فاكرىيا دىمىتروۋا بىر ئەما ئايال، ئەمما ئۇ كىشىلەرنىڭ ئۆتمۈشىنى قىياس قىلىپ، كەلگۈسىدىن بېشارەت بېرەلەيدۇ، كىشىلەرگە كېسەلنى قانداق داۋالاشنى كۆرسىتىپ بېرەلەيدۇ. شۇنداقلا يۈز بېرىش مۇمكىنچىلىقى بولغان بالا قازادىن ئالدىن خەۋەر بېرىپ، يوقاپ كەتكەنلەرنىڭ ئىز دېرىكىنى ئېيتىپ بېرەلەيدۇ. ئېيتىشلارغا قارىغاندا، ئۇ ئىلگىرى سىتالىننىڭ ۋاپاتىدىن ئالدىن بىشارەت بەرگەچكە تۈرمىگە قامالغانىكەن.
دىمىتروۋا بۇلغارىيە، ماكېدونىيە ۋە گېرىتسىيە چېگرىلىنىدىغان جايدىكى بىر يېزىدا تۇراتتى. 1941-يىلى يانۋارنىڭ مەلۇم بىر كېچىسى ساۋۇت دوبۇلغۇلۇق بىر چەۋەنداز ئۇنىڭ ئۆيىدە پەيدا بولدى ۋە ئۇنىڭغا :ئۇزاققا قالماي ئىنسانىيەتكە ئاپەت ياغىدۇ، نەچچە مىليون ئادەم جېنىدىن ئايرىلىدۇ، سەن بۇلاردىن ئالدىن بېشارەت بېرىشنى خالامسەن؟ قورقما، قانداق قىلىشنى مەن ئۆگىتىمەن، دېدى. دىمىتروۋا ئەينى چاغدا 30 ياشقا كىرگەن بولۇپ، بۇ سىرلىق چەۋەندازغا يولۇقۇشتىن ئىلگىرىلا سىرلىق تالانتىنى نامايەن قىلىشقا باشلىغانىدى. ئۇ بالا ۋاقتىدىلا بەزى غەلىتە ئويۇنلارنى ئويناتتى، كۆزى ئېتىق ھالەتتە نەرسىلەرنى قويۇلغان ئورنىنى دەل كۆرسىتىپ بېرەتتى. ئۇ يەنە «داۋالىغۇچى» يەنى (دىنىي ئۇسۇلدا كېسەل داۋالايدىغانلار) بولۇشنى ياخشى كۆرەتتى، ئۆسۈملۈك دورىلىرى بىلەن دوستلىرىنىڭ كېسەللىرىنى داۋالايتتى.
دىمىتروۋانىڭ كىچىك ۋاقتىدىلا ئانىسى تۈگەپ كەتكەن بولۇپ، ئۇ دادىسىنىڭ چارۋىچىلىق مەيدانىدا چوڭ بولغانىدى. ئۇ 12 ياشقا كىرگەن يىلى بىر قېتىم قاتتىق شىۋىرغاندا قالدى، قۇيۇن ئۇنى ئۇچۇرۇپ يىراق جايغا ئاپىرىپ تاشلىدى. كىشىلەر ئۇنى تاپقاندا ئۇ ئاللىقاچان ئەما بولۇپ قالغانىدى. شۇنىڭدىن ئېتىبارەن ئۇ ئالدىن كۆرەرلىك تىلەپ تەڭرىگە ئىلتىجا قىلىدىغان بولدى. 16 ياشقا كىرگەن يىلى ئۇنىڭدا ئالاھىدە ئىقتىدار ئىپادىلىنىشكە باشلىدى. ئۇ دادىسىنىڭ ئوغرىلانغان قويلىرىنى ئىزدىشىگە ياردەملەشتى ۋە ئوغرىلانغان قوي يوشۇرۇپ قويۇلغان ھويلىنى ئەينەن سۈرەتلەپ بەردى. دىمىتروۋا شۇنىڭدىن كېيىن بىر قىسىم قورقۇنچلۇق ئىشلارنى چۈشەيدىغان بولۇپ قالدى، يامان يېرى ئۇ كۆرگەن چۈشى كېيىن رېئاللىققا ئايلاندى.
2-دۇنيا ئۇرۇشى مەزگىلىدە دىمىتروۋاغا چوقۇنىدىغانلار بارغانسېرى كۆپەيدى. ئۇنى زىيارەت قىلىدىغانلارنىڭ كۆپىنچىسى ئۇرۇش سەۋەبىدىن ئايرىلىپ كەتكەن تۇغقانلىرىنىڭ خەۋىرىگە ئىنتىزار بولغانلار ئىدى. دىمىتروۋا كىشىلەرگە ئۇرۇش مەيدانىدا ئۆزىنى قانداق قوغداش، دورا ئۆسۈملۈك، سېغىز توپا، سېرىق مومدىن پايدىلىنىپ، يارىنى تېڭىش، يۈتكەن نەرسىسىنى ئىزدەش ئۇسۇللىرىنى ئۆگىتەتتى. ئۇرۇشتىن كېتىن دىمىتروۋا سىتالىننىڭ ۋاپاتىدىن بىشارەت بەرگەنلىكى ئۈچۈن قولغا ئېلىندى ۋە بىر يىلدىن كېيىن قويۇۋېتىلدى. چۈنكى سىتالىن راستىنلا ئۇ بېشارەت بەرگەن ۋاقىتتا ۋاپات بولغانىدى. شۇنىڭدىن كېيىن دىمىتروۋا كىشىلەردە قورقۇنچ پەيدا قىلىشتىن ئەنسىرەپ، رەھبەرلەر ۋە دۇنيا دۇچ كېلىدىغان ئاپەتتىن بىشارەت بەرمەيدىغان بولدى. دىمىتروۋا ئاكىسىنىڭ 23 ياشقا كىرگەندە ئېچىنىشلىق ئۆلتۈرۈلىدىغانلىقىنى چۈشىدە كۆرگەنىدى. شۇڭا ئاكىسىنىڭ پارتىزانلىق ئۇرۇشىغا قاتنىشىشىغا قارشى تۇردى. ئەمما ئاكىسى ئۇنىڭ گېپىگە قۇلاق سالمىدى، كېيىن ئۇنىڭ ئاكىسى ئەسىرگە چۈشۈپ قېلىپ، قاتتىق قىيىن قىستاققا ئېلىنغاندىن كېيىن ئېتىۋېتىلدى. دىمىتروۋا ئۆلۈمدىن قورقمايدۇ، ئۇ: مەن سىلەرگە ئېيتسام، ئادەم ئۆلگەندىن كېيىن تېنى چىرىپ كېتىدۇ، لېكىن تەننىڭ يەنە بىر قىسمى يەنى روھى پارچىلانمايدۇ، ئۇ تېخىمۇ يۈكسەك ھالەتتە داۋاملىق مەۋجۈت بولىدۇ دېگەن.
يوللىغان ۋاقتى 2011-10-11 16:03:45
دۇنيا مىھىر - مۇھاببەتكە مۇھتاج ، قىزلار خاتىرجەم ئىناق بەخىتكە مۇھتاج
