بالىلىرىمىز تەييارغا ھەييار بولۇپ قالمىسۇن!

Tursunniyaz · ۋاقتى: 2012-6-24 22:09:54

شىنجاڭ خەلق رادىيو ئىستانسىسى خەۋەرلەر تورى:
ئاغىنىمىزنىڭ 12 ياشلار ئەتراپىدىكى ئوغۇل نەۋرىسى، تۆت، بەش كىلوگرام ئېغىرلىقتىكى كۆكتات قاتارلىق نەرسىلەرنى كۆتۈرۈپ كىرىپ، ئىشىك تۈۋىگىلا تاشلاپ : بۇ نەرسىلەرنى كۆتۈرەلمەي سوغۇقتا توڭلاپ ، ھېرىپ ئۆلەي دەپ قالدىم، سىلەر ئۆزۈڭلار كۆتۈرمەي ، ئۆز ئىشىڭلار بىلەن ئولتۇرسىلەر ... دەپ كايىپ كەتتى. بۇنى كۆرۈپ ھەيران قالدىم . ئەسلىي بۇ كۆكتاتلارنى ئۇ 1- قەۋەتتىن 3- قەۋەتكىچىلا ئەپچىققان ئىكەن . باشلانغۇچ مەكتەپنى پۈتتۈرەي دەپ قالغان 12 ياشلاردىكى بالىلارنىڭ تۆت ،بەش كىلوگرام كېلىدىغان نەرسىنى 10 ~ 20 مېتىر، ھەتتا 200 ~ 300 مېتىر يەرگە كۆتۈرۈپ بېرىشى نورمال ئىش . ئالايلۇق ھازىر باشلانغۇچ مەكتەپتىكى ئوقۇغۇچىلارنىڭ سومكىسى ئۈچ كىلوگرامدىن كەم ئەمەس، ھەتتا بەزىلەرنىڭ تۆت ، بەش كىلوگىرام چىقىشى تۇرغانلا گەپ. ئۇلار شۇ سومكىلرىنى ئۆزلىرى كۆتۈرۈپ ھەر كۈنى مەكتەپكە بارىدىغۇ. مەن ھېلىقى ئاغىنىمىزنىڭ نەۋرىسىنىڭ سۆز - ھەرىكىتىنى كۆرۈپ، ئويلىنىپ قالدىم. بالىلىلىرىمىز مۇشۇنچىلىك كىچىك ئىشلارغىمۇ بەرداشلىق بېرەلمىسە، ئۇلارنىڭ چوڭ بولغاندىكى تەن ساپاسى قانداق بولار ؟
نۆۋەتتە، جەمئىيىتىمىزنىڭ شەھەرلىشىش قەدىمىنىڭ تېزلىشىشىگە ئەگىشىپ، نۇرغۇن بالىلار شەھەرلەردىكى جاپاسىز ، راھەت تۇرمۇشقا كۆنۈپ قېلىۋاتىدۇ. ئۆيدىكى ئاز - تولا ئائىلە ئىشلىرىنى قىلسىمۇ ياكى مەكتەپلەردىكى تازىلىق ۋە ئاز - تولا ئەمگەك پائالىيەتلىرىگە قاتناشسىمۇ ، بۇ خىل ئەمگەكلەرنىڭ سالمىقى چوڭ ئەمەس. شۇڭا ئاتا - ئانىلار بۇ جەھەتتىكى تەربىيەنى مەكتەپكە، جەمئىيەتكە ئىتتىرىپ قويماستىن، پەرزەنتلىرىمىزنىڭ تۇنجى ئۇستازى بولۇشتەك بۇرچىمىزنى تولۇق ئادا قىلىپ، كىچىكىدىن تارتىپ جاپاغا چىداپ ، ئۆز كۈچىگە تايىنىپ ياشاش ئىقتىدارىنى يېتىلدۈرۈشكە ئەھمىيەت بېرىشىمىز ، بالىلىرىمىزنى ھەرگىزمۇ » تەييارغا ھەييار « قىلىپ قويماسلىقىمىز ، ئۇلارنى جاپا - مۇشەققەتلىك تۇرمۇشقىمۇ كۆنەلەيدىغان ، ھازىرقى ئەۋزەل شارائىتنى قەدىرلەيدىغان، كەلگۈسىدە بىرەر ئىشنى ئۆز ئالدىغا قىلالايدىغان ، مۇستەقىل ئىگىلىك تىكلەش روھىغا ئىگە، ياراملىق ئىز باسارلاردىن قېلىپ يېتىشتۈرۈپ چىقىشىمىز لازىم .

arkinjuma · ۋاقتى: 2012-6-24 22:58:42

ھازىرىقى بالىلار بارغانچە ھورۇن چوڭ بولىۋاتقاندەكلا بىلىنىدۇ ماڭا.