تارىمنى بويلاپ

ALPAMIX

	مەۋجۇتلۇقنىڭ  كۆزىدە،               ساھىلدا تەنھا  تۇرغان مەن ئەمەس،               بەلكى توغراققا يانداشقان بىر توغراق.               توغراقلار سەپداشلىق تۇيغۇسى بىلەن،               ماڭا  تىكىلىپ  قاراشتى  ئۇزاق.               جىمجىتلىقتا تۇتىشىپ كەتتى كۆڭلىمىز،               كەڭ ۋادىدا بولدۇم بىساناق.                             يېشىل كارىدۇرمەن تەكلىماكاندا،                        يۈرىكىم –تارىمنى بويلاپ سوزۇلغان.                ئاققىنى سۇ ئەمەس، تۈگىمەس سۆيگۈ،                ھاياتلىققا يېڭى جاننى ئۇلىغان.                سۆيگۈدە يۆتكەلگەن تاغلارنىڭ روھى،                تۆرەلگەن قەددى تىك ئۆسۈملۈك،ئورمان.                ئۆركەشلەپ تالمىدى قۇم دولقۇنلىرى                مەن-يېشىل سېپىلدىن ئۆتەلمەي ھەرئان.                ئىلاھى ئورمانمەن چۆللۈك ئىچىدە،                مىليۇن-مىليۇن  يىللار زەپەردەس تۇرغان.                خوتەندىن تا لوپنۇر ۋادىسىغىچە،                قاپ بەلدىن بۆلۈكلىك شۇڭا باياۋان.                 سۆزلىرىم -يوپۇرماق پىچىرلىشىدا،                 زىمىن سۆزى –دەريا شاۋقۇنلىرىدا.                 دەشتكە ۋارقىرىغان ئاسماننىڭ قەلبى-                 تەسىرلىك كۆز يېشى-يامغۇرلىرىدا.                                 تۇيۇقسىز قايتىپ كەلدىم ئۆزۈمگە،                 جىرىڭلاپ ئۆچكە بوينىدا قوڭغىراق.                 كۈلۈمسىرىدى كۈمۈش ساقاللىق بىر بوۋاي،                 تۇرىدۇ  گىرۋەكتە كەپە ۋە بىر قولۋاق.                ئويلاپ قالدىم : شۇ بوۋاي كەلگۈسىدىكى مەنمۇ؟                ياكى مەن شۇ بوۋاينىڭ قىران چېغىمۇ؟                قارىسام بوۋاي خىزىردەك كېتىپتۇ يوقاپ.                 قايتماقچى بولساممۇ كەلگەن يولۇمغا،                 توغراقزارلىق مېنى قۇچاقلىۋېلىپ.                 چىلان رەڭ تۇپراق تاپىنىمنى سۆيىۋېلىپ،                 كېتەلمىدىم قەلبىمدىكى توغراقزاردىن ئۇزاپ.      2008-يىل، بۈگۈر    ئەزىز ھېيىت كۈن: ئالپامىش

ArislanMemet

	ياخشى يېزىلىپتۇ، بۇ شېئىرنى ئوقۇپ چۈشىنەلىدىم.  ئەجىرىڭىزگە رەھمەت.

تەۋپېق

	تەكلىماكان ...توغراق...شەپەق نۇرى....چەكسېز كەتكەن قۇملۇقلار...ھەقىقەتەن گۈزەل

lostba

	ئەجىرىڭىزگە رەھمەت.

diyar213

	شېرىڭىزنى ئۇقۇپ گۇزەل تارىم ۋادىسى بىر-بىرلەپ كۆز ئالدىمىدىن ئۆتتى.ئونىۋىېرسىىتتا ئۇقۇۋاتقاندا پاراكىتىكا مۇناسىۋىتى بىلەن،قۇملۇق تاش يولدىكى تارىم دەريا چوڭ كۆۋرۇكى ئەتىراپىدا  بىر كۇن تەكشۇرۇش ئېلىپ بارغان ئىدۇق،بىردەم دەريانىڭ ئىچىگە كىرسەك بىر دەم درەيا قېشىدكى توغىرقلارنى سۇرەتكە تارتققان ئىدۇق.توختىماي بىر-بىرىمىزىمدىن «قۇملۇقمۇقنىڭ گۇزەلكى نەدە »؟؟دىگەن سۇئالىنى سورايتۇق. بۇ شئىرنى كۇرۇپ شۇگۇزەل منۇتلارنى ئەسلەپ قالدىم.

hayrana

	ئسىل يېزىپسىز ، چۇڭقۇر پىكىرلىك بوپتۇ ، مەنمۇ شۇ تاپ ئاشۇ گۈزەل تارىم بويىدا ئۇنۋىرستىتتا ئوقۇۋاتىمەن ، بۇ گۈزەل سىھرلىك مەنزىرلەنى ئەتراپىمىزدىلا كۆرگىلى بولىدۇ ، بۇ چۇڭقۇر پىكىر، لىرىك تىللار ئچىدە گۈزەل تارىم ۋادىسىنىڭ سھرى كۈچى تېخىمۇ بەك نامايەن بوپتۇ .

ALPAMIX

	ئايدىڭ                 ئەزىز ھېيىت كۈن   باش ئەگىمدە  قونۇپ  قالغان ئاي              چۈشەيدۇ قارايغان تاغلار كەينىدە.              كېتىۋاتقاندەك كېلىۋېتىپ قەدىمىيلىكتىن              قېتىپ قالدى ھەممە ئايدىڭدىكى جىمجىتلىقتا.              كېچە پەقەت شۇ ئايدىڭ كېچە              ئوخشاپ كېتەر سۈت دېڭىزىغا.              ئەڭ قەدىمىيلىقتىكى زىمىندەك تىمتاس              ئاپپاق قەلبنىڭ تنچ،جىمجىتلىغىغا.              ۋاراقلايدۇ كېچىنى شامال              كۆرۈنۈشلەر ئۆتىدۇ غىل-پال              كۆرىنىدۇ ئاق –ئايدىڭ كېچە              كائىناتتا  بولۇپ بىر ئارال.              ھەممە شىرىن چۈشتە،تۇيغۇلار ئويغاق              قەدىم ئاھاڭدا شىۋىرلار يوپۇرماق.                                                                                 ئاي-جىمجىت تۈننىڭ چىرىغى.               يورۇيدۇ ئەلمىساقتىن يورىغاندەك               كەلمىشتىكى  سۈزۈك بوشلۇقتا.                ئايدىڭ كېچە  سەگىتەر روھنى                كەچمىش،كەلمىشنى يىغىپ ھازىرغا                زوھرا  كۆزىدەك  مۇڭلۇق يۇلتۇزلار                جىمىرلايدۇ  تاھىر يېشىدەك سۈزۈك دەريادا.                                  ئاق دېڭىزغا قۇيۇلار ئاق نۇر.                 ئاق دېڭىزدا شىۋىرلار شامال.                 ئاق نۇر-ئايدىڭ كېچىنىڭ تىلى.                 شامال-ئايدىڭ  كېچىنىڭ كۈيى.                 ئاق نۇر-گويا  دىلنازنىڭ  دىلى.                 شامال گويا-دىلنازنىڭ  ئۈنى.                 مەيىن ئۆتەر تىنىمسىز  شامال                 كېچىدە بار  ئالەمچە خىيال.                 سۆيگۈ قۇچىغى-ئايدىڭ كېچىلەر                 مەڭگۈ-مەڭگۈ  ئەزىز  بىلىنەر.                      2009-يىل،بۈگۈر

ALPAMIX

	يوپۇرماق سىرى ئەزىز ھېيىت كۈن ئۆز  تىلىدا   سورىدى ھاۋا: نېچۈن سالقىندا تۇرالمايسەن جىم ؟ تۈگىمەيدۇ  پىچىرلاشلىرىڭ سېنى شۇنداق مەستخۇش قىلغان كىم ؟ ئۆز تىلىدا   ئېيتى يوپۇرماق: سالقىن شامال ئەسلى مۇزىكا. شۇ كۈي چىقىپ ئىگىز جايلاردىن كەڭلىكلەرگە  تارايدۇ ئاستا. دەل-دەرەخنى دەيدۇ كىم جانسىز ؟ مەڭگۈ-مەڭگۈ تۇرىدۇ  ئۆرە. يۈكسەكلىككە چەكسىز ئىنتىلىپ، كۆككە قاراپ  ئۆرلەيدۇ يەنە. كىملەر دەيدۇ  دالىنى ھېسسىز؟ ئۇ ئەسلىدە  پايانسىز  كۆڭۈل. گۈل،تىكەنمۇ،پاخلان بۆرىمۇ سىغىپ كېتەر ئۇنىڭغا  پۈتكۈل. كىملەر  دەيدۇ زىمىننى  جانسىز؟ تىنىقىدۇر- ھاۋا،-سەن ئۆزۈڭ. جېنى بولۇپ دەريا ئاققىدۇ، دولقۇنلارنى كۆرگەنسەن ئۆزۈڭ؟ زىمىن-غايەت تەنلىك جانلىقتۇر روھى پارلار  يۈكسەك تاغلاردا. كۈندۈز قۇياش،تۈندە يۇلتۇزلار ھەۋەس بىلەن باقار سامادا. كۆك ئاسماننى كىم دەيدۇ ئەينەك؟ ئاسمان ئەسلى ئالەمنىڭ كۆزى. ئەلمىساقتىن تا  ئەبەتكىچە سۈرەت بولۇپ قالار يەر يۈزى. مۇھەبەتلىك ئالەم  ئەسلى بۇ، ھەممە سۆيگۈ  بىلەن يارالغان. سۆيگۈسىدە  نۇرلۇق قۇياشنىڭ, بۇ ئالەمگە  كۈندۈز  تارالغان. ھەسەن-ھۈسەن كۆكتە پارلايدۇ، جىمىرلايدۇ  تۈندە  يۇلتۇزلار. تەڭكەش بولۇپ يىلتىز،يۈرەككە، سەكرەپ ئاقار  دەريادا سۇلار بۇ ئالەمدە  ھەممە جۈپلۈكتۇر،، سالقىن ماڭا  شۇنداق سۆزلەيدۇ. ئۇ شىۋىرلاپ، مەنمۇ پىچىرلاپ سۆھبىتىمىز راست تۈگىمەيدۇ. ئۆزىمىزنىڭ تىلى -مەڭگۈلۈك، ئۇ يەنە بىر  گۈزەل مۇزىكا. مۇھەبەتلىك بۇ كەڭ ئالەمدە تەسىرلەنمەي مەنمۇ نېمىشقا؟ كۈيلەر ،كۈيلەر يېقىملىق كۈيلەر مەس قىلىدۇ جىمجىت كېچىنى. شىۋىرلىغان سالقىن شامالدىن مەن سېزىمەن زىمىن دىلىنى. ئانا زىمىن  ئۇلۇغ  مەڭگۈگە سۆيگۈسىنى تەكشى تاراتتى. ئەشۇ سۆيگۈ تومۇرلار بىلەن يىلتىزلاردا جان بولۇپ ئاقتى. يورۇق كۈندۈز ،دىلبەر كېچىلەر ھەممىگە زەر،شىرىن دەملەردۇر. ئاتالساممۇ  ئاددى يوپۇرماق جىسمىم سانسىز-سانسىز لەۋلەردۇر. دەرەخلەرنىڭ لېۋى مەندۈرمەن، سۆيىلىمەن  نۇرغا، ھاۋاغا. سۆيگۈم بىلەن  يېشىل باھارنى بېرىمەن بۇ كەڭرى دۇنياغا. پىچىرلايمەن سۆيگۈ  ھەققىدە، قەلبى تەشنا  كۈرمىڭ قىز بولۇپ. كەڭ زىمىنغا  تاراپ  يېشىللىق، قالىمەن نى –نى ۋادىلاردا يۈتمەس سىما،ئۆچمەس ئىز بولۇپ. سالقىن بىلەن ئېيتقان  كۈيىمىز تاراپ كېتەر زىمىن  قوينىغا مەڭگۈ يۈتمەس جىمجىت سۆز بولۇپ. 2008-يىل،بۈگۈر

ALPAMIX

	ئايغىر  تۇياقلىرىدىن  چاچرىغان ئوت          (لىرىك داستان)      ئەزىز ھېيىت  كۈن                    1   بولۇپ يەر شارىنىڭ كىچىك سىماسى     كۆرۈنەر گوياكى  بەيگە  مەيداننى.     ئىلاھى جانۋاردەك ئۇچقۇردۇر ھەر ئات     سۆيۈنەر ئېتىدىن  چەۋانداز  جانى.                2     ئات تۇياقلىرىنىڭ  دۈپۈرلەشلىرى     باشلايدۇ  خىيالنى ئۇزاق-ئۇزاققا.     تۆت مىڭ يىل ئىلگىرى ئاتنى كۆندۈرۈپ،(1)     ئىنسانلار ئېرىشكەن تالماس قاناتقا.   موڭغۇلىيە يايلىغى ،جەنۇبى سىبىر،   سېلىنگا،تۇغلا ۋە ئورخۇن دەرياسى،   ئىسسىق كۆل،پەرغانە،تەڭرى تاغ،پامىر،    بولغان تا قەدىمدىن يايلاق دۇنياسى.    كاسپى دېڭىزىدىن تا بايقالغىچە،    ئالتاي تاغلىرىدىن  تا بالقاشقىچە،    ئوردۇس يايلىغىدىن تا ئورالغىچە،   يەنسەي دەرياسىدىن يورۇڭقاشقىچە،   قۇرۇم تاغلىرىىن سىر-ئامۇغىچە، قىرىمدىن تا دوناي دەرياسىغىچە.              بالقان،نورمادىيە،ھەم بېرتانىيەدىن              بىر پۈتۈن قۇرۇقلۇق  دۇنياسىغىچە              ئۆتكەن كۆچمەن خەلق تۇلپار چاپتۇرۇپ.              دالىلار ،سايلاردا ئىزلار  قالدۇرۇپ.              ئات تۇياقلىرىدىن  چاچرىغان ئۇچقۇن،               تاشلارنىڭ ئۈستىدە يانغان چوغ بولۇپ.                          3               تۇلپارلار كىشنىگەن جەڭ مەيدانىدا               قىلىچلار سوقۇلۇپ ياڭرىغان سادا.               دەھشەتلىك جەڭلەردە بويالغان قانغا               كۆز يەتكۈسىز سايلىق-بىپايان دالا.               باتۇرلار ياشىغان ئاتنىڭ  ئۈستىدە،               قالدۇرغان تارىختا ئۆچمەس شانلىق بەت.               مۇناپىق ناكەسلەر  ھاڭلاردىن غۇلاپ               ئەزەلدىن يېڭىلمەي كەلگەن جاسارەت.               ئۆتكەن ئات چاپتۇرۇپ ھون باتۇرلىرى،                شىددەت ئۈن ياڭراتقان ئاۋازلىق ئوقيا.(2)                ھونلارنىڭ تەڭداشسىز سۈر-ھەيۋىسىدە                كەلگەن زىل-زىلىگە قەدىمكى دۇنيا.                 ئاق بوز ئاتلىقلار غەرىپ تەرەپتىن                 كۆك تۇلپار –ئاتلىقلار شەرق تەرەپتىن،                چىلان تورۇقلۇقلار  شىمال تەرەپتىن،                تۇم قارا ئاتلىقلار  جەنۇپ تەرەپتىن،(3)                ياساپ « بەيدىڭ تېغى مۇھاسىرسى»نى(4)                پەيدا قىلغان غەربى خەن قوشۇنىنىڭ                ئەڭ ئېغىر –ئەجەللىك ھالسىرشىنى.                « پىڭچىڭ شەھرىدە تارتۇق دەرد-ئەلەم،                يەتتە كۈن ئاچلىقتا بولدى ماغدۇر كەم،                ئوقيانىمۇ  ئەپلەپ  ئاتالمىدۇق ھەم.» (5)                دىيىشىپ لەشكەرلەر يىگەن چەكسىز غەم.                ئاخىرى يوقالغان ھون سەلتەنەتى                تارىخ سەھنىسىدە ھەيۋىسى سۇنۇپ.                قالغاچقا جەڭگىۋار ئاتلىق قوشۇنلار                شەرقى خەن سۈرىنىڭ بەلگىسى بولۇپ.                سىبىرلار،جورجانلار،تۇرا -قاڭقىللار                ئۆتكەن ھون قەۋمىنىڭ ئىزىنى بېسىپ.               تۈركلەر ،ئۇيغۇرلار ،قىتان،موڭغۇللار،                ئۆتكەن كەينى-كەينىدىن سۈرەنلەر سېلىپ.               شۇ قىقاس –سۈرەننى ئەسلەيدۇ  تاغلار                 ئەسلەيدۇ بىپايان  ۋادا-تۈزلەڭلەر.                 چۈش بولۇپ  ساقلاندى دالا كۆڭلىدە                تارىختا بولغان سان-ساناقسىز جەڭلەر.                             4                   ئات،ئەشۇ قاناتسىز يۈگرۈك جانۋار                   تارىخقا بەرگەن ئۇلۇغ يۈكسېلىش.                   ياراتقان باتۇرلۇق دەۋرى ئۇزاقتۇر                   يۈتمەس قورال بولغان ئۆتكۈر تىغ –قىلىچ.                    ماكان تۇتقان ئۇچقۇر تۇلپار ئۈستىدە                     چىڭگىزخاندەك ئالىپ نى-نى مەردانلار.                    شەرقكە ھەم غەرىپكە قىلغان يۈرۈشتە                     تۇتاشقان ئۆز-ئارا نى-نى بوستانلار.                     ئات يۈدۈپ يەتكۈزگەن مەدەنىيەتنى،                      بولغان نى مىللەتلەر ئارا قوشۇلۇش.                      مىسىردا،،بابىلدا، يۇنان،جوڭگودا                      تۇغدۇرغان ئىمپىريە  بىرلىك-يۇغرۇلۇش.                                   5                    ئات،ئەشۇ قاناتسىز يۈگرۈك جانۋار                 جەملەنسە ئوخشار نىل( 6) ئۆركەشلىرىگە                 بىپايان سايلىقلار مەيداندۇر چەكسىز                    ئات تۇياقلىرىنىڭ دۈپۈرلەشلىرىگە.                   كۈرمىڭ تەكرارلانغان ئەشۇ مەنزىرە                    ئەسلىتىپ دەھشەتلىك قارا بوراننى.                    ئايلاندۇرغان چۆلگە،خارابىلىككە                    نى مەشھۇر شەھەرنى،ھەيۋەت قورغاننى.                     ھەمدەپنە بۇيۇمى بوپ كۆمۈلگەن ئاتلار                      نى داڭدار شاھلارنىڭ قەبرىگاھىغا.                      كۈن،ئايدىن تۆرەلمىش ئەشۇ ئوغلانلار-                      بېرىشنى ئويلىغاچ ئەڭ ئېسىل دۇلدۇل-                      ئۈستىدە تەڭرىنىڭ  كەڭ دەرگاھىغا                       مەردلەر ماكان تۇتقان ئاتنىڭ ئۈستىدە،                       ياشىغان ھەم قارا بوراندەك كۆچۈپ.                       سۈيى ئەلۋەك،كەڭرى يايلاق ئىزدىگەن.                        قاتمۇ-قات قارلىق چوڭ تاغلاردىن ئۆتۈپ.                         نى قەۋم ئاتالغان يايلاق مىللىتى،                         جانغا جان ئۇلىغان ئات تۆھپىسىدە.                        نامايەن  قەدىمكى بۈيۈك سەلتەنەت،                        چاپچىغان ھەر ئاتنىڭ  سۈر-ھەيۋىسىدە.                      6                  بۈگۈنمۇ  چوڭ سەھنە-بەيگە  مەيداننى،                   قوزغايدۇ دىللاردا  ئوتلۇق  ھاياجان.                   بەيگىدە  قۇش كەبى ئۇچقان ھەر تۇلپار،                  ئېتىللار  ئالدىغا  گويا  ئوقسىمان.                   گۈزەللەر چۈمىدۇ  شىرىن  خىيالغا،                  سېغىنىپ « ئاق  ئاتلىق شاھزادىسى»نى.                   قويىدۇ  ئۆزىنى سىرلىق  دۇنياغا،                   بىلگەچ « مىڭ بىر كېچە» ھىكايىسىنى.                   قاتمۇ-قورشاۋلىق قەلئە  ئىچىگە                   كىرسە بىر باھادىر  ئاتلىق باستۇرۇپ،                    ساناقسىز زەپەردەس لەشكەر ئىچىدىن،                   ئالسا بىر گۈزەلنى چامغۇر قىپ يۇلۇپ.                   ئوڭ قولدا قىلىچنى زەرىپلىك شىلتىپ،                   سول قولدا گۈزەلنى ئاتقا قوندۇرۇپ،                     تىز چاپسا « زورۇ»دەك قامالنى يېرىپ،                     كۆمۈش ساپلىق قامچا  ئوينۇتۇپ.                      باھادىرغا مەھكەم چاپلاشسا گۈزەل،                       ھايات-ماماتتا بىر  جانانى بولۇپ.                       زومىگەر ئاتىسى-شاھنىڭ ئوردىسى                       ھەرە ئۇۋىسىدەك كەتسە چۇگۇلۇپ.                       لەكمىڭ لەشكەر قالسا قوغلاپ يېتەلمەي                       تۇلپار ئۇچسا  كۆككە  چاڭنى توزۇتۇپ.                       ئاشىغى يوقاتسا  توسقان لەشكەرنى،                        خەتەرلىك ھاڭلاردىن تاشتەك دوملۇتۇپ.                        گۈزەل بىر ئورمانغا  يەتسە  ئاخىرى                         ئەجەلدىن،خەتەردىن تامام قۇتۇلۇپ.                         گىلەمدەك يېيىلغان چۆپلۈك  ئۈستىدە                         ئىككەيلەن كەتسە بىر جانۇ-تەن بولۇپ.                          تۇلپار تۇتسا بىر جۈپ قۇلىقىنى تىك،                          دەرەخزار چېتىدە كۈزەتتە تۈرۇپ.                          كەچقۇرۇن قانىتى بولغان تۇلپارنى                           سۇ ئەمەس قويسا چىن مېھرىدە يۇيۇپ.                           ئىككىسى بولغاچ چىن قاناتلىق جۈپلەر،                           بارسا ئەڭ گۈزەل جايلارغا  ئۇچۇپ.                           سۆيگۈدە يارالغان گۈزەل قىسىسى                            تارالسا  جاھانغا  ھىكايە بولۇپ.                                      7                   قىقاسقا  تولغان شۇ بەيگە  مەيداننى،                   دىققەتنى ئاتىدۇ  ھازىرغا  ئوق قىپ.                   ئادەملەر گويا ئات ،دۇنيا  مەيداندۇر،                   مۆڭدىلىش غەلبىنى قويىدۇ يوق قىپ.                   رىقابەت –بەيگىدۇر ئاجايىپ كەسكىن،                    بەك قاتتىق  سىنايدۇ  شىر بىلەن شىرنى.                    غەلبىمۇ ھازىردا، نەسلىك  ھازىردا،                   ھەركىم ئۆزى يارىتار  ئاچقۇچلۇق سىرنى.                    ھاياتلىق دەريادۇر مەڭگۈ توختىماس،                   ھەر ئادەم گوياكى  چېپىۋاتقان ئات.                  رىقابەت –ئۇزاق سوزۇلغان بەيگىدە،                     ئەقىل ۋە جاسارەت بوپ كەلگەن قانات.                                     8                           جالالىدىن رۇمى  ئېيتقان بۇرۇنلا                      « ئادەم-ئات ئۈستىدىكى يولۇچى» دەپ.                      ئات-گەۋدە،-بەدەننى كۆرسەتسە شەكسىز،                       دەل روھتۇر « يولۇچى» دىگەن يارقىن گەپ.                       تېنىمىز راست  ئاتتۇر  بىزنى كۆتۈرگەن                       روھىمىز تۇرىدۇ  ئۇنى  تىزگىنلەپ.                       بىز مىنىپ « تەن» ناملىق شۇ ئېتىمىزغا،                       بارىمىز  غايىۋى  پەللىگە  ئۆرلەپ.                      تەن يەنە  روھىمىز ئۆيى-ماكاننى.                      ياشىغان تىرىك ھەر جاننىڭ ماكانى.                      تەن يەنە  مۇكەمەل بولغان ماشىنا                      بېرىدۇ  مەۋجۇتلۇق،ياشاش ئىمكاننى.                    شۇڭا بىز ئاتسىزمۇ  ئاتسىز ئەمەسمىز،                     پۇتىمىزدا كىچىكلەر بۇ كەڭ يەر شارى.                    بىز تەن-ئات  ئۈستىدە يولۇچىدۇرمىز،                    ياشاشچۈن يەر شارى-بەيگە مەيداننى.                          9                        قەدىمدىن كېلىدۇ كىشنىگەن تۇلپار                    ھەم ئاتنىڭ ھەم ئادەم تېنى شەكلىدە.                    ئاڭ،ئىدراك  زەررىچە  پەيدا بولمىسا                    ئادەممۇ  ئاتتەك بىر  ئاتتۇر  ئەسلىدە.                     ئات ئۇلۇغ،ئاتسىمان  بەدەنمۇ ئۇلۇغ،                     كۆرەيلى كۆز ئەمەس ئەقىل كۆزىدە.                     ئاڭ،ئەقىل-روھىمىز،-ئادەملىكىمىز                     بار  تەڭرى قۇدرىتى  ئاڭنىڭ ئۆزىدە.                     نەزەرنى يۆتكىسەك  جانلىقلارغا بىز،                    ئات –ئۇلۇغ،زەپەرگە بەلگە،سىمۋول،قۇت.                     قالىدۇ مەڭگۈلۈك كۆرۈنۈش بولۇپ،                     ئايغىر تۇياقلىرىدىن چاچرىغان ئوت. (1)-تارىخى ماتىرياللاردا ئاتنىڭ كۆندۈرۈلگەنلىكىگە تۆت مىڭ يىل بولغانلىغى      ئېيتىلىدۇ.              (2)-ھونلارنىڭ 2-ئەۋلاد پادىشاھى باتۇر تەڭرىقۇت ( مىلادىدىدىن ئاۋالقى 209-174- يىللار تەختتە ئولتۇرغان) ئاۋازلىق ئوقيانى كەشىپ قىلغان.   (3)–شەرق،غەرىپ،شىمال،جەنۇپتىن ئىبارەت تۆت تەرەپ قەدىمكى دەۋىرلەردە كۆك،ئاق قىزىل،قارا قاتارلىق رەڭلەر ئارقىلىق بىلدۈرۈلگەن.ياكى رەڭ تەرەپلەر بەلگىسى بولغان. (4)-مىلادىدىن بۇرۇنقى 199-يىلى 1-ئايدا خەن گاۋزۇ-لىيۇ باڭ بەيدىڭ تېغىدا ھونلارنىڭ 400 يۈزمىڭ كىشىلىك قوشۇنىنىڭ قورشاۋىدا قالغان ئەھۋالنى كۆرسىتىدۇ ( 5)- مەزكۇر ئۈچ مىسرا-( ئابدۇرھېم راخمان تەرجىمە قىلغان« خەن سۇلالىسى بىلەن ھونلارنىڭ 300 يىللىق ئۇرىشى» ناملىق  كىتاپنىڭ 30-بېتىدىن ئېلىندى) (6)نىل-دۇنيادىكى بىرىنچى چوڭ دەريا –ئافىرقىدىكى نىل دەرياسىنى كۆرسىتىدۇ.                                2010-يىل،بۈگۈر

ALPAMIX

	1؛    مەن  ئەڭ ياخشى شئېىرلىرىمنى « تارىمنى بوۇيلاپ » ناملىق شئېىرىمنىڭ كەينىگە ئىنكاس شەكلىدە يوللاپ بېرىمەن.ئايرىم تېما سۈپىتىدە يولىمايمەن. بۇنىڭدىن كىيىن « تارىمنى بويلاپ » دىگەن ماۋزۇ مېنىڭ    مەزكۇر مۇنبەرگە يوللايدىغان شئېىرلىرىمنىڭ ئومۇمى ماۋزۇسى بولۇپ قالىدۇ.باشقۇرغۇچىلار خەۋەر تېپىپ قالسا. 2؛ تورداشلار مېنىڭ شئېىرلىرىمنى كۆرمەكچى ۋە ئىنكاس يوللىماقچى بولسا مۇشۇ ماۋزۇ ئاستىغا مەرەھەمەت قىلسا بولىدۇ.مەن تورداشلارنىڭ شئېىرغا بولغان تەلىپىنى ئورۇنلاشتا بىر كىشىلىك رول ئويناشقا ئىنتىلىمەن.