بىزگە قانداق مۇنبەرلەر كېرەك ؟

تەڭرىتاغ

	ئەسسىلامۇ ئەلەيكۇم ھۆرمەتلىك تورداشلار ، ئۇيغۇر تورچىلىقى تەرەققىي قىلىپ مەلۇم باسقۇچقا يەتكەندە مەيدانغا كەلگەن ئۇيغۇر مۇنبەرچىلىكى يېقىنقى بىر نەچچە يىلدىن بۇيان زور دەرىجىدە يۈكسەلدى ۋە تەرەققىي قىلدى ، ئەتراپىمىزغا نەزەر سالىدىغان بولساق ، نۆۋەتتىكى ئۇيغۇرچە تور بەتلىرىنىڭ كۆپىنچىسى مۇنبەر ئارقىلىق تورداشلارنىڭ مەنىۋىي تۇرمۇشىغا زوق ئاتا قىلىپ كەلمەكتە . بۇ يەردە نېمە ئۈچۈن ئۇيغۇر تور بېكەتلىرىگە قارىغاندا ، مۇنبەرنىڭ كۆرۈلۈش نىسبىتى يۇقىرى بولىدۇ دېگەن مەسلە كېلىپ چىقىدۇ ؟     مېنىڭچە بۇنى تۆۋەندىكىدەك بىر نەچچە خىل نۇقتىغا يىغىنچاقلاش لازىم :    1 . مۇنبەرنىڭ تېما يوللاش ۋە ئىنكاس قايتۇرۇش ئىقتىدارى . تور بەتلەردە باشقۇرغۇچىلار ئۆزلىرى ماقالە - ئەسەر يازىدۇ ، ئۆزلىرى تەھرىرلەيدۇ ، ئۆزلىرى خىلمۇ خىل سۈرەتلەرنى بىر تەرەپ قىلىدۇ ، بىراق ھەممىمىزگە مەلۇم مۇنبەردە تورداشلار پەقەت تىزىملاتقان بولسىلا ، ئۆزى تېما يېزىپ ، كۆرگەن تېمىلىرىغا ئىنكاس يازالايدۇ .        2 . ئۆز ئارا سۆھبەتلىشىپ ، پىكىر ئالماشتۇرۇش شارائىتى يارىتىلغان . تور بېكەتلەردە مەلۇم بىر خەۋەر ياكى ئەدەبىي ئەسەرنى كۆرۈپ بولغاندىن كېيىن بىزدە ئۇ ئەسەرگە بولغان ھېچقانداق ئىپادە بىلدۈرۈش ھوقۇقى بولمايدۇ ، ئەمما مۇنبەردە بىز كۆرۈپ بولغان ھەر بىر ئەسەرگە نىسبەتەن باھالاش ئېلىپ بارالايمىز ، ئۆزىمىزنىڭ ئويلىغانلىرىمىزنى يازالايمىز ، سىز بىر ئېغىز ، مەن بىر ئېغىز سۆزلەش ئارقىلىق ئۆز ئارا پىكىر ئالماشتۇرۇش بىلەن بىر ۋاقىتتا ، بەزى ئۇقمىغان نەرسىلەرنى ئۇقۇۋالغىلى ، سۆز ، يېزىق قابىلىيىتىنى يۇقىرى كۆتۈرگىلى ، ئەزالار ئوتتۇرىسىدا بەس - مۇنازىرە ئېلىپ بېرىش ئارقىلىق كۆڭۈل ئېچىش ، ئەڭ مۇھىمى مەلۇم بىر توغرا يۆنىلىش ، توغرا ئوي پىكىرنى گەۋدىلەندۈرگىلى بولىدۇ .    3 . مۇنبەرنى ئۇنىۋېرسال بولغان ، ئىچىگە نۇرغۇن بىلىم سېلىنغان چوڭ بىر قامۇسقا ئوخشىتىشقا بولىدۇ . مۇنبەردە تور بېكەتلەرنىڭكىگە ئوخشاش ماقالە - ئەسەرلەرنىڭ تۈرى ، سۈپىتىگە قويۇلىدىغان تەلەپ ئۇنچە بەك يۇقىرى بولمايدۇ ، ۋاقىتچانلىقى جەھەتتىمۇ بەك يۇقىرى تەلەپ قويۇلمايدۇ ، بۇ مۇنبەرگە تېما - ئەسەر يوللاشتا تېمىلارنىڭ سانى جەھەتتىن كۆپ بولۇشىغا شارائىت ياراتقان ، تېما كۆپ ، كۈندە يېڭىلىنىدىغان تېما كۆپ ، ئىنكاس قايتۇرۇلغان تېما كۆپ ... مانا بۇلار مۇنبەرنى ئۇنىۋېرساللىققا ئىگە قىلغان .     بۇنىڭدىن باشقا مۇنبەرنىڭ يەنە نۇرغۇن ئارتۇقچىلىقلىرى بار ، شۇڭا مۇنبەرلەر باشقا تور بەتلەرگە قارىغاندا بەكرەك تورداشلارنىڭ قوللىشىغا ئېرىشىپ كەلمەكتە . بىراق ، شۇنچە نۇرغۇن مۇنبەرلەرنىڭ ئىچىدىن زادى قايسىسىنى كۆرۈش ، مۇنبەرنى قانداق قىلىپ نادىر ، تورداشلار ياقتۇرغان نوپۇزلۇق مۇنبەرگە ئايلاندۇرۇش ھەممەيلەننىڭ بېشىنى قاتۇرۇۋاتقان ھەمدە ھەممەيلەن بىرلىكتە ئويلىنىشقا ، كۆڭۈل بۆلۈشكە ، ھەل قىلىشقا تېگىشلىك مەسلىلەرنىڭ بىرى ...    ئەمسە بىزگە قانداق مۇنبەرلەر كېرەك ؟؟؟  بىزگە قانداق تېمىلار كېرەك ؟ بىزگە قانداق باشقۇرغۇچى ۋە ئەزالار كېرەك ؟    نۆۋەتتىكى مۇنبەرلەرگە نەزەر سالىدىغان بولساق ، ئاۋات تېمىلار ، ئىنكاسلىق تېمىلارنىڭ نەدىكى خەقنى چۈشۈرىدىغان ، باشقىلارنىڭ شەخسىي ئىشلىرىغا ئارىلىشىدىغان ، ئوغرى ، قاراقچى ، پاھىشە ، ئادەم ئۆلتۈرگەن ، باسقۇنچىلىق قىلغان ، ئالىي مەكتەپ قىزلىرىنىڭ بۇزۇلۇپ كېتىۋاتقان ، ئوغۇللارنىڭ قىزلارنى ئازدۇرۇپ ، يامان يوللارغا باشلاۋاتقان ... ئەسەرلەر بىلەن تولغانلىقىنى كۆرىمىز . بۇلار ھازىرقى تورلىرىمىز شۇنداقلا مۇنبەرلىرىمىزدە ئەڭ كۆپ ھۆكۈم سۈرىۋاتقان تېمىلار بولۇپ قالدى ، ئەكسىچە تارىخىي شەخىسلەر ، مىللىتىمىزدىن چىققان ئالىملار ، بىزنىڭ ۋە باشقىلارنىڭ تارىخى ، دۇنيا يېڭىلىقلىرى ،  ئاتا - ئانا ، ئوقۇتقۇچىلار مەدھىيەلىنىدىغان تېمىلارنىڭ چېكىلىش سانى ، كۆرۈلۈشى بىزنى ئەپسۇسلاندۇرىدۇ ، بەلكىم تورداشلارنىڭ قىزغىنلىقى ئوخشىماسلىقى مۇمكىن ، لېكىن  ئالدىدا تىلغا ئالغان تېمىلار بىزنىڭ غەيۋەت شىكايەت قىلىشىمىزغا ، جەمئىيەتتىن ئاغرىنىشىمىزغا ئاساس بولىدۇ ، كېيىنكىسى بىزنىڭ جەمئىيەتنى ، مىللىتىمىزنى تولۇق ، توغرا تونۇشىمىزغا ، ياخشى ئېسىل ئەخلاقىي - پەزىلەت ۋە ئەنئەنىنى داۋاملاشتۇرۇپ ، كېيىنكىلەرگە ئۈلگە ۋە ئۆرنەك بولۇشىمىزغا پايدىسى بار . نېمە ئۈچۈن مىللەتنى سۆكىدىغان ، خانىم - قىزلىرىمىزنى ، ئالىي مەكتەپ قىزلىرىنى بۇزۇق ، پاھىشىگە چىقىرىۋېتىدىغان تېمىلار ئىنكاسلار كۆپلەپ يېزىلىپ ، جەمئىيىتىمىزدىكى ياخشى ئىش ، ياخشى ئادەملەر ، مىللىتىمىزدىن چىقىۋاتقان ئۇيغۇر ئايال دوكتورلىرىنىڭ ئوبرازى مۇنبەر يۈزىدە دەۋر سۈرمەيدۇ ؟ كەچكىچە ئاغرىنىپ ، باتناپ ، تىللاپ ، سۆكۈپ يۈرسەك ، بىز نېمىگە ئېرىشەمىز ؟ خەقنى تىللايمىزيۇ ئۆزىمىز نەچچىلىك قىلىۋاتىمىز ، شۇنىڭ ئورنىغا ئەتراپىمىزدا ئۇچراتقان ياخشى ئىش ياخشى ۋەقەلەرنى ، ساۋات خاراكتېرلىك ، كىشىلەرنى تەربىيەلەش خاراكتېرلىك تېمىلارنى كۆپلەپ يوللىساق ، بۇنىڭدىن تورداشلار ئۈلگە ئالسا ، نەپ ئالسا ، ئەۋلادلىرىمىزنى ئەنە شۇ تېمىلىرىمىز بىلەن ياخشى يولغا يېتەكلىسەك مېنىڭچە مۇشۇنداق مۇنبەرلەر ئەڭ نوچىدۇر .     بەلكىم بۇنداق دېسەم ، بەزى تورداشلىرىمىز ئەمسە ئاشۇنداق يامان ئىللەت ، يامان ئىشلارنى قايسى خىل ئۇسۇل بىلەن ئەيىبلەيمىز ؟ باشقىلارغا قانداق ئىبرەت قىلىمىز دېيىشى مۇمكىن . مېنىڭچە بولسا مۇنبەردە ئۇنداق تېمىلارغىمۇ مۇۋاپىق ئورۇن بېرىپ ، بەك ئاشۇرۇۋەتمەسلىك ، ئۇنداق تېمىلارنىڭمۇ  تورداشلارنى يېتەكلەش ئۈنۈمىگە ئەھمىيەت بېرىپ ، مۇنداقلا يېزىپ قويۇلغان ، ھېچقانداق مەنىسى يوق ، تورداشلارنى ئەھمىيەتسىز سۆھبەتلەرگە سېلىپ قويۇپ ، بىر تەرەپتە ئولتۇرۇپ ئويۇن كۆرۈشنى مەقسەت قىلىپ يېزىلغان تېمىلارنى پەرقلەندۈرۈپ ، تورداشلارنى توغرا ئىدىيەگە يىتەكلەش لازىم .       تەجرىبىسى يوق ، مەسلىلەرنى توغرا تەھلىل قىلىش ئىقتىدارى يوق ، مۇستەھكەم مەيدانى يوق بەزى ساپاسىز، تالاش - تارتىش ، بەس - مۇنازىرىلەردە داپ داڭرىغان ، ئىشەك ھاڭرىغان مۇقامغا ئەگىشىپ كېتىپ قالىدىغان باشقۇرغۇچىلاردىن ھەزەر ئەيلەپ توغرا پىكىر قىلالايدىغان ، تورداشلارنى توغرا يېتەكلىيەلەيدىغان ، ئىنكاس يېزىش ، باشقىلارنى قايىل قىلىش ئىقتىدارى يۇقىرى بولغان باشقۇرغۇچىلارنى مۇنبەرنى بىرلىكتە باشقۇرۇشقا تەكلىپ قىلىش ، ئۇلارنىڭ ئىقتىدارىدىن تولۇق پايدىلىنىش ، مۇنبەردىكى ئەزالارغا ئادىل ، باراۋەر ، ئەپۇچان ئاساستا مۇئامىلە قىلىش كېرەك .     يۇقىرىقىلار مېنىڭ مۇنبەر ھەققىدە ئويلىغانلىرىم ، بىزگە قانداق مۇنبەرلەر كېرەك ؟ بۇ يەنىلا كەڭ تورداشلارنىڭ ئالدىغا قويۇلغان مۇھىم مەسلىلەرنىڭ بىرى .        ئەسەردە ئوتتۇرىغا قويۇلغان مەزمۇنلار تېما ئىگىسىنىڭ شەخسىي كۆز قارىشى . ئەسەرنىڭ بارلىق ھوقۇقى تېما ئىگىسىگە ئىگە . باشقا مۇنبەرلەردە كۆچۈرۈپ تارقىتىشقا بولمايدۇ .

noshirwan

	باشقۇرغۇچىلىق تور بەتچىلىك ئىشلىرىدا مۇھىم ئورۇن تۇتىدۇ. توربەت سۈپىتىنىڭ قانداق بولۇشى باشقۇرغۇچىنىڭ سىياسىي، ئىدىيىۋى ۋە كەسىپ ساپاسى بىلەن زىچ مۇناسىۋەتلىك. تور بەتتىكى تېمىلارنىڭ دائىرىسى كەڭ، مەزمۇنى ھەر خىل بولغاچقا، باشقۇرغۇچىدىن ئۇنىۋېرسال ساپا ۋە كۈچلۈك مەسئۇلىيەت ئېڭى بولۇشىنى تەلەپ قىلىدۇ. باشقۇرغۇچىلىقنىڭ ھۆددىسىدىن ئوبدان چىقىشى ئۈچۈن ئۇنىۋېرسال ساپاسىنى ئۈزلۈكسىز ئۆستۈرۈشكە توغرا كېلىدۇ. تور بەتكە يوللىنىدىغان تېما ھەرخىل بولىدۇ. بۇ باشقۇرغۇچىلاردىن ھەر ۋاقىت سەگەك تۇرۇشنى تەلەپ قىلىدۇ. نۆۋەتتە، تور بەت باشقۇرغۇچىلىرىنىڭ سىياسىي سەزگۈرلۈكىنى يۇقۇرى دېيىشكە بولىدۇ. بەزى باشقۇرغۇچىلارنىڭ سەزگۈرلىكى زىيادە ئېشىپ كەتكەنلىكتىن، ئۆز-ئۆزىدىن ئەنسىرەپ، سىياسىيغا مۇناسىۋەتلىك تېمىلارنى بىردەك تەستىقلىمايدىغان ئەھۋاللارمۇ ساقلاندى. پۇقرالار ئاساسىي قانۇن ۋە قانۇنلارغا ئاساسەن، دۆلەتنىڭ سىياسىي، ئىقتىسادىي، مەدەنىيەت-مائارىپ ۋە باشقا تۈرلۈك ئىجتىمائىي ئىشلىرىغا ئىشتىراك قىلىدۇ ۋە باشقۇرۇشقا قاتنىشىدۇ. بۇ جەرياندا دۆلەتنىڭ سىياسىي، ئىقتىسادىي، مەدەنىيەت-مائارىپ ۋە ئەدلىيە تۈزۈمى قاتارلىق ساھەلەر ھەققىدە پىكىر-تەكلىپلەرنى ئوتتۇرىغا قويىدۇ، ساقلانغان مەسىلىلەر ھەققىدە تەنقىت ۋە تەكلىپ بېرىدۇ، ئۆزىنىڭ كۆز-قاراشلىرىنى ئوتتۇرىغا قويىدۇ. موشۇ خىلدىكى تېمىلارنى سىياسىيغا چېتىلىدىكەن دەپلا تەستىقلىمىسا، تور بەتلەر قايسى بىر ھەمجىنىسلارنىڭ بەتقىلىقلىرى، ئاتا قىزىغا باسقۇنچىلىق قىلغانلىقى، ئۆزئارا تونۇشۇپ قالايلى دېگەندەك تېمىلار بىلەن توشۇپ كەتسە، شۇ ئارقىلىق زىيارەت قېتىم سانىنى ئاشۇرۇپ، ئېلان كىرىمىنى كۆپەيتىش ئۈچۈنلا تىرىشىپ، تېما تاللاش ۋە شاللاشقا ئەھمىيەت بەرمىسە، بۇنداق توربەتنىڭ ئىجتىمائىي ئۈنۈمى قانچىلىك بولماقچى. .(بىزنىڭ بۇيەردە تور بەتنىڭ ئىقتىسادىي ئۈنۈم يارىتىشىنى چەتكە قېقىش ئويىمىز يوق. مۇئەييەن ئىقتىسادىي ئۈنۈم يارىتىش بىلەن بىرگە ئىجتىمائىي ئۈنۈم مەسىلىسىنى كۆزدە تۇتىۋاتىمىز) باشقۇرغۇچىلار تۈرلۈك قانۇن-سىياسەتلەرنى پىششىق ئۆگىنىپ، قايسى تېمىدا سىياسىي جەھەتتە مەسىلە بار، قايسى تېما قانۇن-سىياسەتلەرگە ئۇيغۇن، دۆلەت ۋە خەلقنىڭ ئىشلىرىغا پايدىلىق دېگەننى پەرقلەندۈرۈش ئىقتىدارىنى ئۆستۈرۈش زۆرۈر. باشقۇرغۇچىلاردا ئەتراپلىق بىلىم بولمىسا بولمايدۇ. باشقۇرغۇچىلار ئىمكان قەدەر ھەر ساھەدىن مەلۇم دەرىجىدە خەۋەردار ئادەم بولسا، تېما تەستىقلاش ۋە تەھرىرلەشتە قىينالمايدۇ. تورغا يوللانغان تېمىلارنىڭ دائىرىسى ھەرقايسى ساھە، كەسىپ ۋە ھەرقايسى سەپلەرگە مۇناسىۋەتلىك بولغاچقا، باشقۇرغۇچىلار ئادەتتىكى ۋاقىتلاردا ئەتراپلىق بىلىم ئېلىشقا ئەھمىيەت بېرىش زۆرۈر. باشقۇرغۇچىلاردا خالىسانە تۆھپە قوشۇش روھى بولۇشى تېخىمۇ مۇھىم. باشقۇرغۇچىلىق جاپالىق ئەمگەك بولۇپ، ياراملىق باشقۇرغۇچى بولۇش ئۈچۈن خەلقىم ئۈچۈن مىننەتسىز ئىشلەيمەن، دەيدىغان روھ بولۇشى كېرەك. باشقۇرغۇچىلار داۋاملىق ئۆگىنىپ ئىقتىدارىنى ئۈزلۈكسىز ئۆستۈرۈپ تۇرمىسا، تېمىنىڭ سۈپىتىگە كاپالەتلىك قىلالمايدۇ، شۇڭا، داۋاملىق ئۆگىنىپ، سەۋىيىسىنى ئۆستۈرۈپ، ئالدىن مۆلچەرلەش، ئالدىن كۆرۈش ئىقتىدارىغا ئىگە بولۇشى، يېڭى بىلىملەر بىلەن ئۆزىنى بېيىتىپ تۇرۇشى كېرەك. باشقۇرغۇچىلارنىڭ تىل جەھەتتىكى ساپاسى ئۇلارنىڭ ئاساسىي ماھارىتىدۇر. تىل جەھەتتىكى ساپا گىرامماتىكا، ئىستىلىستىكا، لوگىكا جەھەتتىكى ساپانى كۆرسىتىدۇ. باشقۇرغۇچىلەر گىرامماتىكا، ئىستىلىستىكا، لوگىكىنى توغرا ئىشلىتىشنى بىلمىسە، خەۋەر – ماقالىدە خاتا سۆز – ئىبارىلەرنى ئىشلىتىشتىن، سۆز – جۈملىلەرنى توغرا قوللانماسلىقتىن، كېسەل سۆز – جۈملىلەرنى ئىشلىتىشتىن، نەقىل كەلتۈرۈلگەن سۆز – ئىبارىلەرنى توغرا قوللانماسلىقتىن ساقلىنالمايدۇ. كۆپلىگەن باشقۇرغۇچىلار توربەتتە ئېلان قىلىنىدىغان يازمىلارغا گېزىت-ژۇرناللاردا ئېلان قىلىنىدىغان ماقالە-ئەسەرلەرگە قويۇلىدىغان تەلەپنى قويغىلى بولمايدۇ دېيىشىدۇ. بۇنى خاتا دېگىلى بولمايدۇ، لېكىن، بەزى ئەقەللىي تەلەپلەرنى يەنىلا نەزەردىن ساقت قىلىشقا بولمايدۇ.

تەڭرىتاغ

	noshirwan يوللىغان ۋاقتى  2011-8-26 14:26 باشقۇرغۇچىلىق تور بەتچىلىك ئىشلىرىدا مۇھىم ئورۇن تۇتى ... ناھايىتى ياخشى پىكىر يېزىپسىز دوستۇم ، ئىشىنىمەنكى تەڭرىتاغ تورى مۇنبىرى باشقۇرغۇچىلارنى ئادىل سايلاپ ، تورداشلار ئۈچۈن ئەڭ ياخشى مۇلازىمەت قىلىش ئۈچۈن تىرىشىدۇ . باشقۇرغۇچىلارنىڭ ۋەزىپىسى ، مەسئۇلىيىتى ، مەجبۇرىيىتى قاتارلىق جەھەتلەردىن تېخىمۇ ئەتراپلىق بىلىمگە ئىگە قىلدىڭىز . دېمەك ، مۇنبەر ئۈچۈن تىرىشىۋاتقانلار ، مۈنبەرنىڭ تېخىمۇ ياخشى چىقىشى ئۈچۈن كۈچ چىقىرىۋاتقان ئەزالار ، تورداشلىرىمىز ئاز ئەمەس ، باشقۇرغۇچىلار ئۆز ھوقۇقىدىن تولۇق ، توغرا پايدىلانسا ، شەخسىيەتچىلىك قىلمىسا ، ئەزالارمۇ ئۆزىنىڭ بىلىم سەۋىيەسى بويىچە ئۆزىنىڭ ئويلىغانلىرىنى ، كۆرگەنلىرىنى ، ئاڭلىغانلىرىنى مۇنبەردە تېما قىلىپ يازسا ، باشقا تورداشلار بۇ خىلمۇ خىل ۋە رەڭگارەڭ تېمىلارنى كۆرسە ، بۇ تېمىلارغا ئىنكاس يازسا ، بۇ تېمىلار ئۈستىدە ئويلانسا نېمىدىگەن ياخشى ھە ! تور دۇنياسى بىزنىڭ نۆۋەتتىكى مەۋھۇم پائالىيەت مەيدانىمىز بولۇپ قالدى ، بۇ پائالىيەت مەيدانىدا مۇنبەرلەر مەھەللە ، قەۋملىق رولىنى ئويناۋاتىدۇ ، مەھەللىمىزنى قانداق قۇرۇش ، قانداق گۈللەندۈرۈش ، قانداق تەرەققىي تاپقۇزۇش قاتارلىق ئىشلارنىڭ ھەممىسى يەنىلا شۇ تورداشلارنىڭ ، مەھەللە ئەزالىرىنىڭ قولىدىكى ئىش ، ھەممەيلەن بىرلىكتە مۇنبەرنى تەرەققىي قىلدۇرۇش ئۈچۈن كۈچ چىقىرايلى .

noshirwan

	«ئىشىنىمەنكى تەڭرىتاغ تورى مۇنبىرى باشقۇرغۇچىلارنى ئادىل سايلاپ ، تورداشلار ئۈچۈن ئەڭ ياخشى مۇلازىمەت قىلىش ئۈچۈن تىرىشىدۇ .» شۇنداق بولۇشىغا تىلەكداشمىز. تەڭرىتاغ مۇنبىرى يازغۇچىلار مۇنبىرىدىن كېيىن ھۆكۈمەت تەرىپىدىن ئېچىلغان 2-مۇنبەر. يازغۇچىلار مۇنبىرى كەسپىي مۇنبەر . شۇنداق بولغاندا، تەڭرىتاغ مۇنبىرى ھۆكۈمەت تەرىپىدىن ئېچىلغان تۇنجى ئونۋېرسال مۇنبەر بولۇپ قالىدۇ. ئۇيغۇر تىلىدىكى مۇنبەرلەرنىڭ سانى ئاز بولمىسىمۇ، سۈپىتى تورداشلارنى رازى قىلالمايۋاتىدۇ. ئۇيغۇرچە تور بېكەتدىن ھەقىقىي تور بېكەت دېگىدەك بېكەتلەرمۇ بارماق بىلەن ساناقلىقلا. موشۇنداق ئەھۋالدا، تەڭرىتاغ مۇنبىرىنى ھەقىقىي ياخشى باشقۇرۇپ، ئۇيغۇر تىلىدىكى نوپۇزلۇق ۋە ئالدىنقى قاتاردا تۇرىدىغان مۇنبەر قىلىپ قۇرۇپ چىقىشىڭلارنى ئۈمىت قىلىمەن.

تەڭرىتاغ

	noshirwan يوللىغان ۋاقتى  2011-8-28 19:31 «ئىشىنىمەنكى تەڭرىتاغ تورى مۇنبىرى باشقۇرغۇچىلارنى ئ ... رەھمەت ، بىز چوقۇم مۇنبەرنى ياخشى باشقۇرۇپ ، مۇنبەردىكى ئەزالارنى ياخشى تەشكىللەپ مۇنبەرنى ئۇيغۇر تىلىدىكى مۇنبەرلەرنىڭ ئالدى قىلىپ چىقىش ئۈچۈن تىرىشىمىز ، شۇنداقلا سىلەرنىڭ مۇنبەرگە قىممەتلىك تەكلىپ - پىكىرلەرنى بېرىشىڭلارنى ئۈمىد قىلىمىز .

رۇجەك

	بىز ھەممىدىن ياخشىنى  تاللاپ بولالمايمىز ھەممىدىن ياخشىنى  ئۈزۈڭلار  تاللاڭلار   مۇشۇ پىرىنسىپ بويىنچە  ماڭساق مۇنبىرىمزنىڭ چۇقۇم سەركە  مۇنبەر بولۇشىدا  گەپ يوق

GULI

	مېنىڭچە بولغاندا باشقۇرغۇچىلار ھەرقايسى سەھىپىلەرگە ئايرىلىشى، ئۆزى تەستىقلىغان تېمىغا ئاخىرغىچە مەسئۇل بولۇشى، چۈشكەن ئىنكاسلارغا مۇۋاپىق جاۋاپ قايتۇرۇشى كىرەك، يەنە بىر نۇقتا ، ھازىر مۇنبەرلەردە پىسخىكىلىق سىناق نامى بىلەن تېپىشماق تېمىلار كۆپىيىپ قالدى، بۇخىل ئىلمىيلىكى يوق، قىزىقارلىق ئويۇن تۈسىنى ئالغان تېمىلار تەستىقلانمىسا دەيمەن، باشقۇرغۇچىلار دىققەت قىلىشقا تىگىشلىك ئەڭ مۇھىم نۇقتا ، تېمىغا مۇناسىۋەتسىز ، تېما مەزمۇنىنى بۇرمىلايدىغان، مۇنبەر ۋەزىيىتىگە پايدىسىز بولغان، نازۇك مەسىلىلەرگە چېتىلىدىغان، تېما ئىگىسى ياكى باشقا ئىنكاس يازغۇچىنىڭ ئىززىتىگە تېگىدىغان ئىنكاسلارنى ۋاقتىدا بايقاش ۋە تازىلاشقا ئەھمىيەت بېرىشى لازىم دەپ قارايمەن. ئاخىرىدا قوشۇپ قويىدىغىنىم، باشقۇرغۇچىلار مەيلى تېما يازسۇن ياكى ئىنكاس يوللىسۇن ،ئىملاغا ئالاھىدە دىققەت قىلىشى كىرەك. يۇقارقىلار مېنىڭ شەخسى قارىشىم.

تەڭرىتاغ

	GULI يوللىغان ۋاقتى  2011-9-27 23:14 مېنىڭچە بولغاندا باشقۇرغۇچىلار ھەرقايسى سەھىپىلەرگە  ... سىزنىڭ قىممەتلىك تەكلىپ - پىكىرلىرىڭىزگە كۆپتىن - كۆپ رەھمەت .

karwanim

	تەڭرىتاغ ئۇيغۇر مۇنبىرى ئۈچۈن قولىمىزدىن كىلىشىچە ھەمدەمدە بولىمىز.

تەڭرىتاغ

	karwanim يوللىغان ۋاقتى  2011-9-28 17:43 تەڭرىتاغ ئۇيغۇر مۇنبىرى ئۈچۈن قولىمىزدىن كىلىشىچە ھەم ... مۇنبىرىمىز ئۈچۈن كۈچ چىقىرىۋاتقان بارلىق ئەزالارغا رەھمەت ئېيتىمەن .

Talwa0908

	باشقۇرغۇچى تاللاش ھەرگىزمۇ سەل قارايدىغان ئىش ئەمەس  ئىشىنىمەنكى سىلەر چوقۇم ياخشى باشقۇرغۇچىلارنى تاللاپ چىقالايسىلەر.  مۇنبەر ئۈچۈن كۆڭۈل بۆلدىغان دوستلارنىڭ ئۆزىنىڭ رولنى ياخشى جارى قىلدۇرۇپ مۇنبەرنى گۈللەندۈرشىنى ئۆمۈد قىلىمەن..

تەڭرىتاغ

	Talwa0908 يوللىغان ۋاقتى  2011-9-30 11:05 باشقۇرغۇچى تاللاش ھەرگىزمۇ سەل قارايدىغان ئىش ئەمەس  ئ ... بىزنى قوللىغىنىڭىزغا رەھمەت ، بىز باشقۇرغۇچىلارنى ياخشى تاللاپ سىلەر ئۈچۈن ئەلا مۇلازىمەت قىلىمىز .

QaraOt

	يان بېسىش ، گوروھۋازلىق ، قاراپ تۇرۇپ ئىلمىي كۆز قاراشنى چەتكە قېقىش ------- بۇ خىل ناچار ئىللەت نۇرغۇن تور بېكەتلەرنى سوۋۇتقان . ئەسەر كۆچۈرۈپ كېلىشكە روخسەت قىلىپ ، كېلىش مەنبەسىنى ئەسكەرتمەسلىك - بىر تەرەپتىن ، بىر قىسىم تورداشلاردا ئىلىمگە ھۆرمەت قىلماسلىق ، تەقلىدچىلىك ، كىشىنىڭ ئىجادىيىتىنى ئوغرىلاش قاتارلىق يامان ئىللەتلەر نى ئەۋجىگە چىقارغان بولسا ، يەنە بىر جەھەتتىن شۇ تور بېكەتنىڭ خاسلىقىنى يوقۇتۇشقا تۇرتكىلىق رول ئوينىدى .

تەڭرىتاغ

	QaraOt يوللىغان ۋاقتى  2011-9-30 22:29 يان بېسىش ، گوروھۋازلىق ، قاراپ تۇرۇپ ئىلمىي كۆز قاراش ... قىممەتلىك تەكلىپ - پىكىرلەرنى بەرگىنىڭىزگە رەھمەت .

mungdax

	تەڭرىتاغ مۇنبىرىنىڭ گۈللىنىشى ئۈچۈن ھاردىم- تالدىم دېمەي بىر كىشىلىك ھەسسەمنى قوشىمەن.

jasus19

	مۇھەببەت تىمىسدىكى كىشلەرنى روھى چۈشكۈنلۈككە باشلاپ كىردىغان ئەسەرلەرنى تەستىقلىمسا ،دىنىي مەزمۇندىكى ھۆكمەت ۋە خەلىققە زىينى يوق ،تەربىيۋى كۈچكە ئگە تىمىلارنى دىنىي تىما ئىكەن  دەپ تەستىقلىماسلىقتىن ساقلانسا كەن دىگەن قاراشتىمەن. چۈنكى بۇ مۇنبەرنىڭ مۇ مىسرانىم مۇنبىردەك تىل-ھاقارەتلەرگە قىلشىنى خالىمايمەن .

GULI

	ھەممەيلەن ئىنكاستىكى پىكىرلەرگە ئەھمىيەت بەرسەك ئەڭ ياخشى بولىدۇ، ھۆكۈمەت تورىنىڭ مۇنبىرى ئۇيغۇر تورچىلىغىمىزدىكى يېڭى مايسا، بۇنى پەرۋىش قىلىش، ئاينىتىش ھەممىمىزنىڭ ئورتاق مەسئۇلىيىتى، شۇنداق بولغانكەن، ھەر بىر ئەزا ئۆزىنىڭ مەسۇلىيىتىنى ئۇنتۇپ قالمىسىكەن دەيمەن.

تەڭرىتاغ

	GULI يوللىغان ۋاقتى  2011-10-4 23:54 ھەممەيلەن ئىنكاستىكى پىكىرلەرگە ئەھمىيەت بەرسەك ئەڭ ي ... بىزنى قوللىغىنىڭىزغا رەھمەت .

tuman

	بىز ھەممىدىن ياخشىنى  تاللاپ بولالمايمىز ھەممىدىن ياخشىنى  ئۈزۈڭلار  تاللاڭلار مۇشۇ پىرىنسىپ بويىنچە  ماڭساق مۇنبىرىمزنىڭ چۇقۇم سەركە  مۇنبەر بولۇشىدا  گەپ يوق  ~! ھەممەيلەن ئىنكاستىكى پىكىرلەرگە ئەھمىيەت بەرسەك ئەڭ ياخشى بولىدۇ، تەڭرىتاغ مۇنبىرىنىڭ گۈللىنىشى ئۈچۈن ھاردىم- تالدىم دېمەي بىر كىشىلىك ھەسسەمنى قوشىمەن.

Erkman

	بىزگە ھېسسىي ئادەملىكتىن ھالقىغان، ئەقلىي ئادەم بولۇپ چوڭ بولىۋاتقان مۇنبەرچىلەر بىلەن تولغان،  تېما-ئىنكاسلىرىمىزغا  بىرەر ئېغىز ياپتا-كىنايەلەر ئارتۇق كەتسە جېدەلدىن خالىي، ئەمما قىزغىن-دوستانە تۇرالايدىغان مۇنبەر كېرەك! ئىشىنىمەنكى، تەڭرىتاغ مۇنبىرى مۇشۇنداق مۇنبەر بولىدۇ!