ئۆگىنىشتە نىشان بولۇش كېرەك

Tursunniyaz · ۋاقتى: 2011-9-3 15:26:04

ئۆگىنىشتە نىشان بولۇش كېرەك
　ب د ت مائارىپ، پەن، مەدەنىيەت تەشكىلاتى نەشر قىلغان «ياشاشنى ئۆگىنىۋېلىش» دېگەن كىتابتا: «كەلگۈسىدىكى ساۋاتسىزلار خەت تونۇمايدىغان كىشىلەرنى ئەمەس، بەلكى ئۆگىنىشتە نىشانى بولمىغان كىشىلەرنى كۆرسىتىدۇ» دەيدىغان بىر جۈملە سۆز بار. بۇ سۆز بىزگە ئۆگىنىشكە ئەھمىيەت بېرىپلا قالماي، توغرا ئۆگىنىش ئۇسۇلى يەنى «قانداق ئۆگىنىش»نى ئىگىلەشكە ئەھمىيەت بېرىش كېرەكلىكىدىنمۇ بېشارەت بېرىدۇ. كىشىلەر دائىم ئۆگىنىدۇ، بەزىلەر توغرا ئۆگىنىش ئۇسۇلىنى بىلمەسلىكى مۇمكىن. مەسىلەن: بەزىلەر ئىجتىھات بىلەن ئۆگىنىدۇ، ۋاقتى چىقسىلا كىتاب ئوقۇيدۇ، لېكىن كىتاب ئوقۇغاندا يۆنىلىشنى پەرق ئېتەلمەيدۇ، مۇھىم نۇقتىلارغا ئەھمىيەت بېرەلمەيدۇ؛ بەزىلەر دەرسنى كۆڭۈل قويۇپ ئاڭلايدۇ، ئەستايىدىل خاتىرە قالدۇرىدۇ، لېكىن پىكىر يۈرگۈزمەيدۇ؛ يەنە بەزىلەر يۇقىرى دەرىجىلىك ئورۇنلار بېكىتىپ بەرگەن ئۆگىنىش مۇندەرىجىسى ۋە مەزمۇنىنى ئەستايىدىل ئۆگىنىدۇ، كۆڭۈل قويۇپ خاتىرە قالدۇرىدۇ، لېكىن ئەمەلىيەتتە ئىشلىتىشنى بىلمەيدۇ. بۇنىڭدىن كۆرۈۋېلىشقا بولىدۇكى، ئۆگىنىشتە قىزغىنلىقنىڭ بولۇشى، جاپاغا چىداشنى بىلىشلا كۇپايە قىلمايدۇ، يەنە ئۆگىنىشكە ماھىر بولۇش كېرەك.

　　ئۆگىنىشتە ئاۋۋال نىشان بولۇشى كېرەك. ئەگەر نىشان بولمىسا، ئۆگىنىش ئۈنۈمى ياخشى بولمايدۇ. يولداش چېن يى: «ئەڭ ياخشى ئۇسۇل شۇكى، بىر خىل ئارتۇقچىلىققا ئىگە بولغاندىن كېيىن، ئادەتتىكى ساۋاتلارنى توپلاشقا ئەھمىيەت بېرىش كېرەك» دېگەن. ھەرقانداق كىشىنىڭ ھەممىنى بىلىپ كېتىشى مۇمكىن ئەمەس. ھازىرقى دەۋر زور تەرەققىي قىلىۋاتقان، زور ئىسلاھات ئېلىپ بېرىلىۋاتقان، ئەتراپلىق تەڭشىلىۋاتقان، يېڭى شەيئى، يېڭى ئەھۋال، يېڭى ئىجادىيەت، يېڭى كەشپىياتلار بارلىققا كېلىۋاتقان، بىلىم ۋە ئۇچۇر مىقدارى ھەسسىلەپ ئېشىۋاتقان دەۋر. بۇنداق يېڭى ۋەزىيەتتە، بىز ئۆگىنىشنى چىڭ تۇتۇپ، داۋاملىق ئۆگىنىش بىلەن بىللە، ئۆزىمىزنىڭ نېمىنى ئۆگىنىشىمىز كېرەكلىكىنى، قانداق نەرسىنى ئۆگىنىشنىڭ پايدىلىق ئىكەنلىكىنى بىلىشىمىز كېرەك. پارتىيەلىك كادىرلار، بولۇپمۇ ھەردەرىجىلىك رەھبىرىي كادىرلار ماركسىزم نەزەرىيەسى، تۈرلۈك ئىلغار بىلىملەرنى ئۆگىنىشى، ئىستراتېگىيەلىك تەپەككۇر، يېڭىلىق يارىتىش تەپەككۇرى، دېيالىكتىك تەپەككۇر، سىستېمىلىق تەپەككۇر ئىقتىدارىنى چۆرىدىگەن ھالدا ئۆزىگە كېرەكلىك بىلىملەرنى نۇقتىلىق ئۆگىنىشى كېرەك. خىزمەت ئېھتىياجى ۋە بىلىم قۇرۇلمىسى جەھەتتىكى ئەمەلىي ئەھۋالىغا ئاساسەن، خىزمىتىگە مۇناسىۋەتلىك بىلىملەرنى قاراتمىلىق ۋە نىشانلىق ئۆگىنىشى كېرەك.ئۆگىنىش ئۇسۇلى ئۆگىنىش ئىقتىدارى بىلەن مۇناسىۋەتلىك بولۇپ، ئۆگىنىش ئۈنۈمىگە تەسىر كۆرسىتىدۇ. ئۆگىنىش ئۇسۇلى توغرا بولسا، كۆزلىگەن نىشانغا يېتەلەيدۇ. ئۆگىنىش ئۇسۇلى خاتا بولسا، كۆزلىگەن نىشانغا يېتەلمەيدۇ. 1948-يىلى يولداش ليۇ شاۋچى ماركسىزم-لېنىنىزم ئىنستىتۇتىدىكى كۇرسانتلارغا: «بىلىم ئالىمەن دەيدىكەنمىز، تىرىشچانلىقىمىزغا تايىنىشىمىز، ئۆگىنىش ئۇسۇلىنى توغرا تاللىشىمىز كېرەك»، «ھەرقانچە تىرىشقان بىلەن ئۆگىنىش ئۇسۇلىمىز توغرا بولمىسا، ئۆگەنگەن نەرسىمىزنىمۇ ئىشلىتەلمەيمىز» دېگەن. ئىقتىسادىي ۋە ئىجتىمائىي تەرەققىيات ھەم پەن-تېخنىكىنىڭ ئۇچقانداق تەرەققىي قىلىشىغا ئەگىشىپ، كىشىلەر ئۆگىنىدىغان مەزمۇنلار مۇرەككەپلىشىپ، بىزدىن ئۆگىنىش ئۇسۇلىنى داۋاملىق ئۆزگەرتىپ، ئۆگىنىش ئۇسۇلىنى يېڭىلاشنى تەلەپ قىلماقتا. ئىسلاھات ۋە تەرەققىيات داۋامىدىكى يېڭى ئىدىيە، يېڭى بىلىملەر ۋە يېڭى تەجرىبىلەرنى ئۆگىنىش ۋە ئىگىلەش ئۈچۈن، ئىلگىرى شەكىللەنگەن ئۈنۈملۈك ئۇسۇللارغا داۋاملىق ۋارىسلىق قىلىش ۋە ئۇنىڭدا چىڭ تۇرۇش، دەۋر ئالاھىدىلىكىنى گەۋدىلەندۈرىدىغان، دەۋر ئېقىمىغا ئۇيغۇن كېلىدىغان يېڭى ئۇسۇللار توغرىسىدا ئىزدىنىش، ئۆزئارا ئۆگىنىش، ئۆگەنگەن بىلىملەردىن ئورتاق بەھرىمەن بولۇش، ئېچىۋېتىلگەن شەكىلدىكى ئۆگىنىش قاتارلىق شەكىللەرنى قوللىنىپ، ئۇچۇر تور تېخنىكىسى ۋە زامانىۋى ئۆگىنىش ئۇسۇللىرىدىن كەڭ پايدىلانغاندىلا، ئۆگىنىش ئۈنۈمىنى ئۆستۈرگىلى بولىدۇ.

　　ئۆگەنگەن بىلىملەردىن قانداق پايدىلىنىشنى بىلىش كېرەك. ئۆگىنىشتىكى مەقسەت − ئۆگەنگەن نەرسىنى ئىشلىتىشنى بىلىش. بۇ، پارتىيەمىز ئۆگىنىش مەسىلىسىدە ئىزچىل تەكىتلەۋاتقان تۈپ پىرىنسىپ. يولداش ماۋ زېدۇڭ: «كىتاب ئوقۇشمۇ ئۆگىنىش، ئىشلىتىشمۇ ئۆگىنىش بولۇپلا قالماستىن، بەلكى ئۇ تېخىمۇ مۇھىم ئۆگىنىش» دېگەن. ئەگەر ئۆگەنگەن بىلىملەرنى ئىشلىتىشنى بىلمىسە، كىتابنى ھەر قانچە كۆپ ئوقۇغان، ھەر قانچە قېتىرقىنىپ ئۆگەنگەن بىلەنمۇ، ئەمەلىي مەسىلىلەرنى ھەل قىلىش ئىقتىدارىمىز بولمىسا، ئەمەلىي نەپكە ئېرىشەلمەيمىز. ھازىر دۆلىتىمىز زىددىيەتلەر گەۋدىلىك، مۇرەككەپ بولۇۋاتقان مۇھىم ئىستراتېگىيەلىك تەرەققىيات باسقۇچىدا تۇرۇۋاتىدۇ. خىزمەتلەرنى ياخشى ئىشلەش ۋە تەرەققىياتنى ئىلگىرى سۈرۈش جەھەتتە قىيىن مەسىلىلەر كۆپىيىۋاتىدۇ. بۇ بىزدىن ئۆگىنىش داۋامىدا ئۆگەنگەن بىلىملەرنى ئىقتىدارغا ئايلاندۇرۇپ، ئۆگىنىش بىلەن ئەمەلىيەتنى ئورگانىك بىرلەشتۈرۈپ، ئىقتىسادىي قۇرۇلۇش ۋە ئىجتىمائىي تەرەققىياتتىكى تۈرلۈك قىيىن مەسىلىلەرنى داۋاملىق تەتقىق قىلىپ، ئۆگىنىش نەتىجىمىزنى ئىلمىي تەرەققىياتقا رەھبەرلىك قىلىدىغان ئەمەلىي ماھارەتكە ئايلاندۇرۇپ، ئىلمىي تەرەققىيات جەھەتتىكى خىزمەت تەپەككۇرىنى يېتىلدۈرۈپ، ئىلمىي تەرەققىياتقا ئائىت سىياسىي تەدبىرلەرنى تۈزۈش ھەم ئىلمىي تەرەققىياتتا ياخشى ئىستىل يېتىلدۈرۈش ھەم ئىقتىسادىي ۋە ئىجتىمائىي تەرەققىياتنى تېخىمۇ ياخشى ئىلگىرى سۈرۈشنى جىددىي تەلەپ قىلىۋاتىدۇ.

　　مەنبە: جۇڭگو ئۇيغۇرچە رادىئو تورى

ماس قەدەمدە ئەۋەتىلدى Tursun007نىڭ مىكرو بلوگى