ئاددىي ئادەم
(ھېكايە)
ماردىكا (ئامېرىكا)
بىر موماي يېڭىلا ياغقان قارنى غاچىلدىتىپ دەسسەپ ئاستا كېتىۋاتاتتى. شەھەرنىڭ ئاۋات بۇ كوچىسىدا كىشىلەر ئۇنىڭغا كۆز قىرىنى سېلىپمۇ قويمايىتتى. سەل دىققەت قىلغان ئادەم ئۇنىڭ پۇتىدا ئاياغ كىيىم يوقلىقىنى، قارنى يالاڭئاياغ دەسسەپ كىتىۋاتقانلىقىنى كۆرگەن بولاتتى. موماي كونىرىغان چاپىنىنىڭ ئالدىنى ئەتمەكچى بولاتتى، ئەمما چاپاننىڭ تۈگمىلىرى تولۇق ئەمەس ئىدى.
ئۇ ئاپتۇبۇس بىكىتىگە كىلىپ توختىدى. بېكەتتە سومكا كۆتۈرۋالغان مۆتىۋەر سۈپەت بىرەيلەنمۇ ئاپتۇبۇس ساقلاۋاتاتتى. ئۇ موماينىڭ ئۈستىبېشىغا قاراپ ئاللىنېمىلەرنى ئويلىدىمۇ قانداق، مومايدىن يىراقراق تۇردى.
ئاپتوبۇس كېلىۋىدى، موماي ناھايىتى تەستە چىقىپ شوپۇرنىڭ ئارقىسىدىكى ئورۇندۇقتا ئولتۇردى. ئۇنىڭ بىلەن يانمۇ يان ئولتۇرغان ئەر مومايدىن بىزار بولغاندەك قاراپ قوياتتى.
ئاپتوبۇستىكى بىر بالا ئاپسىغا موماينى كۆرسىتىپ:
ـــ ئاپا، ئاۋۇ موماينىڭ پۇتىدا ئاياغ يوققۇ، ـــ دېدى.
ئوڭايسىزلانغان ئانا ئوغلىنى نوقۇغۇنىچە:
ـــ ئاندېرو، باشقىلارغا قول شىلتىش ئەدەپسىزلىك، ـــ دېدى ۋە سىرىتقا قاراپ ئولتۇرىۋەردى.
ـــ ئۇنىڭ ھالىدىن خەۋەر ئالدىغان باللىرى بار بولغىيتى، ئۇ باللار ئانسىنىڭ بۇ ھالىنى كۆرسە ئويالماسمۇ؟ ـــ دېدى ئاپتوبۇستىكى خۇرۇم پەلتۇ كىيىۋالغان ئايال. چۈنكى ئۇ ئانسىنىڭ ھالىدىن ناھايىتى ئوبدان خەۋەر ئالاتتى.
ـــ بىز تاپشۇرغان باج مۇشۇ مەسلىنى ھەل قىلالمامدىغاندۇ؟ ـــ دېدى بىر قۇچاق سوۋغاتلىق ئېلىۋالغان ئايال.
ـــ ھەممەيلەن ئۆزىنىڭ پۇلىنى تېجىشى كىرەك، ـــ دەپ لوقما سالدى بىر ئىستودىنت، ـــ ئۇ ياشلىقىدا بانكىغا پۇل ئامانەت قويغان بولسىدى، بۇنچە ئېغىر كۈندە قالماس ئىدى، بۇ ئۆزىنىڭ خاتالىقى.
بۇ گەپتىن ئەتراپتىكىلەر مەمنۇن بولغاندەك باش لىڭشىتتى. ئەمما سودىگەر سۈپەت بىرەيلەن ئاپتوبۇستىكىلەرنىڭ مومايغا تۇتقان پوزىتسىيەسىدىن بىزار بولدى بولغاي، يانچۇقىدىن 20 دوللار پۇلنى چىقىرىپ موماينىڭ قورۇق باسقان تىتىرەڭگۈ قولىغا تۇتقۇزغىنىچە:
ـــ خانىم، بۇنىڭغا ئاياغ ئېلىۋالارسىز، ـــ دېدى. موماي بېشىنى لىڭشىتىپ رەھمىتىنى بىلدۈردى. سودىگەر ئۆز ئىشىدىن مەمنۇن بولدى.
بىر تەقۋادار ئايال بۇ ئىشلارغا دىققەت قىلىپ ئولتۇراتتى، ئۇ ئىچىدە تىلاۋەت قىلىپ «پەرۋەردىگارىم، مەندە پۇل يوق، ئو مومايغا ياردەم قىلالمايمەن. ئەمما ماڭا شۇ نەرسە ئايانكى، سەن تولىمۇ مىھرىبان، سەن ھەممىگە قادىر، مېھىر-شەپقىتىنىڭنىڭ نۇرى مۇشۇ مۇمايغا چۈشتى، ئاسماندىن ئاياغ چۈشۈرۈپ بەردىڭ، موماي مەۋلۇت بايرىمىدا يېڭى ئاياغ كىيەلەيدىغان بولدى...» دېدى ۋە ئۆزىنى بەك ئالىيجاناپ ھىس قىلدى.
ئاپتوبۇس يەنە بىر بىكەتكە كەلگەندە بىر يىگىت ئاپتوبۇسقا چىقتى. ئۇ قۇلقىغا نائۇشنىك سېلىۋالغان بولۇپ، بەدىننى موزىكىغا ماسلاشتۇرۇپ تولغايتتى. ئۇ موماينىڭ ئاياغ كىيىمسىز پۇتىنى كۆرۈپ چۆچۈپ كەتتى، كۆزى موماينىڭ پۇتىدىن ئۆزىنىڭ پۇتىغا يۆتكەلدى. ئۇ يېڭى، قىممەت پۇللۇق مودا تەنھەركەت ئاياغ كىيىغالغانىدى، يىگىت ئېڭىشىپ ئايغىنى يەشتى-دە، موماينىڭ ئالدىغا كىلىپ يۈكۈندى:
ـــ خانىم، سىزگە ئايغىمنى كىيگۈزۈپ قوياي.
يىگىت موماينىڭ تارشىدەك قېتىپ كەتكەن پۇتلىرىنى ئاۋايلاپ كۆتۈرۈپ، ئۆزىنىڭ پايپىقى بىلەن ئايغىنى كىيگۈزۈپ قويدى. موماي قايتا-قايتا رەھمىتىنى بىلدۈردى.
ئاپتوبۇس يەنە بىر بىكەتكە كەلگەندە يىگىت ئاپتوبۇستىن چۈشتى-دە، قاردا يالاڭئاياغ مېڭىشقا باشلىدى. يولۇچىلار دېرىزىدىن سىرىتقا قارغىنىچە مۇنازىرىگە چۈشتى:
ـــ ئۇ كىمدۇ؟
ـــ ئۇ چوقۇم بىشارەتچى.
ـــ ئۇ چوقۇم خاسىيەتلىك ئادەم.
ـــ ئۇ چوقۇم پەرىشتە.
ـــ ئۇ چوقۇم تەڭرىنىڭ ئوغلى.
ـــ ئۇنداق ئەمەس ئاپا، مەن ئېنىق كۆردۈم، ئۇمۇ بىزگە ئوخشاشلا ئادەتتىكى ئادەم، ـــ دېدى ھېلىقى بالا.
ئابلىز ئۆمەر ھاجى تەرجىمىسى
گىزىتتىن كۆچۈرۈپ مۇنبەرگە يوللىغۇچى: كەمىنە تەلقىن.
تۈنۈگۈن بىر تاشلىۋىتىلگەن كونا گىزىتتىن كۆرۈپ قېلىپ ئوقۇپ باققان ئىدىم. شۇنداق تەسىر قىلدى. شوڭا ھېكايە بار يېرىنىلا يىرتىۋېلىپ يانچۇقۇمغا سېلىپ قويغان. بۈگۈن ئىشتىن چۈشۈپلا ئۆيگىمۇ قايىتماي ئىشخاندىلا كومپىيوتىرغا ئۇرۇپ ساقلىۋالدىم. ھەم تورداشلار بىلەن بۇ ياخشى تەرجىمە ئەسەردىن تەڭ بەھىرلىنىش ئۈچۈن مۇنبەرگە يوللىدىم.
تورداشلار ھېكايىنىڭ مەزمۇنىدىن نىمىنى ھىس قىلغانلىقىمىزنى ئوتتۇرغا قويۇپ باقساق دەيمەن.
يوللىغان ۋاقتى 2012-5-3 21:45:37
