ئاياللار ! بىز ئەرلەر سىلەرنى ياخشى كۆرىمىز !
راستىنى ئېيتقاندا ، سىلەر بىز ئۈچۈن ناھايتى مۇھىم . شۇڭا بىز ئەڭ باشتىلا سىلەرنى ئۇلۇغلاپ ئانىلىق ئۇرۇقداشلىق جەمئىيتى قۇردۇق. سىلەرنى ئۇلۇغلاپ ، ئۇماي رىۋايىتىنى ياراتتۇق ؛سىلەر ئۈچۈن ، داستان ،نەزمىلەرنى يازمىغان بىرمۇ يازغۇچى ، شائىرنى، سىلەر ئۈچۈن شىرىن خيال قىلمىغان بىرمۇ ئەر زاتىنى تاپقىلى بۇلمايدۇ!!!
سىلەر قەلبىمىزدە ئەنە ئاشۇنداق ئۇلۇغ ، گەرچە مۇھەممەد ئەلەيھىسسالام :« ئادەمنى ئادەمگە سەجدە قىلىشقا بۇيرۇشقا توغرا كەلسە ، ئاياللارنى ئەرلىرىگە سەجدە قىلىشقا بۇيرۇيتتىم» دېگەن بۇلسىمۇ ، بىز سىلەرنى سەجدە قىلدۇرماي ، ئەكسىچە سىلەرنىڭ ئىتىكىڭلارغا باش قويۇش ئۈچۈن يۈرەكلىرىمىزنى سەكپارە قىلىپ ، مەيدىمىزنى مۇزدەك يەرگە يېقىپ ياتقان كۈن ۋە تۈنلىرىمىز ئاز ئەمەس .
ياشلىقنىڭ گۈزەل چاغلىرىدا ، بىز سىلەرنى مەھبۇبىمىز ئورنىدا كۆرىمىز ؛ ھايات چەرغى ئانىللىرىمىز ئامانىتىنى ئەرشكە كۆتۈرگەندە بىز سىلەردىن ئانا مىھرىنى تەمە قىلىمىز ؛ بىشىمىزغا كۈن چۈشكەندە سىلەرنى دوستىمىز قاتارىدا كۆرۈپ دەرت – ئەلەملىرىمىزنى ئورتاقلىشىمىز؛ بىشىمىزغا غەم چۈشكەندە سىلەرنىڭ مىھرىبان قوللىرىڭلار بىلەن بېشىمىزنى سىلاپ قويۇشۇڭلارغا تەشنا بۇلىمىز ! سىلەر بىلمەيسىلەر ، راستىنى ئېيتقاندا ، سىلەر بىزنىڭ ھەممە نىمىمىز !
ئەمما ئاياللار ، سىلەر مۇھەببەت ھۇجرىسىدىن ، تۇرمۇش قايناملىرىغا چۈككەندە ، ئازراق ئۆزگۈرۈپ كىتىسىلەر ! يېڭى توي قىلغان چاغلاردا ئىشقا ماڭساق ، كىيىملىرىمىزنى چىرايلىق قىلىپ ، ئۆز قولۇڭلار بىلەن كەيدۇرۇپ ، بىزنىڭ خۇشاللىقىمىزدىن ئۆزۈڭلار خۇشال بۇلۇپ ، ھۇزۇر قىلىسىلەر ! ئاخشىمى تاماقنى ئېتىپ ساقلاپ ئولتۇرۇشمۇ سىلەرگە بىرخىل راھەت، چۈنكى بىزنىڭ راھەت تاماقلىنىشىمىز سىلەرنى سۈيۈندۈرىدۈ! مۇھەببەت پاراڭلىرىڭلارنىڭ ، يۈرەكنى جۇغۇلدىتىدىغان ، شىرىن ھېسلارغا چۈمدۇرۇدىغان قىلىقلىرىڭلارنىڭ راھىتىنى بىزگە قانغۇچە بىرىسىلەر !
ئەمما ئاياللار ....
ۋاقىت ئۆتكەنسىرى ، بىز ئاستا-ئاستا دىققەت نەزىرىڭلاردىن چۈشۈپ قالىمىز. سىلەر ھۇزۇرنى بىزدىن ئەمەس ، ئۆي بىزەشتىن ، ياخشى كىيىنىشىتىن ، گىرىم قىلىپ ئۆزۈڭلارنى تۈزەشتىن ، بالىلارنى چىرايلىق ياساپ تاراشتىن ، ئۇلارنى ياراملىق قىلىپ تەربىيلەشكە كۈچ چىقىرىشتىن تاپىسىلەر ! بىز ، ئەزەلدىنلا نەزىرىڭلارنىڭ مەركىزىدە تۇرغان بىز ئاستا – ئاستا چەمبەر مەركىزىدىن يىراقلىشىمز، سىلەر يۇقۇرقى ئىشلاردىن ئېشىنغاندىن كىيىن ، ئاندىن بىزنى ئەسكە ئالىسىلەر !
بۇمۇ مەيلى دەيمىز ، چۈنكى بۇلارنىڭ ھەممىسى ئائىلە ، بالىلار ۋە جەمىيەتتىكى ئىناۋەت ئۈچۈن؛ ھەتتا بىزنىڭ بەزىدە سىلەرنىڭ يۈكۈڭلارنىڭ ئېغىر بۇلۇپ كىتىۋاتقانلىقىدىن يۈرىكىمىز پۇچۇلىنىدۇ. سىلەرمۇ بىزگە ئوخشاش خىزمەت قىلىسىلەر ، ئائىلىگە كىلىپ تاماق ئىتىش ، بالا بېقىش ، ئائىلە ئىشلىرى ، يەنە تېخى ئايىقى ئۈزۈلمەس ئادەمگەرچىلىكلەر سىلەرنى كۈتۈپ تۇرىدۇ.
ئەمما ئاياللار ...
سىلەر ئاستا –ئاستا ئەرلەرنى ئەيىپلەشنى ، ئۇلاردىن قۇسۇر تېپىشنى ئۆگىنىۋالىسىلەر . ئۇلارغا بوتنايسىلەر ،« ئۇ ئشنى قىلىش كېرەك ئىدى، بۇ ئىشنى قىلىش كېرەك ئىدى» دەپ خىزمەتتىن ، ئېتىزلىقتىن ھېرىپ كىرگەندە ئۇلارنىڭ كاللىسىدىكى ھارغىنلىقنى تېخىمۇ ئېغىرلاشتۇرىۋىتىسىلەر ، سىلەر بەلكىم بىلمەيسىلەر ، سىىلەرنىڭ ھەر بىر قىلغان گىپىڭلار بىز ئەرلەر ئۈچۈن قۇمانداننىڭ بۇيرۇقى! بىز قىلىمىز ، ئەمما سىلەرنىڭ مۇنداق تەلىپىڭلارنىڭ ئايىقى ئۈزۈلمەيدۇ :« كىرئالغۇنى پۈتۈن ئاپتۇماتىك كىرئالغۇغا ئالماشتۇرساق بۇلارمۇ ؟»«يېڭى ئۆيگە كونا گاز ئوچاق ماس كەلمەيدىكەن ، يېڭىسىنى ئالايلى ».... بارغانسرى زىرىكىش ھېس قىلىمىز .
بۇلا ئەمەس ، ئەرلەر بەزىدە بىر قىسىم ئىشلارنى خاتا قىلپ قالغاندا ، ئۇلارنى خۇددى كىچىك بالىلارنى ئەيىپلىگەندەك ، ئوقۇتقۇچى ئوقۇغۇچىنى تەنقىدلىگەندەك ئەيىپلەيسىلەر ، تەنقىدلەيسىلەر!خۇددى ئەرلەر ھەممە ئىشنى مۇكەممەل قىلىشى لازىمدەك ، خۇددى ئەرلەر ھەممە ئىشنى كەم-كۈتىسىز قىلىشى لازىمدەك ! ھەتتا ئازراق ئىشلار ئۈچۈن ئائىلىدە جىدەل قوزغايسىلەر ! مۇنداق تەنقىدلەرنىڭ ، ئەيىپلەشلەرنىڭ ئايىقى ئۈزۈلمىگەنسىرى بىز ئەرلەر ئائىلە كۆزۈمىزگە جەننەتتەك كۆرىنىدىغان تۇيغۇلارنىڭ ئاستا –ئاستا ئۆزىمىزدىن يىراقلىشىۋاتقانلىقىنى بايقايمىز ! ئىشتىن چۈشۈپ ئائىلىگە قايتىشقا ئالدىرىماي ئىشداشلار بىلەن قۇرۇق پاراڭ قىلىدىغان ، ياكى يۇقىلاڭ باھانە –سەۋەپ بىلەن ئائىلىگە قايتمايدىغان يامان ئادەتنى يىتىلدۇرىۋالىمىز.
سىلەرنىڭ يەنە ئەيىپلەيسىلەر ، ئاچچىقلايسىلەر ، سىلەرنىڭ ئەيىپلىشىڭلار ، ئاچچىقلىشىڭلار بىزنى مەركەزدىن يەنە يىراقلاشتۇرىۋىتىدۇ.مۇشۇنداق بۇلىدۇ ،ئاياللار !
ئاقىۋەتچۇ ؟ بەزى ئەرلەر ئائىلىدە ھەممىگە بىپەرۋا قارايدىغان بۇلىۋالىدۇ؛ بەزى ئەرلەر تالادىن مىھر – مۇھەببەت ئىزدەيدىغان بۇلىۋالىدۇ؛ بەزىلەر ھەتتا سىلەردىن كەچمەكچىمۇ بۇلىدۇ.مۇشۇنداق بۇلىدۇ ، ئاياللار !
سىلەر قان يىغلايسىلەر ، نېمە ئۈچۈنلىكىنى بىلەلمەي ، نىمىنى خاتا قىلغانلىقىڭلارنى چۈشەنمەي ئۇلارنى بىۋاپاغا ، قارايۇزگە چىقرىۋىتىسىلەر .ئازاپ ئىلكىدە پۇچۇلىنىسىلەر .
ئاياللار ، بىز ئەرلەر ئەيىپلەشكە ئەمەس، خۇددى كىچىك بالىلاردەك ئىلھاملاندۇرۇشقا مۇھتاج؛ بىز ئەرلەر نەزەردىن ساقىت بۇلۇشقا ، بىزگە بىپەرۋا مۇئامىلە قىلىشىڭلارغا ئەمەس، دىققەت نەزىرىڭلارغا بۇلۇشقا ، تالاي ئىشلار ئارىسدا بىزنىمۇ ئويلىشىڭلارغا ئىھتىياجلىق؛ نارازىلىقلارغا، كوتۇلداشلارغا ئەمەس، شىرىن سۆزلەرگە ، لىرىك تۇيغۇلارغا، ماختىشىڭلارغا ئىھتىياجلىق . سىلەر بىزنى ماختاپ قويساڭلار ، خۇددى دەستە ناچارراق ئۇقۇغۇچى ئوقۇتقۇچىسىنىڭ ماختىشىغا ئىرىشكەندەك خۇشال بۇلۇپ كىتىمىز ، ئۆزۈمىزگە بولغان ئىشەنچىمىز ئاشىدۇ. ئاشۇنداق بۇلىدۇ ،ئاياللار !
سىلەر ئائىلدە ئىچىدىن ئۆزۈڭلارغا قانائەت تاپىسىلەر ، ئۆي چىرايلىق بىزەلسە، بالىلار ساغلام ، ئەقىللىق چوڭ بولسا، تاماقنى ئوخشىتىپ ئەتسەڭلەر ، ھەممە تەل بولسا . ئەمما بىز ئەرلەرنىڭ يۇقۇرقىلاردىن قانائەت تاپقاندىن باشقا يەنە بىر قىسىم قانائىتىمىز سىرىتتىن كىلىدۇ، خىزمەتتە ئۇتۇق قازانساق، ئۆزىمىزنىڭ ئۇلۇغۋار غايىللىرىغا بىر قەدەم يېقىنلىشالىساق ، دوست – بۇرادەرلىرىمىز ئالدىدا ئىناۋىتىمىز بولسا . شۇڭا بەزىدە سىلەرنىڭ ئائىلىدىكى ئۇششاق ئىشلار بىلەن مەشخۇل بۇلۇشقا ئۇندىشىڭلار ۋە بۇ ھەقتە بىزنى ئەيىپلىشىڭلار بىز ئۈچۈن قىلىنغان ئادالەتسىزلىك ! ئوزۇڭلارنىڭ تۇرمۇش قارىشى ۋە قانائىتى ئۈچۈن بىزنى قۇربان قىلماڭلار ۋە بىزنى ئىش-ھەرىكىتىمىزنى ئۆزۈڭلارنىڭ قارىشىنى ئۆلچەم قىلىپ باھالىماڭلار !
ئاياللار ، سىلەر بىز ئەرلەر ئۈچۈن تاڭغا نۇرىغا باشلايدىغان پەرىشتە ياكى زۇلمەتكە باشلايدىغان ئالۋاستى. بىز سىلەرنىڭ ئۇماق شىۋىرلىشىڭلار ئارقىلىق ، ئۆز تالانتىمزنى تۇلۇق جارى قىلدۇرۇپ ، مۆجىزە يارىتالىشىمىز مۇمكىن ؛ بىز سىلەرنىڭ ئەيىپلەشلىرىڭلار ئارقىلىق ، قۇرۇتتىنمۇ بەتەر ھالەتكە چۈشۈپ قېلىشىمىزمۇ ھەم مۇمكىن .
ئاياللار ، پەرھاد سىلەر ئۈچۈن تاغ تىشىپ سۇ ئېلىپ كەلدى؛ پوشكىن سىلەر ئۈچۈن دوئىلغا چۈشۈپ ياش ھاياتىنى ئاخىرلاشتۇردى. مانا مۇشۇنداق ، بىز ئەرلەر سىلەر ئۈچۈن ھەممىنى قىلىمىز ،
ئەمدىكى گەپ ، راستىنى ئېيتقاندا ، بىز سىلەرنىڭ ماختىشىڭلارغا، ئىلھاملاندۇرىشىڭلارغا مۇھتاج. مۇشۇ ھاجىتىمىزنى ھاياتىڭلارنىڭ ئاخىرغىچە راۋا قىلساڭلار ، بىز بەلكىم بۇ قىسقا ھاياتىمىزدا ئالەمشۇمۇل نەتىجىلەرنى يارىتىشىمىز مۇمكىن . شۇڭا ئەقىللىق ئەجدادلىرىمىز « ئەرنى ئەر قىلغانمۇ خۇتۇن ، ئەرنى يەر قىلغانمۇ خوتۇن»دېگەن بولسا ، مۇۋاپپەقىيەتشۇناسلار :« ھەر بىر مۇۋاپپەقىيەت قازانغان ئەرنىڭ ئارقىسدا ،ئۈنسىز ئەجىر قىلىۋاتقان بىر ئايال بۇلىدۇ » دېيشىدۇ. راستىنلا شۇنداق، ئاياللار !
ئاياللار ، بىز سىلەرنى ياخشى كۆرىمىز ، شۇنداقلا سىلەرگە مۇھتاجمىز !
2011-يىلى 4-ئاينىڭ 23-كۈنى كەچ
ئەسكەرتىش : بۇ ئەسەرنىڭ ئىلان قىلىنىشى ئۆردەك بىلوگى
ئۆردەك بىلوگى ۋە ئەلكۇيى مۇنبىرىدە بۇلىدۇ . باشقا ئورۇنغا كۆچۈرۈپ ئىشلىتىشكە بولمايدۇ.
يوللىغان ۋاقتى 2011-4-24 00:39:10
