بىز قىلىشىدىغان پاراڭلار

abaytarim

	بىزدە دەسمىسىز پاراڭلار بەك كۆپ ئىدى.    تالاي ئۆگىنىش، كورسلارغا باراتتۇق، ئەمما قايتىپ كېلىپ ئۆگەنگەنلىرىمىز ھەققىدە پاراڭلىشىپ باقمايتتۇق . تەجربە ئالماشتۇرۇش ئاساسەن يوق ئىدى . تالاي ئاپتورلار ھەققىدە دەرس ئۆتەتتۇق، ئەمما ئۇلار ھەققىدە ، ئۇلارنىڭ ئەڭ يېڭى يازمىلىرى ھەققىدە سۆزلىشىپمۇ قويماتتۇق . بىز بالىلارغا بىلدۈرۋاتقان ئاپتورلىرىمىز تىلىمىزغا چىقىپ باقماي تۇرۇپلا ئۇ دۇنياغا ئۈن-تۈنسىز كېتىپ قالاتتى. يوقىرىدىن دەرس ئىسلاھاتى ھەققىدە لېكسىيە سۆزلەش ھەققىدىكى چاقىرىق، يېڭى تېجارەت باشلىغان لەڭپۇڭخانىنىڭ ئىككى كۈن ئېتىبار باھادا لەڭپۇڭ سېتىش ھەققىدىكى ئۇچۇرىدەك جەلپ قىلالمايتتى . ئەڭ ئېسىل دۇردانە پاراڭلارنى ئالدىمىزغا كېلىپ ھەقسىز بەرسىمۇ تىڭشاشقا خوشياقمايتتى . ئېسىل، مەزمۇنلۇق پاراڭلارنى ئۆزىمىز قىلىشىپ باقماسلىق، باشقىلار قىلىپ بەرسە ئاڭلىماسلىق....           بىر يىل ئوقۇتقۇچىلىق قىلىپ ئوتتۇز يىل تەكرارلاش، ئوتتۇز يىل بىر خىل پاراڭ قىلىش، ئوخشىمىغان پاراڭلارنى يەكلەش، خىزمىتىنى تۆھپىسى ،ئەجرى، ئوقۇغۇچىلار قەلبىدىكى ئۆچمەس ئوبرازى بىلەن ئۆلچىمەي نوقۇل خىزمەت تارىخى بىلەن ئۆلچەش... خىزمەت خۇلاسىسى يېزىشقا مەجبۇرلانمىسا ، ئۆزى خىزمەت ھاياتىدىن خۇلاسە چىقىرىپ باقماسلىق...  بىزنى تېخىمۇ كۆپ پاراڭلار ساقلاۋاتاتتى... مەڭگۈ تاشلار، قۇتادغۇبىلىك، تارىخي ھەمىدىي، تارىخىي رەشىدىي، ئانا يۇرت، باياۋاندىكى گۈلخان، قۇم باسقان شەھەر، چېقىلىۋاتقان مەھەللە، ئۇلۇغبەگ خەزىنىسى،  باش زىندانلىرىغا ھۇجۇم، ئىز ، زوردۇن سابىر، باھادىرنامە، غۇرۇرنامە، قەدىمكى مەركىزىي ئاسىيا، غەربىي يۇرت تاشكېمىر سەنئىتى، سادىر پەلۋان ،نۇزۇگۇم، ساپا مائارىپىمۇ، خاتا مائارىپىمۇ؟، مىڭئۆيلەر سىلەرگە يۈز كېلەلمەيمىز! قاتارلىق كىتاب، ئاپتورلار ھەققىدە، ئاتا-ئانىلىرىدىن، ئوقۇتقۇچىلاردىن مېھىر-مۇھەببەت، روھى ئوزۇق ئالالمايۋاتقان ئوقۇغۇچىلار ھەققىدە، بىخەتەر، تىنچ مۇھىتتىكى يېگىلەۋاتقان ،ئانىمىز، ئەجدادىمىز مەڭگۈ يوقاتماسلىققا ، راۋاجلاندۇرۇشقا تاپشۇرغان تىلىمىز، دىلىمىز، دىنىمىز ھەققىدە يىغىلىشلىرىمىزدا، ئايرىم  ئولتۇرۇشلىرىمىزدا مۇھەببەتلىك پاراڭلارنى قىلىشساق ھەقىقى ئوقۇتقۇچىلار ئولتۇرغان سورۇن بولاتتى ...   مەن ئۆزۈمنىڭ ئوقۇتقۇچى بولۇپ قالغانلىقىمدىن پەخىرلىنىمەن. ئەمما مۇشۇنداق پاراڭ سۆھبەتلەرنى قىلىشىپ باقماي ئۆتۈپ كەتكەن ئۆمرۈمنى ئويلىسام ۋىجدانىم ئالدىدا، مەمتىلى ئەپەندى، مۇسابايىفلار، مەڭگۈ تاشلار ئالدىدا، قايتىلانماس ئۆتۈپ كەتكەن ئۆمرۈم ئالدىدا ، دەرستىن سىرت ھېچنىمە دەپ بېرەلمىگەن ئوقۇغۇچىلىرىم ئالدىدا ئۆزۈمنى گۇناھكار ھېسابلايمەن. ئۇلۇغ ياغۇچىمىز زوردۇن سابىرنىڭ ‹ مۇئەللىم ئوقۇغۇچىلىرىغا نېمىلەرنى دېمەيدۇ؟ ئۆزىنىڭ ئىنسان ، تۇرمۇش ۋە ئىستىقبال توغرىسىدىكى يېڭىلىقلىرىنى ئوقۇغۇچىلىرىغا دېمەي كىمگە دەيدۇ. ھەقىقەت ۋە گۈزەل ھاياتقا ئۆز خەلقىنى ئۈندەش ۋە شۇلار ئۈچۈن كۈرەش قىلىشقا ئىلھاملاندۇرۇش، دېگەندەك زامان خالايدىغان سۆزلەرنى فىزىكا ، ماتىماتىكا دەرسلىرىنىڭ ئارىلىقلىرىدىمۇ دېمىسە ئۇ قانداقمۇ ئوقۇتقۇچى بولالايدۇ› دېگەن سۆزلىرىنى تولىمۇ كېچىكىپ چۈشىنىپتىمەن ئەمەسمۇ... ھەي كېچىكىش بىزدىن قاچانمۇ قاچىدىغان بولارسەن. .. ھەي قىممەتلىك قىلىنىشقا مۇيەسسەر بولالمايۋاتقان پاراڭلار بىزنى كەچۈر، قولىمىزدىن شۇ پاراڭ قىلىش بەك كېلەتتى ، شۇنىمۇ قىلماپتۇق ئەمەسمۇ ...        (ھازىرچە تۈگىدى )           ئەبەي تارىم .

muddia

	سىز ئويلىغان پاراڭلار ھەقىقەتەن قىممەتلىك پاراڭلار ئىكەن. بىز ئويلىغىنىمىزنى قانۇن بىلەن ئەخلاق ئىچىدە قانچىلىك پاراڭغا ئايلاندۇرساق بۇلىۋېرىدۇ. بىزنىڭ مەدەنىيەتنىڭ قىممىتى بىلەن مەدەنىيەتنىڭ ھەم ئادەمنىڭ تەرەققىياتى توغرىسىدىكى پاراڭلىرىمىزنىڭ غەيۋەت ھەم ئەرزىمەس پاراڭلارنىڭ ئورنىنى ئېلىشىنى ئۈمىد قىلىمەن. تەشۋىقاتتىكى تاشقى مايىللىقنى  ئىچكى مايىللىقا يۈزلەندۈرۈش سىزنىڭ قىممەتلىك پاراڭ تېمىلىرىڭىز ئارقىلىق باشلىنىپ قېلىشىنى ئويلايمەن. پاراڭلىرىڭىز تۈگۈمىگەي قېرىندىشىم!

mustapha

	دەرھەقىقەت،بىز پاراڭ خۇمار خەلق.     ئەتىسى-ئاخشاملىرى پاراڭلىشىمىز قايسى جايغا يېڭى رېستوران ياكى ئارامگاھ ئېچىلغانلىقى توغرۇلۇق؛ توردا كەلتۈرىۋالغان مەشۇقلىرىمىز توغرۇلۇق؛ قايسى بىر تونۇشىمىزنىڭ تويىدا قانچىلىك ھاراق ئىچىلگەنلىكى توغرۇلۇق؛ قايسىدۇر بىر ئارتىسنىڭ نەشە ساتقانلىقى ۋە قىمار ئويناپ قانچە پۇل ئۇتتۇرىۋەتكەنلىكى توغرۇلۇق...     بىز پاراڭلىشىمىز ھىندىستان، كورىيە، تۈركىيە...لىك قايسى چولپاننىڭ قەيىرى بەكرەك ئادەمنى جەلپ قىلىدىغانلىقى توغرۇلۇق؛ ئامېرىكا «تيۇلىن» ئالاھىدە ھەرىكەت ئەترىتى ئېتىپ ئۆلتۈرگىنى ساداممۇ ياكى بىن لادىنمۇ؟ بەش پاي ئوق بىلەن ئۆلتۈرگەنمۇ ياكى ئالتە پاي ئوق بىلەنمۇ؟ دېگەن مەسىلە توغرۇلۇق؛ ئوبامانىڭ خوتۇنى قانداق رەڭلىك ئىچ كىيىم كىيىدۇ؟ دېگەن مەسىلە توغرۇلۇق؛ ھوللىۋودتىكى قايسى چولپاننىڭ ئەسلى ئۇيغۇرنىڭ پۇشتى ئىكەنلىكى توغرۇلۇق...     داۋاملىق پاراڭلىشىمىز قايسىدۇر باشلىقنىڭ يەنە قايسى بىر خىزمەتچىنىڭ خوتۇنى بىلەن مۇناسىۋىتى بارلىقى توغرۇلۇق؛ قاچاندۇر بىرچاغلاردىكى سورۇندا كىمنىڭ قانداق مەس بولۇپ، قانداق ياندۇرىۋەتكەنلىكى توغرۇلۇق؛ كوچا ئاپتوبۇسىدا ئېھتىياتسىزلىقتىن يېڭى مايلىغان ئايىقىمىزغا دەسسەپ سالغان بىرەيلەننى تىللاپ پۇسكايتىۋەتكەنلىكىمىز توغرۇلۇق...     پاراڭلىشىمىز...يەنە پاراڭلىشىمىز...     پاراڭلىرىمىز شۇ قەدەر «مول»، شۇ قەدەر «رەڭدار» ھەم شۇ قەدەر «مەزمۇنلۇق». بىلمىدىم، بىزنىڭ پاراڭلىشىش ئادىتىمىز قاچاندىن باشلاپ بۇ قەدەر «سەرخىل»لىشىپ كەتتىكىن.

abaytarim

	رەھمەت مۇددىئا قېرىندىشىم ، پاراڭلىرىم ھەرقايسىڭلارنى زېرىكتۈرۈپ قويمىسىلا مەن ئالەمچە شادلىقتا. دېمىسىمۇ بىزدا قىممەتلىك پاراڭلار كۆمۈلۈپ قېلىۋاتىدۇ. ۋاختىم چىقسىلا يوللاشقا تىرىشىمەن.

axkama

	بەك  توغرا  دەيسىز ....

muddia

	abaytarim يوللىغان ۋاقتى  2012-6-28 15:33 رەھمەت مۇددىئا قېرىندىشىم ، پاراڭلىرىم ھەرقايسىڭلارن ... سىزنىڭمۇ قانداق پاراڭ قىلىشىمىز توغرىلىق يوللىغان قىممەتلىك تېمىڭىزغا رەھمەت! بىز ئەسلى ئەنە سىز ئويلىغاندەك ئەھمىيەتلىك پاراڭلارنى قىلىشىمىز-سېلىشىمىز كېرەك ئىدى. ئەمدى بولساقمۇ كېچىكمەيمىز. چۈنكى، بىزنىڭ ئانا تىلىمىز ئەۋلاتلىرىمىزغا مۇشۇنداق پاراڭلارنى قىلىپ ئۇلارنى يىتەكلىيەلەيدۇ، تىل-مەدەنىيەتكە مۇناسىۋەتلىك تارىخنى، ھازىرنى، كەلگۈسىنى سۆزلەپ بىرەلەيدۇ. مەدەنىيەت خاسلىقىنى پەرزەنىت تەربىيەسىگە سىڭدۈرەلەيدۇ. نىمىدىن يىتەكلىنىشنى بىلمەي تىنەپ-گاڭگىراپ يۈرگەن بالىلارغا يول كۆرسۈتۈپ بىرەلەيدۇ.

xarikmalikis

	ئۇرۇنسىز پاراڭ قىلىپ ۋاقىت ئىسراپ قىلغۇچە ئەھمىيەتلىك پاراڭلارنى قىلغان تۈزۈك ... ئۇنداق ئەھمىيەتلىك پاراڭلاردىن بىز تۇرنۇشتىكى نۇرغۇن قىيىن مەسىللەرگە قانائەتلىنەرلىك قاۋاپ تاپالايمىز ....