ھىجران كوچىسىدا... پوۋېست (ياۋاكۆز)

yawakoz

ھىجران كوچىسىدا
10-قىسىم
كېچە ھەر ئىككىلمىز ئۇيان ئۆرلۈپ، بۇيان چۆچۈرۈلۈپ ئۇيقۇ بىزنى چىللىيالمىدى.تاڭ يورۇماستىلا خالئاي ئورنىدىن تۇرۇپ خۇددى سەپەرگە ھازىرلىق كۆرگەندەك ياتاق ئىچىدە ئۇياقتىن - بۇياققا ئايىقىدىن تاراق -تۇرۇق چىقىرۋەتتى. يېرىم سائەتچە گەپ -سۆز قىلماي تورۇسقا قاراپ جىمىدە يېتىپ باقتىم. ئۇ بىردە دېرىزە تۈۋىگە بارسا، بىردە كارۋىتىغا كېلىپ ئېغىر - ئېغىر تىنىپ ئىچىنى پۇشىراتتى. بۇ قىلىقلىرى نېرۋامغا تەسىر قىلىپ مېنىڭمۇ زەردە قىلىپ قويدى. ئاخىرى ئېغىز ئېچىشقا مەجبۇر بولدۇم.
— ئەتىگەندە نېم بولدى ساڭا؟ ئىت ھاۋشىماستا ياتاقنىڭ ئېچىدە ئۇياقتىن - بۇياققا مېڭىپ يۈرۈيسەنغۇ؟ كېچە ياما چۈش كۆرۈپ قالمىغانسەن -ھە؟ تىشلىقمۇ يا؟
— ھە، مەن ئاشۇنداق ساراڭ بوپ قالدىم. مەن بىلەن كارىڭ بولمىسۇن! ئاخشامقى ئويۇمدا چىڭ تۇرىمەن.
— قايسى ئويۇڭ ئۇ؟
— سىرتقا چىقىپ ئىشلەيمەن.
— بىرسى ساڭا ئىشلە دەپ بۇيرۇق قىلدىما؟
— ھەئە، ۋىجدانىم توختىماي بۇيرۇق قىلىۋاتىدۇ.
— سەندە باشقىلاردا يوق ۋىجدان باكەن - ھە! مەنمۇ ساڭا بۇيرۇق قىلاي، ئىشلەيمەن دېگەن نىيىتىڭدىن يېنىپ، ياتاقتا ماڭا ھەمراھ بولغاچ پورتمالىڭنى كەشتىلە.
— بولمايدۇ.
گېپىمنى ئۇ لوق گۆشكە پالتا ئۇرغاندەك چاناپ تاشلىدى.
— ئىشلىشىڭنىڭ سەۋەبى زادى نېمە؟ دېگىنە، مەن بىر ئاڭلاپ باقاي.
— پۇل تاپىمەن، سېنى داۋالىتىمەن، دوختۇرخانىغا تاپشۇرىمەن.
— نېمىش قىلماقچى، ئويلۇشۇپ باقتىڭمۇ؟
— ئالدىمغا قانداق ئىش ئۇچرىسا شۇنى قىلىمەن.
— نې..نېمە؟ سەن خەتەرلىك بوپ قاپسەن. سىرتقا چىقىپ ئالدىڭغا نېمە ئىش ئۇچرىسا شۇنى قىلىپ جېنىڭنى قىيناپ يۈرگۈچە، دوختۇرخانىنىڭ قان بېرىش ئورنىغا بېرىپ، قېنىڭنى سات.
— بۇمۇ بولىغان چارىكەن. ئەمىسە چىقىپ باقاي...
ئۇ ساپمىسىنى شارتتىدە سېپىپ، بىرسى ئىشىك تۈۋىدە جىددى چاقىرغاندەك پالاقلاپ كەتتى.
— ۋوي، نەگە؟
— دېگىنىڭ توغرىغۇ؟ بۈگۈنچە قان سېتىپ تۇرۇپ، ئەتىگىچە بازارنىڭ ئېپىنى بېلىۋېلىپ ئىش تۇتسام تېخىمۇ ياخشى ئەمەسمۇ؟
ئاچچىقىم پەلەك بويى ئۆرلىدى. كۆرسەتكۈچ بارمىقىمنى ئۇنىڭ يۈزىگە چىنەپ تۇرۇپ كۆزلىرىمدە پەيدا توغراق چۇچۇلىسىدەك غەزەپ ئوتۇمنى قەلبىگە ياقتىم.
— قېشىڭغا بارغۇچە كەينىڭگە يان گۈلۈم.
— نېمانچە قەھرىڭنى يامان قىلىسەن پەرھات؟ ئەجىبا قىلغىنىم خاتامۇ؟ كەلگۈسىمىزنى ئويلاۋاتىمەن.
— قىلغىنىڭ خاتا. چوپچوڭ يىگىت بار يەردە ئىشلەشنى كىم قويۇپتۇ بەرنا قىزغا. قان سېتىشنىڭ گېپىنى چىقىرىپ قويسام راست قوللاۋاتقان ئوخشايدۇ دەپ قالما. بىز تېخى ئۇ كۈنگە قالمىدۇق. خەتتە ھېلىقى نامسىز رېژىسسور بۈگۈن قېشىمىزغا كېلىدىغانلىقىنى ئېيتىپتۇ. مېنىڭچە ئۇ ئالدامچى ئەمەس. ساقلايلى...بولامدۇ؟ ناۋادا ئىشلەشكە توغرا كەلسە سىرتقا مەن چىقىشىم كېرەك. ئىككى - تۆتتال پۇل يوقاپ كېتىپ بولغۇچە سەن بۇنداق ئىشلەشنىڭ گېپىنى قىلغىلى تۇرساڭ، مەن ئۆزۈمچە سېنى پۇلسىز قويغاندەك، باقالمىغاندەك تۇيغۇغا كېلىپ قېلىپ تەڭقىسلقتا قالىدىكەنمەن. ماڭا بېسىم قىلما تاتلىق گۈلۈم، پەيلىڭدىن يان!
ئۇ ئاستا كارىۋاتقان كېلىپ ئولتۇردى. كۆرسەتكۈچ بارمىقىمنى ئەمدى تاشلىدىم.
— ساڭا بىسىم قىلغىنىم ئەمەس. يوقاپ كەتكەن پۇلنىڭ سېنىڭ پۇلۇڭمۇ بار ئىدى، شۇڭا...
— بولدى، يەنە شۇ گەپمۇ؟
قاتتىقراق تەلەپپۇز قىلىنىپ قالغان بۇ سۆزۈم ئۇ جىم بولۇپ قالدى. بىردەمدى كېيىن ئارىمىزدىكى سۈكۈت يېشىلىپ ئورنىمىزدىن تۇرۇشۇپ ھەمداستىخان بولۇشتۇق. ئۇ داستىخاننى يۇغۇشتۇرۇپلا ئىشىك تەرەپكە قاراپ ماڭدى. يەنە ۋارقىراپ سالدى.
— ئەمدى نەگە؟
— ۋاي، بوش ۋارقىرىغىغىغنا پەرھات. سۇخانىغا چىقىپ كىرسەممۇ بولمامدا؟ ئىشەنمىسەڭ مەن بىلەن بىرگە چىق!
— ئىم، بالدۇرراق كىر. گەپ بار.
— گېپىڭنى دەپ بول، ئاندىن چىقاي ئەمىسە.
— بەك ئۇزۇن گەپ ئۇ. پات تۈگىمەيدۇ. ئاۋۋال چىقىپ كىرە!
ئۇ چىقىپ كەتتى. بۈگۈن ئۇنىڭ مىجەزى باشقا كۈندىكىگە قارىغاندا پەقەتلا ئوخشىمايتتى. ساقلىدىم، كىرمىدى. 20 مىنۇت ئۆتتى، سايىسىمۇ يوق. بەكلا ئەنسىرەپ كېتىپ، سۇخانىنىڭ ئالدىدا كۈتتۈم، كىرگەنلەر بىر تەرەپتىن چىقىپ بولدى. چاتاق، قان بېرىش ئۆيىگە كەتتىمۇ يا؟ دەرال ئۇ يەرگىمۇ باردىم. ئەپسۇس، ئىز دېرىكى بولمىدى. ئۇ سىرتقا ئىشلىگىلى چىقىپ كېتىپتۇ. ھەي، گەپ ئاڭلىمايدىغان نادان يايرىم. بازارنىڭ ئېپىنى ئۇقمايدىغان ھالىڭغا قايسى كوچىلاردا يۈك قاچىلانغان ئەسكى قاپقا تەلمۈرۈپ يۈرۈيدىغانسەن! كەينىدىن ئىزدەپ چىقسام قانداق بولار؟ بۇنچە چوڭ قايناق شەھەردە بىر ئادەمنى كۆز بىلەن تېپىش ئۇنداق ئاسان ئەمەس. ئۇ كەچتە كەلگەن ۋاقتىدا راسا ئەدپىنى بەرمىسەم. ياق، ئۇ ئەيىبلىشىمگە ئەمەس بەلكى، تەسەللىي بېرىشىمگە مۇھتاج. ئاران ھېرىپ - ئېچىپ كەلسە ئۈستىلەپ تىل ياغدۇرسام قاملاشمايدۇ. ئوبدان گۈلۈم، كۆزۈمنىڭ قاياشى، سېنى توسۇپ قالالمىدىم، كەچۈرگىن! ياتىقىمغا كىرىپ ھېچ ئىش خۇشياقماي خىيالىمدا خالئاينىڭ تىزرق كەچ بولۇشىنى ئاللاھدىن تىلەپ سائەت - سائەتلەپ تىرىك مۇردىدەك سۇنايلىنىپ يېتىپ كەتتىم. چۈش بولدى، يەنە شۇ بىرلا پەدىدە ئاھ ئۇرماقتىمەن. تۇيۇقسىز ئىشىك چېكىلدى. بېشىمنى كۆتۈرۈپ ئىشىككە ئورنىتىلغان ئەينەككە باقسام،كۆك كاستيىۇم كىيگەن، قارا گالستۇك تاقىغان چىلان رەڭ شىلەپە كەيگەن بىر ئەركىشى كۆرۈندى.
— كىرىڭ!
— ئەسسالامۇ ئەلەيكۇم!
— ۋەئەلەيكۇم ئەسسالام. ئورنۇمدىن تۇرغىلىمۇ تاۋىم يوق سالىمنى مۇنداقلا ئىلىك ئالدىم.
— قانداق ئەھۋالىڭ پەرھات؟
— مېنى تونۇيدىكەنسىزدە، سىز ئاخشامقى ھېلىقى خەتتىكى...
— توغرا دەيسەن، مەن شۇ خەتنىڭ ئىگىسى بولىمەن.
— پۇل قىنى؟
— قايسى پۇل؟
— ساقلاپ بىرىمەن دەپ پۇلنى ئېلىپ كېتىپسىزغۇ؟ قىز دوستۇم مۇشۇ سەۋەبلىك ئەتىگەن پۇل تاپقىلى ئىش ئىزدەپ سىېرتقا چىقىپ كەتتى.
— ھە راسىت، خالئاي ساڭا تاماق ئەۋەتتى. قىززىقىدا يەۋالغىن!
ئۇ ئۈستەلگە قويۇپ قويۇلغان تاماق قاچىسىنىڭ ئېغىزىنى ئاچتى.
— سىلەر تونۇشامسىلەر؟ ئۇ سىزنى ئىزدەپ بېرىپتىما؟
— مېنى تونۇمايدۇ. مەن ھەر ئىككىلىڭلارنى تونۇيمەن. نېمە، تىكىلىپ قاراپ كەتتىڭغۇ؟ كىيىنىشىم غەيرى بىلىنىۋاتامدۇ؟ خى، كۆنۈپ قاپتىمەن. تاماق يەۋال، ئاندىن پاراڭلاشساقمۇ بولىدۇ.
— خالئاينى تاپقان ئادەم بۇ يەرگە ياندۇۇرپ ئېلىپ كەلسىڭىز بولمامدۇ؟ يۈرىكىڭىز تاش ئىكەن. قاراپ تۇرۇپ بىر قىز تونۇشىڭىز سىرتتا قىينىلىۋاتسا ئىچىڭىزمۇ ئاغرىماپتۇ.
— خى، مېنىڭ قېشىڭغ ئېلىپ كەلگۈم بار ئىدى. بىراق ئۇ كەتتى.
— نې... نېمە؟ كەتتى؟  نەگە كەتتى؟
— ئەكبەرنىڭ قېشىغا.
— ئورنۇمدىن توپتەك چاچراپ تۇرۇپ كەتتىم.
— مۇمكىن ئەمەس. ئۇ كەتمەيدۇ. ھەرگىز مېنى تاشلاپ كەتمەيدۇ. يالغان سۆزلەۋاتىسىز. دېگەنلىرىڭىز يالغان. مېنىڭ گۈلۈم كەتمەيدۇ.
— ئۇنى مەن كەتكۈزىۋتتىم.
— خى، يوق گەپنى قىلماڭ ئەپەندىم، ئۇ كچىك بالا ئەمەس. ئۇنىڭغا سىزنىڭ كۈچىڭىز يەتمەيدۇ.
— ئۇنىڭ خاتىرىسىنى ئەسلىگە كەلتۈردۈم.
— بارغانچە يالغانلىرىڭىز قاملاشمايۋاتىدۇ. چاقچاقنى قويۇپ، پۇلنى ئەكىلىڭ! گۈلۈمنىڭ كەچتە گۈلۈمنى خۇش قىلىمەن. ئەتىدىن باشلاپ ئۇ ئىشلىمەي ماڭا ھەمراھ بولغاچ يېنىمدا ئولتۇرۇپ كەشتىسىنى توقۇيدۇ.
— ئىشەنمەمسەن؟ ئەمىسە سەل تەخىر قىلىپ تۇر يىگىت!
ئۇ سىرتمىلىق قارا سومكىسىنى مالتىلاپ، ئىچىىدىن بىر پېلاستىنكىنى چىقاردىدە، تېلېۋېزورنىڭ  ئۈستىگە جايلاشتۇرلغان سىن قويۇش ئاپپاراتىغا پېلاستىنكىنى سېلىپ تېلېۋېزورنىڭ ئىكرانىنى تىزگىنەك بىلەن قوزغاتتى. ئىكران يورۇدى.
— زېھنىڭنى يىغىپ ئىكرانغا كۆز تاشلا، بۇ خالئاي ئىككىڭلارنىڭ ماشىنا ھادىسىسىگە ئۇچرىغان كۈنۈڭلاردىكى كۆرۈنۈشلەر. بىرىمۇ سۈرەتكە كەم ئىلىنمىغان. ئەكبەر سىلەرگە ھېكايەڭلەرنى چالا دەپ بەرگەنتى، بۇنىڭدىن تولۇق كۆرىۋال.
شۇنچە سۈزۈك سۈرەتكە ئېلىنغان ئىكراندىكى ياپياش تونۇش يىگىتنى ئۆزۈم ئەمەس دېيىشكە ئاجىز ئىدىم. ياڭراتقۇدىن چىققان ئاۋازلار ئۆزۈمنىڭ ئىدى. ئۇ كۈنى ئەتىگەندە خالئايغا تېلېفۇن قىلىپتىمەن. تېلېفۇندا ئۇرۇشۇپ كېتىپتۇق. ئارقىدىن ئوتتۇرا ياشلاردىكى شىلەپىلىك بىر كىشىدىن ماڭا تېلېفۇن كېلىدىكەن:
— شىركەتكە بىر كېلىپ كەتسەڭ پەرھات! قولۇمدا بىر سېنارىيە بار، تەھرىرلەپ، ئۈگۈنلۈككە ئۈلگۈرتۈپ بەرسەڭ سۈرەتكە ئېلىۋەتسەك بولاتتى.
— بولىدۇ. ھازىرلا باراي.
بۇ  كۆرۈنۈشلەردىن يېنىمدىكى كىشىنىڭ كىملىكىنى بىلدىم. بۇ ئۇشتۇمتۇت خەۋەرنى خالئايغا يەتكۈزۈش ئۈچۈن ئۇنىڭغا تېلېفۇن قىلسام، ئۇ ئەزۋەيلەپ كەتكۈدەك. ئاخىرى خالئاينىڭ قېشىغا بارغۇدەكمەن. ئەكبەرنىڭ دېەىنى توغرىكەن، ئەسلىدە خالئاي بىلەن ئىككىمىز ئالىي مەكتەپتە ئوقۇيدىكەنمىز. بىراق مەكتىپىمىز ئايرىم - ئايرىم ئىكەن. قارلىق يولدا ھاۋانىڭ سوغۇقلىقىدىن چاپىنىمنىڭ ئولپىقىنى بېشىمغا كېيىۋالغۇدەكمەن. يولنىڭ تىيىلغاقلىقى، كوچا ئاپتۇبۇسىنىڭ ئاران - ئاران سۆرىلىپ مېڭىشلىرى، سائىتىمگە پات - پات قاراپ قويۇپ تىت - تىت بولۇشلىرىم شۇنچە ئېنىق سۈرەتكە تارتىلىپتۇ. خالئاينىڭ مەكتىپىگە كېلىپ ئۇنى ياتىقىدىن چاقىرتىپ ئېلىپ چىققۇدەكمەن.
— قەيەردە سەن؟
— مەكتەپ دەرۋازىسىنىڭ ئۇدۇلىدىكى ئوقۇتۇش بىناسىنىڭ ئالدىدا.
ئۇنىڭ بىلەن كۆرەشەر - كۆرۈشمەيلا بىر - بىرىمىزگە خاپا بولۇشۇپ ئۇرۇشۇپ كەتكۈدەكمىز.
— جۈرە، بىنانىڭ ئىچىگە كىرىپ سۆزلىشەيلى!
— گەپ بولسا مۇشۇ يەردە ئوچۇق پاراڭلىشىمىز.
— سەن ھېلىلا ئىسسىق ياتىقىڭدىن چىققىنىڭ بىلەن مەن بىر سائەتتىن ئارتۇق قار كېچىپ كەلدىم.
— توڭغان بولساڭ، گەپنى قىسقارتىپ مېغىزلىق سۆزلە!
بىلىكىدىن تارتسام چاپان قاققاندەك قولۇمنى سەت سىلكىۋەتكۇدەك. بىر نىمىلەرنى دەپ يۈرۈپ بىنا ئىچىگە كىرىپتۇق. ئۇ چۈشەندۈرۈشۈمنى ھېچ ئاڭلايدىغاندەك ئەمەس. بىرنى دېسەم ئوننى ياندۇرۇپ تۇرىدىكەن. ئاشۇ پاسسىپ ئەھۋالدىمۇ مەن ئۇنىڭغا كۆڭلۈمنى ئىزھار قىلغان كۆرۈنۈشلىرىنى كۆرۈپ كەچمىشىمدىن ئۆزۈممۇ تەسىرلىنىپ كەتتىم.
— بىز يۈرەيلى خالئاي!
— ياق، بولمايدۇ.
— نېمىشقا؟
— مېنىڭ مۇھەببىتىم بار. شۇنىڭ ئۈچۈن.
— ئىشەنمەيمەن.
— ئىشەنمىسەڭ مەيلى، مانا ماۋۇ بارمىقىمدىكى يىگىتىم ئېلىپ بەرگەن كۈمۈش ئۈزۈك.
— كىم بىلەن يۈردۇڭ؟
— سورىما.
— زادى كىم بىلەن يۈردۈڭ؟
— ئۆزۈمگە ماس كېلىدىغا بىرسى بىلەن يۈردۈم تازا، گەپ باما؟
ھە ئەسلى مۇنداقكەندە، مەن خالئاينى بۇرۇنلا ياخشى كۆرىدىكەنمەن. بۇ ئۇ باشقا بىرىنى تېپىۋاپتۇ. بۇ بىزنىڭ ئادا - جۇدا بولغان كۈنىمىز ئىكەن. ئاخىرىنى ھەرىكەتلىرىمگە بارغانچە قىزىقىپ ئالدىغا سۈرۈلۈپ ئولتۇردۇم. ئاشىق يىگىت سۆيگەن قىزىغا شۇنچە يالۋۇرىۋاتسا قىز پەرۋاسىز ھالدا يىگىتنىڭ قەلبىگە مىخ قاقسا ئەلۋەتتە غۇرۇر كۆتۈرمەيدۇدە. دەل ئاشۇ يېرىدە تامغا مۇش ئېتىپ ئوغۇل بالىنىڭ ئىشىنى قىپتىمەن. خى، خالاينىڭ گەپلىرىدىن ئۆرگىلەي، بىر قىز بالىنى دەپ ئۇنىڭغا بارلىقىنى ئاتىۋەتكەن ئوغۇل بالا ئەخمەقمىش. بەلكىم بۇ سۆزنىڭ ياغىنى يوقتۇ. بىراق كۆڭلۈمنى ئايىماستىن ئۇدۇللا بۇ گەپلەرنى قىلىشى دىلمنى ئېنىقلا زىدە قىلىدۇ.
— كەتتىم ھە، خوش.
قارا ئۇنىڭ ئۆز بېشىمچىلىقنى. مەندىن قۇتۇلغىنىغا خۇش بولغىنىدەك چاۋاك ئۇرۇپ كېتىپتۇ. ئەي، پەرھات، ساڭا ئۇۋال بولدىدە، ئىچىمنى تېخىمۇ قايناتقان يېرى، بۇ كىنو ئەمەس بەلكى كەچمىشىم ئىكەن ئەمەسمۇ. ئاچچىقىمدا كەينىمگە بۇۇرلۇپلا ئىككى قات دېرىزە ئەينىكىنى چىقىپتىمەن. چاچلىرىمنى يۇلۇپتمەن. پەشتاقتا ئولتۇۇرپ تىزمغا بېشىمنى قويۇپ ئۈنسىز يىغلاپتىمەن. تۇيۇقسىز كاللامغا بىر ئىش تەسىر قىلغان بولسا كېرەك. يۈگۈرگەن پېتى مەكتەپ سىرتىغا چىقىپ، يولنىڭ قارشى تەرىپىگە ئۆتۈپ بىرسى توختا دەپ بۇيرۇق بەرگەندەك جايىمدىلا تۇرۇپ قاپتىمەن. تۆت ئەتراپقا 360 گىرادۇس ئايلىنىپ بىر قارىۋەتكەندىن كېيىن، ئاسمانغا كۆز تىكىپتىمەن. يۈزۈمگە چۈشۈۋاتقان سوغۇق قار تېنىمنى قاتتىق بىر سىلكىتىپ توختىغۇدەك. ئېغىىزمدىن چىقىۋاتقان ھور بارغانچە ئازلىدى. ئاندىن ماي يولنىڭ گىرۋىكىگە كېلىپ كۆزۈمنى يۇمۇپ ماشنىغا قارشى يۆلىنىشتە تۇمانلار ئارىسىدا يەنە يۈگۈرپتىمەن. توۋا ئاچچىق تۇتقاندا ئادەم ساراڭغىلا ئايلىنىدكەن.  ئاندىن 7 - 8 مېتىرچە يېراقلىىتىن ماشنىغا ئەينىكىنى سۈرتكەچ كېلىۋاتقان قارا رەڭلىك بىر پىكاپكا كۆزۈمنى يۇمغان پېتى ئۆزۈمنى يانچە ئېتىپتىمەن. بۇ كۆرۈنۈشنى كۆرۈپ يۈرىكىمنى تۇتۇپلا قالدىم. يېنىمدىكى كىشىنىڭمۇ كۆز جىيەكلىرى ھىسداشلىق تامچىلىرى نەمدىلىپ، ئىككى قولى بىلەن يۈزىن قاماللاپ تۇتتىدە، بېشىنى تۆۋەن سالدى. مېڭەمنىڭ بىر يەرلىرى بىلىنەر - بىلىنمەس غىدىقلىنىشقا باشلىدىيۇ، بىراق ئالاھىدە ئىنكاس يوق. خىيالىم يەنە شۇ ئىكرانغا مەركەزلەشتى. ئەتراپىمغا بىر توپ كىشى يىغىلدى. ئاڭغىچە قۇتقۇزۇش ماشىنىلىرى يېتىپ كەلدى. مەن سوقۇلغان پىكاپنىڭ ئوڭ پاي چاقى ئاستىدا مىجىلىپ كېتەيلا دەپ قالغان قول تېلېفۇنۇمنى قاياقتىندۇر يەنە شۇ شىلەپىلىك كىشى پەيدا بولۇپ كېلىپ قولغا ئالدىدە، نومۇر تېزىملىكىنى ئېچىپ، خالئايغا تېلېفۇن سايراتتى. سۆزلىشىپ بولۇپ، تېلېفۇننى تۇيدۇرماي كۆزەينەكلىك دوختۇرنى سىيپاپ ئۆتۈپ خالىتىنىڭ يانچۇقىغا سېلىپ قويدى. قارا بۇ گۇينىڭ ئەقىللىقلىقىنى. ئاڭغىچە ئۇ تەرەپتىن خالئاي ھاسىراپ يۈگۈرگىنىچە مەن تەرەپكە كېلىۋېتىپ، مەنزىلگە ئۇلىشىشىغا 5 مېتىرچە ئارىلىق قالغاندا ئوڭ ئەرىپىدىن كەلگەن كۆڭ رەڭلىق يۈك ماشىنىسىنىڭ ئاستىغا كىرىپ كەتتى. ئېغىزىمنى ئېچىپلا قالدىم. ماشىنا ئەينىكىگە چاچرىغان قان يامغۇردەك تامشىۋاتىدۇ... بىردىنلا تېنىم شۈركەندى.
— ياق!
قاياقتىندۇر بۇ ئاۋاز ئاڭلىنىدىكەن. قارىسام ئەكبەر. ئۇ خالئاينىڭ قېشىغا يۈگۈرۈپ كېلىپ بېشىنى قۇچىغا ئالدىدە، قۇتقۇزۇش ماشىنىسىنى چاقىردى. مېنى ھارۋىغا سېلىۋاتقان دوختۇرلار، جۇغلاشقان ئادەملەر يەردە قانسىراپ ياتاقان قىز بىلەن «قۇتقۇزۇڭلار» دەپ ۋارقىراۋاتقان يېگىتكە قاراپ بۇ تاسادىپىي ۋەقەدىن ھەيران قىلىشتى. قۇتقۇزۇش ماشىنىسىغا خالئاي چىقىرىلدى، ئەكبەرمۇ ئەگىشىپ چىقىۋالدى. قان بېرىشكە توغرا كەلگەندە ئەكبەر پەقەت ۋە پەقەت خالئايغىلا قان بېرەلەيدىغانلىقىنى شەرت قىلىدى. قان تېپىمىز ئوخشاش تۇرۇپ ماڭا پەرۋامۇ قىلىپ قويمىغىنىغا ئاچچىقىم كەلدىيۇ، بىراق ئورنىدا مەن بولغان بولساممۇ جەزمەن شۇنداق قىلغان بولاتتىم. دوختۇرخانىغا ئېلىپ كېلىنىپ ئىگە چىقمىغىنى قەلبىمنى لەش قىلدى. مۇساپىرچىلىقنىڭ كۈنى شۇ بولسا كېرەك. دوختۇرنىڭ ئېغىزىدىن «بۇ يىگىت خاتىرىسىنى يوقاتتى...» دېگەن سۆزلەر چىقىشقا باشلىغىنىدا پىلاستىنكا ئۆچتى. گەرچە كەچمىشىمنى كۆرۈۈپ پۈتۈنلەي ئەسلىمنى تاپالمىغان بولساممۇ، پاكىت ئالدىدا «ياق» دېيىشكە پىتىنالمىدىم.
— سىز بۇلارنى نەدە تۇرۇپ سۈرەتكە تارتىۋالدىڭىز؟
— خى، سۈرەتكە مەن ئالمىدىم، ئوپىراتورلار ئالدى.
— نېمىشقا كەچمىشىمنى سۈرەتكە ئالىسىلەر؟
— بۇ سوئالىڭغا تەسىلىي جاۋاب بېرەلمەيمەن، قىسقارتىپ ئېيتسام، سېنىڭ كەچمىشنىڭ ماڭا يارايدۇ. سۈرەتكە ئېلىپ، ئازراقلا تەھرىرلىسە تۇرمۇش پۇرىقى كۈچلۈك بولغان ياشلارنىڭ ئەڭ رومانتىك فىلىمىگە ئايلىنالايدۇ. ساڭا كۆرگىنىڭ قىسمەتلىرىڭنىڭ ئالتىدىن بىرى.
— دېمەك، كەينىمگە چۈشكىلى خېلى يىللار بوپتۇدە؟!
— خالئاينىڭ كەينىگە چۈشكەن چاغلىرىڭدىن باشلاندى دېسەك توغرا بولىدۇ. ساياھەتتە يۈرگەن چاغلىرىمدا تاسادىپىي كۆزۈمگە چىلىقىپ قالدىڭ. مەنمۇ ئويۇن - تاماشىلىرىمنى يۇغۇشتۇرۇپ، كىنو سەنئىتىگە قايتىدىن ئۈمىد باغلاپ ئادەملىرىمنى توپلاپ ئىزىڭغا چۈشتۇق. ئەلۋەتتە ساڭىل قاراپ ئولتۇرمىدۇق، ئىلمىي فانتازىيە، كارتون... قاتارلىىقلارنىمۇ ئىشلەپ تۇردۇق ھەم ئىشلەۋاتىمىز. تەلىيىمگە بىر كۈنى سەن شىركىتىمىزگە ئىش ئىزدەپ كەپسەن. ئالدىمغا يۈرەكلىك ھالدا تاشلىغان سىنارىيەڭ مېنى چۆچۈتۈپ قويدى. سېنى ئېلىپ قېلىش ئويۇم بولغاچقا پۇزىتسىيەڭنىڭ ناچارلىقىغا قارىماي يېنىمدا قالدۇردۇم. قارىسام، سەن تىرىشچان، ئەستايىدىل، ئىش ئۇقىدىغان يىگىت ئىكەنسەن. تۇيۇقسىز ھۆرمىتىم ئېشىپ قالدى. ئارقىدىن ماشىنىغا سوقۇلدۇڭ. مۇھىم قىسمەتلىرىڭ يۈز بەرگەن مۇھتتا مەنمۇ ئەتراپىڭدا مەنمۇ پەيدا بولدۇم. ئەسلىي دوختۇرخانىغا سېنى بۇرۇنلا يوقلاپ كەلسەم بولاتتى، بىراق ئۈنۈمسىز ئىكەنلىكىنى ھېس قىلدىم. خەۋىرىڭنى بۇرادەرلىرىمدىن ئاڭلاپ تۇردۇم.
— مېنىڭ تېلېفۇنۇمنى كۆزەينەكلىك دوختۇرنىڭ يانۇقىغا سېلىپ قويۇپتىكەنسىز، قانداق بولۇپ يەنە سىزنىڭ قولىڭىزغا ئۆتۈپ قالدى؟
— كۆزەينەكلىك دوختۇر تېلېفۇننى ئەكبەرگە بېرىپتىكەن، ئەكبەر ئۆيدىكىلىرىڭگە خەەۋەر قىلىۋېتىپ بولۇپ تۇيۇقسىز مۇشۇ قەۋەتنىڭ قايسى بىر دېرىزىسىدىن تېلېفۇنۇڭنى گۈللۈككە چۆرىۋېتىپتۇ. سىلەرگە قويۇپ قويغان كۆزەتچىلىرىم تېپىۋىلىپ ماڭا تاپشۇرۇپ بەردى.
— ئۇ نېمىشقا چۆرۈۋېتىدۇ؟ ھېچ كاللامدىن ئۆتمىدى دېسە....
— ئېنىقكى، سېنىڭ بۇ مۇرەككەپ ئىشلىرىڭغا ساقچى تەرەپمۇ ئارىلاشقان. شۇڭا ساقچىلارنى ئۇنى ئىزدەپ كېلىپ ئاۋارە قىلىشىدىن ئەنسىرەپ، تېلېفۇنىڭنى چۆرىۋەتتى. خالئاينىڭ تېلېفۇنىغا كەلسەك، ۋەقە يۈز بەرگەن كۈنى نەخ مەيداندىكى ھەممە ئىشلار ئاخىرلىشىپ خالئاي ماشنىغا سوقۇلغان ئورۇنغا كەلسەم، تېلېفۇنى شۇ بىر ئىستولبىنىڭ يېنىدا ئاجراپ يېتىپتۇ. شۇ چاغدا ئېلىۋېلىپ قايتا قوراشتۇۇرپ، رىمۇنىتلاپ ھەر ھالدا ئىشلەتكىلى بولىدىغان ھالەتكە ئەكېلىپ قويغانىدىم.
— بۈگۈن خالئاينىڭ خاتىرىسى ئەسلىگە كەلگەنلىكىگە ئىشىنىمەن. قولىڭىزدىكى پىلاستىنكىنى كۆرگەن بولسا، ئەلۋەتتە مەندىن تانىدۇ. نېمىشقا بۇنداق قىلىسىز؟
— ئويۇننى تېخىمۇ قىززىق بولسۇن دەپ.
— خى، نەزىرىڭىزدە رىئاللىقتىكى ئاچچىق كەچمىشلىرىم سىزگە ئويۇندەك تۇيۇلۇپ قاپتۇدە؟ خالئاي بىلەن مەن سىزنىڭ ئويۇنچۇقىڭىز بوپتۇق. تولىمۇ رەزىل ئىكەنسىز. خەپ، ھەر ئىشنىڭ ۋاقىت - سائىتى كېلىدۇ، سىزنى بوش قويىۋەتمەيمەن.
— مەن سېنىڭ دەل مۇشۇ ئاخىرقى سۆزۈڭنى تەقەززالىق بىلەن كۈتۈپ تۇرغانتىم ئەكبە، چاتاق يوق، رىقابەتكە ھازىرلىق كۆرسەڭ بولىدۇ. ھاياتنىڭ پەيزى ئەگرى - توقايلىقتا. سەن ئىرادىگە تولساڭ ئويۇنىمىز تېخىمۇ قىزىيدۇ يىگىت.
— بىز توغرۇلۇق يەنە قانداق ئەشەددى پېلانلارنى تۈزدىڭىز؟
— ئۇنى دەۋەتسەم قانداق بولىدۇ؟ ئۇنىڭ ئۈستىگە پېلانلىرىم شارائىتقا قاراپ ئۆزگىرىپ قىلىشى مۇمكىن. ئېسىڭدە بولسۇن، كۈنلۈكمۇ ئىككى خىل بولىدۇ، يامغۇرلۇق كۈنلۈك، ئاپتاپلىق كۈنلۈك. بۇنى كۆپ كىشىلەر ئۇقمايدۇدە، دائىم ھاياتقا ئۇتتۇرۇپلا ياشايدۇ.
— قارىسام سىز تۇرمۇشقا پىشقان ئادەمكەنسىز. بولدى، سز بىلەن رىقابەتلەشمەيمەن. بىراق بۇندىن كېيىن بىز ئالاقە قىلمايلى. يولۇمغا پۇتلاشماڭ! بولامدۇ؟
— خى، خى، خى، قارا قورققىنىڭدىن چىرايىڭنىڭ تاتىرىپ كەتكىنىنى. يولۇمغا پۇتلاشماڭ دېگەن سۆزۈڭ ئۈچۈن بولسىمۇ سېنى دائىم ئاۋارە قىلىپ تۇرىمەن. سېنىڭ ئىرادىسىز ئىنسان ئىكەنلىكىڭگە ئىشەنمەيمەن، ھامان بىر كۈنى مېنى يېقىتالايسەن.
— ياق، مەن بۇنداق ئەسكى ئويۇننى ئوينىمايمەن ئەپەندىم، ئارتۇقچە زورلىمىسىڭىز.
— مەقسىتىمنى خاتا چۈشىنىۋاپسەن، راسىت گەپنى ئېيتاي، مەن سېنى ياقتۇرىمەن يېگىت. كاللاڭ ئوچۇق، ياراملىق ئادەمسەن. مەن قىرىقتىن ھالقىپتىمەن. ئۆمرۈمنىڭ يېرىمىنى يەمچۈك قىلىپ بولدۇم. ئەمدى ئورنۇمنى باسقۇدەك بىر نامزات بولۇشى كېرەك. بۇنىڭغا سە ئەڭ مۇۋاپىق كېلىسەن. مەن بىلەن ئىشلە بولامدۇ؟
— كەينىڭىزگە كىرىپ مەنمۇ سىزدەك قايسى بىر جۈپلەرنىڭ، قايسى بىر ئاجىزلارنىڭ تۇرمۇشىغا چاقچاق قىلىپ ياشامدىم؟ ياق، ئىككىمىز بىر يولدىكى ئادەم ئەمەس، سىزگە سەپەرداش بولالمايمەن.
— مېنى ھەقىقەتەن ئەسكى ئادەم دەپ چاغلامسەن؟ مەن نېمىشقا خالئاينىڭ خاتىرىىسنى ئەسلىگە كەلتۈرۈپ ئۇنى ئەكبەرنىڭ قېشىغا كەتكۈزىۋەتتىم بىلەمسەن؟
ئۇنىڭ بۇ سوئالىغا قىزىقىپ يۈزىگە بۇرۇلۇپ قارىدىم
— راسىت، نېمىشقا ئۇنى مەندىن ئايرىۋىتىىسز؟
— سوئالىڭ خاتا بولۇپ قالدى. ئۇنى سەندىن ئايرىۋەتكىنى مەن ئەەمس. ئۆزى كەتتى. خاتىرىسى ئەسلىگە كېلىشى بىلەن تەڭ چۈشەندۈرۈشۈمنىمۇ ئاڭلىماي ئىشخانامدىن چىقىپ كەتتى. كەينىدىن چىقىپ توسۇپ يۈرمىدىم، چۈنكى، ئۇنىڭ ئالدىنى توسىيالىغىنىم بىلەن كۆڭلىنى توسۇيالمايمەندە.
— دېمەك، ئۇ ئەكبەرنى سۆيىدىكەن شۇنداقمۇ؟
— شۇنداقراق چۈشىنىپ تۇرايلى، ئۇ سېنى قايتا ئۇچرىتىپ قىلىشنى خالىمايدىكەن. ھاياتىدا سەن بىلەن قايتا بىر يەرگە كېلىپ قىلىشنى ئىككىنچى چوڭ خاتالىقى دەپ بىلىدىكەن. ئەمىسە دوختۇرخانىدا نېىمىشقا ئەكبەرنى تاللىماي پەرھاتنى تاللايسىز دەپ سورىسام، ئۇ ۋاقتىدا كاللام جايىدا ئەمەستى، خاتىرەمنى يوقۇتۇشۇمغىمۇ پەرھات سەۋەبچى. ئەكبەر ماڭا شۇنچە قىلسا ئۇنى پەرۋايىمغا كەلتۈرمەپتىمەن، ئەمدى بولسىمۇ سۆيەنىڭ قەدرىگە يېتىشىم كېرەك.... دەپ جاۋاب بەردى.
— ئۇنىڭغا راستىنلا ئۇۋال قىلدىممۇ؟
— ئۆزۈڭنى كۆپ سوراقلىما، ھەقىقەت ئىگىلىدۇ، سۇنمايدۇ. ئەسئى ئۇنى يېنىڭغا قايتۇرۋېتەلەيتتى، بىراق ئۇنىڭ قەلبىدە شەكىللەنگەن ئوي - تۈگۈنلەر ۋاقىتنىڭ ئۆتۈشى بىلەن پارتىلاپ چىقىپ ئازابلىرڭنىڭ تېخىمۇ ئاتىپ كېتىشىنى خالىمىدىم. سىلەرنى ياخشى ياشىدى دەپ قارىغان تەقدىردىمۇ توي كۈنۈڭلاردا.... توي كۈنۈڭلاردا ئەكبەر جاھاننىڭ ئۇ چېتىدە بولسىمۇ پەيدا بولۇپ قالىدۇ، ئۆزىگە نىسىپ بولمىغان قىزنىڭ باشقا بىرسىگە نىسىپ بولۇشىنى ئۇ قانداقمۇ ئىچىگە سىغدۇرالىسۇن؟ نىكاھ ئوقۇلىۋاتقان دەقىقىگە ئۇدۇللاپ :«خالئاي، سەن بىلەن توي قىلىشقا تېگىشلىك يېگىت ئەسلى مەن. يېنىڭدا تۇرغان ئۇ يىگىتنىڭ مانچە يىللار بۇرۇن سەن ئەڭ ئۆز كۆرىدىغان ئادىمىڭ ئىكەنلىكىنى ئېسىڭدىن چىقىرىپ قويدۇڭ! خاتىرەڭنى يۇقۇتۇشۇڭغا سەۋەبچى بولغان خۇمپەر دەل پەرھات ئىكەنلىكىنى خىيالىڭغا كەلتۈرمىگەن بولغىيتتىڭ -ھە؟ ئەسلى ھېكايەت مۇنداق....» دەپ چالىسىنى سۆزلەپ چۇقان كۆتۈرىدۇ. دېگەنلىرىم مىسالغا كەلتۈرۈش ئۈچۈن پەرەز بىلەن دېيىلدى، بىراق چوقۇم ھەر ئامال بىلەن تويۇڭنى بۇزىۋىتىشتىن يانمايدۇ. بۇنىڭغا ئىشەن.
— ئەكبەر ئۇنچىۋالا ئەسكىلكنىمۇ قىلماس.
— مۇھەببەت كىشىنى نېمە كويلارغا سالمايدۇ دەيسەن! ناۋادا ئۇنىڭ ئورنىدا سە بولغان بولساڭ ئاشۇ خىل ئەھۋالدا قانداق قىلغان بولاتتىڭ؟
— ئەكبەر ئۇنچىلىك قەھرىمانلىق كۆرسەتكەن يەردە مەن چوقۇم ئۇىىڭدىنمۇ ئاشۇرۇپ توينى بۇزاتتىم.
— خى، گەپ دەل مۇشۇ يەردە. تولىمۇ ئەخمەق بالىكەنسەن. توينى بۇزساڭ خالئاي ئەكبەرگىمۇ، ساڭىمۇ نىسىپ بولالماي قايسى بىر لالما ئىرتنىڭ قولىدا بەختسىز بولۇپ قالمامدۇ؟ شۇنىڭ بىلەن جەمئىي 3 ئادەم بەختسىز بەختسىز بوپ قىلىشنى كەلتۈرۈپ چىقارماقچىمۇ سەن؟ بالام دەپ جان كۆيدۈرگەن ئاتا - ئاناڭلارنى قوشۇپ ھېسابلىساق ئۈچتىنمۇ ئېشىپ كەتكۈدەكسىلەر. مۇھەببەتلىك ياشاشقىمۇ كاللا كېتىدۇ يېگىت.
ئۇ ناھايتى تەمكىنلىك بىلەن كۆرسەتكۈچ بارمىقىدا چىكىسىگە ئۇرۇپ قيدى.
— قارىغاندا بۇ خىل ئىلاجسىزلىققا ئامالىڭىز بار ئوخشىمامدۇ؟
— ئامال يوق ئەمەس، ئەلۋەتتە بار. بىراق تۆلەيدىغان بەدىلى، ئورۇندايدىغان شەرتى بار.
— شەرتىنى ئېيتىڭ!
— شەرتى بەك ئاددىي، ھازىرچە ماڭا ئەگەشكىن. نۆۋىتى كەلگەندە بىلىپ بىلمەي ئۆزۈڭ يېتەرلىك ئېقتىدارغا ئىگە بولۇپ قالىسەن. ئامال دېگەن شۇ.
— مەن يېتەرلىك ئېقتىدار ھازىرلاپ بولغۇچە ۋاقتى بەك كەينىگە سوزۇلۇپ كېتىپ، خالئاي توي قىپ بولسىچۇ؟
— ھەممە ئىش ئاللاھنىڭ تەقدىرى بىلەن بولىدۇ. توي قىپ بولسا ھېچ گەپ يوق. بۇ يەردە كۆڭۈل مەسىلىسى مەۋجۇت. قايىل بولسا قايتىپ كېلىدۇ، قايتىپ كېلىشكە ئىمكانىيەت بولمىسا ئۆلگۈچە سېنى ياد ئېتىپ تۇرىدۇ. ساڭا بۇلارمۇ يېتەرلىك ئەمەسمۇ؟
— دېگەنلىرىڭىز ئورۇنلۇق بىلىندى. بوپتۇ، سىزگە ئەگەشتىم. شەرتىم، مەن چىن سۆيگۈگە ئېرىشمەكچى، يەنە كېلىپ خالئاينىڭ سۆيگۈسىگە.
— ساڭا خالئايدىن باشقا قىز كۆڭۈل بەرسە رەت قىلامسەن؟
— ئەلۋەتتە، كىممۇ قەلبىمدە ئۇنىڭدەك ئىز قالدۇرالىسۇن!
— ئەمىسە سەن بۇ جاھاندىن سۆيگۈسىز ئۆتۈپ كەتكۈدەكسەن. «كەپىنى ياراتماي مەيداندا قالدىم، دەرماننى قوغلىىشپ ئارماندا قالدىم» دېگەن شۇدە.
— ئەمىسە ئىشنى قەيەردىن باشلىسام بولار؟
— ئىشلارنى ئورنۇڭدىن تۇرۇشتىن باشلا بۇنىڭدنمۇ ئېسىلراق چارە ساڭا تېپىلمايدۇ.
ئۇ شىلەپىسىنى بەش بارمىقىدا قاماللاپ ئېلىپ بىر بارمىقىدا چۆرگىلىتىشكە باشلىدى.  بۇ غەلىتە ئادەمكىنا، خۇددى بىزنىڭ خىلىمىزدىن ئەمەستەك. گەپلىرى قايىلقىلارلىق چىقىدىكەن. قىنى ۋاقىتلىق ئەگىشىپ ناقاي، ناۋادا ساختىپەر بىر نېمە بولسا دەرھال يېنىدىن ئايرىلارمەن.
— مەن ئاساسەن ساقايدىم، بۈگۈنلا ئورنۇمدىن تۇراي.
— خى، سەل بۇرۇن بوپ قالارمىكىن يىگىت!
— ياق، بۇرۇن ئەمەس. ئاۋۋال تۇرۇپ باقمامدىم.
— بوپتۇ، كۈچۈڭنى سىناپ باقايلى. ئاۋۋال تاماقنى يەۋال، ئاندىن دوختۇرخانىدىكى ۋىساباتنى بوغۇپ، ئازاد بولايلى. ۋاقتىنچە شىركەتتىن ساڭا بىر ئېغىر ئۆي ئاجرىتىپ بېرىمەن. ئۆيۈڭ شۇ بولغاچ تۇرسۇن. ئاندىن كېيىنكى ئىشلارنى ئۆز نۆۋىتىدە كۆرەيلى، قانداق؟
— پىكىرىڭى ياقتى، قۇرۇق رەھمەت ئېيىتپ يۈرمەيمەن، رەھمەت ئېيتقۇدەك ئېقتىدار ھازىرلاپ بىر - بىرلەپ ئادىمگەرچىلىك قىلاي.
— ئوغۇل بالىنىڭ گېپىنى قىلدىڭ، — ئۇ مۈرەمگە ئۇرۇپ قويدى، — قىنى تاماققا باققىن.
10 مىنۇتقا سوزۇلماي تاماق يېيىلىپ بولدى. 15 ئىچىدە نەر - كېرەكلىىرمنى جابدۇقلاپ تاق بولدۇم.
— پۈتتى، ماڭايلى ئاكا!
— ھەي، بىر تەكلىپ پىكىرىم بار، ئاڭلاپ باقامسەن؟
— قىنى ئېيتىڭ!
— ھاياتقا كۈلۈپ باققۇڭ بولسا، ئۆزۈڭنى دۇنياغا قايتىدىن نەزەر تاشلىماقچى بولساڭ، بۇ كونا بوغچىلارنى تاشلىۋەتسەڭكەن دەيمەن. دوختۇرخانىدىن قول سالغان پېتى چىقىپ كېتەيلى!
— ئەمىسە سىز سوۋغا قىلغان قول تېلېفۇننى ئېلىۋالاي!
— ئۇنىمۇ قويۇپ قوي، ساڭا بۈگۈن يەنە بىرنى ئېلىپ بېرىمەن. ئالغاندىمۇ ئەڭ ئېسىلىنى.
گېپىدىن سەل ئىككىلىنىپ تۇرۇپ قالغان بولساممۇ، بىراق ئۇنىڭ «ئازاد بولىمىز» دېگەن سۆزلىرىنى قايتا ئېسىمگە ئېلىپ قولۇمدىكى بوغچىلارنى كارۋاتقىلا ئاتتىم.
— ماقۇل، ئەمىسە كەتتۇق!
دوختۇرخانا خىراجىتىنى ئۇ كىىشى بىر تەرەپ قىلىۋەتتى. سىرتقا چىقىپلا گىرادۇسلۇق كۆزەينىكىنى تاقىۋالدى.
— نەگە بارغۇڭ بار؟
— ئۆزىڭىز بىكىتىڭ!
— تېلېفۇن ئالغىلى بارايلى! «ئالما» ئېلىپ بەرسەم رازى بولامسەن؟
— نېمە؟ ئالما دېدىڭىزما؟ ماقۇل، ئۇنىمۇ يەپ قويغۇلۇق.
— خى، جاھاندىن بىخەۋەردە سەن، مېنىڭ دەۋەتقىنىم يەيدىغان ئالما ئەمەس. تېلېفۇننىڭ ماركىسى.
— ھە، چۈشەندىم، قارىغاندا ئۇ خېلى ئېسىل ماركىكەندە؟
— خېلى ئېسىل دەپ تەرپلىسەك قىممىتىگە تەسىر يېتىدۇ. تېلېفۇنلارنىڭ ئاتىسى دېسەك لايىقىدا بولىدۇ. «ئالما» دۇنيا داڭلىق 50 كارخانىنىڭ بىرسىگە ئىگىدارچىلىق قىلىغان جوبىس ئەپەندىنىڭ مەھسۇلاتلىرى. ئەپسۇس، ئۇ يېقىندا ياشلا ۋاپات بولدى. بىراق مەھسۇلاتلىرىنىڭ سېتىلىش قىممىتى دۇنيادا بەشنىڭ ئىچىدە.
— ياشلا تۇرۇپ ئالدەمدىن ئۆتۈپتۈ، قارىغاندا كېسىلى بار ئوخشمامدۇ؟ قەيەرلىك ئادەم ئۇ؟
—  ئۇ ئامېرىكىلىق مەشھۇر كارخانىچى، خەۋەرلەردە ئېيتىلىشىچە، ئالاھىدە كېسىلىمۇ يوق ئىكەن، پۇل تاپىمەن دەپ زىيادە چارچاپ كېتىش سەۋەبلىك تېنى ھەرىكەتتىن توختاپتۇ.
ئاڭغىچە تېلېفۇن بازىرىغىمۇ كېلىپ قالدۇق.
— ۋاھ، ئېلىكتېرون بازىرى قايناپ كېتىپتىغۇ؟
— ماشىنىدىن چۈشۈپ ئاۋۇ دوقمۇشتا مېنى ساقلاپ تۇرغىن، ماشىنىنى جايلاشتۇرىۋېتىپ يېنىڭدا ھازىر بولىمەن.
تېلېفۇن بازىرىغا كىرىپ «ئالما» سۈرىتى چۈشۈرۈلگەن تېلېفۇنلارنىڭ ھەممسىنى بىر قۇر ئاختۇرۇپ چىقتۇق، ئۇنىڭغا يارىمىدى.
— نېمىشقا ئالمايمىز؟
— ئانچە ئىشەنچىلىك كۆرمىدىم. چەتئەلدىكى دوستلىرىمغا دەپ ئاشۇ تەرەپتىن ئەكەلدۈرۈپ بېرەي.
— كۆپ ھەشەمەت قىلمايلى، مۇشۇمۇ يېتەرلىك.
— ھەشەمەت قىلغىنىم ئەەمس، يىگىت دېگەن يىگختتەك بولغۇلۇق. قول ئاستىمدا ئىشلەيدىغان ياردەمچىلرىمنى كۆرىدىغان بولساڭ مېنىڭ ھەقىقىي ئەركەكتەك ياشايدىغانلىقىنى ھېس قىلىپ قالىسەن. كاللا ئىشلىتىپ پۇل تېپىش كېرەك، تاپقاندىمۇ راۋرۇس تېپىش كېرەك، ئېسىل كىيىنىپ، ئېسىل يەپ، ئېسىل يۈرگۈلۈك. بىراۋ ھەۋەس قىلسۇن. ئەرلەرنى كۆرەلمەيدىغان ئاياللارنىڭ كۆزىنى ئېچىپ قويۇشنى بىل يىگىت! بۇنداق دېگىنىم ھەرگىزمۇ كىبىرىڭنى كۆرسىتىپ، غادىيىپ يۈرگىن دېگەنلىك ئەمەس. تۆت كۈنلۈك جاھاندا ئاللاھ بەرگەن يولدا دۇرۇس نىيەت مېڭىپ، ھارغۇچە ئىشلەپ، تاپقىنىڭنى قۇۋزىڭغا تولدۇۇرپ - تولدۇرۇپ چىلشەپ ياشىۋالغىنىڭ تۈزۈك. كەتسەڭ ھەممىسى ماللىىرڭدىن، جانلىرىڭدىن، باللىرىڭدىن ئايرىلىسەن. يىغىنچاقلىسام، مەن ئىلمىي تۈرمۇش كەچۈرۈشنى كۈچەپ تەشەببۇس قىلغۇچى. بۇ ئادەتنى مەن ھوللىۋودتا يېتىلدۈۈرگەن.
— ھوللىۋۇد؟ ئاڭلىغاندەك قىلىمەن.
— ئىم، تىللا تۆكۈلىدىغان شەھەر دەپ نامى بار. ئۇ يەرلىكلەر كىنو ئىشلەپ باي بولۇپ كەتكەن. قۇرۇلۇشلىرى، ئادەملىرى، مائارىپى پىلاتوننىڭ غايىۋىي دۆلىتىنى ئەسلىتىپ قويىدۇ.
گېپىدىن چىقىپ تۇۇرپتۇكى، ئۇ بۇ يەرلىكەردىن كۆپ پەرقلىنىدىكەن. كاللىسى ئوچۇق، ئەقىللىق ئادەمكەن.
— ھازىرچە ساڭا ئاددىي بولسىمۇ بىر خاتىرە كومپىيوتىر ئېلىپ بەرگەچ تۇراي، تېلېفۇنۇڭمۇ بىر ئاي ئىچىدە قولۇڭغا ئۈنۈپ بولىدۇ.
ئۇ بىر دۇكانغا كىرىپ 6000 سومغا قارا رەڭلىك سىپتا لايىھەلەنگەن خاتىرە كومپىيوتىر سېتىۋالدى، — دە، ماڭا سۇندى. رەھمەت ئېيىتپ ھەشقاللىسى بىلەن مەمنۇنلۇق ئىلكىدە قولۇمغا ئالدىم. ئاندىن قايتتۇق.
— نەگە ماڭدۇق؟ — ماشىنىدا كېتىۋاتقان سورىدىم.
— شىركەتكە.
— گېپىڭزچە، ھوللىھودتا ئۇزاق تۇرۇپتىكەنسىزدە؟
— ھوللىھودتا ئۈچ يىل تۇرۇپ فانتازىيەلىك كىنو ئىشلەش ماھارىتىنى ئىگەللىدىم، ياپۇنىيەدە بىر يىل تۇرۇپ كارتون فىلىم ماھارىتىنى ئۈگەندىم، كۆپلەپ پۇل تاپتىم، ئاخىرىدا فىرانسىيە كېلىپ پارىژدا 6 ئاي ساياھەتتە بولدۇم. ئاندىن ۋەتەنگە قايتتىم. بۇ يەردە پۇلۇڭ بولغان بىلەنمۇ رول ئالىدىغان ئادەم يوق، كىشىنى ۋاي دېگۈزگىدەك سىنارىيە تېخىمۇ يوق، ساپلا قىلىپلىىشپ قالغان كونا ئاخلاق - پەزىلەت كىتابى يۇسۇندا يېزىلىۋېرىدىكەن. چەتئەلگە قايتىپ چىقىپ كېتەي دېگەنتىم، بۇرۇنقىدەك ياخشى ئورۇنلارغا، كاتتا ئۇستازلارغا ئېرىشەلەمدىم يوق ئۇقمىغاچقا لاغايلاپ يۈردۈم، تۇيۇقسىز سەن ئۇچراپ قالدىڭ. قارىسام مىجەزىمىز چىقىشىدىغاندەك تۇيۇلدى. شۇڭا بىر يىلدىن بىرى ئىزچىل ئىزىڭدا بولدۇم. ماڭا ياردەم قىل، ھەمكارلىشپ بىر ئىش قىلايلى...!
— كىنو ئىشلەمدۇق؟
— ئەلۋەتتە، سېنى ئۆزۈم بىر قوللۇق تەربىيلەيمەن. بىر تەرەپتىن يېزىقچىلىقڭنى قىلغاچ، بىر تەرەپتىن رول ئالىسەن.
— قاملاشتۇرالماي قالارمەنمىكىن رىژىسسور.
— ئەنسىرمە، بارا - بارا تەرەققىي قىلىشىمىزغا ئەگىشىپ سېنى چەتئەللەرگە تەربىيلىنىشكە چىقارتىمەن. بىز دۇنياغا يۈزلەنگەن ئىنقىلا خاراكتارلىك ئىشلارنى ۋۇجۇدقا چىقىرالىشىمىز كېرەك. سەۋەبى بىرلا، بىز دۆت ئەمەس. چۈشەندىڭمۇ؟
ئۇ ماڭا مەنىلىك قاراپ قويدى — دە، ئالدىدىكى ماشىنىغا سىگنال بېرىپ، بىر ئېگىز بىنانىڭ ئالدىغا كېلىپ ماشىنىنى تورمۇزلىدى.
— كەلدۇق.
— ۋاھ، بۇ بىنا سىزنىڭمۇ؟
— خى، ياقەي، بۇ بىنانى سېتىۋېلىشقا پۇلۇم يېتىدۇ، بىراق سېتىۋالغانغا تۇشلۇق ئارزۇيۇم ھازىر بولمايدۇ. ناۋادا بايقى پىكىرىمنى ماقۇل كۆرسەڭ ئاللاھ خالىسا كەلگۈسىدە بۇنداق بىنادىن بىر نەچچىگە ئىگە بولىمىز. قىنى مەن بىلەن يۈر!
تۆتىنچى قەۋەتكە چىقتۇق. مۇھىتى تىپتىىچ ئىدى. خۇددى ھېچكىشى يوقتەك. ئىشخانىنىڭ ئىشىكى ئېچىلدى.
— ئادەملىرىڭىز قىنى؟
— مەن ئادەتتە ھەمراھلىرىمنى ئالاھىدە يىغىنلار بوپ قالمىسا ئىشخانىغا يىغىۋالمايمەن. تىگىشلىك ۋەزىپە تاپشۇرۇپ قويۇپ ئەركىن قويۇپ برىمەن. ئۇلارمۇ ئادەتتىكى كىشىلەردىن پەرقلىنىدۇ، بەك گەپ ئاڭلايدۇ. نىشانىمىز بىر.
— ھە، چۈشەندىم، قالتىسكەنسىز جۇمۇ! باشقۇرۇش ئېقتىدارىڭىزغا قول قول قويدۇم.
— ئۆۈمنى ماختىغىنىم ئەمەس، ئىشقىلىپ ئەقلىمگە قوشۇلۇپ پاراسىتىممۇ بار. ماۋۇ ئۆي بوش. ساڭا تەقدىم قىلاي،.
— ۋاھ، كارىۋات، يوتقان - كۆرپە، كىيىم ئىشكابى... ھەممىسى تولۇق ئىكەنغۇ! بۇرۇن بىرەرسى تۇرغاندەك ئەمەس.
— ئەلۋەتتە، تېخى يىپيېڭى. سېنى كېلىدۇ دەپ تەييارلاپ قويغان.
— مېنىڭ كېلىشىمگە شۇنچىۋالا ئىشەنچىڭىز بارمىتى؟
— شۇنداق، ئادەتتە مېنىڭ ئىش بىجىرىش سەۋىيەم %98.5. چەتئەلدە تۇرغان ۋاقتىمدا يەھۇدى مىللىىتىدىن بىر قىز دوستۇم بولىدىغان. شۇ تەكشۈرۈپ بىكىتكەن.
— ۋاھ، يەھۇدىي مىللىتىدىن قىز دوست تۇتقانمىتىڭىز؟
— ھەيران قالما، ئۇ مۇسۇلمان قىز. ۋەتىنىمگە قايتىشىمنى ئېيتقان ۋاقتىمدا كۆزىنى ياشلىغان ئايرىدورمدا قالغانتى.
ئۇ ئىككى قولىنى ئىشتىنىڭ يانچۇقىغا سالغانچە دېرىزە تۆۋىگە كېلىپ يېراقلارغا كۆز تىكتى - دە، ئېچىگە ئۇھ تارىتتى.
— ئۇنى ئەسلەپ تۇرىدىكەنسىزدە؟
— قەلبىدىكى ئاشىقىنى ئۇنتۇش ئاسان ئەمەستە. بىراق ئۈمۈدۈم ئۇنىڭدا ئەمەس. 15 يىل كىنو ساھەسىدە تىپىرلاپ يۈردۈم، ئارزۇيۇمغا يەتكەن كۈنۈم تۇرمۇش قۇرمىسام زېھنىم بۆلۈنۈپ كېتىپ كەسىپتىنمۇ، ئائىلەمدىنمۇ كۆڭلۈم سۇ ئىچمەي قىلىشىدىن ئەنسىرەيمەن.
— تېخى سىزنى تۇرمۇش قۇرۇپ بولغانمىكىن دەپتىمەن.
— خى، رىزقىم تېخى پۈتۈلمىگەن ئوخشايدۇ.
— بايامقى سوئالىڭىزغا ئەمدى جاۋاب بېرەي، مەن سىزگە ئەگخشىپ كىنو ساھەسىدە مۇۋەپپەقىيەت قازىنىشنى خالىدىم. سىزنىڭ خىيالىڭزچە بولغاندا، ئىلمىي فانتازىيلىك كىنولار بىلەن كارتون فىلىملارنىلا ئىشلەمدۇق؟ بۇ كىنولارنىڭ ئالدى ھېسابلىنامدۇ؟
— ئۇنداق ئەمەس، غەربلىكلەرنىڭ شۇنچە ئالقىشقا ئېرىشىۋاتقىنى پەقەت ۋە پەقەت تېخنىكا. يەنى، كومپىيوتىر تېخنىكىسى. بىزدە مۇشۇلا ماھارەت بولىدىكەن، تەسەۋۋۇر، باش قەھرىمان دېگەنلەر ئېشىپ - تېشىپ تۇرۇپتۇ. مەن ئويلايمەن، بىز ئۇلارنى دورىماي، ئېتىقادىمىز، دىيارمىز، ئۆرۈپ- ئادىتىمىز، مائارىپىمىز، ئىقتىسادىمىزنى گەۋدىلەندۈرىدىغان خاراكتىرىدىكى يارقىن كارتىنىلارنى مەيلى رىئال بولسۇن ياكى خىيال بولسۇن كىنو ئارقىلىق يارقىن نامايان قىلىپ خەلققە تارقىتىش كېرەك. بۇنداق بولغاندا خەلقئاراغا بۆسۈپ كىرىپ، دۇنياغا قەدەم تاشلىغىلى بولىدۇ.
— دېگىنىڭىزنىڭ ئاساسى بار.  ھازىرچە شىركەتتە ماڭا نېمە ئىش تاپشۇرىسىز؟ بىلىپ باققۇم بار.
— ئالدى بىلەن خالئاينى تولۇق ئۇنتۇپ كېتەلمىگەن تەقدىردىمۇ، كەسپى ئىشلارنى بىجىرگەندە ئۇ كاللاڭغا كىرىۋالمايىغان شارائىت ھازىرلىشىڭ كىرەك. قانچە تىز بولسا شۇنچە ياخشى. ئاندىن ساڭا ۋەزىپە تاپشۇرىمەن.
— ئىم، ئۇقتۇم، ھەقىقەتەن تىرىكچىلىكنىڭ يولىنى بىلىدىغان ئادەم ئىكەنسىز. ئىسمىڭىزنى سورىسام بولامدۇ؟
— باش رېژىسسور دەپ چاقىرغىن. ۋاقتى كەلگەندە ھەقىقىي ئىسمىمنى دەپ بىرىمەن.
— خوپ باش رېژىسسور!
— مەن بۈگۈنچە ئۆيگە قايتاي، ئەتە ئەتىگەن مۇشۇ يەردە كۆرىشەيلى پەرھات. ھە، راست، بۇ ئاچقۇچ سەندە قالسۇن! سىرتقا چىقساڭ لازىم بولىدۇ. ماڭدىم - ھە، ياخشى قال!
ئۇ قويۇن يانچۇقىدىن ئىككى دانە تۆت قىرلىق ئاچقۇچنى چىقىرىپ ماڭا سۇندى -دە، كۈلۈمسىرىگىنىچە ئىشخانىدىن غايىب بولدى.

ھىجران كوچىسىنىڭ 10- قىسمى تۈگىدى.
5-فېۋرال (چارشەنبە)

yawakoz

ھىجران كوچىسىدا...
11-قىسىم
كۈندۈزنى مۈگدەك بېسىشىغا يېقىن پەسكە چۈشۈپ تورتلۇق بولكا، مېنىرال سۇ، گازىر، سۈت سېتىۋېلىپ ئەكىرىپ قورسۇقۇمنى تويغۇزۇپ تۇردۇم. تەقدىرىم بەدىلىگە كەلگەن بۇ ياتاق ئۆيۈمدە نېمىش قىلىشنى بىلەلمەي زېرىكىپ تۇرغىنىمدا، خاتىرە كومپىيوتېرىمنى ئېچىپ بېقىش يادىمغا يەتتى. ئۇ يەرنى ھەپىلىشىپ، بۇ يەرنى مالتىلاپ بېقىپ تازا كۆڭلۈمنى ئېچىلدۇرالماي، كومپىيوتېرنىمۇ كىرىسلودا تاشلاپ قويۇپ كارۋېتىمغا ئورۇن راسلىدىم - دە، بۇلۇتقا يۇمشاققىنە ئۆزۈمنى تاشلىدىم. بۈگۈن بىر كۈن ئىچىدە جىق ئىشلار يۈز بەردى دېسە. ھاياتنىڭ ئىنساننى كۈتىۋالىدىغان دوقمۇشلىرى كۆپ بولىدىكەن. بىر كوچا قول ئېلىشقانچە باغرىغا بېسىپ قارشى ئالسا، بىر كوچا ئۈندىمەستىن يۈزۈڭگە تەتۈر كاچاتلاپ يولغا سالىدىكەن. نېمىش بولغىنىنىمۇ بىلەلمەي قالدىكىسەن. ياندۇرۇپ سەۋەبىنى سورىساڭ لېۋىنى مىدىرلىتىش تۈگەل، ئىشارە قىلپمۇ قويمايدىكەن ئەمەسمۇ! نى كۈنلەر بېشىمغا كەپتۇ. بىراق بۇ مېنىڭ ئۈمىدسىز خىياللارغا چۆكىدىغان دەقىقىلىرىم ئەمەس. گەرچە خالئايدىن ئايرىلىپ قالغان بولساممۇ، رېژىسسوردەك قوللىغۇچۇم بار. ئۇ مېنى قەدىرلەيدۇ. ئەجىبا ئوغۇل بالىنىڭ قەدرىنى قىز بالا، قىز بالىنىڭ قەدرىنى ئوغۇل بالا قىلىشى پەرھىز ئەمەسقۇ! ئوغۇللار ئوغۇللارنى، قىزلار قىزلارنى قەدرلەپ، قەدىرلىنىپ، قەدىرلىشىپ ئۆتسە بولىۋېرىدىغۇ! قىز - يىگىتلەرنىڭمۇ قەدىرلىنىدىغان ۋاقتى كېلىدۇ، ئۇنى ياراتقۇچى ئاللاھ ئۆزى توغۇرلايدۇ، بىز ئاجىز بەندىلەرنىڭ قولىدىن كۈتۈش، سەرۋر، بەدەل، تەلپۈنۈشلا كېلىدۇ. بۇ ئالەمنىڭ قىسمەت - ھېكايەتلىرىگە سەل ئىەىلىپ تۇرۇپ تاقابىل تۇرمىساڭ تەقدىر تەلۋىلىك بىلەن يۈەۈرۈپ كېلىپ ياقاڭدىن ئالغىنىچە گاھى تامغا، گاھى ماشىنىغا ئۈسسۈتۈپ قويىىدكەن، خۇددى مېنىڭ ھالىمدەك. تەقدىرمۇ كىشىگە يامان چاقچاق قىلىپ بولۇپ ئارقىدىنلا پىشانىسىگە پاققىدە بىرنى ئۇرۇپ پۇشايمان يەمدۇ - قانداق، ئېچى ئاغرىپ چىن مېھرى بىلەن بوينۇڭغا گىرە سالىدىكەن. شۇنىڭدىن ھېس قىلدىمكى، تەقدىرچىلىكنى چەتكە قېقىشمۇ تازا ئورۇنلۇق ئەمەستەك قىلىدۇ. خالئاينى قانداق قىلىپ ئۇنۇتارمەن ئەمدى. قېشىغا ئىزدەپ بارايمۇ - يا؟ ياق، ياق، ئۇ ھازىر ئەكبەرنىڭ قېشىدا. «سەن بىلەن كەتمەيمەن» دەپ تۇرىۋالسا ئەكبەرنىڭ ئالدىدا يۈزۈمنىڭ چۈشكىنى چۈشكەن. مۇھەببەت ئۈچۈن يۈزۈمغۇ چۈشسىغۇ ھېچ گەپ ئەمەس، ئۇنىڭغا مېڭنى يالۋۇرغىنىم بىكار. خالئاي ئەمدى يېنىمغا قايتمايدۇ. رېژىسسور دوختۇرخاندىن قول سېلىپ چىقىپ كېتىمىز دەپ ئەكبەر سوۋغا قىلغان كىتابلىرىممۇ ياستۇقۇمنىڭ ئاستىدىلا قاپتۇ ئەمەسمۇ. مۇشۇنداق غېربسىنغان ۋاقىتلىرىمدا بىرەر - ئىككى پارچە شېئىر ئوقۇپ قويغان بولسام دەردىم چىقىپ قالار بولغىيتتى. يازاي دېسەممۇ قەغەز - قەلىمىم يوق. بۈگۈن ھەجەب نامراتچىلىقتا ئۆتكەن بىر كۈنۈم بولدى دېسە. ھەي... ئۇيقۇم كەلمىسىمۇ كۆزۈمنى چىڭ يۇمۇپ باقاي.
مەن بارغانسىرى خىيال ئېچىدە قالغان ئىدىم، خۇددى بىر كىشى پىرىېخونلارنىڭ ئارىسىدا قالغاندەك. ئۇيان ئۆرۈلىمەن - بۇيان چۆرۈلىمەن. تۇۇرۇپ - تۇرۇپ جۈپسىز قالغان دەمدەردەك بۇقۇلداپ سالاتتىم. يەنە تۇرۇپ - تۇرۇپ چۆلدە كېتىۋېتىپ ئالتۇن كومزەككە يولۇققان دىۋانىدەك كۈلۈپمۇ قوياتتىم. قاچانلاردا كۆزۈمنى ئۇيقۇ باستىكىن، تاڭ. بىر چاغدا بىرسى ئىسمىمنى چاقىردى.
— پەرھات؟
كۆزۈمنى ئاچماي تۇرۇپ ئاۋازىنى تىڭشىسام، چاقىرغىنى رىژىسسوركەن ئەمەسمۇ! ئورنۇمدىن دەسسىدە تۇرۇپ كەتتىم.
— خەيرلىك ئەتىگەن يىگىت! چۆچۈتىۋەتتىم - ھە!
— خەيرلىك ئەتىگەن. ياقەي، تاڭمۇ ئېتىپ بوپتۇ. ۋاقتىدا ئويغۇتۇپ قويدىڭىز، رەھمەت سىزگە!
— ھەقاچان بىر كېچە خىيال سۈرۈپ ئانچە ياخشىمۇ ئۇخلىيالمىدىڭ. شۇنداقتىمۇ سەھەر تۇرۇشنى ئۈگەنمىسەڭ بولمايدۇ. ھېلى ئىشخانىغا باشقا يولداشلار كېلىپ قالسا ئىزاغا قالدىغان گەپ. قانداق دېدىم؟
— ئىم، توغرا دەيسىز. بۈگۈن نىېمىش قىلىمەن؟
— خى، ئىش قىلىشقا شۇنچە ئالدىراپ كېتىۋاتامسەن؟ ئاۋۋال تاماق يەيمىز، ئاندىن كومپىيوتېرىڭغا تور ئۇلاپ بېرىمەن. توردا يېڭىلىقلار كۆپ. ئويۇنمۇ بار، بىلىممۇ بار. خاراكتىرىڭگە ماس كېلىدىغاننى ئۆزۈڭ تاللايسەن - دە، شۇ بويىچە ئاستا - ئاستا تەرەققىياتنىڭ ئۇلىنى تىكلەيلى!
— بولىدۇ. ئاۋۋال تاماق يەيلى.
پەسكە چۈشۈپ خام كۆكتات، سۈت ۋە قۇيماق بىلەن ناشتا قىلىۋالدۇق.ئىشخانىغا قايتىپ چىقىپ بىردەمدىلا كومپىيوتېرىم تورغا ئۇلاندى.
— كومپىيوتېر سېنىڭ بولغاندىكىن، خالىغانچە مەشخۇلات قىل.
— مېنىڭچە، سىز بىرەر ئىشنىڭ پېشىنى تۇتۇپ بېرىڭ. مەن بىر كۈن ئولتۇرساممۇ ھېچ ئۈنۈمگە ئېرىشەلمەسلىكىم ئېنىق. كومپىيوتېر ماڭا نىسبەتەن يېڭى ئۇقۇم. شۇڭا ئۇستازغا مۇھتاجمەن. ئەگەر مېنى بۇنداق مەيلىمگە قويىۋەتسىڭىز جەزمەنكى ئۈمىدىڭىزنى ئاقلىيالماي قالىمەن.
— بولىدۇ، تۇنجى رەت ئېغىر مەشخۇلاتلارنى ئالدىڭغا تاشلاپ قويالمايمەم، ئاۋۋال يېنىك سىستېمىلارنى بىر تەرەپ قىلىشنى مەشىق قىلىپ تۇر.ھازىر توردىن چۈشۈرىۋاتقىنىم «چ چ» كۆزنىكى. بۇ ئالاقە قىلىشنىڭ مەۋھۇم قورالى سۈپىتىدە دۇنيادا ئۇندىداردىن قىلىشمىغۇدەك دەرىجىدە قىممىتىنى ساقلاپ كەلمەكتە. چەتئەللەردە بو قۇرالنى %75 كىشى سودا ئالاقىسى ئۈچۈن ئىشلىتىدۇ. بىز تەرەپتە تورغا خۇمار بولغانلار ئىچ - پۇشىقىنى چىقىرىش ئۈچۈن ئىشلىتىدۇ.
— ئەمىسە مەن قايسى تەرىپىدىن پايدىلىنىمەن؟
— ھازىرچە ئىچ - پۇشىقىڭنى چىقىرىش ئۈچۈن پايدىلىنىسەن. چۈنكى ساڭا خالئايدىن ئايرىلغىلى ئاران بىر كۈن بوپتۇ. كۆڭلۈڭ جايىدا ئەمەس. بۇنداق ئەھۋال ئاستىدا سودا ئالاقىسى ئۈچۈن ئىشلىتىشنى تەلەپ قىلسام، جەزمەنكى مەغلۇپ بولىسەن. تۆت - بەش خىل ئويۇنمۇ چۈشۈرۈپمۇ قويدۇم، بىرنىڭدىن مەيلىڭ يانسا، بېرىنى ھەمراھ قىلىپ تۇر. چوقۇم بىرسى كۆڭلۈڭنى ئۇتىۋالالايدۇ. نەرسە - كېرەك بولەمدۇ ياكى پۇل بولامدۇ، قايسىسى لازىم بولسا تارتىنماي ماڭا دېسەڭ بولىدۇ. قېشىڭدا ساقچىسەك ئولتۇرىۋالمايمەن. ياتاق، شىركەت كۆپ ھاللاردا ساڭا قالىدىغان بولدى. ھەر راست، پۇلنى ھازىر بېرىۋىتەي. ھازىرچە 5000 سوم بېرىپ تۇراي، تۈگىسە ئېسىمگە سال ئېنىم!
— سىز ماڭا نېمىشقا ياخشى مۇئامىلە قىلىسىز؟ ئازراق گۇمانلىنىۋاتىمەن. چۈشەنچە بېرەمسىز؟
— گۇمان قىلغىنىڭ ئورۇنلۇق، لېكىن ئارتۇقچە گۇماندا بولما. مەقستىم شۇكى، سېنى ياراملىق ئىز - باسار قىلىش بىلەن بىرگە ھەقىقىي مۇھەببەتنى ھېس قىلدۇرسام دەيمەن. سەن قىز دوستۇڭدىن ئايرىلدىڭ، بۇنداق قىسمەت مېنىڭمۇ بېشىمغا كەلگەن. ئۆزۈممۇ بىلمەيمەن، سېنى ئۆزۈمنىڭ ياش ۋاقىتلىرىغا ئوخشىتىپ قالىمەن.
— سىزمۇ ماشىنىغا سوقۇلغانمۇ؟
— ياق، لېكىن ئۇنىڭدىنمۇ دەھشەت ئىشلارغا يولۇققان.
— سۆزلەپ بېرىڭە!
س بولمايدۇ. ھېچكىمگە ئېيتمايمەن. مېنىڭ بىر خۇيۇم، ئالدىراپ كىشىگە مەخپىيەتلىكنى ئاشكارلىمايمەن. چىقىپ كەتتىم، ئامان بول!
— نەگە بارىسىز؟
— ئىشقىلىپ ئاسمانغا چىقىپ كەتمەيمەن.
كاستىيۇمنىڭ تۈگمىسىنى تاقاشتۇرۇپلا مەنىلىك كۈلۈمسىرەپ قويۇپ يېنىمدىن چىقىپ كەتتى. تور دۇنياسىدا نېمىلەر باردۇ؟ دەل مۇشۇ ئوي بىلەن كومپىيوتېرنىڭ ئالدىغا كەلدىم. ئۇ يەرنى مالتىلاپ - بۇ يەرنى مالتىلاپ «چ چ» نومۇر ئالدىم- دە، خالىغانچە ئادەم قوشتۇم. كۆڭۈل دېگەن يۈگۈرەك نەرسە دە، ساپلا قىز بالا قوشۇپتىمەن. بەزىلىرىنى ھېسابقا ئالمىغاندا ھەممىسى دېگۈدەك قوشۇشۇمنى رەت قىلمىدى. مىنۇت ئۆتمەيلا سۆز باشلاپ كەتتۇق.
— تىشلىقمۇ؟
— تىشلىق، سىزچۇ؟
— شۈكرى، قەيەردىن بولىسىز؟
— قەشقەردىن. سىزچۇ؟
— مەن ئۆرۈمچىدىن. ئىسمىڭىز كىم بولىدۇ؟
— تۇمارىس.
— تۇمارس؟ ۋاھ، نىمانچە گۈزەل ئىسىم بۇ! ياقتۇرۇپ قالدىم.
— رەھمەت ، سىزنىڭ ئىسمىڭىزچۇ؟
— قەھرىمان.
— ھە، مۇنداق دەڭ، سىز قەيەرنىڭ قەھرىمانى؟
— مەن؟ خى، مەن سىزنىڭ قەھرىمانىڭىز.
— خى، خى، قىزىقچى ئىكەنسىز جۇمۇ!
— كۈلمەڭ، قىزچاق. ھازىرقىچە سىزنىڭ قەھرىمانىڭىز بولۇپ باققانمۇ؟
— راست گەپ قىلسام، مېنىڭ قەھرىمانىم بولۇپ باقمىغان. تامقان ھەقرىمانلىرىمنىڭ جىمىسى قەلبىمدە ئازاب قالدۇرۇشتىلا قەھرىمانلىق كۆرسىتىشتى. لېكىن سېغىنىپ ئەسلىگۈدەك ئىزناسى يوق. كۈندە دېگۈدەك كۆڭلۈم يېرىملا يۈرۈيمەن. سىلەر ئوغۇللار نېمانچە ئالدامچى؟ نېمانچە ۋەدىكەش؟ نېمىشقا سۆيگەن قىزىڭلارنى دائىم ئالداپ قويىسىلەر؟
— دېمەك، دەردىڭزى كۆپكەندە، سىزگە دېسەم قاراڭ، مەن ئىسمىمغا خاس قىز دوستۇمغا قەھرىمانلىق كۆرستىپ باققان. نەتىجىدە ئوخشاشلا مەغلۇب بولدۇم. سىلەر قىزلا نېمانچە ۋاپاسىز؟ نېمانچە باغرى تاش؟ نېمانچە دۆت؟ «يېنىمدا قال گۈلۈم» دەپ يىلىنسا ئۇنىمايسىلەر، پېشىنى قېقىپ كەتكەن ھارامزادىنىڭ كەينىدىن «ئۇ مېنىڭ بەختىم» دەپ يۈگ
ۈرەيسىلەر. قىلچە بىزدەك قەھرىمانلارنىڭ ئازابلىق قەلبىنى ئېتىبارغا ئېلىپ قويمايدىكەنسىلەر. شۇڭا سىلەر قىزلارنىڭ قەھرىمانسىز قېلىشىڭلار ھەيرانقالارلىق ئەمەس. بىر ھېسابتا خوپ بولدى.
— سىز!
— نېمە؟ ئاچچىقىڭىز كەلدىما؟
— قىز دوستىڭىزدىن چىقىرالمىغان دەردىڭىزنى مەندىن چىقىرۋاتامسىز؟ نېمىنداق توڭ گەپ قىلىسىز؟ كۆڭلۈم ئېچىلىپ قالارمىكىن دەپ قوشۇپتىكەنمەن سىزنى. تېخىمۇ ئوۋغامنى قايناتتىڭىز. خۇش، ئىشىم چىقىپ قەلدى، مەن چۈشۈپ كەتتىم.
— ياق، توختاپ تۇرۇڭ. سۆزلىرىم كۆڭلىڭىزگە ئېغىر كەتكەن بولسا كەچۈرۈڭ.مەنمۇ شۇ ئازار يېگەن دىلىمغا سىرداش ئىزدەپ تورغا چىققانتىم. توغرا چۈشەنسىڭىز. بۇ تېمىنى قويۇپ، باشقا يەردىن گەپ ئاچايلى، ئەمدى خاپا قىلمايمەن تۇمارس.
ئۇنى چۈشۈپ كەتكەنمىكىن دەپ ئويلىغانتىم، تەلىيىمگە خاپا بولغان چىراي ئىپادىسىنى يوللاپتۇ. مەيۇس چېھرىمگە قايتىدىن باشقىچە كۈلكە يۈگۈردى.
— بۇ يىل قانچە ياشقا كىردىڭىز؟
— 5- ئاي كەلسە 18 گە توشىمەن.
— ۋاھ، تېخى غۇنچە ئىكەنسىز. كامىرادا پاراڭلاشساق بولامدۇ؟
— كەچۈرۈڭ، مەن ئۆيدە بولغاچقا كامىرانى ئېچىش قولايسىز.
— لېكىن سىزنى كۆرۈپ باققۇم كېلىۋاتىدۇ.
— «چ چ» بوشلۇقۇمنى قوزغىتىپ، رەسىم كۆزىنىكى ئېچىڭ، مەن مەخپى نومۇرىنى دەپ بېرەي، سۈرىتىمنى شۇ يەردىن كۆرۈڭ ئەمىسە.
— سۈرەت بىلەن سىزنىڭ ئارىڭىزدا پەرق چوڭ بولىدۇ تۇمارىس، ماقۇل دەپ، كامىرانى ئېچڭە!
— ئۆزىڭىز خوتەنلىك بولغىنىڭىز بىلەن خوتەنلىكتىنمۇ ئۆتە قاھىل بەندە ئىكەنسىز. قانداق قىلاتتىڭىز مېنى كامىرادا كۆرۈپ؟
بۇ قىزغا يالۋۇرسا ئېشىۋالىدىغانلىقىنى ھېس قىلدىم.
— سىزنى كۆرۈپ ھېچنىمە قىلمايمەن ئوماق قىز. قۇرۇق پاراڭ سوقۇپ، ئەھمىيەتسىز سىردىشىپ يۈرگەندىن كۆرە بىر - بىرىمىزنى كۆرۈپ سەمىمىي پاراڭ سوقايلى دەپتىكەنمەن. باشقىچە ئويلاپ كەتكەن بولسىڭىز ئېختيارىڭىز. ھازىرلا «چ چ» رىڭىزىدن مېنى يۇيىۋەتسىڭىزمۇ رەنجىمەيمەن. سىزسىز مۇڭداشلىرىم ئازمىتى مېنىڭ. باشقا قىزلارغا قارىغاندا خېلى ئىشەنچىلىك بىلىنگەن ئىدىڭىز، شۇڭا تەلەپ پۇزىتسىيىسىدە ئەمەس، ئۆتۈنۈش تەرىقىسىدە كامىرانى ئېچىڭ دەپتىمەن.
— گەپ-سۆزىڭىزدىن قارىسام، سىزمۇ ئىشەنلىچىك يىگىتتەك قىلىسىز، بىراق... بىراق مەن بۇرۇن ئوغۇللار تاتلىق گەپ قىلىپ سۈرىتىڭىزنى ئەۋەتىڭ، كامىرانى ئېچىڭ دېسە، ئىىشنىپ ئەۋەتىپ بېرىپ كېيىن تالاي پۇشايمانغا قالغانتىم. مەنلا ئەمەس، كۆپۈنچە قىزلارنىڭ بۇ جەھەتتە بۇرنىغا سۇ كىردى. ھازىر ئالدانمايمىز. بىزمۇ ئوغۇللارنى ئالداشنى ئۈگىنىۋالۇق.
— نېمىشقا بىزنى ئالداشنى ئۆگىنىپ قالدىڭلار؟
— ئاددىيلا قىلىپ ئېيتسام: «ئۇنداق قازانغا مۇنداق چۆمۈچ».
— خى، بىز شۇنچە ئەسكىما؟
— ياخشىلارمۇ يوق ئەمەس، بىراق بىزنى تولا ئالداپ، ە دېسىلا ئويۇنچۇق قىلىپ، خالىساڭلار پىشانىمىزگە سۆيۈپ قويۇپ، خالىساڭلار كاچاتلاپ قويۇپ قىممىتىمىزنى نەزەرگە ئالمىدىڭلار، شۇڭا بىز سىلەردىن كۆپ بىزار. بەك - بەك بىزار.
— خى، سىلەر بىر ئىشنى خاتا قىلدىڭلار، سىلەرنى تايىنى يوق ھارامزادىلەر ئالدىسا، سىلەر ئىنتىقامىڭلارنى يوۋاش يىگىتلەردىن ئېلىپ ياشايسىلەر. قەدرىڭلارنى قىلىپ بېشىدا مىندۈرۈپ ماڭمايدىيۇ، بىراق ئۇنىڭدىن باشقىسىنىڭ ھەممىسىگە كۆنۈپ سىلەرنى ۋاي دەپ يۈرگەن ئېسىل يىگىتلەرنى كوچا كۈچىكىچىلىك ئېتىبارىڭلارغا ئېلىپ بىرەر قېتىم ئىللىق تەبەسسۈم بىلەن قاراپ قويمايسىلەر. بىزمۇ سىلەرگە ئۆچ بولدۇق، بەك - بەك ئۆچ بولدۇق.
— بەلكىم شۇنداقتۇ!
— مانا قاراڭ، ئېتراب قىلمىدىڭىز. باشقا گەپنى قويۇپ تۇرايلى، كامىرانى ئاچامسىز - يوق؟
— ئاچمايمەن تازا.
— بوپتۇ، ماڭا ئاچماڭ، باشقا بىرسىگە ئېچىپ قالارسىز. خوش خېنىم!
— خوش!
ئۇ قىزنى شۇ ھامان « چ چ» رىمدىن يۇۇيپ تاشلىدىم. ھەجەب توڭ قىزكىنا بۇ. ھە دەپ قويسا بىز ئوغۇللارنى «شاپاق نەرخى» قىلىۋەتتى دېسە. خەپ قىزلار، خەپ قىزلار. خالئاينىڭ ئازابى ئاز كەلگەندەك توردىمۇ تونۇمايدىغان بىر كىملەردىن دىلىمنى زىدە قىلىۋالدىم دېسە.
— ئاچچىقىڭ كېلىپ قاپتىغۇ پەرھات؟ بىرەر قىينچىلىق يوقتۇ؟
نەدىندۇر رېژىسسور پەيدا بولۇپ كىردى.
— ياقەي، قىزلار ئاچچىقىمنى كەلتۈرۈپ شۇ.
— قىزلار؟ نەدىكى قىزلار ئۇ؟ سىرتتىن قىزلارنى ئەكىرگەنمىتىڭ؟
— ۋاي نەدىكى گەپنى قىلماڭە ئاكا، توردىكى قىزلارنى دەۋاتىمەن.
— ھا... ھا... ھا...
— مەن تېخى سېنى نېمە سەۋەبتىن بۇنچە قىزىرىپ ئولتۇرپ كەتكەندۇ دەپتىمەن. توردىكى قىزلارنىڭ كۆپۈنچىسى ئويۇنخۇمار، تاپتىن چىققانراق كىلىدۇ. چۈنكى، ئۇلارنى ئالدى بىر نەچچە يۈز قېتىم كەينى بىر - ئىككى قېتىم ئوغۇللاردىن قاتتىق ئازار يېگەنلەردۇر. ئۇلارغا نەسىھەت قىلساڭ قۇلىقىغا كىرمەيدۇ، توڭ گەپ قىلساڭ بىر سۆزۈڭگە 10 ئېغىز جاۋاب قايتۇرۇشنى بىلىدۇ. يالۋۇرساڭ ئۇلارنىڭ مەسخىرىسىگە قىلىپ تېخىمۇ نەزىرىدىن چۈشىسەن. ئۇ شەيتانلارنى كەلتۈرۈشنىڭ بىرلا ئۈنۈملۈك ئۇسسۇلى بار.
— قانداق ئۇسسۇل؟
— خى، ئەمدى قىزلارنى ئالداپ باقاي دەمسەن؟
— خالئايدىن راستىنلا كۆڭلۈم رەنجىدى ئاكا. ئوغۇل بالا بىر قىزدىن ئازار يېسە، باشقا قىزلارغىمۇ ئوخشاشلا نەپرىتى تۇتۇپ قالامدىكىن، تاڭ. مەنمۇ كۆڭلۈمنى خۇش قىلىپ باقاي... كۆپ ئەمەس، بىر - ئىككىنى ئالداپ دەردىمنى بوشىتىۋالاي، ماڭا قىزلارنى توردا ئالداشنىڭ ئۈنۈملۈك ئۇسسۇلىنى ئېيتىپ بېرىڭچۇ!
— تىكەننى كىرگەن يەردىن ئالغۇلۇق ئەركەك دېگەن.
— تىكەننى كىرگەن يەردىن قانداق ئالىمەن؟ خالئاي باشقا بىرىنىڭ قولىدا تۇرسا، تىكەننى قانداقمۇ ئوڭۇشلۇق ئالالايمەن؟ مېنىڭ ئۇ تىكەننى كىرگەن يېرىدىن قان چىقارماي، ئاغرىتماي ئالغۇم بار.
— تىكەننى كىرگەن يېرىىدىن قان چىقارماي، ئاغرىتماي ئالماق سەل تەسكە توختارمىكىن يىگىت! لېكىن بۇنىڭ ئامالى بار.
— ماڭا شۇ ئامالنى دەپ بېرىڭ!
— ئۆزۈڭ تاپ. مەن قىلىقسىز ئىشلارغا ئۇستاز بولالمايمەن. ياخشى ئىشلار بولسا چاقىر! ئۇيقۇم كېلىۋاتىدۇ، ئۆيگە قايتىپ ئارام ئالاي، خەير!
رېژىسسور پەرۋاسىز قىياپەتتە چىقىپ كەتتى. زادى قانداق قىلىشىم كېرەك؟ خالئاينى ئۇنتىيالىغان بولسام يۈرىكىمگە چىڭقىلىپ كەتكەن ئازابنى يوق قىلىش ئۈچۈش بۇنچە ئامال ئىزدەپ كەتمەس ئىدىم. تور بەتنىڭ بۇلۇڭ - پۇچقاقلىرىنى خالىغانچە ئاختۇرۇپ تۇيۇقسىز «ئازاپ» دېگەن سۆز يادىمغا كەلدى. تور بەت ئادرىسىغا «ئازاب» دەپ كىرگۈزۈشۈم بىلەن تەڭ يۈرەكنى ئەزگۈدەك بىر مۇڭ ناخشا ئاڭلاندى. ئورۇندۇقۇمغا يۆلىنىپ جىمجىت ئاڭلاشقا باشلىدىم. (ئاجىز كەلدىم بەندە بولغاچقا...)
ناخشىمۇ توختاپ بولدى، بىراق مەن يەنىلا پىراقتا. تۈزۈك بىر ئازابقا چۆكمەكنى ئىستەپ، باشقا ناخشىلارنى قويۇپ بېقىش ئۈچۈن مائۇسنى مىدىرلىتىۋېتىپ، كۆزۈم يەنە « چ چ» چۈشتى. بىرسىدىن ىەت كەلگەندەك قىلامدۇ - نېمە؟ قىز بالىكەن.
— ئەسسالامۇ ئەلەيكۇم!
— ۋەئەلەيكۇم.
— تولۇق سالام قىلسام نېمىشقا كۆزگە ئىلمىغاندەك سالام قايتۇرىسىز؟
— كەچۈرۈڭ، كۆڭلۈم جايىدا ئەمەس.
— ھە، نېىم بولدى؟ قىز دوستىڭىزدىن ئايرىلىپ قالمىغانسىز؟
— ھەئە،
— قايغۇرماڭ، بۇ كۈنلەرمۇ ئۆتۈپ كېتىدۇ.
— بىر ئېغىز «قايغۇرماڭ» دېگەن سۆزىڭىز بىلەن ھىجراندىن قۇتۇلغىلى بولامتى قىزچاق، بولدى، ئاقماس سۆزلەر بىلەن ماڭا تەسەللىي بېرىمەن دېمەڭ.
— ئىسمىڭىز كىم بولىدۇ؟
سەل ئويلۇنۇپ تۇرۇپ جاۋاب قايتۇردۇم.
— قەدىردان.
— ھە، چىرايلىق ئىسىمكەن. ئىسمىڭىز چىرايلىق قويۇلغانغا قارىغاندا، چوقۇم سىزمۇ كىلىشكەن. خى.
— نېمىنداق قاملاشمىغاندەك جۆيلۈپ يۈرۈيسىز؟ ئىسمى چىرايلىقنىڭ ئۆزى چىرايلىق بولىدىغان قائىدە يوقتۇ؟ ئاچچىقىمنى كەلتۈرمەي يوقۇلۇڭە!
— نېمىنداق سىلكىيسىز مېنى؟ سىزنىڭ كۆڭلىڭىز جانان چىنە، مېنىڭ كۆڭلۈم پۇچۇق پىيالە ئەمەس جۇمۇ!
— كەچۈرۈڭ، بۈگۈن دىلىم راستلا قانىدى. كەيپىياتىم ناچار ۋاقتىدا سىز بىلەن پاراڭلىشىپ قالدىم. توغرا چۈشىنىڭ.
— مېنىڭمۇ كۆڭلۈم يېرىم، لېكىن چاندۇرمىدىمغۇ؟
— مەن سىزنى دورىيالمايدىكەنمەن.
— نېمىشقا كۆڭلىڭىز يېرىم؟ ئاڭلاپ باقسام بولامدۇ؟
— ئاڭلىسىڭىزمۇ سىزگە بەرىبىر. سەل تۇرۇپ ئۇيقۇمنىڭ كېلىشىگە قىستاپ كارۋىتىمغا چىقىۋالسام، ئەتە ياخشى بولۇپ قالىمەن.
— ئۆزىڭىز ئۆرۈمچىدىن بولغىنىڭىز بىلەن، بەكلا جاھىل ئىكەنسىز. ناخشا ئېيتالامسىز؟
— ناخشا دەمسىز؟ خى، ھەجەب بۇنى سوراپ قالدىڭىزغۇ؟
— قارىغاندا ئېيتالايدىكەنسىز - دە! بەكلا ئاڭلىغۇم بار ناخشىڭىزنى.
— بارچە ئاۋازىمنى قويىۋېتىپ ناخشا ئېيتساممۇ سىز يىراقتا، ئاڭلىيالمايسىز.
— كامىرانى ئاچىمەن.
— خى، ۋاي چاقچاق قىلماڭە!
— چاقچاق قىلغاندەك بىلىنىۋاتامدۇ سۆزلىرىم؟ كامىرانى ئۇلىدىم، قوبۇل قىلىڭ!
مەن ئىككىلىنپ قالدىم، يۈرىكىم گۈپۈلدەپ كەتتى. ھەجەب ئوچۇق قىزكىنا بۇ. ئەركەك زەدەك ئەمەستۇ - ھە؟
— تېخىچە قوبۇلقىلمايسىزغۇ قەدىردانىم؟ خالىمايۋاتامسىز؟
— ياق، ياق خالىمغىنىم ئەمەس قىزچاق، يېنىمدا دوستلىرىم باتتى، خىجىل بولىۋاتىمەن.
— خى، خى، خى، ما گەپنى كۆرۈڭ، ئوغۇل بالىنىڭ ئېغىزىدىن بۇنداق گەپنى تۇنجى ئاڭلىىشم. ئوغۇللارنىڭ ئىچىدىمۇ خىجىلچانلار باكەن ئەمەسمۇ؟!
— مەسخىرە قىلماڭ، ئۆزىڭىزچە ئوغۇللارنىڭ ھەممىسىنى يۈزى قېلىن چاغلاپ قالغانمىتىڭىز؟ ئوغۇللار ئىچىدىمىچۇ، نى - نى قەلبى گۈزەللەر بار. ئۇلار سىلەردەك ھۈسنى گۈزەللەردىن مىڭ مەرتىۋە ئەلا، بىلىپ قويۇڭ شۇنى.
— ماقۇل، ماقۇل! چېچىلماڭ، تېز قىرىپ كېتىسىز.
— خى، قىزلار قېرىشتىن قورقىدۇ. قېرىشتىن ئىبارەت بۇ ھۆكۈملۈك بىز ئوغۇللار ئۈچۈن بەرىبىر. مەلۇم جەھەتتىن ئېلىپ ئېيتقاندا، يىگىتلەر قىزلارنى دېمىسە بۇ جاھاندا نېم بار بىزگە ياشاپ؟
— بۇ گەپچە، سىلەر بىزنىڭ شەپقەتچىىز ئىكەنسىلەردە؟ كۆپ رەھمەت بىز ئۈچۈن ياشاۋاتقىنىڭلارغا. بىز ئۈچۈن كۆيۈپ، بىز ئۈچۈن ئۆلۈپ بەك قەدرىمىزنى قىلىۋاتىسىلەر قەدىردانلار!
— نېمانچە تەنە گەپ قىلىسىز؟ ساماننى داندىن ئايرىشنى بىلمىگەن گۇناھ ئۆزۈڭلاردا. بۇ گەپلىرىڭىزنى ئاشۇ نامەردلەرگە ئېيتىپ بېرىڭ. بولدى، بولدى، سۆزلىسەك ھېكايىمىز تولا خەق بىز. ئىسمىڭىز كىم؟ سورىماپتىمەن.
— لالە. مېنى لالەم دەپ چاقىرىڭ!
— يەنىلا لالە دەپ چاقىراي. ئىشقى مۇھەببەت باغلاپ قالساق ئاندىن لالەم دېسەممۇ ئۈلگۈرىمەن.
— ئىختىيارىڭىز.
— يىگىتىڭىز بامۇ؟
— ھازىرچە يوق.
— پات يېقىندا بولماقچىكەندە؟
— ئۇقمايمەن.
— ئەمىسە قەلبىڭىزدە كۈتكىنىڭىز بامۇ؟
— يوق.
— ئەمىسە مېنى كۈتۈپ بېقىڭ!
— نېمىشقا سىزنى كۈتكۈدەكمەن؟
— مەن سىزنى كۈتسەمغۇ بولا؟
— تۇيۇقسىزلا كۈتۈشنىڭ ەېپىنى چىقىرىپ قالدىڭىز، سەۋەبىنى ئاڭلاپ باقسام دەيمەن قەدىردان.
— كۆيۈككە باھانە يوق لالە، سىزگە كۆڭلۈم چۈشكەن بولسا كېرەك. سەۋەبى مانا مۇشۇنداق ئاددىي.
— كوچىدا بىر كۆرۈپلا ئاشىق بولۇشنى راست دېيىشكە بولسىمۇ، كوت -كوتتا بىر ئىزدىشىپلا ئاشىق بولۇشنى تازا ئىشەنچىلىك دېگىلى بولمايدۇ. ناۋادا ئىسپاتىڭىز بولسا دەلىللەڭ!
— كوچىدا بىر كۆرۈپ ئاشىق بولۇشقا ئىشەنگەن ئىكەنسىز، كوت - كوتتا بىر ئىزدىشىپ ئاشىق بولۇشقىمۇ ئىشىنىشڭىز ئارتۇقچە ئەمەس. سىزدە سسك - چۆچەككە ئەگىشىش پىسخىكىسى بار ئىكەن. مەيلى كوچىدا بولسۇن، مەيلى كوت - كوتتا بولسسۇن، مەيلى غايىبتىن كەلگەن كونۋېرتتىكى ناتونۇش بىرسى بولسۇن گەپ، سىزگە كۆز تاشلىغان شۇ كىشىنىڭ كۆڭۈل ئىزھارىنى توغرا پەرەز قىلىشتا. بىز يۈرەيلى لالەم!
ئۇنىڭغا چىرايلىق ئېچىلغان بىر تال قىزىل ئەتىرگۈلنىڭ رەسىمىنى يوللىدىم. ئۇ خېلى ئۇزاققىچە ئېغىز ئاچمىدى.
— ھېلىمۇ كۆپ قېتىم كۆڭلۈمنى ئىزھار قىلىپ بولدۇم، دىل بايانلىرىمنىمۇ تۆكۈپ بولدۇم. ئەمدى ئاردۇق ھېكايە توقۇغۇم يوق. ئاخىرقى قېتىم كۆڭۈل ئىزھار قىلىمەن، مەيلىڭىز بولسا كەينىگە سوزماي، جاۋاب قايتۇرۇڭ، بولىسا خوشلاشساق بولىدۇ. لالەم بىز يۈرۈپ قالايلى!
— ئىككىمىز يۈرگەن تەقدىردىمۇ سىز ئۆرۈمچىدە، مەن ئاقسۇدا. كەلگۈسىمىزدىن ئەنسىرەيمەن.
— كېيىنكى ئىشلارنى ۋاقتى كەلگەندە كۆرىمىز لالەم، ماقۇل دەڭ، مۇھەببەتنىڭ پەيزىنى سۈرۈپ باقايلى.
— ئەمىسە مەن ئويلىشىپ جاۋابىنى بېرەي!
— ياق، كۆڭلۈم ئارتۇق تاقەت قىلالمايدۇ. ھازىرلا جاۋاب قايتۇرۇڭ.
— مەجبۇرلاۋاتامسىز؟
— ناۋادا مەجبۇرلىدى دەپ قارىسىڭىز ياق دەپ جاۋاب بەرسىڭىزلا كۇپايە. سۆزىڭىزگە ھۆرمەت قىلىمەن.
— بوپتۇ، يۈرەيلى.
— خۇش بولدۇم، ئادىتىم بويىچە سەن دەپ چاقىرىمەن.سەنچۇ؟
— ھازىرچە سىز دەپ تۇراي، كۆنەلمەيدىكەنمەن.
— ئىم، بەك ياخشى بولدى، ئوبدان لالەم، كۆزلىرىم قىزىرىپ كەتتى، ئارام ئالسام رۇخسەتمىدۇ؟
— ئەسكى، ماقۇل دېگۈزۈپلا مېنى يالغۇز تاشلاپ قويۇپ ئۆزىڭىز ئۇخلىۋالامسىز؟
— ئۇنداق خاتا چۈشەنمىسەڭچۇ، ئىشلەپ چارچاپتىمەن.
— ماقۇل، ياخشى چۈش كۆرۈڭ ئەمىسە.
— ئىم، سەنمۇ شۇ لالەم.
كوت - كوتتىن چىكىندىم. خى، قانداق خالئاي، بىر قىزنى ماقۇل كەلتۈرۈش ئانچە تەس ئەمەستى. ساڭا ئەخمەق لالەمگە ئوخشاش پۇزۇتسىيە قوللانمىغان يېرىملا بار ئىدى. قارا، يېرىم سائەتتە بىرى گول بولدى. خاتا قىلغانلىقىمنى بىلىمەن، بىراق ھازىرچە تەن ئالمايمەن. مەنمۇ بىر مەزگىل ئەسكى ئوغۇللارنىڭ خۇيىنى دوراپ باقاي، ھېچ بولمىسا ئىچىم بوشاپ قالار. يارايسەن پەرھات، قالتىس ئىش قىلدىڭ. بارچە ھەسرەتنى سەنلا چېكەمتىڭ؟ سەنمۇ چەكتۈرۈپ باق، گەرچە بۇ ئازابنى چېكىشكە تېگىشلىك ئادەمگە چەكتۈرەلمىگەن بولساڭمۇ، لېكىن چەكتۈرۋاتقىنىڭ ئوخشاشلا چېچى ئۇزۇن، قارا كۆزلۈك، ئېگىز پاشنىلىق ئاياغ كېيىدىغانلاردىندۇر. قىزلارنى شەيتان دەپ قوياتتۇققۇ، خى، شەيتانلارنى ئازدۇرالىغان ئوغۇللارنى نېمە دېسەك بولار ئەمدى ھا، ھا، ھا. مۇشۇ ئويلار بىلەن كارۋاتقا ئۆزۈمنى ئوڭدىسىغا تاشلىدىمدە راسا بىر سوزۇلغىنىمچە مەسخىرىلىك كۈلۈپ قويۇپ، بىخىرامان ئۇيقۇغا كەتتىم. ئەتىگەن ئويغۇنۇپ قارىسام، بېشىمدا رېژىسسور ماڭا چېكىتتەك قاراپ تۇرۇپتۇ. دەرھال كىيىملىرىمنى تۈزەشتۈرۈپ،ئۆزۈمنى رۇسلىۋالدىم.
— خەيرلىك كۈنلەر يىگىت!
— خەيرلىك كۈنلەر! قاچان كىردىڭىز؟
— قاپاقلىرىڭ قىزىرىپ كېتىپتىغۇ؟ توردىكى قىزلاردىن پەشۋا يېمىگەنسەن؟ قارىغاندا مۇشتمۇ يېگەن ئوخشايسەن.
— نەدىكىنى، قارمۇ - قارشى بوپ قالدى. ئەكىسچە توردىكى قىزلارنى مەن قويىۋەتتىم.
— خى، قانچىنى قويدۇڭ؟
— بىرگە ئۇتتۇرۇپ، بىرنى ئۇتتۇم.
— خى، يامان ئەمەس. يەنە داۋاملىق ئۇتۇپ - ئۇتتۇرۇرماقچىمۇسەن؟
— ھەئە، بىر مەزگىل شۇنداق ئويۇم بار.
— قىنى تەييار گۆشلەرنىڭمۇ تەمىنى تىتىپ كۆر، بىراق ھەپتە ۋاقىت بېرىمەن، قانچىلىك ئۇتىۋالساڭ كارىم يوق، ئاندىن كېيىن ساڭا بېرىدىغان ۋەزىپە بار.
— قانداق ۋەزىپە؟
— ۋاقتى كەلگەندە بىلىپ قالىسەن. ئۈجمە كۆڭۈل، تاماق ئەكىرىپ قويدۇم، يەپ بولۇپ ئويۇنۇڭنى داۋاملاشتۇر.
— سىز بۇ ئىشلىرىمغا قارشى تۇرمامسىز؟
— چەكتىن ئاشسا قارشى تۇرىمەن، ئوغۇل بالا دېگەن 80 قازاندا قايناپ باققۇلۇق. مەن كەتتىم -ھە!
تېخى ھورى يوقاپ كەتمىگەن گۆشلۈك پولۇنى تەۋېتىپ خىيالىمغا ئەشەددىي پېلانلار كېلىۋالدى. قىز بالىنى ئالداش لالەمنى ئالدىغاندەك ئاسانغا چۈشىدىغان بولسا، مەن ئالدىغان قىزلىرىمنى سىتاستىكىلاپ ماڭىمەن. توردا ئالداپلا بولدى قىلماستىن، كۆرۈشۈشنى تەلەپ قىلىشىم كېرەك. نەزەرىيەنى ئەمەلىيەتكە تەتبىقلاش دېگەن شۇ. يىراق يەردىكىنى قويۇپ، ئەتراپىمدىن قوشۇپ باقاي.
بۇ رەزىل پېلانلار بىلەن تاماقنى تېز تېز يەپ يەنە كومپىيوتېر ئالدىغا كەلدىم. قوشقان دېگەن مانا مۇنداق بولىدۇ، بىرلا قېتىمدا 200 قىز بالىنى قوشۇپتىمەن، ئەلۋەتتە قېرىنداش مىللەتلەردىنمۇ بار. ئۇنىڭ ئۈستىگە رەسىمىگە قاراپ تۇرۇپ تاللاپ قوشتۇم. ئەمدى ئۇلارنىڭ خەۋىرىنى كۈتەي. مانا، مانا، ئۇچۇر كېلىشكە باشلىدى.
— سىز كىم؟
— مۇرات. سىزنىڭچۇ؟
— ھىلال.
— ۋاھ، مەن تولۇن ئايغا قارىغاندا ھىلال ئاينى ياقتۇرىمەن. ئىسىملارنىڭ خانىشىنى تاللاپ قويۇپتىكەن ئاتا - ئانىڭىز.
— رەھمەت. نېمىش قىلىسىز؟
— مەن ئوقۇيمەن.
— ئىم، مۇنداق دەڭ، مەنمۇ ئوقۇيمەن.
— بەك ياخشى بولدى، سىز بىلەن سەمىمىي سىرداش بولسام، بىر كۈنلەردە يىگىتىڭىزنىڭ كۈندەشلىكى تۇتۇپ قالماس - ھە؟
— نەدىكى يىگىت ئۇ، يېقىندا ئايرىلىپ كەتتۇق.
ما كارامەتنى كۆرۈڭ، قىزلاردىن تەلىيىم باكەنغۇ مېنىڭ. بۇنىمۇ چېلىپ بېقىش كېرەك.
— مەنمۇ ھەتە بۇرۇن قىز دوستۇمدىن ئايرىلىپ كەتتىم.
— ھە، ۋاپاسىزلىق قىلدىڭىزمۇ ياكى ۋاپاسىزلىق قىلدىمۇ؟
— ئۆزۈمنى ئاقلاپ ئۇنى ۋاپاسىزلىق قىلدى دەپ يۈرمەيمەن. ئىشقىلىپ تەقدىر شۇنداق بولۇپ قالدى. سىز كۆڭلىڭىزنى باقالىغۇدەك ياخشى يىگىتكە ئۇچراپ قالسىڭىز يەنە يۈرۈشنى ئويلىشىپ باقتىڭىزمۇ؟
— ئەلۋەتتە يۈرىمەن. ئەسكى بىلەن كىمنىڭ ىوشى دەيسىز مۇرات، ياخشى تاپقاندا پېشىنى تۇتىۋالغانغا يەتمەيدۇ.
— قانداق دەيسىز؟
— ياخشى دېگەن ئېشىۋالساممۇ گېپىمنى ئاڭلايدۇ، تاشلىۋەتسەممۇ ئىزدەپ كېلىدۇ، يىغلىسام يېشىمنى سۈرتىدۇ، ماڭا بەخت دېگەن شۇ.
— ئەمىسە پات يېقىندا مۇرادىڭىز ھاسىل بولغۇدەك.
— چاقچاق قىلماڭە، ئۇياقتىن ئايرىلىپ بولغۇچە بۇياقتىن ماڭا كۆيۈپ يۈرگەن كىمكەن ئۇ؟
— ئىسمىمدىن چىقىپ تۇرۇپتۇكى، مەن مۇرات مۇرادىڭىزنى ھاسىل قىلىشنى خالايمەن.
— سىز؟ بىز يا ىرەر قېتىم ئۇچرىشىپ باقمىساق، سىز ئاقمۇ، قارىمۇ، ئېگىزمۇ - پەسمۇ بىلمىسەم قانداق مۇرادىمنى ھاسىل قىلالايسىز؟
— بەك بەلەن گەپ بولدى ھىلال، بىر ئۇچرىشايلى. يۈز كۆرۈشۈپ بولغاندىن كېيىن ئاندى كۆڭۈل بېرىشسەكمۇ ئۈلگۈرىمىز. سىزچە...؟
— بەك تېز بوپ كەتتىمۇ قانداق، بىر مەزگىل توردا كۆرۈشۈپ تۇرايلى.
— تونۇر قىززىقىدا ناننى يېقىۋالغان ياخشى ھىلال، ئۇزۇنغا سوزۇلۇپ كەتكەن ئىش تازا ئەپلەشمەي قالىدۇ. كۆرۈشۈپ كۆڭلىڭىزگە ياقمىسام ئوچۇقلا سىز بولمايدىكەنسىز كېتىڭ دېسىڭىز ھەر ئىككىلىمىز بەختىمىزنى ئىزدەپ يولىمىزغا ۋاقتىدا كەتسەك بولمىدىمۇ.
— بۇ...نەدە كۆرىشىمىز؟
— مەكتىپىڭىزگە باراي، ئادرىسنى دەپ بېرىڭ.
— تېلېفۇن نومۇرۇمنى دەپ بېرەي، تېلېفۇن قىلىڭ بولمىسا.
— تېلېاۇنۇمنى دوسلۇرۇم كىنو كۆرىمىز دەپ تالىشىپ ئۈلۈشكۈن چىقىۋەتتى، ھازىرچە قولۇمدا تېلېفۇ يوق. يەنىلا تۇرار جايىڭىزغا ئىزدەپ باراي. ئەتىلا باراي.
— ئەتە چۈشتىن كىيىن كېلىڭ!
ئۇ ئادرىسىنى ئېيتىپ بەردى. خى، قوينىڭمۇ بۆرىگە ئايلىنىدىغان چاغلىرى بولىدىكەن - ھە پەرھات.سۆيگۈ تىلەپ يالۋۇرۇشلىرىڭ، يىغلاشلىرىڭ، ئەتىۋارلاپ پۈۋلەشلىرىڭ، جاھاندا بىر گۈلۈم دەپ بەدەل تۆلەشلىرىڭ ۋاقتىنچە قۇرۇپ كەتسۇن. ئوينا يىگىت، ئوينا. يالغان گەپ قىلىشتىن قورقاتتىڭغۇ؟ لېكىن بايا پىلىموتنىڭ ئوقىدەك يالغاننى ياغدۇرۋەتتىڭ. قىزلارنى جاللات ھېسابلاپ، ئۆزۈڭنى بولسا دار ئالدىدىكى جىناياتچى چاغلاپ قىز بالىغا گەپ قىلالمايتتىڭغۇ؟ بىراق گەپنىڭ سۆڭىكى يوقلىقىنى ئوبدانلا ھېس قىلىۋالدىڭ. بىرەرسى سەندىن :«قىز بالا دېگەن كىم» دەپ سوراپ قالسا، سەن :«قىز بالا دېگەن يالغانغا ئەڭ تېز ئىشىنىدىغان ئادەم سىياقىدىكى ئەڭ گۈزەل قونچاق» دەپ جاۋاب بېرەرسەنمۇ ئەمدى. خى، خى. خى. توۋا، ھەممە ئىشنىڭ يولى بار ئىكەن ئەمەسمۇ. بىلەمسەن خالئاي، سەنمۇ دەل مۇشۇ يول بىلەن ئەكبەرنىڭ قېىشىغا كەتتىڭ. ئەكبەر...ئەكبەر سېنى خۇددى دەل مۇشۇ ئۇسۇل بىلەن ئۆزىگە جەلب قىلىۋالدى. نەپرەتلىنىمەن، ھەر ئىككىلىڭگە نەپرەتلىنىمەن. بىراق پۇشايمىنىم يوق. چۈنكى مېنىڭمۇ ئەتراپىمدا نەچچە كېپىنەك ئەگىپ يۈرىيدىغان بولدى. ئەپسۇس، سەن كۆرەلمىدىڭ - دە. ناۋادا كۆرۈپ قالغان بولساڭ جەزمەنكى ئىچىڭ مۇچتەك ئاچچىققا تولغان بولاتتى. كەينىدىن بىر پىيالە ئاچچقسۇنى گۈپپىدە كۆتۈرۋىتەتتىڭ - دە، ئازاب پۈتۈن ۋۇجۇدۇڭنى دىر - دىر تىترىتەتتى. شۇ ۋاقتىدا دىلمنىڭ يارىسىنى مىسقالچە چۈشەنگەن بولاتتىڭ زەھەر گۈلۈم.
كومپىيوتېردىن زېرىكىپ پىرقىرىما ئورۇندۇقتىن تۇرۇپ بولغۇچە سائەت ئۆز ئوقىدا 6 - 7 قېتىم ئايلىنىپ بولدى. دېرىزدىن سىرتقا كۆز تاشلىدىم، ھە، كەچ بوپتۇ - دە! ساناپ باقايچۇ، بۈگۈن ئەخمەق كۆڭۈلدىن قانچىنى ئۇتقاندىمەن، ھىلال، شەھرىزاد، مەھلىيا، خانقىز...ئە، تۆت بوپتۇ، مۇبارەك دېگەن قىز خېلى ئىش كۆرگەن نېمىكەن، ھېچ سۆزلىرىمگە ئىشنىدىغاندەك ئەمەس، سۆزلەرنى خېلى ياساپ باقتىم بولمىسا. ۋاي، بولىدىلا، مۇشۇ تۆتىمۇ يېتىپ ئاشىدۇ ماڭا. شەھرىزاد بىلەن خانقىزنىڭ رەسىمى كۆردۈم تېخى. ئوماق قىزلاركەن. بولۇپمۇ خانقىز دېگىنى كۆزۈمنىڭ لال قىلدى. ھەممىسى ئۆرۈمچىدە ئوقۇۋاتقان باشقا - باشقا يەرلىك قىزلاركەن. بوپتۇ، ئۇلار مېنىڭ ھىلە - مىكىرىمنى بىلىپ بولغۇچە ساختا بولسىمۇ سۆيگۈنىڭ بەھرىنى سۈرۈپ ياشىۋالمامدىم.
— ۋوي، ئاپتاپپەرەستەك ئېچىلىپ كېتىپسەنغۇ، بىرە چوڭ خۇشاللىق باما؟
— قايتىپ كەلدىڭىزما رېژىسسور، خى، ئەلۋەتتە خۇشاللىق بار. بىر سى ئەمەس، تۆتى بار خۇشاللىقتىن.
— ۋاھ، قىنى بىر - بىرلەپ ئېيتىپ باقە.
— ھىلال، شەھرىزاد، مەھلىيا، خانقىز.
مەن ھىجىيىپ تۇرۇپ بارمىقىمدا ئۇلارنى سانىدىم.
— كىملەر بۇ؟ ساپلا قىز بالىنى ساناپ كەتتىڭغۇ؟
— ئۇلار مېنىڭ قىز دوسلۇرۇم ئاكىجان.
— ھە؟ قىز دوسلۇرۇم؟ بىر جېنىڭنى جان ئېتەلمەي يۈرۈيسەنۇ، تۆت قىزنىڭ ھۆددىسىن قانداق چىقارسەن ئەمدى؟
— ئۆمۈرلۈك يۈرۈشكە كىمنىڭ چولى دەيسىز؟ بىرەر ئاي يۈرسەم يەنە ئالماشتۇرىمەن.
— قىزلار سېنىڭ نەزىرىڭدە سەھرا بازىرىدىكى مال - چارۋا ئىكەندە؟ خېلى كاللىسى ئىشلەيدۇ دەپ كومپىيوتېر ئېلىپ بەرسەم خۇدۇڭنى بىلمەيلا قاپسەن. ئازراق ئىش تەييارلاپ قويدۇم، ئەتىدىن باشلاپ شۇنىڭغا تۇتۇش قىلىمىز. تايىنى ئويۇنلىرىڭنى يۇغۇشتۇرۋال.
— نېمانچە ئاچچىقلايسىز ئاكا، ئۇلارنى كۆڭۈل خۇشى دەپ كوت كوتتا ئالداپ قويغىنىم بىلەن، تېخى ئەمەلىيەتتە قولىنىڭ ئۇچڭنىمۇ تۇتۇپ باقمىدىمغۇ.
— مەن بىلەن تەڭ تۇرىۋاتامسەن؟ نەچچە قېتىم دېدىم، مېنىڭمۇ سەندەك چاغلىرىم بولغان دەپ. كۆڭلۈڭنى غاجىلاۋاتقان قۇرتلارنى مېنى بىلمەيدۇ دېمە. چوپچوڭ بوپ قالغاندىمۇ خاپىلىق تېرىپ يۈرۈيدىكەنسە پەرھات. ئەتىۋارىڭنى بىڭلسەڭچۇ، قەدرىڭگە، ھۆرمىتىڭگە لاي سۇۋىما. كەينىدىن زىخلىمىساممۇ ئۆزىنىڭ يولىنى ئۆزى تېپىپ ماڭالايدىغۇ، كەلگۈسىدە كۈچۈم يەتمىگەن چوڭ - چوڭ ئىشلارنى پەرھات تەۋرىتەلەيدىغۇ دەپ تاغدەك ئىشەنسەم، ئىشەنچىمنى يادەك پەسكە ئىگىۋاتىسەن. دوختۇرخانىدىكى ۋاقىتلىرىڭدا كۆزلىرىڭنى چىمچىقلىتىپ قويۇپ، بالكوندا ئۆرە تۇرپ خىرە ئاي يورۇقىدا كىتاب ئوقۇپ كېتەتتىڭغۇ؟ شېئىر يېزىپ قوياتتىڭغۇ؟ ھەقىقىي مۇھەببەتكە خۇددى ماگنېت بىلەن تۆمۈرگە مەھكەم يېپىشقاندەك ئىنتىلەتتىڭغۇ؟ كىنو كۆرسەڭ باش قەھرىماننىڭ يۇقىرى ماھارەتلىرىنى قاملاشمىسىمۇ دوراپ باقاتتىڭغۇ؟ ئارام ئېلىش زالىدا بالدۇرراق كېسەل كارۋىتىدىن چۈشۈشنىڭ ئامالىنى ئىزدەپ سۇنغان يەرلىرىڭ ئاغرىسىمۇ لېۋىڭنى چىشلەپ تۇرۇپ ھەرىكەت قىلىپ قوياتتىڭغۇ؟ سەل زېرىكىشلىك بولسىمۇ ئاشۇ دوختۇرخانىدىكى كۈنلىرىڭ نېمەدېگەن مەنىلىك - ھە؟! — رىژىسسور ئىككى قولىنى بىلىگە تىرەپ تۇرۇپ، كۆزەينىكىنى ئىككى بارمىقى بىلەن سەل ئۈستۈن كۆتۈرۈپ قويدى -دە، ئەپسۇسلىنش نەزىرى بىلەن بېشىنى چايقاپ قويۇپ سۆزىنى داۋام قىلدى، — ئەمدى ھازىرچۇ؟ ئىككى كۈن ئۆتەر - ئۆتمەي كىرەكسىز يۈك بولدۇڭ. ماڭا يۈك بولدۇڭ دېگىنىم يوق، جەمئىيەت نۇقتىسىدىن تۇرۇپ سۆزلەۋاتىمەن. ئالدىغان قىزلىرىڭ بەلكىم راست گول بولغاندۇ، ياكى بېشىدا ساددا قىياپەتتە شەرتىڭگە كۆنگەن بولىۋېلىپ ئاقىۋەتتە سېنى ئالداشنى كۆڭلىگە پۈكۈپ بولغاندۇ. نوچى بولساڭ خالئاينىڭ ئۆزىنى ئالداپ باق. ئاندىن قول قويىمەن. ئەگەر راستىنلا بىڭسىڭ بولسا، خالئاينىمۇ ئالداشنى قويۇپ ھاياتنىڭ ساڭا ئېلىپ كەلگەن كۈپلەتلىرىگە شۈكرى قىلىپ، ئازغىنە قالغان 3 كۈنلۈكۈڭنى قەدىرلەپ، سەت تاشلاردا تاپىنىڭنىڭ ئىزناسىنى قالدۇر. نېمانچە كۆرەڭلىك بۇ، 35 يىللىق ھاياتىمدا ھېچكىمگە بۇنداق ئۇزۇن سۆزلەپ باقمىغانىدىم، ھەتتا قىز دوستۇم مېنى خاتا چۈشەنگەن چاغلاردىمۇ مېھىرنىڭ تاتلىقلىقنى بۇنچە يېشىپ چۈشەندۈرۈپ باقمىغاندىم يىگىت. سەن ئادەم بول. تەكرارلايمەن... سەن ئادەم بول!
ئېشىك قاتتىق يېپىلىپ يېرىم ئېچىلدى. بېشىمنى كۆتۈرۈپ قارىسام، رېژىسسور يوق. ئۇنىڭ بايامقى گەپلىرىدىن بىر نەرسىلەرنى ھېس قىلىۋالدىم. تەنبىھلىرى لايىقىدا بولدى. ئىككى كۈندىن بۇيان 5 قىزنى ئالداپتىمەن دېگەندىن كۆرە، كۆڭلۈمنى بەش قېتىم بەزلەپتىمەن دېگىنىم تۈزۈكرەك. مەن قىز بالىغا شۇنچە ئېھتىياجلىقمۇ؟ ياق، ئەمىسە قىزلار ماڭا ئېھتىياقلىقمۇ؟ ياق. نېمە ئۈچۈن قىز بالا بىلەنلا ھەپىلىشپ يۈرۈيمەن؟ مەن ئۈجمە كۆڭۈلمۇ؟ تور دۇنياسى ئۇ كەڭرى بوشلۇق. بۇ بوشلۇقتا پەقەت قىزلار بىلەن ئوغۇللار ياشامدۇ؟ ياق، تەبىئەتمۇ، ھايۋاناتلارمۇ، ئۆسۈملۈكلەرمۇ ياشايدۇ. كىم ئۈچۈن ياشايدۇ؟ ئىنسانلارنىڭ تۇرمۇشىنى بېيىتىش ئۈچۈن. توردا ئېتىقادمۇ مەۋجۇتمۇ؟ مېنىڭچە چوقۇم مەۋجۇت. توردا ئادەملەرنى ھەقىقىي ئۆلتۈرگىلى بولامدۇ؟ بولىدۇ. يەنى ئاناتومىيە ئىلمىدىن پايدىلىنىپ ھەرقانداق بىر شەئىينىڭ نېرۋا توقۇلمىرىغا پىسخولوگىيلىك تاجاۋۇز قىلىش ئارقىلىق يىلتىزىدىن يوقاتقىلىق، يىقىتقىلى بولىدڭ. مۇشۇنداق قىلىش توغرىمۇ؟ ئەلۋەتتە خاتا. ھايات راۋان داۋام؛لاشسۇنمۇ ياكى دوقمۇش - دوقۇمۇشتا توغان سېلىشىپ قويايلىمۇ؟ راۋان داۋاملاشقىنى ئەۋزەل. ھېچ بولمىسا ئەۋلادلار ئۈچۈن بولسىمۇ ھەممە ئۆز ئوقىدا ئايلىنىپ، بىر - بىرىنى تارتىپ تۇرغىنى كۆپ ياخشىدۇر. ھە، كاللام ئەمدى ئېچىلىشقا باشلىغاندەك قىلىدۇ. كەچۈرۈڭلار مەن ئالدىغان قىزلار. كوت - كوتنىمۇ يۇيىۋېتىپ تۇراي، لازىم بولغاندا يېڭىدىن ئالغىلى بولىدۇ. پەن - تېخنىكا تەرەققىياتى قانداق بولىۋاتىدىكىن، توردىن بىرەر - ئىككى كىنو سۈزۈپ كۆرۈپ بېقىشىم كېرەك. ھازىرلا كۆرۈپ بېقىشىم كېرەك.
مۇشۇ ئويلار بىلەن ئىكراننى قايتا قوزغاتتىم - دە، ئامېرىكا، ئەنگىلىيە، فىرانسىيە، ياپۇنىيە، تۈركىيە، كورىيە، مىسىر، ھېندىستان، ئەرەبىستان، ئۆزبېكىستان، جۇڭگو، شىياڭگاڭ فىلىمرىنى ئايرىم - ئايرىم چۈشۈرۈپ بىر قۇر كۆرۈپ چىقىشقا باشلىدىم. ئامېرىكا كىنوچىلىقى سېنارىيەدىنمۇ بەكرەك كومپىيوتىېر تېخنىكىسىغا ۋە تەسەۋۋۇرغا تاينىدىكەن، ئىلىم - پەنگە ئالاھىدە ھۆرمەت نەزىرى بىلەن قارايدىكەن. قورال كۈچى ئالاھىدە گەۋدىلەنگەن؛ ئەنگىلىيە كىنوچىلىقى دىن بىلەن پارلامېنت ئوتتۇرىسىدىكى توقۇنۇشنى، قۇرۇقلۇق ئۇرۇشىدىكى تانكا ئۇرۇشىنى، قىلىچۋازلىق، قارغا ئېلىش ماھارەتلىرى ھەممە كىنولىرىدا دېگۈدەك ئەكىس ئېتىپ تۇرىدىكەن؛ فىرانسىيە كىنوچىلىقى ئۆزىدە بار بولغان گۈزەل مۇھىتىدىن، ھەيۋەتلىق قۇرۇلۇش ئىمارەتلىرىدىن ناھايىتى ئەپچىللىك بىلەن پايدىلىنىپتۇ. دائىم دېگۈدەك سېھرى كۈچكە ئىگە بىر پالىۋان ئاجىز بىر قىزنى قۇتقۇزىدۇ ۋە خەلقىنى ئازادلىققا ئېرىشتۈرىدىكەن؛ ياپۇنىيەنىڭ كارتون فىلىملىرى ئالاھىدە جەلىبكار ئىكەن. جەمئىيەت خاراكتىرىنى سىزما كارتونلارغا سىڭدۈرۈپ مىللەت، دۆلەت، كائىنات ئوتتۇرىسىدىكى مۇناسىۋەتنى ئىنتايىن ئەپچىلىك بىلەن پاش قىلىپ بېرىدىكەن. تۈركىيەدە بولسا كۈچەپ ئىسلام ئەقىدىسى ۋە تارىختا ئۆچمەس ئىز قالدۇرغان ئوسمان تۈرك ئىمپىرىيىسى ئالاھىدە شەرھلىنىپ تۇرىدىكەن، تېخىمۇ ئۆزگىچە تەرىپى، ئەرلەرنىڭ ساقال - بۇرتلىرى ئەركەكلەرگە خاس تۇيغۇ بېرىدىكەن؛ «ئاچچىق ھايات»، «ئادانالىق»، «سەلتەنەتلىك يۈز يىل» بۇ فىلىملەر 200 قىسىمدىن ئاز ئەمەس. تۈركىيە كارتىنىسى ناھايىتى ئىنچىكە سۈرەتلەنگەن ئىكەن. ئەلۋەتتە تولۇق كۆرۈپ بولالمىدىم، بېشىنى كۆرۈپلا ھېس قىلدىم. كورىيە فىلىملىرىمۇ ناھايتىى ئۇزۇن ئىشلىنىدىكەن، «جەننەتكە تۇتاشقان يول»، «يەنە بىر كۆرسەم» بۇ فىلىملىرى خېلى تېتىملىق تۇيۇلدى. مىسىرنىڭ فىلىملىرىگە قارىدىم، ئەزھەر ئۇنىۋېرسىتېتى بىلەن نىل دەرياسىنى چۆرىدەپ ئىشلەنگەن كىنولار كۆپرەككەن. ئۇ يەردە ئېتىقاد ۋە ئىقتىساد بارغانچە مۇكەممەل ۋە ئىلمىيلىككە قاراپ يۈزلىنىپتۇ. ھېندىستانمۇ كىنوچىلىقتا تېز ئىلگىرلەپتۇ، «ماشىنا ئادەم چېتى»، «يەر شارىدىكى يۇلتۇز» فىلىملىرىدە ئاجايىب ھىكمەت بار ئىكەن. ئەرەبىستانمۇ ئىخلاس بىلەن مەككە مۇكەررەمنىڭ خىسلىتىنى بارچە كۈچى بىلەن ئىنسانلارغا شەرھلەپ قائىدىلىشىپتۇ، مەزھەپلەر توقۇنىشىمۇ ئەپچىللىك بىلەن دەلىلنىپتۇ؛ ئۆزبېكىستان فىلىملىرى قىسقا، لېكىن تۇرمۇشتىن ئېلىنغان. كۆپىنچە قىز - يىگىتلەرنىڭ ئائىلە قۇرۇش كەچمىشلىرى، ئازابلىق قىسمەتلىرى جاھانگىرنىڭ ناخشىلىرىنىڭ قوشۇلىشى بىلەن ئاجايىب يارقىن ئەنئەنە جۇلاسىنى تېپىپتۇ؛ جۇڭگۇ فىلىملىرىنىڭ تۈرى كۆپ ئىكەن، بۇرۇنقىدىن كۆپ ياخشى، ئەخلاق، ئىلىم، مۇناسىۋەت قاتارلىق ئامىللار ياش ئارتىسلارنىڭ ماھارىتى بىلەن خېلىلا مۇكەممەللىككە يۈزلىنىپتۇ، لېكىن سېنارىيەنىڭ تېخىچە ھېسسىياتتىن ئەقىلگە كۆچۈپ بولالماسلىقى سەۋەبلىك يىغلىغۇدەك يەر بولمىسىمۇ قەستەن ئازابلىنىدۇ. ئەمما تېلېۋېزوردا بېرىلىۋاتقان ناخشا - ئۇسۇللۇق پروگراممىلىرى جۇڭگولۇق ياشلارنى ناھايىتى تېز ئويغىنىشىغا تۈرتكە بولۇۋېتىپتۇ. شىياڭگاڭ فىلىملىرى لىليىەنجى، چىڭلوڭلارنىڭ شۆھرەت تېپىشى ئارقىسىدا كومىدىيەلىك خاراكتىرىنى نامايان قىلىدىكەن ھەمدە ئەنئەنىسى بولغان چامباشچىلىق ماھارىتىنى ھەقىقىي تۈردە نامايان قىلىپ بېرەلەيدىكەن. ئۇھ، چارچاپتىمەن، قالغىنىنى يەنە ۋاقىت چىقىرىپ كۆرەرمەن، بايانلىرىمدىن شۇنداق دېيىشكە بولىدۇكى، كىنوچىلىق بىرىنچى قىلىپ ئىقتىسادنى كۆزلەيدىكەن، ئۇنىڭغا ئەگىشىپ، جەمئىيەت، دۆلەت، مىللەت، شەخس خاراكتىرىنى ئېچىپ تاشلايدىكەن، تالانىتلىقلارنى جاھانغا تونۇتىدىكەن، ئىلىم - پەننىڭ كېيىنكى تەرەققيياتىغا يول كۆرسىتپ بېرەلەيدىكەن. كۆرگۈچىنىڭ ئىددىيىسىگە ھەردانداق ئۇستازنىڭ ئىلمىدىنمۇ ئۈنۈملۈك تەسىر كۆرسىتەلەيدىكەن. كىنو ئەدەبىيات - سەنئەتنىڭ ئاتىسىغا ئايلىنىپتۇ. رېژىسسورنىڭ كىنو ئىشلەيلى دېگىنى بىكار ئەمەسكەن. كىنو ئىشلەشكە ئادەم، مۇھىت، ئىقتىساد، يېتەرلىك قوراق - جابدۇقلار، تېخنىكا، ياراملىق سېنارىيە ھازىر بولۇشى كېرەككەن. بۇ ساھەدە مۇۋەپپەقىيەت قازىنىش ئۇنداق ئاسان ئەمەسكەن، رېژىسسورمۇ بۇ نۇقتىنى ھېس قىلىپ يەتتى ھەقاچان. قىنى ئەتە تاڭ ئاتسۇن، بايا ئويلىغانلىرىمنى ۋوردتا بېسىپ تەييارلاپ قوياي، ئۇ كۆرۈپ باقسۇن! مېنىڭ يارامسىز ئىنسان ئەمەسلىكىمنى ئالدى بىلەن رېژىسسورغا بىلدۈرۈپ قويىمەن.
شۇلارنى ئويلىدىم -دە، پېلانلىرىمنى ۋوردتا ئۇرۇپ بولۇپ، ئېغىر ئەمگەكتىن چارچاپ كەلگەن نىمكەشتەك ئاياغلىرىمنىمۇ سېلىشقا مادار يوق، كىيىملىرىم بىلەن ھارغىن بەدىنىمنى كارۋاتقا تاشلىدىم.

Isteksiz sokakin 11 bolümü tamam oldu
11 Şubat 2014;  Salı ahxam

ZUHAL

شىنجاڭ يازغۇچىلىرى تور بىتى ئۇقمايدىكەنمەن

ZUHAL

شىنجاڭ يازغۇچىلىرى توربىتىنى ئۇقمايدىكەنمەن ، يوللاپ بەرسەڭلار

yawakoz

ZUHAL يوللىغان ۋاقتى  2014-2-26 13:49
شىنجاڭ يازغۇچىلىرى توربىتىنى ئۇقمايدىكەنمەن ، يوللاپ  ...

http://bbs.xjzjxh.com/portal.php

Man buning ahirni kat eylam tapal midim ,.  11  Kesmini korup bol dum amma ahri hazir huqa tapal midim .Ahir tehi yezil midimu yaki . Torda elan kelin midi  . Adam xunda kirxip  kalhan da yerim yolda tohtap kalmisa !

Man bak kirxip kalhan edim amma ahirqu ?

ئىلشاد

11  ning ahiri tehi yollan midimu yaki?

yawakoz

ئاخىرىنى يوللايمەن، ئاۋازلىقى بار ئىدى، قوشۇپ يوللاي دېسە، پەقەت بۇ توردا ياردەمچىمنى تاپالمايۋاتىمەن.

yawakoz

ھىجران كوچىسىدا...
12-قىسىم
خالئاي بىلەن ناۋاتتىن تاتلىق ۋەدىلەرنى بېرىشىپ، ئۆستەڭنىڭ ئىككى يېقىدا تۇرۇپ سۇ چېچىشىپ ئويناۋاتسام، قاياقتىندۇر خورازنىڭ ئۈنى ئاڭلاندى. كۆزۈمنى ئېچىپ قارىسام، رېژىسسورنىڭ تېلېفۇنى سايراۋېتىپتۇ. توۋا، چۈشۈمكەن ئەمەسمۇ! يېنىك - يېنىك ئىككى قېتىم ئەسنەپ قويۇپ، ئورنۇمدىن تۇردۇم. رېژىسورنىڭ ۋاقچە تۇرۇپسەن... دەپ تەنقىدلىشىدىن ئەنسىرىگەن ئىدىم، بىراق ئۇنىڭ چىراي ئىپادىسىدە ئۇنداق مەنا يوق.
— ساڭا قاراپ ئۆرە تۇرغىلى 10 مىنۇتتىن ئاشتى، ئولتۇرۇڭمۇ دېمەيسەنغۇ يىگىت، — دېدى ئۇ ماڭا سىلىق چاقچاق قىلىپ.
يېنىمدىن ئورۇن بوشاتتىم.
— كېلىڭ رېژىسسور، ئەتىگەن يەنە ۋاقچە تۇرۇپ سەت بولدى. كەچۈرۈڭ، بۇ ھورۇنلۇقۇمنى ئاللاھ خالىسا مۇشۇ ئىككى - ئۈچ كۈن ئىچىدە تۈزىتىۋالىمەن. ئالدىڭىزدا خىجىلمەن. ياردەم قىلىمەن دېگىنىڭىزگە تويغۇزۇپ، ھەر جەھەتتىن كۆپ زىيان سېلىپ قويۇۋاتىمەن. قانداق تاپشۇرۇقلىرىڭىز باركىن؟ مەن بۈگۈندىن تارتىپ خىزمىتىڭىزدە بولۇشنى خالايمەن.
— پاھ، بىزنىڭ يىگىتتە ئۆزگىرىش زورغۇ؟! — دېدى رېژىسسور بىر قولىنى يانچۇقىغا سېلىپ، بىر قولىنى ئۈستەلگە تېرەپ تۇرۇپ.
مەن كىنوچىلىق توغرىسىدا ئويلىغان ئاخشامقى ئويلىرىمنى رىژىسسورغا دېدىم ۋە يېزىپ قويغانلىرىمنى تەپسىلىي چۈشەندۈردۈم. رېژىسسور قاپقارا كەلگەن كەكە ساقاللىرىنى سىلاپ تۇرۇپ ماڭا قول قويغان مەنىدە تىكىلىپ قارىغىنىچە باش لىڭشىتتى.
— پېلانىم يارىدىمۇ باش رىژىسسور؟ ئەگەر بولمىغان تەرەپلىرى بولسا تۈزىتىش بېرىڭ، ئىشقىلىپ مەن ئەمدى جىم ياتمايمەن. مەنمۇ جاھاننى تەۋرىتىپ باقاي، خۇددى ماركىس، گېتلىردەك.
— ھا... ھا... ھا... يارايسەن يىگىت، يارايسەن.
رېژىسسور ئاۋازىنى بولۇشىغا قويۇۋېتىپ كۈلۈپ تاشلىدى. ئۇنىڭ ئاۋازى دېرىزە ئەينەكلىرىدىن، ئاپئاق سىرلانغان تاملاردىن جاراڭلىق سادا ياڭرىتىۋەتكەنىدى.
— كۈلكىڭىز بىردە ماڭا ئىلھام بېغىشلىسا، بىردە مېنى مازاق قىلىۋاتقاندەك بىلىنىۋاتىدۇ، ئېنىق تەبىر بەرگەن بولسىڭىز ئۇستاز!
— ماڭا قارا يىگىت، ساڭا ئىشەنمىگىنىم ئەمەس، بىراق بايا ئېيتقانلىرىڭ سەل ھاياجان بولۇپ قالدى. ساڭا ھەپتە قاراپ باقىمەن، ئۆزۈڭنى توختۇتۇپ، تەمكىنلىك بىلەن كەلگۈسۈڭنى ئويلۇشۇپ، ئاخىرقى تىنىقلىرىدىڭدىمۇ تەۋرەنمەيدىغان ئەقىدە بىلەن بىر قارارغا كەلگىنىڭدە ئاندىن مەن سېنى رەسمىي كىنوچىلىق ساھەسىگە ئېلىپ كىرىمەن. بۇنداق شوئارلىرىڭ بىلەن ئۇستازىڭنىڭ كۆڭلىنى ئالالمايسەن. ئازراق پۇل بېرەي، خەجلەپ كۆر، تېلېفۇنىڭمۇ مۇددەتتىن بۇرۇن كەلدى، ئىشلەتكىن.
ئۇ پۇل قاپچۇقىدىن قاتلانمىغان بىر باغلام پۇلنى ئۇزاتتى ۋە قولۇمغا ئالمىنىڭ سۈرىتى چۈشۈرۈلگەن سىپتا بىر ئايفۇننى تۇتقۇزدى.
— پۇلنى نېمانچە كۆپ بېرىسىز؟
— سېنىڭچە مۇشۇ كۆپما؟ خى، ئوغۇل بالا ئۈچۈن بۇ ھېچقانچە پۇل قىممەت ھېسابلانمايدۇ. ھېلىغۇ بىر باغلام پۇل يۇتقۇزدۇم، بىر كاللەك سېرىق ئالتۇن تۇتقۇزساممۇ كۆز قىرىڭنى سالمىغۇدەك غادىيالىساڭ ئاندىن سەن نوچى. بۇنداق دېگىنىم ھەرگىزمۇ پۇلنى خارلىغىن دېگىنىم ئەمەس. ئەتراپىڭغا ئىنچىكە نەزرىڭنى ئاغدۇرۇپ باق، قەدەمدە بىر پۇلغا ئېھتىياجلىق كىشىنى ئۇچرىتىسەن. دوقمۇشتا بىر غېرب قەلەندەرنى ئۇچرىتىسەن، يۇرتتا بىر ئاچ يۈرگەن تەرى ئۆڭگەن جاھاننىڭ ئۈگەي بالىلىرىنى ئۇچرىتىسەن، دۆلەتتە بىر ھەل قىلىنىشقا تېگىشلىك ئىقتىسادىي قېيىنچىلىقنى يەنى مۇھىت مەسىلىسىنى ئۇچرىتىسەن. ئەمدى بۇ ئۇلۇغ بۇرچۇڭ بىلەن كۆزۈڭگە چوڭ كۆرۈنۈپ كەتكەن ئالىقىنىڭدىكى بىر باغلام پۇلنى سېلىشتۇرۇپ كۆر. ئۇ پۇل جىقمىكەن؟
بۇ مېھىر - مۇھەببەتلىك ئۈنچىلەردىن مەن ئېغىر ئويلىنىش ئىچىدە تۇرۇپ قالدىم.
— بىراق،— دەرھال ئىنكاس قايتۇردۇم،— بىراق پۇل بىلەن ئۇ چوڭ مەسىلىلەرنى تەلتۈكۈس يوقاتقىلى بولمايدۇ - دە. يەنە كېلىپ، سىز بىلەن مەن قانداقمۇ بۇ ئوڭۇشسىزلىققا تاقابىل تۇرۇپ بولالايمىز؟ قىلغانلىرىمىز ۋاقىتلىق ھېسداشلىقتىن باشقا نەرسە ئەمەس. قېيىنچىلىقلارنى ياراتقۇچى ھەل قىلغىنى ئەۋزەل دەپ قارايمەن ئۇستاز.