شاتۇت قىز (ھېكايە)

تاتلىق920

سالام تورداشلار سىلەرنىڭ ۋاقىت چىقرىپ بۇ ھېكايەمنى ئوقۇغۇنىڭلاردىن بەك خوشالمەن ،،مەن بۇ ئەسىرىمنى ئەلكۈيى مۇنبىرگىمۇ بەرگەن ،،بۇ تەڭرىتاغ مۇنبىردىكى مۇنبەرداشلارنىڭمۇ كۆرۈپ باھا بىرشىنى توغرا كۆردۈم ،،يېتەرسىزلىكلىرىم بولسا ئېيتىپ بىرشىڭلارنى ئۈمۈد قىلمەن ...رەھمەت سىلەرگە ...

ياخشى يېزىپسىز، داۋامىنى ساقلايمىز.

تاتلىق920

«سالام ئەقىدە، سىز مېنى تونۇمايسىز، شۇنداق بولسىمۇ سىزنىڭ ئەتە مەن بىلەن كۆرۈشمەكچى بولغىنىڭىزدىن بەك خۇش بولدۇم، سىزنى ساقلايمەن، سەردار» ئۇ ئەمەسكەن، ئۆزۈمنى توختىتالماي يىغلاپ تاشلىدىم.
    نەدە سىز بەگزاد، مەن خەق بىلەن كۆرۈشمەكچى، سىزگە ھەم مۇھەببىتىمىزگە ئاسىيلىق قىلغان ھالدا يات بىرسى بىلەن كۆرۈشمەكچى بولۇۋاتىمەن، ماڭا بىرەر قېتىم بولسىمۇ تېلېفون قىلغان بولسىڭىز، مەن سىزنى بىر ئۆمۈر ساقلايتىم ئەمەسمۇ؟؟
    شۇنداق قىلىپ سەردار بىلەن كۆرۈشتۈم، ئۇنى كۆردۈم يۈرىكىم قارتلا قىلىپ قالدى، ئالدىمدا تۇرغان بۇ بالا قارىماققا بەگزادقا بەك ئوخشايتى. بولۇپمۇ ئۇنىڭ تۇرقى، لېكىن ئۇ ئەمەس ئېدى، بۇ تامامەن باشقا بىرسى ئىدى.
    سەردار بىلەن كۆرۈشۈپ ئۇنىڭ بىلەن تاماق يىدۇق، ئۇ مىجەزى ئوچۇق، گەپدان بالىكەن، خېلى چىقىشىپ قالدىم. لېكىن كۆڭۈل ئېكرانىمدا يەنىلا بەگزاد.
    شۇنىڭ بىلەن سەردار بىلەن ئالاقەم باشلاندى، گەرچە ئۇنىڭغا مۇھەببەتلىك قەلبىمدىن پەقەت ئورۇن بولمىسىمۇ، لېكىن ئۇنى ھۆرمەتلەيتىم، ئۇنىڭ مۇھەببەتلىك سوئاللىرىغا باشقىچە جاۋابلارنى قايتۇراتتىم، ئۇلارنىڭ ئۆيىدىن ماڭا ئەلچى كىردى، بۇ كۈنكى ئازابىمنى بىر ئاللا بىر ئۆزۈم بىلىمەن.
    ياراتقان ئىگەم بەندەم دەپ ئويلىغان كىشىڭگە بۇ كۈنلەرنى كۆرسەتمىگەيسەن.
    مانا بۈگۈن تويۇم، ئەتىگەندە نىكاھقا سەردار بىلەن كىرىپ تۇرۇپمۇ يەنىلا ئۆزۈمنى بەگزادنىڭ ئادىمى، شاتۇتى دەپ ئويلىدىم، سەردارغىلا ئەمەس مېنى سۆيگەن ھەممىسىگە ئاسىيلىق قىلىۋاتاتتىم.
    قاردەك ئاق توي كۆڭلىكى كىيىپ رىستوراندا سەردارغا يېقىن ئولتۇرىمەن، ئۈستۈمدىكى توي كۆڭلىكى ئەمەس، بەلكى تۈمەنلىگەن قۇرت - قوڭغۇزلار مېنى چېقىۋاتقاندەك يۈرىكىمنى خۇددى بىرسى سۇغىرىپ ئېلىپ كېتىپ بارغاندەك ئولتۇرىمەن. بەگزاد نەدە سىز، سىز ياخشى كۆرگەن شاتۇتىڭىز مانا بۈگۈن باشقا بىرىنىڭ قەپىزىدە ئاھ ئۇرۇپ يىغلاۋاتىدۇ، قانىتى باغلىنىش ئالدىدا، سىز ئۈچۈن پەقەت سىز ئۈچۈنلا ئاياپ ساقلاۋاتقان ئەڭ نازۇك پەيلىرى باشقىلار تەرىپىدىن يۇلىنىش ئالدىدا تۇرماقتا. ئەجىبا تەقدىر دېگەن مۇشۇمۇ؟ ياق بۇ سىزنىڭ ئاللاھ چەكلىگەن، ئادەمنى مايمۇن ئورنىدا ئوينىتىدىغان شۇ نىجس ھاراقنى ئىچىپ ئېلىشقا تېگىشلىك بولمىغان رولنى ئېلىپ قالغانلىقىڭىزنىڭ، مەن بولسام ئۆز مۇھەببىتىمنى ئېتىراپ قىلماي، جاھىللىق قىلغانلىقىمنىڭ، جۈملىدىن سىز چۈشەندۈرۈشنى خالىماي، مەن چۈشىنىشنى خالىماي قەدرىگە يەتمىگەن مۇھەببىتىمىزنىڭ نەتىجىسى!
    تەقدىرگە تەن بەردىم، ئەمدى ئامالىممۇ يوق ئىدى، سەردارغا ئاسىيلىق قىلىشقا ھېچ ئاساسىم يوق ئىدى. چۈنكى ئۇ مېنى بەك ياخشى كۆرەتتى، قەدىرلەيتى، ئايايتى، سەۋەبسىز قىلغان قوپاللىقلىرىمغا سۈكۈت قىلاتتى. ھەتتا نەچچە قېتىم ئۇنىڭ بەزىبىر تەلەپلىرىگە قوشۇلماي ئۇنى شۇنداق سەت سىلكىگىنىمدە ئۇنىڭ كۆزلىردىكى ياشنى كۆرۈپ قالدىم. ھەر قېتىم «ئەمدى ئۇنداق قىلمايمەن» دەپ ئۆزۈمگە ۋەدە بېرەتتىم - يۇ، لېكىن يەنىلا شۇنداق يولسىزلىق قىلاتتىم.
    مۇشۇ كۈنلەردە مېنى ئۇنىڭ چەت ئەلدىكى كىچىك ئىنىسى ئۆزىگە قىزىقتۇرۇپ قالدى، سەردار ئىنىم - ئىنىملا دەيتى - يۇ، لېكىن ئۇنى نە تويىمىزدا كۆرمىدىم. سەردارنىڭ ئاتا - ئانىسىمۇ ئۇ بالىنىڭ ئىسمىنى پەقەت ئېغىزغا ئالمايتى. شۇڭا مەنمۇ چىش يېرىپ ئۇ بالا توغرىلىق گەپ ئاچمىدىم. چۈنكى سەردار مەندىن 4 ياش چوڭ بولۇپ، مەن ئۇنىڭ شۇ ئىنىسى بىلەن تەڭ ئىدىم، شۇڭا ئۇدۇللا بۇ گەپنى سوراش ماڭا سەل بىئەپ ئىدى.
    سەردار ئەتىگەندىلا ئىشىنىڭ بارلىقىنى ئېيتىپ چىقىپ كەتتى، ئۆي تازىلاۋاتاتتىم، تېلېفونۇم سايرىدى:
    - ۋەي، جېنىم مەن، تېلېفونۇم ئۆيدە قاپتۇ، سىز تالاغا چىقسىڭىز خاپا بولماي ماڭا يولىقىڭە بولامدۇ؟
    - ماقۇل، مەن ئاپىرىپ بېرەي.
    ماشىنىنى ھەيدەپ ئۇنىڭ يېنىغا ماڭدىم، تۇيۇقسىز ئۇنىڭ تېلېفونىغا تېلېفون كەلدى، ئالدىغا +بەلگىسى قويۇلغان بۇ نومۇردىن چەت ئەلدىن كەلگەنلىكىنى بىلدىم. سەل ئىككىلىنىپ تېلېفوننى ئالدىم.
    - ۋەي، ياخشىمۇسىز؟
    - ئالو. كىمۇ، سەردار ئاكامما؟ - بىر ئوغۇل بالىنىڭ ئاۋازى.
    - ھە، مەن ئايالى، ئاكىڭىز تېلېفونىنى ئۇنتۇپ قاپتىكەن، مەن يېنىغا ئېلىپ ماڭغان.
    - ۋوي، يەڭگە ياخشىمۇسىز، كەچۈرۈڭ تويۇڭلارغا قاتنىشالمىدىم، مەنمۇ توي كۈنىلا ئۇقۇپتىمەن ئاكامنىڭ توي قىلىدىغىنىنى، مەن بۈگۈن چۈشتىن كېيىننىڭ ئايروپىلانىدا قايتىمەن، شۇڭا ئاكامغا تېلېفون قىلغان.
    - ھە، ئەمىسە مەن دەپ قوياي، يولىڭىزغا قارايمىز.
    - ماقۇل، ئاللاغا ئامانەت.
    ئۇنىڭ ئېنىسى كېلىدىكەندە، شۇ خىياللار بىلەن سەردارنىڭ يېنىغا كەلدىم، ئۇنىڭغا ئېنىسىنىڭ كېلىدىغانلىقىنى ئېيتتىم، ئۇ بەك خۇش بولدى، لېكىن نېمىدىندۇر ئەنسىرىگەندەكمۇ قىلدى.
    - سەردار، ئېنىڭىز بىلەن سىلەرنىڭ ئوتتۇرىڭلاردا بىرە ئىش بولغانما؟ ھەتتا توي كۈنىمىزدە ئۇقۇپتۇ سىزنىڭ توي قىلىدىغىنىڭىزنى؟
    - شۇ، ئۇ دادامنىڭ سەل ئاچچىقىنى كەلتۈرۈپ قويغان، چەت ئەلگە بىزگە دەپمۇ قويماي كېتىپ بىزنى بەك ئەنسىرەتتى، ئاپام شۇ سەۋەبلىك يېقىلپمۇ چۈشتى، ئۇ كەلمىگىلى نەچچە يىل بولدى، مەنمۇ سۈرۈشتۈرۈپ يۈرۈپ ئۇنىڭ نومۇرىنى بەك تەستە تاپتىم.
    - ھە!!! مانا قايتىپ كېلىدىكەنغۇ؟
    شۇنداق دېدىم - يۇ، ئېسىمگە بەگزاد كەلدى، بەلكىم مەنمۇ ئۇنىڭ نومۇرىنى تاپالىغان بولسام بۈگۈن بۇ يەردە ئولتۇرماس بولغىيتىم.
    - توغرا، ئېنىڭىزنىڭ ئىسمى نېمۇ؟
    ئۇنىڭغا كەلگەن تېلېفون گېپىمىزنى ئۈزۈپ قويدى.
    سەردارنىڭ تېلېفوننى قويۇشىنى ساقلاپ ئولتۇردۇم. تۇيۇقسىز مېنىڭ تېلېفونۇم سايرىدى، ئاپامدىن كەلگەن ئېدى، ئاپامنىڭ مىجەزى يوق بولۇپ مېنى ۋاقتىم بولسا دوختۇرغا بىللە بېرىشىمنى ئېيتىپ تېلېفون قىپتۇ.
    - سەردار، بارسام بولامدۇ؟ ئېنىڭىز كەلمەكچىتى؟
    - مەيلى جېنىم، بېرىپ كېلىڭ، ئۆيدە ئاپاملار تۇرسا.
    شۇنداق بولسىمۇ كۆڭلۈم بىر قىسىم بولۇپ قالدى، ئۇنىڭغا بالدۇر قايتىپ كېلىدىغانلىقىمنى ئېيتىپ ئاپامنىڭ يېنىغا ماڭدىم. يولدا تۇيۇقسىز ئۇنىڭ ئېنىسى ئېسىمگە كەلدى «ئىسمى نېمە بولغىيتى، بولدىلا كەچتە ئاللاھ خالىسا كۆرۈشمەنغۇ.»
    ئاپامنىڭ قان بېسىمى ئۆرلەپ قاپتۇ، نەچچە كۈنلۈك دورا ئوكۇل ئېلىپ قايتتۇق.
    - ئاپا، سەردارنىڭ ھېلىقى ئىنىسى قايتىپ كېلىدىكەن، - دېدىممەن ئاپامغا.
    - ھوي، بالام ئۇنداق بولسا تېز قايتىڭ، سىز بولمىسىڭىز سەت تۇرىدۇ، بايىلام شۇنداق دېگەن بولسىڭىز ئۆزۈم كېلەتتىم ئەمەسمۇ؟
    تۇيۇقسىز ئۆز ئاپام ئۈچۈن بىر سائەت ۋاقتىمنىمۇ چىقىرالماي قېلىۋاتقىنىمدىن كۆڭلۈم تولىمۇ يېرىم بولدى، «قىز بالا تالانىڭ ئادىمى» دەپ بەك توغرا دەپتىكەن بۇرۇنقىلار.
    ئۆيگە كەلدى  ،سەردارنىڭ دادا - ئاپىسى ئىنىسىگە بولغان خاپىلىقلىرىنى پۈتۈنلەي ئۇنتۇپ قىن - قىنىغا پاتماي ئوغلى ئەڭ ياخشى كۆرىدىغان تاماق، نەرسىلەرنى تەييارلاپ ئوغلىنى ساقلاۋاتاتتى.
    مېنىڭ نېمىشقىدۇر كۆڭلۈم يېرىم ئىدى، بىلمەيمەن يۈرىكىم ئاللىقانداق بىر ئىشنى سەزگەندەك ئىتتىك سوقۇۋاتاتتى «ئۇلۇغ ئاللاھ ئۆزۈڭ بار، ياخشى ئىشلار بولسۇن»
    بىر چاغدا ھويلىغا ماشىنىنىڭ يوۇرقى چۈشتى، سەردارنىڭ ماشىنىسى دەرۋازنىڭ ئالدىغا كېلىپ توختىدى. ئۇلارنى كۆرۈشۈۋلسۇن دەپ مەن ھۇجرامغا كىرىپ تۇردۇم ھەم مەن بىر كېلىن تۇرۇپ ئۆزۈم بىلەن تەڭ ئەزەلدىن كۆرۈپ باقمىغان بالىنىڭ ئالدىغا يۈگۈرۈپ چىقىش، شەرىئەت ھەم ئەخلاققا ئۇيغۇنمۇ كەلمەيتى.
    دېرىزىدىن ئۇلارنىڭ ئارقىسىدىن قاراپ تۇردۇم «ھەجەپ تونۇش سىما؟ بەگزاد؟ ياق، ياق، كاللاڭنى سىلكىۋەت ئەقىدە، بۇ دېگەن يولدىشىڭنىڭ ئىنىسى، سېنىڭ قىيىن ئىنىڭ، ئەمدى بەگزاد يوق»
    ئۇلار كۆرۈشۈپ ئۈستەل ئورۇندۇققا كېلىپ ئولتۇرغاندا مەن قولۇمغا چاي چەينىكى كۆتۈرۈپ ئۇلارنىڭ يېنىغا چىقتىم.
    -ئەسسالامۇئەلەيكۇم.
    «ئۇلۇغ ئاللاھ، كۆزۈم كور بولسا بولمامدۇ، نەچچە يىل ياقى كېچە - كۈندۈز بىر كۆرۈشنى ئارزۇ قىلغان كىشىمنى بۈگۈن، مەن تامامەن ئارقامغا قايتالمايدىغان بۈگۈنگە كەلگەندە ئۇچرىتىش ئۈچۈن زار قىلغانمىدىڭ. مەن بۇنچىلىك كۈنلەرگە قالغۇدەك كىمگە يامانلىق قىلغان بولغىيتىم؟»
    ماڭا ئۆرۈلۈپ سالىمىمغا جاۋاب قايتۇرغىنى، يولدىشىمنىڭ ئىنىسى، مېنىڭ قىيىىن ئىنىم، مەن تۇنجى ياخشى كۆرگەن، مۇھەببىتىمىزنى رويقاپقا چىقىرالماي، سەۋەبسىز ئايرىلىپ كەتكەن بەگزاد ئىدى!
    چىرايىمنىڭ قانچىلىك دەرىجىدە ئۆزگىرىپ كەتكىننى ھېس قىلدىم، لېكىن ئۆزۈمنى ئوڭشىغۇدەك نەدىكى كۈچ مەندە؟
    - نېمە بولدى قىزىم، مىجەزىڭىز يوقمۇ؟
    - ھە؟ بۇ ...بۇ ... شۇ سەل بېشىم قىيىپ ... مانا تۇنجى يالغانچىلىقىم باشلاندى.
    - بەگزاد، بۇ قىز سەردار ئاكاڭنىڭ ئايالى، يەڭگەڭ بولىدۇ.
    شۇنداق، مەن يەڭگىڭىز بەگزاد، خاتالىشىپ قالمايلى، سىز مېنىڭ ئىنىم، مەن ئاكىڭىزنىڭ ھالاللاپ ئىككى دۇنيالىق ئالغان ئايالى، مەن ئەمدى شاتۇتىڭىز ئەمەس.
    ئۇ ھېچقانداق ئىپادىسىز ماڭا قاراپ قالدى، كۆزلىرىدە نۇرغۇن سوئال، مەن سوئاللىرىڭىزغا جاۋاب بېرەلمەيمەن، قولۇمدىن كەلمەيدۇ، سىزگە بېرىلىدىغان ئەڭ توغرا جاۋاب مەن يەڭگىڭىز.
    بۇنداق ھاڭۋېقىپ تۇۇىۋېرىشقا بولمايتى.
    - سالامەت كېلىۋالدىڭىزمۇ ئىنىم، - دېدىم مەن ئۆزۈمنى سەل ئوڭشاپ.
    - خۇداغا شۈكرى، سىزچۇ كۆنۈپ قالغانسىز يېڭى تۇرمۇشىڭىزغا ھە؟ يەڭگە.
    ئۇنىڭ «يەڭگە» دىگەن سۆزى شۇنچىلىك زەرد بىلەن چىقتىكى يۈرىىمگە پىچاق تىققاندەك ئاغرىپ كەتتى.
    - ھە، كۆنۈپ قالدىم.
    قىيىن ئاپام بەگزادتىن زادى نېمە ئۈچۈن شۇ چاغدا خوشمۇ دەپ قويماي كەتكەنلىكىنى، نېمىشقا بۇنچە ئۇزۇن يوقاپ كەتكەنلىكىنى ئاچچىقلاپ ھەم كۆڭلى يېرىم بولۇپ سوراشقا باشلىدى.
    بەگزاد بولسا ماڭا «بۇنىڭ سەۋەبىنى سەن بىلىسەنغۇ؟ قېنى دېمەمسەن» دېگەندەك نەپرەت ھەم ئېچىنىش ئىچىدە قاراپ ئولتۇراتتى، تۇيۇقسىز ئۇنىڭ كۆزىدىن سىرغىپ چۈشكەن ياشنى كۆردۈم.
    ئاھ خۇدا! نېمە ئۈچۈن، بۇ نېمە ئۈچۈن، نېمىشقا بۇنداق بولىدۇ؟
    - مېنى كەچۈرۈڭلار، مەن ئەرزىمەيدىغان ئىشلار ئۈچۈن سىلەرنى تاشلاپ كېتىپتىكەنمەن، بەك پۇشايمان قىلىۋاتىمەن.
    «نېمە؟ ئەرزىمەيدىغان ئىشلار ئۈچۈن؟ مەن ئەمدى ئەرزىمەس بولدۇممۇ؟ مەن مەجبۇر قىلغانمۇ سىزنىڭ كېتىشىڭىزنى؟»
    ئۇلارنىڭ يېنىدا داۋاملىق تۇرىۋېرىشقا تاقىتىم قالمىدى، بېشىم قېيىۋاتىدۇ دەپ قويۇپ ھۇجرامغا كىرىپ كەتمەكچى بولدۇم، ئۆيۈمگە يېنىپ كىردىم، ياشلىرىم سەلدەك ئاقماقتا، نېمە ئۈچۈن ئېقىۋاتىدۇ؟ شۇنچە يىل كۈتكەن ئادىمىمنى كۆرگەنلىكىم ئۈچۈنمۇ؟ ياكى مىنۇت ئۇنۇتماي ياخشى كۆرگەن ئادىمىمنىڭ نەپرىتىگە قېلىپ ئۇنىڭ ئۈچۈن ئەرزىمەس ئادەم بولۇپ قالغانلىقىم ئۈچۈنمۇ؟
    - ئەقىدە، مەن سىرتقا چىقىپ كىرەي ھە؟ - سەردار ۋارقىراپ شۇنداق دېدى - دە، چىقىپ كەتتى.
    قارىسام ئۇلارمۇ تاماق يېيىش ئۈچۈن ئولتۇرۇپتۇ، ياشلىرىمنى سۈرتۈپ ئۇلارنىڭ يېنىغا چىقتىم. تاماقنى مەن يېدىممۇ تاماق مېنى يېدىمۇ بىلمەيمەن، ئۆمرۈمدە بۇنچىلىك تەستە تاماق يېگىنىمنى بىلمەيمەن. قاچىلارنى يىغىشتۇرۇپ يۇيۇش ئۈچۈن ئېلىپ ماڭدىم، ئاشخانىغا كىرىپ يەنە يىغلىدىم.
    - بۇ ياشلار نىمە ئۈچۈن، كىم ئۈچۈن، ئەقىدە. سىزنى دەپ نەچچە يىل سەرسان بولغان ئادەمنىڭ ئاكىسىغا خوتۇن بولۇپ ئۇنىڭغا يەڭگىلىك مۇھەببىتى بېرىۋاتقانلىقىڭىزغا تەسىرلىنىپمۇ؟ ياكى ماڭا يەنە بىر قېتىم كۆڭلىڭىزدىكىدەك جاۋاب قايتۇرۇۋالغانلىقىڭىزدىن پەخىرلىنىپمۇ؟
    چۆچۈپ ئارقامغا قاردىم، بەگزاد ماڭا چۈشىنىكسىز بىر خىل نەزەردە قاراپ تۇراتتى.
    - بۇ، بۇ يەدە نېمە قىلسىز، چىقىپ كېتىڭ سەت تۇرىدۇ.
    - نېمە، سىز، سىز سەتنى بىلەمسىز، سىز نومۇسنى بىلسىڭىز مېنىڭ ئاكامغا تىگەمتىڭىز؟
    - نېمە دېگىنىڭىز بۇ؟ مەن نېمە بىلەي، بەگزاد بىلسەم سىزچە بۇ توينى قىلارمەنمۇ؟
    - بىلمەيسىز، مېنى مۇشۇنچىلىك ياخشى كۆرەمتىڭىز؟ نېمىشقا مېنى ساقلىمايسىز.
    - ساقلىدىم، سىزدىن نە ئۇچۇر بولمىسا يەنە قانداق ساقلاي، ئەمدى بولغاندا ماڭا نېمە دەيسىز؟
    - 2 يىل، ئاران 2 يىل بولدىغۇ؟ ئەجىبا توي قىلىشتىن بۇرۇن بۇ ئۆيدە مەندەك بىرسىنىڭ بارلىقىنى پەقەت بىلمىدىڭىزما؟ ئاكامدىنمۇ ئاڭلىمىدىڭىزمۇ؟
    - بەگزاد، مەن راستىنلا...
    - بولدى بەس، - ئۇ ماڭا يېقىن كېلىشكە باشلىدى- بۇنداق قىلماڭ بەگزاد، ئۆتۈنەي، مەن ئاكىڭىزنىڭ ئايالى...
    - بىلمەن، لېكىن سىز يەنىلا مېنىڭ شاتۇتۇم، بۇ مېنىڭ قەلبىمدە ئۆزگەرمەس ھەقىقەت، سىزنى ئاكامدىن تارتىۋالالمايمەن، سىزنىڭمۇ ئۇنىڭدىن ئايرىلىشقا ھەققىڭىز يوق، ياخشى كۆرىدىغان ئادىمىڭىز پەقەت مەن،ئاكامغا ھالال خوتۇن سىز خالاس، بۇ يولنى ئۆزىڭىز تاللىدىڭىز، ئەمدى باسماي ئامالىڭىز يوق، سىز ماڭا قەرزدار، ئىلگىرىمۇ سوئاللىرىمغا غەيرى جاۋابلارنى بېرىشكە ئۇستا ئىدىڭىز، ئەمدى ئاكام ئىككىمىزنىڭ سوئاللىرغا جاۋاب بېرىشنى داۋاملاشتۇرۇڭ، مەن سىزنى سۆيمەن!
    ئۇنىڭ تىنىقلىرى يۈزۈمگە ئۇرۇلدى.
    - بەگزاد بالام، قېنى سەن چىقىپ مېۋە يە؟
    ئۇ مېنى زەردە بىلەن ئىتتەردى - دە، ياشلىرىنى سۈرتىۋېتىپ چاققانلىق بىلەن ئارقىسىغا بۇرۇلۇپ چىقىپ كەتتى.
    ( داۋامى بار)

haltakoqa

  پوۋېستمۇ ھېكايىمۇ؟، ئۇزۇن ھېكايە دەمدۇق يە!

ئالمىرە

بىرىنجى قەۋەتتىكى ئىنكاسنى ئوقۇپ بولدۇم . بۇ كۆرنۈشلەر كۆز ئالدىمدىن بىر قىتىم نامايەن بولغاندەك بولدى ، قەلىمىڭىز ھەقىقەتەن بەك كۈچلۈك ئىكەن .

تاتلىق920

قايسى بىر دەردلىرىمنى ئېيتاي، زارىقىپ بىر كۆرۈۋېلىشنى ئارزۇ قىلغان ئادىمىمنى بۇنداق ھالەتتە، بۇنداق شارائىتتا كۆرۈشۈم ماڭا ھەقىقەتەن بەك ئېغىر كەلدى، ئۇنىڭدىن مېھىر كۈتكەن كۆزلىرىدىن تاپشۇرۇپ ئالغىنىم ئالەمچە نەپرەت بولدى، بەگزاد مەندىن شۇنداق ئۆچ ئېلىۋاتاتتىكىن ئەزەلدىنلا تۇرۇش ماڭا ئېغىر كېلىۋاتقان بۇ ئائىلىدە ئەمدى تۇرۇش مۇمكىن بولماسلىق تەرىپىگە ئۆتۈۋاتاتتى، لېكىن بۇ ئۆيدىن نېمىنى، كىمنى سەۋەب قىلىپ چىقىپ كېتىمەن، سەردارنىمۇ؟ ياق، ئۇنىڭدىن ماڭا ھېچقانداق ئازار يەتمىسە، بېشىغا ئېلىپ كۆتۈرۈۋاتقان ئادەمدىن قانداق قۇسۇر تاپىمەن؟ بار ئاسىيلىقنى مەن ئۇنىڭغا قىلىۋاتسام، قىيىن ئاتا - ئاپامغا تېخى گەپ كەتمەيدۇ، مۇشۇ ئائىلىگە كىرىپ ئۇلارنىڭ بىرەر قېتىم ماڭا يات كۆزىدە قارىغانلىقىنى بىلمەيمەن، خۇددى ئۆز قىزىغا مۇئامىلە قىلغاندەك قاراپ كېلىۋاتقان بۇ پەرىشتە سۈپەت كىشىلەرنىڭ نەرىدىن يامانلاي، ئەگەر شۇنداق قىلسام ئىككى دۇنيا قارا يۈز بولۇپ كېتەرمەن، بەگزادنى تېخىمۇ دېيەلمەيمەن، چۈنكى مېنىڭ سەردارغا ئۇنىڭ ئاكىسى ئىكەنلىكىنى بىلمەي تېگىپ قالغانلىقىمغا بەگزاد ئىشەنمەيۋاتقان يەردە بۇ ئائىلىدىكىلەرنىڭ، كىشىلەرنىڭ ئىشنىشى مۇمكىنمۇ؟ بولۇپمۇ ھازىرقىدەك ئەجىلى توشۇپ ئاللا تەرىپىدىن جېنى ئېلىنىۋاتقان كىشىلەرنىڭمۇ ئارقىسىدىن قىلچە خىجىل بولماي سۆز - چۆچەك قىلىۋاتقان كىشىلىرىمىزنىڭ مېنىڭ بۇ ئائىلىدىن چىقىپ كەتكىنىمنى توغرا چۈشنىشىنى كۈتۈش ئەسلىدىنلا بىر ئەخمىقانىلىك.
    كۈنلىرىم ئاكا - ئۇكا ئىككەيلەن ئالدىدا رول ئېلىش بىلەن ئۆتمەكتە، بەگزاد ئۆيدىكىلەر ئالدىدا ماڭا شۇنچىلىك كۆيۈنگەندەك مۇئامىلە قىلاتتى - يۇ، يالغۇز قالساقلا مېنى قىيناپ، تەنە گەپ قىلىپ ھېچ ھالىمغا قويمايتى. بولۇپمۇ ئەتىگەندە ھۇجرامدىن چىققاندا ياكى بولمىسا كەچتە ئارام ئالغىلى ماڭغاندا ئۇ ماڭا شۇنچىلىك نەپرەت بىلەن قارايتىكى ئۆزۈمنى قويىدىغان يەر تاپالماي قالاتتىم، ئۇلۇغ ئاللاھ ماڭا ئۆزۈڭ مەدەت سەۋر ئاتا قىلغىن.
    سەردار سودا ئىشى بىلەن ئالمۇتاغا 3 كۈنلۈك چىقىدىغان بولدى، بۈگۈن ئەتىگەندە ئۇنىڭ كىيىملىرىنى تەييارلاپ بېرىۋېتىپ ئىختىيارسىز يىغلاپ تاشلىدىم، سەردارغا چىدىمايمۇ ياكى ئۇ كەتكەندىن كېيىن بەگزادنىڭ ماڭا قىلىدىغانلىرىدىن يۈرىكىم ئاغرىپمۇ، ھېچ بىلمىدىم.
    - بۇنداق يىغلىسىڭىز مەن قانداق ماڭىمەن، ئاللا خالىسا 3 كۈندە قايتىپ كېلىپ بولىمەن، بىرەر ئىشتىن قىينالسىڭىز بەگزادقا دەڭ، ئۇ قىلىشىپ بېرىدۇ.
    - شۇنداق، يەڭگە ئاكام كەتسە مەن بار، ئۇمۇ تېزلا قايتىپ كېلىدۇ. 3 كۈن دېگەن بىردەمدە ئۆتۈپ كېتىدۇ. يا ئۇ بىر 3 يىل بولمىسا.
    ئۇنىڭ چاقچاق قىلىپ ئەمما ماڭا نىسبەتەن مەنىىسى چوڭقۇر بولغان گەپلىرى ماڭا زىقتەك سانجىلدى.
    سەردارنى ئۇزىتىپ قويۇپ قىيىن ئاتام - ئاپاممۇ باردىغان يېرى بارلىقىنى ئېيتىپ چىقىپ كەتتى. مەنمۇ ئاپامنىڭ يېنىغا بېرىپ كېلىش ئۈچۈن تەييارلىق قىلىشقا باشلىدىم.
    - نەگە، شاتۇتۇم، ئۇچماقچىمۇ؟ سىز چىقىپ كەتسىڭىز ماڭا كىم تاماق قىلىپ بېرىدۇ؟
    ئۇ كەينىمدىن ئەگىشىپلا ھۇجرامغا كىرگەن ئىدى.
    - بازاردىكى ئاشخانىلار تاقىلىپ كېتىپتىمۇ ياكى سىزگە تاماق ساتمامدىكەن، - دېدىممەن زەردە بىلەن.
    - ئوچۇقمۇ، تاقاقمۇ، ساتامدۇ، ساتمامدۇ بۇنىسى زۆرۈر ئەمەس، ھېچ يەرگە چىقمايسىز، مېنىڭ سىزدىن سورايدىغان نۇرغۇن سوئاللىرىم بار.
    ئەمدى چىداپ تۇرۇشقا تاقىتىم قالمىدى.
    - بولدى بەس! يېتەر بەگزاد، ماڭا نېمىشقا بۇنداق قىلسىز، سىزنىڭ ماڭا بۇنداق قىلىدىغانغا نېمە ھوقۇقىڭىز بار، مەندەك ئەرزىمەس ئادەمنى تاشلاپ كەتكەن 2 يىلدا بىرەر قېتىم ئىزدەپ قويمىغان كىشى ئۆزىڭىز تۇرۇپ، مەندىن يەنە نېمە كۈتىسىز؟ مېنى شۇنچە ۋاقىت قىينىغىنىڭىز يەتمىگەندەك يەنە نېمە كۈن بۇ ماڭا؟ ئەجىبا ماڭا ئۆزۈم قىلچە ياخشى كۆرمەيدىغان ئادەمگە ياتلىق بولۇش، ئۆزۈم ياخشى كۆرگەن ئادىمىمگە يەڭگە بولۇش ئاسانمۇ؟
    - ئەمسە ماڭىچۇ، ئەقىدە، دۆتلۈك قىلىپ خاتالىق ئۆتكۈزگىنىم راست، كىم دەيدۇ سىزنى مېنى ئىزدىمىدى دەپ، مەن سىزگە بىۋاسىتە تېلېفون قىلىشتىن خىجىل بولۇپ نۇرغۇن خەت يېزىپ بىر ئاغىنەمدىن ئۇ مۇشۇ ياققا قايتقاندا ئەۋەتتىم، لېكىن بىرەرسىگىمۇ ئۇچۇر قايتۇرمىدىڭىز، ئەگەر مېنى كەچۈرسە ماڭا چوقۇم تېلېفون قىلىدۇ دەپ خەتكە نومۇرۇمنى يازدىم، لېكىن تېلېفونمۇ قىلمىدىڭىز، ھالا بۈگۈنكى كۈنگە كەلگەندە سىزنى ئاكامنىڭ خوتۇنى، يەڭگەم سۈپىتىدە، ئۇنىڭ ھۇجرىسىدا كۆرۈۋاتىمەن، ئۆزۈم ياخشى كۆرگەن، تېخى قولىنىمۇ تۇتۇشقا ئۈلگۈرمىگەن قىزىمنى ئۆزۈم كېلىن قىلىپ ئەكىرىمەن دەپ ئويلىغان ئۆيۈمدە باشقا بىر ئەر كىشى بىلەن كەچلىكى «خەيىرلىك كەچ» دەپ ئۇزىتىپ قويۇپ سەھەردە «خەيرلىك سەھەر» دەپ كۈتۈۋالىمەن، بۇنىڭغا زادى كىم سەۋەبچى؟ ماڭا دەڭە!
    بەگزادمۇ، مەنمۇ يىغلىدۇق، ئۇ مېنى ئىزدەپتىكەن، لېكىن مەن ئۇ ئەۋەتكەن خەتلەرنىڭ بىرسىنىمۇ تاپشۇرۇپ ئالمىدىم.
    - سىز كىمگە بەرگەن ئۇ خەتلەرنى، مەن راستىنلا تاپشۇرۇپ ئالمىدىم.
    - ئەكبەر دېگەن ئاغىنەمگە.
    - ئەمسە ئۇنىڭدىن سوراپ بېقىڭ، ماڭا راستلا بەرمىدى.
    - ئۇ شۇ يىلى مۇشۇ يەردە قاتناش ۋەقەسىدە قازا قىلدى، لېكىن ئۇ ماڭا سىزنىڭ قولىڭىزغا تەگكەنلىكىنى ئېيتقان.
    - ياق، بەگزاد، مەن ئالمىدىم، ماڭا ئىشىنىڭ.
    - بولدى، ئەمدى ئويۇن ئوينىماڭ، سىز مەندىن ئۆچ ئېلىش ئۈچۈن بۇ ئويۇننى ئويلاپ چىقتىڭىز.
    خەتنىمۇ ئالمىغان بولۇڭ، ئەجىبا سەردارنىڭ مېنىڭ ئاكام ئىكەنلىكىنى راست بىلمەمتىڭىز؟
    ئۇنىڭغا جاۋاپ قايتۇرغۇدەك ماجالىم قالمىدى. تويۇقسىز ئۇ مېنى قۇچاقلىدى، ھەرقانچە قىلىپمۇ ئۇنىڭ قولىدىن چىقالمىدىم. مەن كۈچىگەنسېرى ئۇ تېخىمۇ ئەسەبىيلىشەتتى، ئۇنىڭغا يالۋۇردۇم، «بەگزاد بۇنداق قىلماڭ، ئۆتۈنەي»
    - سىز ئىككىلىمىزنى خىيانەتچى، گۇناھكار قىلدىڭىز، سىزگە قانچىلىك مۇھەببىتىم بولسىا شۇنچىلىك نەپرىتىم بار، كۆز ئالدىمدا ئاكامغا خوتۇن بولۇشىڭىز مېنى ساراڭ قىلاي دىدى، ئاللاھ ئىككىلىمىزنىڭ جاجىسىنى بەرسۇن، بۇنداق خىيانەتچى، ئاسىيى سۆيگۈگە ئاللاھ لەنەت قىلسۇن.
    ئۇ مېنى قانداق كۈچەپ تارتىپ قۇچاقلىغان بولسا شۇنداق كۈچەپ ئىتتەردىدە چىقىپ كەتتى.
    ئۇ مېنى ئىزدەپتىكەن، لىكىن مەن ئۇنى ساقلىمىدىم، چۈنكى ئۇ يازغان خەتلەرنىڭ بىرسىمۇ ماڭا تەگمىدى، شۇنىڭ ئۈچۈن بۇ قىلچىمۇ ئۇچۇر بولمىغان سۆيگۈدىن ئۈمىدىمنى ئۈزۈپ بۈگۈنكى مۇھەببىتىم بولمىغان تۇرمۇشقا قەدەم قويغىنىم ھەق.
    ئەمسە ئۇ خەتلەر قېنى؟ ئۇ بالا قازا قىپتۇ، ئۇ نېمە ئۈچۈن ماڭا بەردىم دەيدۇ؟ ئۇ پۇل بولمىسا يا ئۇ بالا ئۆزى ئېلىۋالىدىغانغا، كۈنلىرىم تىڭىرقاش، «يۈز مىڭلىغان نېمە ئۈچۈن» لەر ئىلكىدە ئۆتمەكتە، سەردار ئەتە كەلمەكچى، ئۇ كېتىپ مەنمۇ ئىككى كۈن ياقى مىجەزىم يوق دەپ ئاپامنىڭ ئۆيىگە يېنىپ كەلگەنىدىم، بۈگۈن قايتمىسام ئامالىم يوق، لېكىن ئۇ ئۆيدە بىر مىنۇتمۇ تۇرغۇدەك مادار، غەيرەت مەندە قالمىدى، چۈنكى بەگزاد مېنى ھەم ئۆزىنى بەك قىيناپ كېتىۋاتاتتى، نېمىلا دېسەم ئاڭلار ئەمەس.
    تۇيۇقسىز تېلېفونۇم سايرىدى، بەگزاد، ئاھ خۇدا!
    - سالام يەڭگە، قانداق ئەھۋالىڭىز؟
    تۇنجى ئاڭلىغان بۇ سۆز يۈرىكىمدىن يەنە بىر تۆشۈك ئاچتى.
    - ياخشى.
    - ھە، بۈگۈن قايتىپ كېلىدىكەنسىز، شۇ ئاپام مېنى سىزنى ئەكەلگىن دەپ بۇيرىغان، مەن ھازىر ئۆيىڭىزگە كېلەي دېدىم، چۈشۈپ تۇرامسىز؟
    - بۇ، بۇ، بىكارغا ئاۋارە بولۇپسىز.
    دۈت... دۈت... ئۇ گېپىمنى ئاڭلىمايلا تېلېفوننى قويىۋەتتى، ئۇلۇغ خۇدا!
    ئەنە ئۇ يەردە مېنى شۇنداق كېلىشكەن، بىر كۆرۈش بىلەن خېلى مەن مەن دېگەن قىزلارنى ئاللىقانداق خىياللارغا سېلىپ قويىدىغان، مېنى سۆيگەن مەن ھەم سۆيگەن، لېكىن ۋىسالىمىزغا يېتەلمىگەن، مېنىڭ يۈرىكىمنى پۈتۈنلەي ئىگەللەپ بولغان بەگزادىم ساقلاپ تۇرىدۇ، لېكىن مەن ئۇنىڭ سۆيگۈنى سۈپىتىدە ئەمەس، بەلكى ئاكىسىنىڭ ئايالى، يەڭگىسى ئورنىدا ئۇنىڭ يېنىغا كېتىپ بارىمەن.
    بەگزادقا تۈزۈكمۇ قارىيالماي ئۇدۇل ماشىنىغا چىقتىم.
    - ياخشى بولۇپ قالدىڭىزمۇ يەڭگە؟
    - ياخشى ئۇكام، سىزچۇ؟ ئاپام، داداملار ياخشىدۇ؟
    - ھەممىمىز ياخشى، خۇداغا شۈكرى.
    يول بويى ئوتتۇرىلىقىمىزدا ئۇنىڭدىن باشقا گەپ بولۇنمىدى، ماشىنىنىڭ ئارقىىسىدا ئۇنىڭغا قاراپ ئولتۇرىمەن، مۇشۇ تاپ ئۇنىڭغا ئەركىلىگۈم، ئۇنىڭ بوينىغا ئېسىلىپ تۇرۇپ 2 يىل ياقى ئۇنى قانچىلىك سېغىنغانلىقىمنى، ئۇنى قانچىلىك تەشنالىق بىلەن كۈتكەنلىكىمنى ئېيتقۇم بار، لېكىن مەن بىر توي قىلغان، يەنى كېلىپ ئۇنىڭ ئاكىسىنىڭ نىكاھىدىكى ئايال، ئۇنىڭغا ئېسىلىشىم ئەمەس، ئەسلىدە باشقا كىشىنىڭ نىكاھىدا تۇرۇپ بەگزادنى ياخشى كۆرۈشۈم، ئۇنى كىچە - كۈندۈز سېغىنىشىمنىڭ ئۆزىلا بىر گۇناھ، لېكىن مەن مانا مۇشۇ «ئاسىي سۆيگۈ» بىلەنلا چاڭقىغان كۆڭلۈمنى ئازراق بولسىمۇ سۇغۇرالايمەن، چۈنكى بەگزادتىن باشقا ئادەمنى كۆڭۈل ئۆيۈمگە باشلاپ كىرىش، باشقا بىرىنى ياخشى كۆرۈش ئەسلا قولۇمدىن كەلمەيدۇ، مېنىڭ بۇ كۆڭلۈم، يۈرىكىم ئاللىقاچان بەگزادقا مەنسۇب بولۇپ بولغان، بەڭباش كۆز ياشلىرىم كۆڭۈل نىدالىرىمغا تەسلىم بولۇپ سىرغىپ چۈشتى، سۈرتۈشكە ئۈلگۈرەلمىدىم، بەگزاد كۆرۈپ قالدى - يۇ، لېكىن ھېچقانداق ئىپادە بىلدۈرمىدى.
    تۇيۇقسىز ماشىنىنىڭ ئۆي تەرەپكە ئەمەس، بەلكى دەريا بويى تەرەپكە قاراپ كېتىۋاتقانلىقىنى ھېس قىلدىم.
    - نەگە بارىمىز بەگزاد؟ - ئۇنىڭغا تەلمۈرۈش ھەم ئۆتۈنۈش ئىلكىدە دېدىم مەن.
    ئۇ ماڭا جاۋابنىڭ ئورنىدا كۈلكە قايتۇردى، مەن تۇمشۇقۇمنى ئۇچلاپ سىرتقا قاراپ ئولتۇردۇم. ئۇ ماشىنىنى تۇيۇقسىز ئادەم ئازراق كېلىدىغان يەرگە ئەكىلىپ توختاتتى.
    - چۈشىڭە ماشىنىدىن، - دېدى ئۇ قوپاللىق بىلەن.
    بۇ ھالدا ئۇنىڭ بىلەن ئارتۇق گەپ تالاشقۇم كەلمىدى.
    - ئۆيگە كېتەيلى، ئاپاملار ئىككىمىزنىڭ بىللە ئىكەنلىكىنى بىلىدۇ، كەچ قالساق سەت تۇرىدۇ.
    - خاتىرجەم بولۇڭ، مەن ئاپامغا سىز بىلەن تاماقنى يەپ كېلىدىغانلىقىمنى ئېيتقان.
    «شۇنداق بولسىمۇ...» مەن بوش ئاۋازدا غوتۇلدىدىم.
    تۇيۇقسىز ئۇ مېنى ئۆزىگە قاراتتى، كۆزلىرىدە ياش.
    - مانا مۇشۇنداق، ھە دېسە غوتۇلداپلا يۈرىدىغان مېنىڭ دۇنيادىكى ئەڭ ئوماق شاتۇتۇم ئىدىڭىز، نېمىشقا بۇنداق قىلىسىز، ماڭا دەڭە ئەقىدە، نېمىشقا ماڭا ئاسىيلىق قىلىسىز، ئۇ خەتلەرنى ئېلىپ تۇرۇپ يەنە نېمىشقا ماڭا يالغان گەپ قىلىسىز، كۆز ئالدىمدا ئۆز ئاكامغا خوتۇن بولۇپ مېنى قىينىغىچە مېنى ئۆلتۈرۈپلاۋەتسىڭىز بولمامدۇ؟
    - بەگزاد، مەن ئۇ خەتلەرنى راستلا ئالمىدىم، ماڭا ئىشنىڭ.
    - يالغان، سىز ئەزەلدىن مېنىڭ سوئاللىرىمغا غەلىتە جاۋاب قايتۇرۇپ كەلگەن. لېكىن سىزنى مېنى ئالدايدۇ دەپ ئويلىماپتىمەن.
    ئۇنىڭ سۆزلىرىدىن، سىلكىشلىرىدىن ئۆزۈمنى يوقىتىپ قويايلا دېدىم.
    - بولدى، يېتەر، ئەمدى تۈگىسۇن، مەيلى سىز ئىشىنىڭ - ئىشەنمەڭ، مەن ئاللىقاچان باشقا بىرىنىڭ، يەنى سىزنىڭ ئاكىڭىزنىڭ بولۇپ بولدۇم، گەرچە يۈرىكىم، كۆڭلۈم سىزگە مەنسۇب بولسىمۇ، لېكىن جىسمىم باشقا بىرىگە مەنسۇب، سىزنى قانچىلىك ساقلىغىنىمنى، ياخشى كۆرگىنىمنى بىر ياراتقان ئىگەم، بىر ئۆزۈم بىلىمەن، سىزنى قەلب تۆرۈمنىڭ ئەڭ ئۈستىدىكى تەختكە ئولتۇرغۇزدۇم، باشقا بىرىنى كىرگۈزمەسلىك ئۈچۈن مەڭگۈلۈككە قۇلۇپلىدىم، لېكىن ھالا بۈگۈنكى كۈنگە كەلگەندە سىزنىڭ ئالدىڭىزدا ھېچنىمگە ئەرزىمەيدىغان، يالغانچى بولدۇم، سىز ئۇ خەتنى بەرگەن بالا ئۇ دۇنياغا كېتىپتۇ، مەن ھەرقانچە قىلساممۇ ئۆزۈمنى ئاقلاپ چىقالمايمەن، ئەمدى بۇ ئىشلار ئۇ دۇنياغا بارغاندىلا ئايدىڭ بولىدۇ، بەگزاد بۇمۇ بىزنىڭ تەقدىرىمىز، سىزدىن ئۆتۈنەي، ئەمدى مېنىمۇ ئۆزىڭىزنىمۇ قىينىماڭ، بىز قايتقىلى بولمايدىغان يولغا مېڭىپ بولدۇق.
    - ياق، ياق، ياق ق ق ق، بۇ مۇمكىن ئەمەس، مېنىڭ تۇنجى مۇھەببىتىم مۇشۇنداقلا ئاخىرلىشامدۇ؟ مەن مۇشۇنىڭ ئۈچۈن شۇنچە يىل كېچە-كۈندۈز ياخشى كۆرگەنمۇ سىزنى، ھە؟ توۋۋا، مېنى ياخشى كۆرىدىكەنسىز، كۆڭلىڭىز مەندىكەن، يەنە قانداق باشقا بىرىگە ياتلىق بولغۇڭىز، ئۆمرىڭىزدىكى ئەڭ مۇھىم دەقىقىلەرنى باشقا بىرسى بىلەن ئۆتكۈزگىڭىز كەلدى؟ يەنە كېلىپ ئۇ ئادەم باشقا بىرى ئەمەس مېنىڭ قېرىندىشىم، ئاكام! مەن ئەكبەرنىڭ ئىنىسى بىلەن كۆرۈشتۈم، مەن ئۇ خەتلەرنى ئەكبەرگە بەرگەندە ئۇمۇ بارتى، ئۇ ماڭا ئەكبەرنىڭ ئۇ خەتلەرنى شۇ چاغدىلا سىزنىڭ قولىڭىزغا يەتكۈزىدىغان بىرىگە بەرگەنلىكىنى، ئەمما كىم ئىكەنلىكىگە بۇ بالىنىڭ شۇ ۋاقتىدا دىققەت قىلمىغاچقا ئېسىدە قالمىغانلىقىنى ئېيتتى، سىز دەپ بېقىڭە، بۇلار بىزگە يالغان سۆزلىگۈدەك ئۇ ياكى پۇل بولمىسا، ئۇنىڭ ئۈستىگە رەھمەتلىك ئەكبەر مېنىڭ ئۇ يەردە قانداق كۈنلەرنى ئۆتكۈزگەنلىكىمنى بىلىدۇ، سىزنى قانچىلىك ياخشى كۆرىدىغانلىقىمنىمۇ بىلىدۇ؟ ئۇ ماڭا ھەرگىز خىيانەت قىلمايدۇ ئەقىدە.
    توۋا، بۇ خەتلەرنى ئالغان زادى كىم بولغىيتى؟ كاللام قۇپقۇرۇق، بىرەر ئىشنى ئويلىغۇدەك ھالىم قالمىدى! ئۇ زادى كىم؟ زادى كىم؟
    سەردار قايتىپ كەلدى، تۇرمۇشۇم ئاجايىپ كۆڭۈلسىزلىكلەر بىلەن داۋام قىلماقتا، كاللامدا شۇ بىرلا سوئال «ئەكبەر خەتنى زادى كىمگە بەرگەن بولغىيتى؟» سەردار مېنىڭ ئۇنىڭدىن ئۆزۈمنى ئېلىپ قېچىۋاتقانلىقىمنى ھېس قىلدى بولغاي مەندىن نەچچە قېتىم نېمە بولغانلىقىمنى سورىدى، لېكىن مەن ئۇنىڭغا ئىزچىل يالغان سۆزلەپ كەلدىم، بەگزاد بولسا تېخىمۇ تۈگشىپ كەتتى، ئۇنىڭ دەردلىرگە مەن ھەمدەم بولالمىدىم، چۈنكى مەن ئۈچۈن ئۇنداق پۇرسەت پەقەتلا يوق ئىدى، يالغۇز ۋاقىتلىرىمىزدا ئۇنىڭغا تەسەللىي بېرەي دەپ ئويلىساممۇ، لېكىن ئۇنىڭ يېنىغا بارساملا ئۇنىڭ ئازابلىرىغا تېخىمۇ ھەسسىلەپ ئازاب قوشاتتىم.
    بۈگۈن ئەتىگەندىلا نېمىشقىدۇر بەك ھالسىز قوپۇپتىمەن، كۆڭلۈم ئېلىشىپلا تۇرىدۇ، ناشتىغا چىقماسلىققا باھانەم يوق، ئۈستەلدە بەك تەسلىكتە ئولتۇرۇپ ئۇلار بىلەن ناشتا قىلىۋاتاتتىم، تۇيۇقسىز كۆڭلۈم بەك ئېلىشىپ كەتتى، يۈگۈرۈپ تازىلىق ئۆيىگە ماڭدىم. قايتىپ چىقىپ سەردار ھەم ئاپاملارنىڭ ماڭا بىرخىل قىزىقىش نەزىرىدە قاراۋاتقانلىقىنى سەزدىم.
    - بالام، خوش خەۋەر بارمۇ قانداق، دوختۇرغا بېرىپ بېقىڭ.
    - نېمە؟ ئاپا ئۇنداق ئەمەس، ئاشقازىنىمغا بىر نەرسە تەسىر قىلغان ئوخشايدۇ.
    ئاھ خۇدا، يەنە شۇ بەگزادنىڭ نەپرەتلىك قاراشلىرى.
    - شۇنداق بولسىمۇ بېرىپ بېقىڭ بالام، ھېچنىم بولمايدۇ، سەردار بالام سەن بىللە بار.
    - بولدى ئاپا، مەن ئۆزۈم باراي، سەردارنىڭ ئىشى شۇنچە ئالدىراش تۇرسا.
    - بېرىپ بېقىڭ يەڭگە، خۇش خەۋەر بولسا چاققانراق ئاڭلايلى.
    بەگزادقا ھەيرانلىق بىلەن قارىدىم، لېكىن مەن بۇ قېتىم نەپرەتنى ئەمەس، ئۇنىڭ كۆزىگە توشۇپ قالغان ياشنى كۆردۈم، ئۇ «بۇنداق بولمىسۇن ئەقىدە» دېگەندەك بىر خىل بىچارىلىك بىلەن قاراپ تۇراتتى.
    چىنە - قاچىلارنى يۇيۇش ئۈچۈن ئاشخانىغا يېنىپ كىردىم.
    - بۈگۈن قاچان بارىمىز جېنىم، - سەردار ئارقامدىن كىرگەن ئىدى.
    - مەيلى، قاچان بارساق، يا بولمىسا مەن ئۆزۈم باراي، سىز بىرى بىلەن كۆرۈشىمەن دېگەنغۇ؟
    - ياق جېنىم، مەن ئۆزۈم ئېلىپ بارىمەن، يا بولمىسا ئەتە بارايلى، بۈگۈن مەن ئىشىمنى تۈگىتىۋالاي.
    - مەيلى، شۇنداق بولسۇن، - ئەمەلىيەتتە مېنىڭمۇ مېنى بەگزادتىن پۈتۈنلەي ئايرىپ تاشلايدىغان، بەگزادنى تېخىمۇ تۈگەشتۈرىدىغان بۇ «نەتىجە» نى پەقەتلا بىلگۈم يوق ئىدى.
    سەردار چىقىپ كەتتى، مەن ھۇجرا ئۆيۈمگە يېنىپ كىردىم، بايامنىڭ ياقى چىقالماي تۇرغان كۆز ياشلىرىم ئېتىلىپ چىقتى، ئۆزۈمنى كارىۋاتقا ئېتىپ يىغلىدىم.
    - مانا مۇشۇ كارىۋاتتا ماڭا خىيانەت قىلدىڭىز ھە؟ مۇشۇ كارىۋاتتا ئۆزىڭىزنى مەندىن مەڭگۈلۈك ئايرىدىڭىز، مۇشۇ كارىۋاتتا مېنىڭ ئەمەس ئاكامنىڭ كارىۋىتىدا...
    چۆچۈپ بېشىمنى كۆتۈردۈم، جېنىم بەگزاد!
    - ئەمدى نېمە بولدى ئەقىدە؟ نېمە بولدى؟ مەن سىزنى ئاكام بىلەن تاكى مۇشۇ كۈنگىچە ئاكام بىلەن ئۇ ھالەتتە كۆز ئالدىمغا كەلتۈرۈپ باقمىغان، سىز مېنىڭ قەلبىمدە يەنىلا پاك، غۇبارسىز شاتۇتۇم ئىدىڭىز. نېمىشقا ماڭا بۇنداق جاۋاب قايتۇرىسىز؟ ماڭا قايتۇرىدىغان يەنە قانداق جاۋابلىرىڭىز بار؟ مەن قانداقمۇ ئاكام بىلەن ئۆزۈم ئەڭ ياخشى كۆرگەن ئادەمدىن بولغان بالىنى جىيەنىم دەپ مېھرىمنى بېرەلەيمەن؟ ئەڭ ياخشىسى بۇنداق بولمىسۇن، بىگۇناھ بالىنى ئۆزىڭىز بىلەن تەڭ مېنىڭ نەپرىتىمگە ئۇچراتماڭ، مېنى تېخىمۇ گۇناھكار قىلماڭ، مەن ئەمدى بەرداشلىق بېرەلمەيمەن، ئەمدى ئۆز سۆيگۈمنىڭ كۆز ئالدىمدا باشقىلار تەرىپىدىن دەپسەندە قىلىنىشىغا قاراپ تۇرالمايمەن، مۇشۇنچىلىك بولسۇن ئەقىدە.
    - بەگزاد توختاڭ، - ئۇ يۈگۈرگىنچە چىقىپ كەتتى، توغرا مەنمۇ بۇ نارىسىدىنىڭ قىلچە مۇھەببەت بولمىغان بۇ ئائىلىدە دۇنياغا كېلىشىنى خالىمايمەن، لېكىن ئەگەردە ئۇ راستلا ئاللاھنىڭ ئورۇنلاشتۇرۇشى بىلەن بولسا مەن ئۇنى قانداقمۇ ئۆز قولۇم بىلەن يوق قىلالايمەن؟ نېمىشقا، زادى نېمىشقا؟ مەن زادى قانداق قىلىمەن؟ سەرداردىن ئاجرىشىپ ئاكا - ئۇكا ئىككىلىسىدىن بىراقلا ئايرىلايمۇ؟ لېكىن تېخى تۇغۇلۇشقا ئۈلگۈرمىگەن بۇ بالامنى يېتىم قىلىشقا مېنىڭ ھەققىم يوق.
    قانچىلىك ئولتۇرغىنىمنى بىلمەيمەن، تۇيۇقسىز سەرداردىن كەلگەن تېلېفون مېنى خىياللىرىمدىن ئويغاتتى.
    - ۋەي ئەقىدە، جېنىم ئۆيدىمۇ سىز؟
    - ھەئە، نېمە بولدى؟
    - مېنىڭ بىخەتەرلىك ئىشكابىمدا بىر ھۆججەت بارتى، شۇنىڭ ئۈستىدە بىر نومۇر بار، ماڭا كۆرۈپ دەپ بېرىڭە؟ مەخپىي نومۇرى *****
    - ماقۇل، مەن تېپىۋېلىپ تېلېفون قىلاي.
    تېلېفوننى قويۇۋېتىپ يۈزۈمنى يۇيدۇم، ئۇنىڭ بىخەتەرلىك ئىشكابىنى ئېچىپ ئۇ دېگەن نەرسىنى تېپىپ ئۈستىدىكى نومۇرنى ئۇنىڭغا دەپ بەردىم، ئىشكاپنى تاقىۋىتەي دەپ تۇيۇقسىز كۆزۈم چىرايلىق بىر تۆمۈر قۇتىغا چۈشتى. بىر قارىماققىلا ئۇنىڭ ئىچىدە خاتىرە ياكى خەت سۈرەتكە ئوخشاش نەرسىلەرنىڭ سېلىنغانلىقىنى بىلىۋالغىلى بولاتتى، ھەممىدىن غەلىتە يېرى شۇكى ئۇنىڭغا كىچىك بىر قۇلۇپ سېلىقلىق تۇراتتى.
    «ئەجىبا سەردارنىڭمۇ ماڭا ئوخشاش يۈرىكىنىڭ ئەڭ چوڭقۇر يەرلىرىگە دەپنە قىلىۋەتكەن ئەسلىمىلىرى بارمىدۇ؟» كاللامدا يەنە بىر جاۋابى ئېنىق بولمىغان سوئال پەيدا بولدى.
    ئۇھ! بولدىلا قايسى بىر ئىشنى ئويلاي، ئاۋۋال سەردارنى ساقلاپ ئولتۇرماي دوختۇرغا ئۆزۈملا بېرىپ باقاي.
    شۇنداق ئويلاپ تەييارلىق قىلىپ دوختۇرغا ماڭدىم، قېيىنئاپامغا دەپ قوياي دەپ پەستىكى مېھمانخانا ئۆيگە كىردىم.
    - ئاپا، مەن دوختۇرغا بېرىپ باقاي ھە؟
    - سەردارمۇ بىللە بارامدۇ بالام؟
    - ياق، ئاپا ئۇنىڭ مۇھىم ئىشى باركەن، ئەتە بارايلى دېگەن، بۈگۈن ئۆزۈملا بېرىپ كېلەي، ماشىنا بولغاندىن كېيىن.
    ئاپامدىن روخسەت ئېلىپ ھويلىغا چىقىپلا بەگزادنى كۆردۈم، ئۇمۇ سىرتقا چىقىش ئۈچۈن ماشىنا قويۇش ئۆيى تەرەپكە مېڭىپتىكەن، ئۈن - تىنسىز ھالدا ئالدى - كەينى ماڭدۇق.
    ئۇ ماشىنىسىغا چىقىۋېتىپ ماڭا قارىدى، ئۇنىڭ كۆزلىرى ئىششىپ قىزىرىپ كەتكەن ئىدى.
    - ئەقىدە، مەن يەنە بىر قېتىم دەي، مېنىڭ ئەمدى كـۆتۈرگۈچىلىكىم قالمىدى، قانداق ئىشلار يۈز بېرىشىدىن قەتئىينەزەر ئەمدى مېنىڭ كارىم يوق.
    - سىز نېمە دېمەكچى بەگزاد، نېمە قىلماقچى؟
    - ئۆزۈممۇ بىلمەيمەن، بەلكىم؟
    ئۇ گېپىنىڭ ئاخىرىنى قىلماي ماشىنىنى ھەيدەپ چىقىپ كەتتى.

ئاخىرىنى تىزراق بىراقلا يوللىۋىتىڭە .

ناھايېتې  بەلەن  چېقپ تۇ

تاتلىق920

دوختۇرخانىغا خىياللار بىلەن قانداق كېلىپ قالغىنىمنى بىلمەي قاپتىمەن، تەكشۈرۈش ئۆيىگە خۇددى پۇتلىرىمغا كىشەن سېلىنغان ئادەمدەك ئېغىر، تەستە مېڭىپ كىردىم، مەندىن باشقا يېڭى توي قىلغان قىزلار بەلكىم بۇ يەرگە نۇرغۇن شېرىن ئارزۇلار بىلەن ئۆزىنىڭ ئانا بولغانلىق خەۋرىنى ئاڭلاش ئۈچۈن كىرەر، لېكىن مەن ئۇنداق ئەمەس، چۈنكى مېنىڭ ئۇ خۇشخەۋەرنى يۈگۈرۈپ بېرىپ ئېيتقۇدەك كۆڭلۈمدىن ياخشى كۆرۈپ توي قىلغان ئادىمىممۇ يوق، ياخشى كۆرگىنىم مېنىڭ قېيىنئىنىم!
    - سىز ھامىلىدار ئەمەسكەنسىز.
    مېنى تەكشۈرۈۋاتقان قىزنىڭ بۇ گېپىدىن كۆزلىرىم چانىقىدىن چىقىپ كېتەي دېدى.
    ئۇلۇغ ئاللاھ! چەكسىز شۈكرى! بەندىلىرىڭگە كۆتۈرەلمىگۈدەك ئازاب بەرمەيسەن، مۇشۇ كۈنلەردە خۇشاللىقلارنى ئۇنتۇپ قالاي دېگەن مەن ھەقىقەتەن خۇش بولدۇم.
    قولۇمغا تېلېفونۇمنى ئالدىم، لېكىن كىمگە ئۇرىمەن؟ سەردارغا نىسبەتەن بۇ ھەرگىزمۇ خۇشخەۋەر ئەمەس، ئۇنىڭ ئاتا - ئانىسى ھەم مېنىڭ ئاتا - ئانامغىمۇ شۇنداق، بەگزادقا ئۇرۇشۇمنىڭ تېخى زۆرۈرىيىتى يوق، چۈنكى ئۇ بەرىبىر خۇش بولمايدۇ.
    ئۆيگە كەلسەم ھېچكىم يوقكەن، ماشىنىنى توختىتىۋېتىپ ھۇجرا ئۆيۈمگە كىرىپ تۇيۇقسز ئاپام ئېسىمگە كەلدى، تېلېفون ئۇردۇم.
    - ۋەي، ئاپا قانداق ئەھۋالىڭ، ياخشى تۇردۇڭمۇ؟
    - ياخشى بالام، سەنچۇ؟ دوختۇرغا بادىڭمۇ؟ نېمە دەيدۇ؟
    - سەن قانداق بىلدىڭ ئاپا، ھە باردىم، ھېچقانداق ئەمەسكەنمەن.
    - ھە، شۇ بايام تويدا قېيىنئاپاڭنى كۆرگەنتىم، شۇنداق دېدى، مەن تېخى خۇشخەۋەر بامىكىن دەپتىمەن،
    - نېمگە ئالدىرايسەن ئاپا، ئۇمۇ بولۇپ قالار.
    ئاپامنىڭ تېلېفونىنى قويۇۋېتىپ بىر قىسمىلا بولۇپ قالدىم، مېنى زادى كىممۇ چۈشىنەر؟
    - ئەقىدە، جېنىم نەدە سىز؟
    تاماققا تەييارلىق قىلىۋاتسام سەردار كىرىپ كەلدى، قولىدا بىر دەستە قىزىل گۈل.
    - ماڭا دەڭە جېنىم، دادا بولامدىمكەن - يا؟
    تۇيۇقسىز يۈرىكىم ئاغرىپ كەتتى.
    - ياق سەردار، ئۇنداق ئەمەسكەن.
    ئۇ بىردەم تۇرۇپ قالدى - يۇ، دەرھاللا ئۆزىنى ئوڭشاپ:
    - ھېچقىسى يوق، بىز تېخى يېڭىلا توي قىلدۇققۇ؟ ئاللاھ خالىسا ئۇ كۈنلەرمۇ كېلىدۇ؟ سىزگە سوغام جېنىم، سىزنى مەڭگۈ سۆيىمەن. - سەردار مېنى ئۆزىگە تارتتى، كۆزۈم ئىشك تۈۋىدىكى بىزگە نەپرەت بىلەن قاراپ تۇرغان بەگزادقا چۈشتى، مەن ئاستا ئۆزۈمنى قاچۇردۇم.
    - بەگزاد كەلدىڭىزمۇ؟ - سەردارمۇ شۇئان ئۆزىنى ئوڭشىدى.
    - قارىغاندا خۇشخەۋەر بار ئوخشىمامدۇ؟
    - ياق ئۇكام، ھازىرچە يوقكەن، ئالدىرماي بولار.
    ئىككىسى شۇنداق دېيىشكەچ چىقىپ كەتتى. ئاھ مېنىڭ يۈرىكىم، مۇشۇنداق چۆچۈش، نەپرەتلىك قاراشلارغا يەنە قانچىلىك بەرداشلىق بېرەر!
    كەچتە بەگزادنى كۆرمىدىم، نېمىشقىدۇر كۆزۈم ھە دېسىلا ئىشىك تەرەپكە كېتىپ قالاتتى، ھەر قېتىم ئىشىك ئېچىلىپ بەگزاد ئەمەس باشقا بىرى كىرىپ كەلگەندە شۇنچىلىك بىئارام بولاتتىمكىن، ئۆزۈمنى قويىدىغان يەر تاپالماي قېلىۋاتاتتىم، ئۇنى زادى نېمىگە مۇشۇنچىلىك كۈتىمەن، ئەسلى مەن كۈتۈشكە، يولىغا ئىنتىزار بولۇشقا تېگىشلىك بولغان ئادەم مانا يېنىمدا تۇرمامدۇ؟ ياق، يۈرىكىم سېغىنىدىغان، كۈتىدىغان ئادىمىم بەگزاد! ئۇ تېخى قايتىپ كەلمىدى، كۈندە ئۆيدىن چىقمايدىغان ئادەم بۈگۈن ھەجەب... ئاغىنىلىرى بىلەن ئولتۇرۇپ قالدىمۇ، ياكى ئەگەر يېنىدا باشقا بىرەر قىز بولسىچۇ؟ بىزنىڭ بۈگۈنكىدەك ئازابلارغا يولۇقىشىمىزغا سەۋەبچى بولغان «دىلنۇر» دەك قىزلار بىلەن يەنە؟
    كاللامغا كەلگەن بۇ مۇدھىش خىيالدىن، پۈتۈن يېرىمنى نەچچە يۈز مىڭلىغان زەھەرلىك يىلان چېقىۋاتقاندەك ئارامسىزلىنىشقا باشلىدىم، ياق، ياق، بۇنداق بولسا بولمايدۇ، بەگزاد مېنى پەقەت مېنى ياخشى كۆرىدۇ!
    ئۆزۈمنىڭ قانچىلىك شەخسىيەتچى بولۇپ كەتكەنلىكىمنى ھېس قىلدىم - يۇ، لېكىن ئامالسىزمەن، ئاللىقاچان بەگزادتىن ئايرىلىپ قالغانلىقىمنى، بۇ يولغا ئۆز ئىختىيارىم بىلەن مېڭىپ بەگزاد ئىككىمىزنىڭ ئوتتۇرىسىغا ئۆتكىلى بولمايدىغان بۇ تامنى ئۆزۈمنىڭ باش بولۇپ سوققانلىقىمنى بىلىپ تۇرساممۇ، لېكىن يەنىلا ئۇنى ياخشى كۆرىمەن، ئۇنى ئۇنتۇشنى پەقەتلا ئويلاپ باقمىدىم، ئۆزۈم گەرچە باشقا بىرىنىڭ نىكاھىدا بولساممۇ، لېكىن بەگزادنى باشقا بىرى بىلەن توي قىلىدۇ دەپ خىيالىمغا كەلتۈرۈپمۇ باقمىدىم ھەم ئۇنچىلىك جۈرئەتمۇ يوق، ئەنە شۇنداق ساراڭدەك خىياللارنى قىلىپ ئولتۇرۇپ خېلى ۋاقىتنى ئۆتكۈزدۈم، لېكىن ئۇ كەلمىدى.
    ئامالسىز ھۇجرامغا ئارام ئېلىش ئۈچۈن يېنىپ كىردىم.
    سەردار مېنىڭ كىرگەنلىكىمنى كۆرۈپ قولىدىكى كۆرۈۋاتقان نەرسىسىنى ئالمان - تالمان ھېلىقى قۇتىغا سالدى - دە، قۇلۇپلاپ بىخەتەرلىك ئىشكابىغا سېلىۋەتتى، ھەممىدىن بەكرەك دىققىتىمنى قوزغىغىنى ئۇنىڭ تېخى سۈرتۈشكە ئۈلگۈرمىگەن كۆز ياشلىرى بولدى.
    - نېمە بولدى سىزگە، يىغلاپسىزغۇ؟ مەندىن بىرەر ئىشنى يوشۇرۇۋاتامسىز قانداق؟
    - ياقەي، سىزدىن نېمە ئىشنى يوشۇراي، شۇ جىق نەرسە كۆرۈۋەتكەن ئوخشايمەن، كۆزۈم ياشاڭغىراپلا تۇرىدىغۇ؟
    سەردارنىڭ بۇ قولاشمىغان گەپلىرى گۇمانىمنى قوزغىغان بولسىمۇ، لېكىن يەنە سوراشنى خالىمىدىم. ئارتۇق گەپ قىلىشماي يېتىپ قېلىشتۇق، ئۇخلىمىغان بولساقمۇ، لېكىن ھەر ئىككىلىمىز ئۆز خىياللىرىمىزنى سۈرۈش بىلەن ئاۋارە ئىدۇق، مەن بەگزادنى سەردار بولسا بايامقى خەتلەرنى ھەم ئۇ خەتنى يازغۇچىنى ئويلاپ ياتاتتۇق، ئۇھ خۇدا، قانداق تۇرمۇش، قانداق مۇھەببەتسىز ئائىلە ئەمدى بۇ؟
    تۇيۇقسىز ماشىنىنىڭ ھويلىغا كىرگەن ئاۋازى ئاڭلاندى، ئاللاغا چەكسىز شۈكرىلەر بولسۇن، بەگزادىم قايتىپ كەلگەن ئىدى.
    ئاخشام تولا خىيال قىلغاچقىمۇ تۈزۈك ياخشى ئۇخلىيالمىدىم، سەردار بىر خېرىدارسى بىلەن كۆرىشىدىغانلىقىنى ئېيتىپ ئەتىگەندىلا چىقىپ كەتتى، مەن ناشتىلىق قىلىپ بولۇپ ھۇجرا ئۆيۈمنى يىغىشتۇرۇش ئۈچۈن قايتىپ كىردىم، تۇيۇقسىز كۆزۈم ئاغزى ئېچىقلىق تۇرغان بىخەتەرلىك ئىشكابى ۋە ئۇنىڭ ئىچىدىكى قۇلۇپنى سېلىپ ئاچقۇچنى ئېلىشقا ئۈلگۈرەلمەي قۇلۇپتا قالغان ھېلىقى تۆمۈر قۇتىغا چۈشتى، شۇنچە كارىم بولماسلىقىنى ئويلىساممۇ، لېكىن يەنىلا ئىچىنى ئېچىپ سەردارنى قىيناپ كېلىۋاتقان، ھەتتا ئۇنىڭ كۆزىدىن ياشمۇ چىقارغان شۇ خەتلەرنى كۆرۈپ باقماقچى بولۇپ قۇتىنى قولۇمغا ئالدىم.

سەجدە

قىززىق كىنو كۆرۋاتقاندەك ئوقۇۋاتاتتىم، كىنونىڭ نوچى كۆرنۈشلىرىگە كەلگەندە ئوتتۇرغا ئېلان قىستۇرۇپ قويغانغا ئوخشاش ،سىزمۇ تازا بەلەن يەرلىرگە كەلگەندە توختۇتۇپ قويۇشنى ئۈگنىۋاپسىز .   شۇنداق بولسىمۇ رەھمەت بىزگە ياخشى ئەسەرنى يوللىغىنىڭىزغا.   قولىڭىزغا دەرت كەممىسۇن.