بۇ يازمىنى ئاخىرىدا sadiksirdax تەھرىرلىگەن. ۋاقتى 2014-5-29 16:38
ھەسەتخور
قارىماققا كىچىك پىل،پەيلى يامان ھەسەتخور، ئېغىزىدا ئىمان بار ، دىلدا يىلان ھەسەتخور، قېرىنداشنى ،دوستىنى چاققان چايان ھەسەتخور، ئادەملىكىڭ دىللاردا،قوزغار گۇمان ھەسەتخور، توشۇپ گەپ-سۆز، دوستلارنى تىرىك ساتقان ھەسەتخور!
ئۆزى ئۇتۇق قازانماي ،يۈرەر دائىم تەمتىرەپ، قان كېتىدۇ ئىچىڭدىن ،بىراۋ قۇچسا شان-شەرەپ،
كونا باشلىق ئالدىدا ياشىغانتىڭ ئەركىلەپ، ئەمدى يېتىم قالدىڭسەن ،تاز ئۆچكىدەك مەقىرەپ، ئىچى تارلىق دەستىدىن ، ئەلەم يۇتقان ھەسەتخور.
مۇسىبەتلىك شۇمخەۋەر يېتىپ كەلدى خوتەنگە: مەرھۇم ئاتاڭ جەسىدى كىرىپتۇ ئاق كېپەنگە، تاغدەك ئېغىر مۇسىبەت كەلگەن چاغدا يەلكەڭگە، بەردىم بېرىپ تەسەللىي، كونا-ۋەيران كەپەڭگە، ياشاپ ئۆسكەن موھىتى ، ئېغىل –قوتان ھەسەتخور.
كەسپ قىلدىڭ ئۆزەڭگە ياخشىلارنى چېقىشنى ، چېقىش بىلەن نەپ ئېلىپ، ئۆگەندىڭ جان بېقىشنى كۈلۈپ تۇرۇپ دوستلارنىڭ،دىلىغا زىخ تىقىشنى، سۇ لېىيىتىپ كۆلچەكتىن،ئۆزەڭ بېلىق تۇتۇشنى شۇ‹ھۇنەر›دە ۋاقىتلىق،تاپتىڭ ھايان ھەسەتخور.
چىرمىۋالغاچ دىلىڭنى ئەمەل-مەنسەپ تاماسى، قابىللارنى دەپ يۈردۈڭ‹قانچىلىكتى ساپاسى؟› كوت-كوت قىلىپ يۈرۈيسەن ، گېپىڭنىڭ يوق ئاساسى، ياخشى ئەمەس بۇنىڭغا،كۆپچىلىكنىڭ باھاسى، ئەمەل-مەنسەپ كويىدا،يۈردۈڭ ھامان ھەسەتخور!
پەيلاسوپتەك كورسىتىپ سەپداشلارغا ئۆزەڭنى ، ھىكمەتلىك دەپ قارايسەن ھەر بىرئېغىز سۆزەڭنى ، ھەقىيقەتنىڭ ئالدىدا،چىڭ يۇمىسەن كۆزەڭنى،
ياقتۇرمىسا ھېچ كىشى سەندەك مەغرۇر-كۆرەڭنى، ئاچچىق مېغىز يىگەندەك چەكتىڭ پىغان ھەسەتخور!
ھەسەت ئوتى قەلبىڭدە بولدى گۈلخان لاۋۇلداپ، كىرگەن كەبى دوزاققا چەكتىڭ دوستۇم دەرت-ئازاپ، بۇغداي ئۆڭلۈك يۈزلىرىڭ كۈندىن-كۈنگە قارىداپ، يازدىڭ ھەتتا ماقالا،تۆھپەكارلارنى غاجاپ، ئاچچىق يۇتۇپ سەكراتتا،يېتىپ قالغان ھەسەتخور.
ئەر سانالماس تۈك-ساقال چىققان بىلەن ئېڭەككە، ئوخشىتىسەن ئۆزەڭنى تەڭدىشى يوق زېرەككە، لېكىن ھەسەت يۇتىسەن ‹‹خەمەك›› چۈشسە ‹‹پىلەك››كە، ھەسەت يۇتقاچ، دوختۇرلارسالدى تىرەك يۈرەككە، زەئىپ بولۇپ يۈرۈگى نىمجان بولغان ھەسەتخور!
تاپقان پۇلۇڭ تاش سېتىپ، كەتتى ئېقىپ دوختۇرغا، تەكشۈرتۈپ باق تەپسىلىي تېخنىكىسى يۇققىرىغا، نەس كېسەللىك ئامراقكەن ئىچى زەھەر-قوتۇرغا،
ئىككى پۇتلۇق ئېشەكمۇ باغلىنىدۇ ئوقۇرغا، ئىسمى ئادەم بولسىمۇ ، نەسلى ھايۋان ھەسەتخور!
ئاگاھ بولغىن ساغلاملىق،تەئۇللۇقتۇر ئوزۇڭگە، ھەسەت دېگەن زىيانلىق،ئۆپكە،يۈرەك،ئۆتۈڭگە، ئايالىڭ ئاق كىيىملىك،كىردى تەكرار چۈشۈمگە، شېئر يېزىپ شىپالىق،ئوكۇل سالدىم كۆتۈڭگە، چىداپ تۇرغىن لەۋ چىشلەپ،دىمە‹‹ ۋايجان!›› ھەسەتخور.
ئاقىۋىتى خەتەرلىك يۈرەك بولسا تىقىلما، قىلىپ قارا نىيەتلىك،سەپداشلارغا چېقىلما، دوستلىرىڭغا بولمىغىن ، ئىككى يۈزلۈك سېتىلما، سۆڭەك بەرگەن ئىگەڭگە،غالجىر ئىتتەك ئېتىلما، ساقىيارسەن ،دىلىڭ كەڭ بولسا ئاسمان ھەسەتخور! مەنبە: خاتىرەم 2013-7-30 | 
يوللىغان ۋاقتى 2014-5-29 11:54:33
