىلىپ،
مىنگاڭغا قاچقان .

ئۆمەر باتۇر خوي ئەر ئىدى،
ئالەمدىن ئاشقان.
ئاتنى تاشلاپ،تاينى مىنىپ،
داۋاندىن ئاشقان.

ئۆمەر باتۇر خوي ئەر ئىدى،
غول تۆۋەن چاپقان.
قىلماس ئىشنى قىلىپ قويۇپ،
دەردىنى تارتقان.

كۆك ئالا تاينى مىنىپ،
سايلاردا چاپقان.
ئۆمەر باتۇر شىھىت بولۇپ،
زىلپۇشنى ياپقان.

ئاغىنىسى ئىزدەپ تىپىپ،
چىگمەندە يۇغان.
پەرىشتىلەر قول كۆتۈرۈپ،
لەھەتكە قويغان.

سىنىڭ بىلەن مەن جىنىمنى،
داڭغا داڭلادىم.
ئۆتكەن -كەچكەن ئىشلارىڭنى ،
خەقتىن ئاڭلادىم.

تىلەكلەرنى تىلۇرمەن،
تىلەكلەر ئۈچۈن.
سەھەر تۇرۇپ يىغلادۇرمەن،
سەن يارلار ئۈچۈن.



مەنبە:ئۇيغۇر خەلق داستانلىرى