ھېلىلا ئالدىمدىن ئۆتتى بۇ ناخشا

( 1 )
ئوغۇزخان بىر ئوتلام ئىچتى نەۋرۇزدىن ،
تۇمارس بىرتال گۈل ئۈزدى نەۋرۇزدىن .
نۇزۇگۇم قەشقەرنى كۆردى نەۋرۇزدىن ،
ئۇيغۇرلار باھارنى سۈزدى نەۋرۇزدىن .

( 2 )
بىز بۈگۈن كۆرىمىز باغدىكى گۈلنىڭ ،
باھارنىڭ كۆكسىدە پورەكلىشىنى .
سەھەردە تۇغۇلغان بىر تال مايسىنىڭ ،
يېشىلرەڭ ئاۋازدا پىچىرلىشىنى .

كۆرىمىز ۋەيەنە قۇشنىڭ قانتىدا ،
شامالدەك يەلپۈنۈپ تۇرغان ۋىسالنى.
ھۆرمەتتە ئاسىمىز باغنىڭ بوينىغا ،
گۈللەردىن تون كىيگەن يېشىل ئارماننى .

( 3 )
ئەي ، يارەب بىر ئاپقۇر شەربەت كەلتۈرگىن ،
نەۋرۇزنىڭ لېۋىدە ئىچەي مەن ئۇنى .
ئەڭ گۈزەل سۆزلەردىن تىزىپ گۈلدەستە ،
نەۋرۇزنىڭ كۆكسىگە ئاساي مەن ئۇنى .

نەۋرۇزنى يېتىلەپ ماڭغان ئېتىزلار ،
سالام دە ، ئاتامنىڭ ئاياغ ئىزىغا .
بىر تەشتەك گۈلدىكى يېشىل تەبىئەت ،
باھاردىن خەۋەر بەر ئانام باغرىغا .

نەۋرۇزدىن چېقىدۇ تورۇق ئات مىنىپ ،
بۇرىتى خەت تارتقان نەۋقىران ھايات .
سالام دە ، ئېتى يوق غېرىب شائىردىن ،
بۇرىتى خەت تارتقان ھاياتقا رەت – رەت .

نەۋرۇز ئۇ ياش پەسىل ، نەۋرۇز ئۇ غۇرۇر ،
نەۋرۇز ئۇ ۋەتەندۇر ، نەۋرۇزدۇر ئۇيغۇر .
ھېلىلا ئالدىمدىن ئۆتتى بۇ ناخشا ،
ھېلىلا ئالدىمدىن ئۆتتى جىنازا .