مەزكۇر تىمىنى مەن نادىرلىدىم ، پىكىرىڭىز بولسا مەن بىلەن ئالاقىلىشىڭ . سەۋەبىنى تېمىنى تەپسىلى كۆرۈپ ، مەزمۇنىدىن بىلگەيسىز . ~~~~~~~~~~~~~~~~~~~~~~~~~~~~~~~~~~~~~~~~~~~~~~~
~~~~~~~~~~~~~~~~~~~~~~~~~~~~~~~~~~~~~~~~~~~~~~~
تور مۇنبەر قۇرغۇچىلارغا 10 تەكلىپ
يولباشچى
يېقىنقى يىللاردىن بۇيانقى تور تېخنىكىسىنىڭ ئالەمشۇمۇل ، ئىنقىلاپ خارەكتىرلىك تەرەققىياتلارغا ئىرىشىشى مابەينىدە تور مۇنبەر مەدەنىيىتى بىزدە بىخلاندى ھەم بەلگىلىك تەرەققياتلارغا ئېرىشتى . تور تېخنىكىسىنىڭ ئوموملىشىشى نەتىجىسىدە تور مۇنبەرلىرىنىڭ سانى كۈندىن - كۈنگە ئىشىپ بارسىمۇ سۈپىتىنىڭ بىر ئىزدا توختاپ قىلىشى تەپەككۇر قىلالايدىغان جانلىقلارنى خۇشال قىلالمىدى . تور مۇنبەرلىرى پەيدا بولغاندىن بۇيان ئاساسەن «ئۇنۋېرسال مۇنبەر » ۋە « خاس مۇنبەر » (ياكى «كەسپى مۇنبەر») دىگەندەك تۈرلەر بىلەن مەۋجۈت بولۇپ كەلدى . يېقىنقى يىللاردىن بۇيان تور مۇنبەرلىرى شىددەت بىلەن كۆپىيىش دەۋرىگە قەدەم قويغان بولسىمۇ بىراق سۈپەت جەھەتتە ئاشماسلىق ياكى بىر ئىزدا توختاپ قىلىش ھالىتىنى ساقلاپ كەلمەكتە . كەمىنە تۆۋەندە ئۆزۈم ھېس قىلغان تور مۇنبەر قۇرغۇچىلار ھازىرلاشقا تىگىشلىك شەرتلەر توغرىسىدا كۆز قاراشلىرىمنى ئوتتۇرىغا قويۇپ ساھەداشلىرىم بىلەن ئورتاقلىشىپ باقماقچىمەن . 1. مۇنبەر قۇرغۇچىلار قانۇن - نىزاملارغا ئاڭلىق ئەمەل قىلىدىغان بولۇش لازىم .
تور مۇنبەر قۇرغۇچىلار مۇنبەر قۇرۇشتىن ئىلگىرى ھەم قۇرۇش داۋامىدا چوقۇم دۆلىتىمىزنىڭ ئاساسى قانۇن ۋە مۇناسىۋەتلىك قانۇن - نىزاملىرىنى بىر قۇر چۈشىنىپ چىقىشى زۆرۈر . تور مۇنبەرلىرى قۇرۇلغاندىن كىيىن تور مۇنبەرلىرىگە ھەرخىل ژانىردا تىمىلار يوللىنىدۇ . ئەلۋەتتە ، بۇنىڭ ئىچىدە تىما يوللىغۇچىنىڭ ئۆزىنىڭ ئەسىرى بولغاندىن باشقا يەنە باشقىلارنىڭ ئەسىرىمۇ بولىدۇ . مۇشۇنداق ئەھۋالدا چوقۇم باشقىلارنىڭ ئەقلى ئەمگىكى ھۆرمەتلىنىشى لازىم . تور مۇنبەرلىرىدە ھەرخىل ئۈن - سىن نەشىر بويۇملىرى يوللىنىپ تۇرىدۇ . مۇشۇنداق ئەھۋالدا دۆلىتىمىزنىڭ ئەقلى مۈلۈك ھوقوقىغا ئالاقىدار قانۇن - نىزاملىرىنى تولۇق ئوقۇپ چۈشىنىپ چىققاندا زۆرۈر بولمىغان قانۇنى جاۋاپكارلىقتىن ساقلانغىلى بولىدۇ . ئەسلى ئاپتور ياكى ئۈن - سىن نەشىر قىلغۇچىلارنىڭ رۇخسىتىنى ئالماي توردا ئىلان قىلىشتىن ساقلىنىش لازىم . مەزمۇنى ساغلام بولمىغان شۇنداقلا دۆلەتنىڭ قانۇن - نىزاملىرىغا زىت بولغان تىمىلارنى بىردەك تەستىقلاپ چىقىرىشتىن ساقلىنىش لازىم . 2. مۇنبەر قۇرغۇچىلار بەلگىلىك تور تېخنىكىسىغا ئىگە بولۇشى لازىم .
مۇنبەر قۇرغۇچىلار مۇنبەر قۇرۇشتىن ئىلگىرى چوقۇم تور تېخنىكىسىنى پۇختا ئىگەللىشى لازىم . شۇنداق بولغاندا تور مۇنبەرلىرىنى ياخشى ھەم ئۈنۈملۈك باشقۇرۇش تېخنىكا كاپالىتىگە ئىگە بولىدۇ . مۇنبەر قۇرغۇچىلار مۇنبەر قۇرۇشقا ئامال بار ئالدىراپ كەتمەي مۇناسىۋەتلىك تور تېخنىكىسىنى پۇختا ئىگەللىشى لازىم . مۇشۇنداق بولغاندا مۇنبەر قۇرۇلغاندىن كىيىن قەستكار (خاككىر) لارنىڭ ھۇجۇمىغا تاقابىل تۇرغىلى ئۈنۈملۈك مۇداپىئە قوللانغىلى بولىدۇ . ئەلۋەتتە ، تور تېخنىكسىى كۈندىن - كۈنگە يېڭىلىنىۋاتقان بۈگۈنكى كۈندە مۇنبەر قۇرغۇچىلار چوقۇم ئۆزىنىڭ قىممەتلىك ۋاقتىدىن ۋاقىت چىقىرىپ ئەڭ يىڭى تور بىلىملىرىدىن خەۋەردار بولۇشى ھەم ئۇنى ئۆز مۇنبەرلىرىنىڭ تەرەققياتىغا سەرپ قىلىشى لازىم . 3. مۇنبەر قۇرغۇچىلار ئىجتىمائى مۇناسىۋەتكە ماھىر بولۇشى لازىم .
ئادەم ئىجتىمائى مۇناسىۋەتلەرنىڭ يىغىندىسى . مۇنبەر ماھىيەت جەھەتتە مەۋھۈملۈككە ئىگە بولسىمۇ بىراق بۇ رىئالنى دۇنيادىكى كىشىلەرنىڭ ئىشتىراك قىلىشى بىلەن ۋۇجۇتقا كەلگەن بولىدۇ . رىئالنى دۇنيادىكى كىشىلەرنىڭ مىجەز - جارەكتىرنىڭ بىر - بىرىگە ئوخشىماسلىقى ، پىكىر قىلىش ئۇسۇلى ھەم تەپەككۇرىنىڭ ھەرخىل قاتلاملاردا بولۇشى مۇنبەردە ھەرخىل پىكىر ئىقىملىرىنى ۋۇجۇتقا كەلتۈرىدۇ . مۇنبەر قۇرغۇچىلار چوقۇم مۇشۇ خىل ئوخشاش بولمىغان مىجەز - خارەكتىردىكى كىشىلەرنىڭ ئوتتۇرىسىدا يۈر بەرگەن ھەرخىل زىدىيەتلەرنى ھەل قىلىشىقا ماھىر بولۇشى ، مۇشۇ كىشىلەر بىلەن ئۆزى ئوتتۇرىسىدىكى ھەر تۈرلۈك مەنپەئەت مۇناسىۋىتى ھەم ئىجتىمائى مۇناسىۋەتلەرنى تەڭشەشكە ماھىر بولۇشى لازىم . «10 ئادەم» گە «10 خىل» گەپ قىلىپ «10 خىل» خۇشال قىلالايدىغان يۇقىرى دەرىجىدىكى ئىجتىمائى مۇناسىۋەت ئىقتىدارىنى ھازىرلاش لازىم . ئەزالار بىلەن ئەزالار ، ئەزالار بىلەن باشقۇرغۇچىلار ، باشقۇرغۇچىلار بىلەن باشقۇرغۇچىلار ، ئەزالار بىلەن ئۆزى ، باشقۇرغۇچىلار بىلەن ئۆزى ئوتتۇرسىدىكى مۇناسىۋەتلەرنى ئەڭ قىسقا ۋاقىت ئىچىدە ياخشى بىر تەرەپ قىلىش لازىم . مۇنبەر قۇرۇلۇپ بولغاندىن كىيىن گورۇھۋازلىق شەكىللىنىپ قىلىشتىن ساقلىنىش لازىم . باشقۇرغۇچىلارغا قارىتا «دان» بىلەن «سامان» نى ئىنىق ئايرىش لازىم . بۇ بىر تۈرلۈك تەلەپ بىر قەدەر مۇھىم . 4. مۇنبەر قۇرغۇچىلار ئۆز مەدەنىيىتى ۋە تارىخىنى بەلگىلىك بىلىش سەۋىيىسى بولۇشى لازىم .
مۇنبەر قۇرغۇچىلار يۇقارقىدەك شەرتلەرنى ھازىرلىغاندىن باشقا يەنە ئۆز مەدەنىيىتى ۋە تارىخىنى بەلگىلىك بىلىش سەۋىيىسىدە بولۇشى لازىم . شۇنداق بولغاندا ئۆز مەدەنىيىتى ۋە تارىخىغا مۇناسىۋەتلىك بۇرمىلانغان ھەم بىر تەرەپلىمە مەزمۇندىكى تىمىلارنىڭ تەستىقلىنىپ چىقىپ كىتىشىدىن ساقلانغىلى بولىدۇ . مۇنبەر قۇرغۇچىلار يازما يوللىغاندا چوقۇم ئۆز مىللىتى تىلىنىڭ ئىملاسى توغرا ، راۋان ، چۈشىنىشلىك بولۇشى ، لوگىكىلىك قۇرۇلمىسى پۇختا بولۇشىغا دىققەت قىلىشى لازىم . ئاز سۆز بىلەن كۆپ مەنانى ئىپادىلەشكە ماھىر بولۇشى لازىم . (ئىپارنى يوشۇرساڭ پۇرىقى بىلدۈرەر ، بىلىمنى يوشۇرساڭ تىلىڭ بىلدۈرەر ---- يۈسۈپ خاس ھاجىپ)شۇنىڭ بىلەن بىرگە مۇنبەر قۇرغۇچىلاردا بەلگىلىك «مەدەنىيەت سەۋىيىسى» بولۇشى لازىم . مۇشۇنداق بولغاندا «مەدەنىيەت سەۋىيە» دىكى «بىلىم دەسمايىسى» ئارقىلىق مۇنبەرنى ئۇزاق مۇددەت ، ئۈنۈملۈك ، ياخشى باشقۇرغىلى بولىدۇ . 5. مۇنبەر قۇرغۇچىلار يېڭىلىق يارتىش روھىغا باي بولۇشى لازىم .
تور مۇنبەر تېخنىكىسى ئوموميۈرلۈك كەڭ قولىنىۋاتقان بۈگۈنكى كۈندە ، تور مۇنبەر قۇرغۇچىلاردا چوقۇم ئۈزلۈكسىز يېڭىلىق يارتىش روھى بولۇشى ھەم بۇنى ئۆز ئەمەلىيىتىدە ئىپادىلىشى لازىم . تور مۇنبەرلىرى قۇرغاندا بۇرۇن قۇرۇلۇپ بولغان تور مۇنبەرلىرىنى «نۇسخىلاپ» قويۇشتىن ساقلىنىش لازىم . تور مۇنبەرلىرى قۇرغاندا سەھىپىدە يېڭىلىق ياراتقاندىن باشقا يەنە مەزمۇنلاردا يېڭىلىق يارتىش تولىمۇ زۆرۈر . ئامال بار ئۆز مۇنبەرلىرىنىڭ خاسلىققا ئىگە تەتقىقات نىشانىنى تىكلىۋىلىش لازىم . شۇنىڭ بىلەن بىرگە مۇلازىمەت ئوبىكتىنى ياخشى تاللاش لازىم . 6. مۇنبەر قۇرغۇچىلارنىڭ تەشكىللەش ئىقتىدارى كۈچلۈك بولۇشى لازىم .
مۇنبەر قۇرغۇچىلارنىڭ تەشكىللەش ئىقتىدارى كۈچلۈك بولۇشى لازىم . مۇنبەرنىڭ قەرەللىك ياكى قەرەلسىز «مۇنبەر مۇھاكىمە يىغىنى» ، «مۇنبەرداشلار ئۇچرىشىشى» ، «مۇنبەر قۇرۇلغان كۈن پائالىيىتى» قاتارلىق پائالىيەتلەردە مۇنبەر قۇرغۇچىلار چوقۇم ئۆزىنىڭ كۈچلۈك بولغان تەشكىللەش ئىقتىدارىنى جارى قىلدۇرۇش لازىم . 7. مۇنبەر قۇرغۇچىلاردا پىلان بولۇش لازىم .
مۇنبەر قۇرغۇچىلاردا مۇنبەر قۇرۇشتىن ئىلگىرىلا چوقۇم بەلگىلىك پىلان بولۇشى لازىم . پىلان چوقۇم رىئالىقتا ئەمەلگە ئاشۇرغىلى بولىدىغان بولۇشى خىيالى بولماسلىقى لازىم . مۇنبەرنى قۇرۇشتا قانداق تەدبىرلەرنى قوللىنىش ، مۇنبەر قۇرۇلغاندىن كىيىن ئەزالارنى قانداق كۆپەيتىش ، باشقۇرغۇچىلارنى قانداق قوبۇل قىلىش قاتارلىقلار پىلاندا بولۇشى لازىم . 8. مۇنبەر قۇرغۇچىلار مۇنازىرە تىمىلىرىغا قاتناشماسلىقى لازىم .
مۇنبەر قۇرغۇچىلار ئۆز مۇنبىرىدىكى ئىلان قىلدۇرۇلغان (مۇنبەر ئىسلاھاتىغا ئالاقىدار تىمىلاردىن باشقا) مۇنازىرە تىمىلىرىغا بىردەك قاتناشماسلىقى لازىم . ئادەتتە مۇنازىرە تىمىلىرىدە پىكىر قىلىش جەھەتتىن ئىككى تەرەپكە بۆلۈنۈش كىلىپ چىققاچقا مۇنبەر قۇرغۇچىلار پىكىر قىلغاندا بىر تەرەپكە ئىغىپ كىتىشتىن ساقلانماق تەسكە توختايدۇ . شۇڭا بۇنداق تىمىلاردا ھېسياتىنى قەدىرلىشى لازىم . بۇنداق بولغاندا بىر تەرەپكە ئىغىپ كىتىپ مۇشۇ سەۋەپتىن قارشى تەرەپنى ئوسال ئەھۋالغا چۈشۈرۈپ قويۇشتىن ساقلانغىلى ، قارشى تەرەپكە بىسىم بولۇپ قىلىشتىن ساقلانغىلى بولىدۇ . 9. مۇنبەر قۇرغۇچىلار تەشۋىقاتقا ئەھمىيەت بىرىش لازىم .
مۇنبەر قۇرغۇچىلار مۇنبىرى قۇرۇلۇشتىن بۇرۇن ھەم قۇرۇلۇش داۋامىدا تەشۋىقاتنى ياخشى ئىشلەش لازىم . قىرىنداش مۇنبەرلەر بىلەن ئىتىپاقلىقنى كۈچەيتىپ تەشۋىقاتنى ياخشى ئىلىپ بىرىش لازىم . تەشۋىقات ياخشى بولغاندىلا مۇنبەرنى تېخىمۇ ياخشى يۈرۈشتۈرگىلى بولىدۇ . 10. مۇنبەر قۇرغۇچىلار 2 پەسىلدە بىر قېتىم مۇنبەردىن خۇلاسە چىقىرىش لازىم .
مۇنبەر قۇرغۇچىلار ئۆز مۇنبىرىنىڭ تىما يوللاش ، ئىنكاس يىزىش شۇنداقلا مۇنبەرنىڭ تۈرلۈك باشقۇرۇش پائالىيەتلىرى ھەم مۇنبەر پائالىيىتىدىن 2 پەسىلدە بىر قېتىم خۇلاسە چىقارسا مۇشۇ ئارقىلىق كىيىنكى مۇنبەر پائالىيىتى تېخىمۇ ياخشى ئىلىپ بارغىلى بولىدۇ ، دەپ قارايمەن . مۇمكىن بولسا بىرەر خاتىرىگە مۇنبەرنىڭ كۈندىلىك پائالىيىتىدىن «مۇنبەر خاتىرىسى» دىگەندەك خاتىرىلەرنى قالدۇرۇش لازىم . بۇ خۇلاسە چىقىرىشقا پايدىلىق . يۇقارقىسى كەمىنەنىڭ تور مۇنبەرلىرىگە ئىشتىراك قىلغان مۇشۇ قىسقىغىنە ۋاقىتتىن بۇيانقى ھېس قىلغانلىرىم . خۇددى دۇنيادا مۇكەممەل شەيئى بولمىغىنىدەك ، يازمامدا سەۋەنلىكلەردىن ساقلىنالمىغانلىقىم تەبىئى . ساھەداشلىرىمنىڭ تەنقىدى تەكلىپ - پىكىرلىرىنى بىرىشىنى ئۈمىد قىلىمەن . 2008 - يىلى 4 - ئاينىڭ 30 - كۈنى
[ baturjangqi تەرپىدىن 2008-04-30 14:33 قايتا تەھرىر ]