ئوتتۇز ياش ئايالنىڭ ئەڭ گۈزەل چېغى
قۇياش ئۇ ئۇپۇقنى سۆيمىگەن تېخى،
شۇ قەدەر لەززەتلىك، شەربەتلىك يېغى،
«مىڭ يەردىن تامىدۇ گۈزەللىك يېغى»،
يۈرەككە سانجىلار كىرپىكلىك تىغى،
ئوتتۇز ياش ئايالنىڭ ئەڭ نۆۋەر چېغى!!!
بۇلبۇلنى مەست قىلغان باغدا گۈل-لالە،
كۆڭۈلنى شاد قىلغان ئالتۇن پىيالە،
ھەتتاكى قۇياشمۇ بولۇپ مىڭ پارە،
گۈزەللىك ھۆسنىگە ياپالماس سايە،
ئوتتۇز ياش ئايالنىڭ زەر-گۆھەر چېغى.
ئوتتۇزغا بارغاندا ئايالنىڭ يېشى،
چۆرگىلەر بېشىدا تۈگمەننىڭ تېشى،
كۆزىدىن ئاقسىمۇ بۇلدۇقلاپ يېشى،
ۋە لېكىن ئۇزلۇقتا يوقتۇر تەڭدىشى،
ئوتتۇز ياش ئايالنىڭ ئەڭ گۈزەل چېغى.
ئائىلە، پەرزەنت، خىزمەت ئىشقىدا،
يۈرۈيدۇ پايپېتەك...جانلىرى پىدا،
ياسايدۇ بەختلىك، ئىللىق بىر ئۇۋا،
بىلەمسەن، پاك قەلبى نېمىگە شەيدا؟!
ئوتتۇز ياش ئايالنىڭ ئەڭ گۈزەل چېغى.
تاشلىدى يىراققا بەڭباش خىيالنى،
ئويلىماس بۇرۇنقى شېرىن ۋىسالنى،
جېنىدىن ئەزىزلەر ئۆيدىكى يارنى،
قەدىرلەر ئىناقلىق تولغان گۈلزارنى،
ئوتتۇز ياش ئايالنىڭ ئەڭ گۈزەل چېغى.
يېتىلگەن دىت، ئەقىل، ئىزگۈ پاراسەت،
خۇلقىدىن نامايەن ئوتلۇق نازاكەت.
تاشقىمۇ بېغىشلار ئىللىق ھارارەت،
ئالەمگە تارقىتار سۆيگۈ-ساداقەت،
ئوتتۇز ياش ئايالنىڭ ئەڭ گۈزەل چېغى.
تاڭ سەھەر قۇياشمۇ قىلغۇسى تازىم،
كېچىسى ئاي، يۇلتۇز بولۇر مۇلازىم،
يولۋاسمۇ ئالدىدا بولۇپ مۇلايىم،
باش ئېگىپ دەر تېخى «ھە نېمە لازىم؟»
ئوتتۇز ياش ئايالنىڭ ئەڭ گۈزەل چېغى.
سورىسا يېشىڭنى، «ئوتتۇزدا مەن» دە،
ئوتتۇز رەت سايرىسۇن، بۇلبۇل چىمەندە،
ھەر كۆڭۈل شادلىقتىن ئەيلىسۇن خەندە،
ئۆمۈرلۈك بەختكە بولغاچ پەيۋەندە،
ئوتتۇز ياش ئايالنىڭ ئەڭ گۈزەل چېغى.
كەپ تۇرسا ئۈزۈلمەي بايرام قاتمۇقات،
بوپ تۇرسا ھەر كۈنى «8-مارت»،
قىزلارنىڭ دۇنياسى بوپ تۇرسا ئاۋات،
نۇر بىلەن بېزەلسە بىزنىڭ بۇ ھايات،
ئوتتۇز ياش ئايالنىڭ ئەڭ گۈزەل چېغى.
يوللىغان ۋاقتى 2011-10-8 01:28:36
يوللىغان ۋاقتى 2011-10-8 15:07:32
يوللىغان ۋاقتى 2011-10-8 22:20:41
