ئارزۇگۈل خەندان بىلەن ئەلكۈيىدە سۆھبەت

umidwar

ئەل سۆيگەن تالانتلىق ناخشىچى،تونۇلغان ئاۋاز ئارتىسى ئارزۇگۈل خەندان بىلەن ئەلكۈيىدە سۆھبەت

ئەسسالامۇئەلەيكوم،ئەلكۈيى تورىدىكى ئەزىز قېرىنداشلار ھەممىڭلارغا تورىمىز ۋە شىركىتىمىز نامىدىن ئوتلۇق سالام!ئالدى بىلەن بارلىق خانىم -قىزلارنىڭ بۈگۈنكى 2012-يىللىق خانىم-قىزلار  بايرىمىغا ئالىي تېلەكلىرىمىزنى يوللايمىز،ئالتۇن بويۇڭلار ھەر زامان ئامان بولسۇن!

خانىم - قىزلار دۇنيانىڭ ھەقىقىي گۈزەللىكىنى،مېھرىبانلىقىنى ئۆز ئەمەلىيتى ئارقىلىق ئەينەن ئىسپاتلايدۇ ئەلۋەتتە.تىرىشچان ، ئەخلاقلىق ،كۆپكە قادىر ئاياللار مەيلى ئائىلە ياكى جەمىئىيەتتە ۋە ياكى خىزمەتتە بولسۇن ھەممەيلەننىڭ ماختىشىغا نائىل بۇلىدۇ.بىز بۈگۈنكىدەك قۇتلۇق مىنۇتلاردا كەڭ خانىم -قىزلىرىمىزغا ئۈلگە بولغۇدەك بىر پەخىرلىك ئۇيغۇر قىزى بىلەن سۆھبەت ئېلىپ باردۇق ۋە بۇ سۆھبىتىمىزنى  كەڭ خانىم - قىزلارنىڭ  بايرىمىغا شۇنداقلا تور ئەھلىنىڭ ھوزۇرىغا سۇندۇق.

زىيارەت فىلىمىنى بۇ يەردىن كۆرۈڭ

ئېنىقلىقى يۇقىرى،ئاۋاز سۈپىتى ئالاھىدە يۇقىرى نۇسخىسى ۋە زىيارەت جەريانىدىكى بىر قىسىم رەسىملەر داۋاملىق  تورغا يوللىنىۋاتىدۇ

بەلكىم ھەممەيلەن بۈگۈنكى ئالاھىدە مېمىنىمىزنىڭ كىم ئىكەنلىگە قىززىقىۋاتىدىغۇ ئەلۋەتتە.ئۇ بولسىمۇ «سەييارە»، «كەتمە»، «چۈش ۋە رېئاللىق»، «مۇھەببەت»، «دالا سەيلىسى» قاتارلىق كۆپلىگەن لىرىك ناخشىلىرى ئارقىلىق تاماشىبىنلار ئارىسىدا زور تەسىر قوزغاپ، ئۇلارنىڭ قەلبىدىن چوڭقۇر ئۇرۇن ئالغان ئەلگە تونۇلغان تالانتلىق ناخشا چولپىنى ئارزۇگۈل خەندان .

بىز بۈگۈنكى زىيارىتىمىزگە ئارزۇگۈل خەنداننى ئالاھىدە تەكلىپ قىلىش ئارقىلىق ،ئۇنىڭ تۇرمۇشى ،كەسىپكە بولغان تىرىشچانلىقى،خىزمەتتىكى ئىپادىسى شۇنداقلا مەسىلىلەرگە بولغان كۆز قاراش..قاتارلىق ئوخشىمىغان نوقتىلار بويىچە سۆھبەت ئېلىپ بېرىش ئارقىلىق،بىر مۇۋەپپەقىيەت قازانغان ئايالدا بولۇشقا تىگىشلىك پەزىلەت ۋە روھ،ئائىلە ۋە جەمىئىيەتكە بولغان پۇزىستىيە ۋە كۆز قاراش ..قاتارلىق مەسىلەر ھەققىدە كەڭ - كۇششادە سۆھبەت ئۆتكۈزدۇق.زىيارىتىمىزنىڭ تەپسىلاتىغا قىززىقسىڭىز،ئارزۇگۈل خەندانغا قەلب ئىزھارىڭىز بولسا دىققىتىڭىز ئەلكۈيى ئېكرانىدا بۇ ھەقتە ئېلىپ بارغان سۆھبەتتە بولسۇن!

زىيارەت جەريانىدىكى رەسىملەردىن ئارىيەلەر

ئەل سۆيگەن تالانتلىق ناخشىچى ئارزۇگۈل خەندان ۋە ئەلكۈيى تورىنىڭ قۇرغۇچىسى،ئەلكۈيى تور تېخنىكا چەكلىك شىركىتىنىڭ مەسئۇلى مۇھەممەدجان ئۈمىدۋار بىرگە

ئەلكۈيى شىركىتىنىڭ بىر قىسىم خىزمەتچى - خادىملىرى ئارزۇگۈل خەندان بىلەن بىرگە

ئەلكۈيى تورنىڭ رىياسەتچىسى  ئارزۇگۈل خەندان بىلەن بىرگە

ئارزۇگۈل خەندان رىياسەتچىنىڭ سۇئالىنى ئاڭلىماقتا

ئارزۇگۈل خەندان ئەلكۈيى تورىدا خاتىرە سۈرەت قالدۇرماقتا

رەسىملەر داۋاملىق يوللىنىۋاتىدۇ...

ئاخىرىدا بىز ئەلكۈيى تورى ۋە بارلىق تورداشلارغا ۋاكالىتەن تالانتلىق ناخشىچىمىز ۋە پەخىرلىك قىزىمىز ئارزۇگۈل خەنداننىڭ بۇنىڭدىن كىيىنكى ئىجادىي ھاياتىنىڭ يەنىمۇ پارلاق مەنزىللەرگە تۇتۇشىغا شۇنداقلا خىزمەت ۋە تۇرمۇشىنىڭ يەنىمۇ كۆڭۈلۈللۈك بولىشىغا ،ئائىلىسىنىڭ بەخت -ئامەتكە يار بولىشىغا چىن دىلىمىزدىن تىلەكداشلىق بىلدۈرىمىز!

كامالىي ئېھتىرام بىلەن :

ئەلكۈيى تور بېكىتى

ئەلكۈيى تور تېخنىكا چەكلىك شىركىتى

2012-يىلى نورۇز ئېينىڭ 8-كۈنى (3-ئاينىڭ 8-كۈنى)

zulal07

ئابدۇللا ئابدۇرېھىم بىلەن ئېيتقان چۈش ۋە رىئاللىق قاتارلىق  ناخشىلارنى ئاڭلاپ تونۇغان ۋە ھۆرمەتتە بولغان ئىدىم.  بوران چاپقۇن كىشىنى يېتىلدۈرىدۇ. ئىدىيدە ئاڭ ئۆزگىرىپ تۇرىدۇ. داۋاملىق ياخشى ھالەت ياخشى ئوبرازىنى ساقلاپ، بىزگە مەنىۋى زوق ئاتا قىلىشىنى ئۈمىد قىلىمەن.
   

hislirim

   ئەلكۈيى تورى تور تېلۋىزىيە پىروگىراممىلىرىنىڭ سۈرەتكە ئىلىش، مونتاژلىنىش جەھەتتىن باشقا تور بەتلەرگە قارىغاندا ئالاھىدە ياخشى دەپ ئويلايمەن... كەسپىيلىك دەرىجىسى ھەقىقەتەنمۇ كىشىنى مەمنۇن قىلىدۇ...
   ئەلكۈيى تورىدىكى بارلىق خانىم- قىزلارنىڭ «8. مارىت خانىم قىزلار بايرىمى» نى قىزغىن تەبرىكلەيمەن... ئەلكۈيى تور تىخنىكا چەكلىك شىركىتىدىكى، ئىكران ئارقا سىپىدە خىزمەت قىلىۋاتقان جاپاكەش خىزمەتچىلەرنىڭ ئىشلىرىنىڭ ئوڭۇشلۇق، تۇرمۇشىنىڭ شاتلىققا تولىشىنى چىن كۆڭلۈمدىن ئۈمۈد قىلىمەن...

ayshah

ۋاھ......! بەك ياخشى چىقىپتۇ. ئارزۇگۈل خەندان ھەدىمىزنىڭ سۆز قابىلىتىمۇ بەك ياخشىكەن . سۆھبەت جەريانىدىكى سۆز ئىبارىلىرى شۇنداق تۇلۇق، راۋان ، يېقىشلىق چىقىپتۇ. ھەقىقەتەنمۇ ئىسمى_جىسمىغا لايىق كىچىك پىئىل، مۇلايىم، ئىللىق تەبىئەتلىك خۇشناۋا بۇلبۇل ھەدىمىزكەن. ئەپسۇس،سۆھبەت بىرئاز قىسقا بوپ قاپتۇ. شۇنداقتىمۇ ئارزۇگۈل ھەدىمىز ئۆزىنىڭ سۆزگە ماھىرلىقى بىلەن ئاۋاز ئارتىسلىق كەسپى، ناخشىچىلىق ھاياتى، ئۆزىنىڭ ئائىلە تۇرمۇشى توغرىسىدىكى ئۇچۇرلىرىنى ئەپچىللىك بىلەن بىر_بىرىگە باغلاپ كىرىشتۈرۈپ تۇرۇپ رىياسەتچىنىڭ سوئالىغا يىتەرلىك جاۋاپ قايتۇرۇپتۇ. لېكىن رىياسەتچىمىزنىڭ ئىنكاسى سەل ئاستا كېپ قاپتۇ. ئارزۇگۈل ھەدىمىز :« ئۆز ئىجادىيىتىم بولغان ناخشام........ » دەپ بايان قىپ  تۇرۇپ رىياسەتچىنىڭ ئاغزىغا گەپ سەپ بېرىپتۇ بولمىسا، ئەمما رىياسەتچىمىز بۇ نۇختىغا سەل قاراپ ئۆتۈپ كىتىپ قاپتۇ. دەل ئاشۇ ۋاقىتتا خەندان ھەدىمىزنىڭ ئىجادىي ئەمگەك پائالىيەتلىرى توغرىسىدا توختالسا بوپتىكەن. ئارزۇگۈل ھەدىمىزنىڭ ناخشىلىرىغا دىققەت قىلغانلىرىمىز بىلىمىز، «چۈش ۋە رىئاللىق » ......... قا ئوخشاش كۆپىنچە ناخشىلىرىنىڭ قەلەم ساھىبى دەل ئۆزى. تىرىشچان، قوش بىسلىق سەنئەتكار.
يولدىشى ھەم ئوغلى ھەققىدىمۇ قىستۇرۇپ ئۆتۈپ بەختلىك ئائىلىسىنىڭ بارلىقىدىن خەۋەرلەندۇق، خەندان ھەدەمگە راستلا مەستلىكىم كېپ قالدى. ( ئىناق ئائىلەڭلارغا كۆز تەگمىسۇن.)
ئاۋاز بېرىش ماھارىتىنىمۇ كۆرسىتىپ ئۆتۈپتۇ، يەنە بىر قېتىم قايىللىقىمنى قوزغىدى. ئەگەر ئۆزىنى كۆرمىگەن بولسام ئۇ ئۈچ پىرسۇناژغا ئۈچ ئادەم ئاۋاز بىرىپتۇ دەپ يۈرەركەنمەن . يەنە ئاۋۇ ئوقۇغۇچى قىزغا بەرگەن ئاۋازى ھاۋاخان ھېيت نىڭكىگە ئوخشاپ قالىدىكەن .
ئەينى چاغدا ناۋا پروگراممىسىنىڭ 9.سانىغا رىياسەتچىلىك قىلغاندىمۇ ھەقىقەتەن كۆپ قىرلىق ، يىتىشكەن قابىل ئارتىسكەن دەپ قول قويغانىدىم.
مۇڭلۇق جۇشقۇن كۈيلىرىنى، يېقىملىق ئاۋازىنى، سەھنىلەردىكى چىىرايلىق ئوبرازىنى بەك ياقتۇرغاچقا ، بۇ ھەدىمىزگە شۇنداق دىققەت قىلىپ كېلىۋاتقانتىم، بۈگۈن بۇ مۇنبەردىكى زىيارەت سىن كۆرۈنىشىنى كۆرۈپ بەك خۇشال بولدۇم.
ئاۋاز، چىراي، تالانت جەھەتلەردە گۈل_گۈلىگە كەلگەن، ئەتراپلىق يىتىشكەن بۇ خۇشناۋا دىلكەش ئاۋاز ئىگىسىنىڭ بۇندىن كىيىنكى سەنئەت ھاياتىغا بەرىكەت، ئائىلىسىگە بەخت تىلەيمەن.
ناخشا كېچىلىكىڭىزنىڭ تېزرەك روياپقا چىقىشىنى ئۈمىد قىلىمەن، يېڭى ناخشىلىرىڭىزغا تەققەززامىز~!

y.n.elqut

ئالدى بىلەن ئارزۇگۈل خەندان خانىمنىڭ تىنىگە سالامەتلىك ، ئائىلىسىگە خاتىرجەملىك يار بولسۇن . خەندان خانىمنىڭ بۇ سۆھبەتتىن ئايان بولغان پەزىلىتى ۋە ساپاسى ( بۇ نۇقتىنى ئۇنىڭ ئائىلىسى ۋە پەرزەنتلىرىنىڭ تەربىيەسىگە بولغان بايانىدىن بىلىۋالغىلى بولىدىكەن  ) ھەقىقەتەن يۇقىرى ئىكەن . شۇنداقلا ، بۇ خانىم كەسپىكىمۇ ، ئائىلىگىمۇ مەسئۇلىيەتچان ھەقىقى ئاياللىق خاراكتىرگە ئىگە ئايال ئىكەن . ئارزۇگۈل خانىمغا بارىكاللا .

ahu ھەقىي سالاھىيەتلىك ئەزا

خەندان دىگەن بۇ تەخەللۇس ئارزىگۈلنىڭ يېقىملىق ئاۋازى،نازۇك تەبىئىتىگە بەكمۇ ماس كەپتۇ.

yarkin0997

خەندان ھەدەمنىڭ تېنىنىڭ سالامەت، ئىشلىرىنىڭ ئۇتۇقلۇق، كۈنلىرىنىڭ خاتىرجەم بۇلىشىنى چىن دىلىمدىن ئۈمىد قىلىمەن !

   مەن ئارزىگۈل ھەدەمنىڭ ‹ئۇنۇتما يار› دىگەن ناخشىسىنى شۇنداقلا ئاشۇ لاتاپەتلىك گۈزەل ئوبرازىنى بەكمۇ ياقتۇرىمەن !

sultan123

ئالدى بىلەن ئارزىگۈل خەندان ھەدىمىزنىڭ تېنىنىڭ سالامەت بولۇش بىلەن بىرگە ،ئاۋازنىڭ يېقىملىق  كۈيلىرنى كەڭ سەنئەت خۇمار خەلقىمىزگە تەقدىم  قىلىشنى ھەر ۋاقىت  ئۈمىد -قىلمەن.ھەمدە ئارزىگۈل ھەدىمىزنىڭ مەيلى خىزمەتتە بولسۇن ياكى ئائىلىدە بولسۇن .ئۆزىنىڭ مەجبۇرىيىتىنى ئۇنتۇپ قالمىغان ئاساسىدا ئائىلىدە ياخشى بىر ئائىلە ئايالنىڭ ئوبرازىنى سۆزىدە  كەڭ كۆرۈرمەنلەرگە يۇرۇتۇپ بېرىپتۇ .كونىلار دىگەندەك‹‹ قەيەردە ئانىلار قاتتىق قول ،تەلەپچان بولسا شۇ يەردە جىگەرلىك پەرزەنتىلەر يىتىشىپ چىقىدۇ  ››دىگەندەك  ئارزىگۈل خەندان ھەدىمىزدەك تەلەپچان  خانىم -قىزلىرىمىزنىڭ كۆپرەك چىقىشنى ئۈمىد-قىلمەن .

dilnurdilo

ئەسسالامۇ ئەلەيكۇم مۇنبەرداشلار.. ئارزىگۈل ھەدىمىزنىڭ ئاۋازى پەقەتلە ئۆزگەرمەپتۇ. كىچىك ۋاقتىمدا چۈش ۋە رېئاللىق دېگەن ناخشىنى ناھايىتى ياقتۇرۇپ ئاڭلايتتىم. ئارزىگۈل ھەدىمىزنىڭ تاتلىق ئاۋازى بىلەن كىنودىكى شۇ پىرسوناژلارنىڭ ئوبرازى، ئۇلارنىڭ خارەكتىرى خېلى ۋاقىتقىچە ئېسىمدىن كۆتىرىلمەيتتى، ھەتتا بەزى دېئالوگلىرىنى ياتقا ئالالايتتىم. دېمەك بۇ ھەممىسى ئارزىگۈل ھەدىمىزنىڭ مۇۋاپىقىيىتى، ئۇ بىزنىڭ مەنىۋىيىتىمىزنى بېيىتىش ئۈچۈن ئىزچىل ئىزدىنىپ تىرىشىپ كەلدى. بىر ئايال كىشىنىڭ ئائىلە ۋە خىزمەتنىڭ ھۆددىسىدىن تەڭ چىقمىقى بەسىمۈشكۈلدۇر. ئارزىگۈل ھەدىمىز بۇنى ئورۇندىيالىدى، ئاپرىن ھەدە، سىزنىڭ بۇنىڭدىن كېيىنكى ھەربىر قەدىمىڭىزنىڭ بەرىكەتلىك بولىشىنى تىلەيمەن!
ئارزىگۈل ھەدىمىز خەلق ناخشىلىرىنى ئېيتسا قانداق بولا دەپ قالىمەن ... مەن تېخى ئاڭلاپ باقمىدىم..ئەگەر بولسا دوستلار يوللاپ قويساڭلار..
ئارزىگۈل ھەدە چىرايىڭىزنىڭ، ئاۋازىڭىزنىڭ مۇشۇنداق 18 ياشلىق قىزدەك ئوماق تۇرىشىنى تىلەيمەن.....

aygul0206

ئارزۇگۈل خەندان خانىمنىڭ تىنىگە سالامەتلىك ، ئائىلىسىگە خاتىرجەملىك يار بولسۇن .ئارزۇگۈل خەندان ئاۋازنى بەكلا ياخشى بېرىدىكەنسىز،ئاۋازىڭىزغا كۆز تەگمىسۇن.
فىلىممۇ شۇنداق ياخشى ئىشلىنىپتۇ،شۇنداق ياقتۇرۇپ كۆردۈم ...