ئامېرىكىلىق ناخشىچى مەددى جەيىن ئۇيغۇرمۇ

maxim

مەددى جەيىن(Maddi Jane) ئۇيغۇرمۇ

 

مەددى جەيىن(Maddi Jane )، youtube تورى ئارقىلىق نام چىقارغان 13ياشلىق ئامېرىكلىق ناخشىچى،ئۇ ئېيتقان« Rolling In The Deep» دېگەن ناخشىنىڭ چىكىلىش نىسبىتى 23مىليون قېتىمغا يېتىپ،بۇ ناخشىنىڭ قايتا ئېيتقۇچىلارنىڭ ئەڭ يۇقىرى رېكورتى يارىتىلغان،يەنە ئۇ ئېيتقان Jessie J نىڭ«  Price Tag »دېگەن ناخشىنىڭ چىكىلىش قېتىم سانى 42مىليونغايەتكەن،بىر ئاي ئىلگىرى ئېلان قىلغان If this was a movieدېگەن ناخشىمۇ ھازىرغىچە ئىككى مىليون قېتىم چىكىلگەن.ئۇنىڭ youtube دىكى مۇزىكا قانىلى ھازىر دۇنيادا 48-ئورۇندا تۇرغان.

youtube قايتا ئېيتىش(داڭلىق چولپانلارنىڭ ناخشىنى ئېيتىپ youtube غا يوللاش)ئەۋج ئالغاندىن كېيىن،بۇ ئارقىلىق خېلى خېلى چولپانلارمۇ يېتىشىپ چىقتى.مەسلەن جاستىن بېبىر ،گريسون شانىس دېگەندەك.لېكىن ئۇيغۇرلار ئۇلارنىڭ ھېچقايسىسىغا قىزىقىپ باققان ئەمەس،لېكىن بۇ13ياشلىق ئامېرىكىلىق قىزچاق ناھايىتى تىزلا ئۇيغۇرلار بولۇپمۇ ئۇيغۇر تورداشلار خېلىلا تونۇيدىغان شەخىسكە ئايلاندى.سەۋەبى دەسلەپتە ئۇ توغرىسىدا ئۇنى ئۇيغۇر ئىكەن،دادىسى ئۇيغۇر،ئاپىسى ئىسپان ئارغۇن ئىكەن دېگەن گەپنىڭ ئېنتېرنېتتا كەڭ تارقىلىشى، بىزنى پۈتۈن دۇنيا تور سەيناسىدا خېلى گەۋدىلىك كۆزگە كۆرۈنۈۋاتقان بۇ ناخشىچىدىن ئىپتىخارلىنىش تۇيغۇسىغا چۆمدۈرۈۋەتتى.

ئەمدى بىر قاتار ھاياجانلىنىشلاردىن كېيىن سوغۇققانلىق بىلەن قارايدىغان بولساق،مەددى جەيىندە راستىنلا ئۇيغۇر قېنى بارمۇ؟كىشىلەر نېمىگە ئاساسلىنىپ ئۇنى ئۇيغۇر دەيدۇ؟ئەڭ دەسلەپتە سىنا مىكرو بىلوگىدا بۇ قىز توغرۇلۇق ۋىدىئو تارقالغاندا زادى نېمە ئۈچۈن ئۇيغۇر دەيدىغانلىقى توغرۇلۇق ھېچقانداق چۈشەندۈرۈلۈش بېرىلمەيلا ئۇنى ئۇيغۇر ،ئۇيغۇرچە ئىسىمىنى مەدەنىيەت(يېقىنىدا تېخى ئۇنىڭ ئۇيغۇرچە ئىسمى مەدىنۇر ئىكەن دېگەن گەپ چىقتى،ئىشقىلىپ كىشىلەر «مەد»دېگەن گەپ بار ئۇيغۇرچە ئىسىملارنىڭ ھەممىسىنى بىرەرقۇردىن دەپ سىناپ باقىدىغان ئوخشايدۇ) دېگەن،بىز ۋىدىئونى چەككەندە ئۇنىڭدا مەددىنىڭ داڭلىق رىياسەتچى Ellen بىلەن پاراڭلىشىۋاتقانلىقىنى،ناخشا ئېيتقانلىقىنى،ئۆزىنىڭ ئۇيغۇر ۋەياكى باشقا مىللەتگە تەۋە ئىكەنلىكى توغرۇلۇق ھېچنىمە دېمىگەنلىكىنى كۆرەلەيمىز.

 

 مەددى جەيىننىڭ facebookتىكى ھېساباتى 

مەددى جەيىننىڭ facebook twitter ىدىكى ماتىرىياللىرىدا ئۆزىنىڭ تۇغۇلغان كۈنى (1998-يىلى 9-ئاينىڭ 4-كۈنى)ھەم تۇغۇلغان جايى (چىكاگو)ئىكەنلىكىلا ئېنىق يېزىلغان،

تىۋىتتىردىكىmaddijanemusic

 

(مەن تىۋىتتىردىكى بىرقەدەر كۆپ ئۇچۇر يوللىنىدىغان (maddijanemusic)دىكى بۇ يېرىم يېل ئىچىدە يوللانغان ئۇچۇرلارنى كۆرۈپ چىقتىم، ئۇنىڭدا مەددىنىڭ ئاتا-ئانىسى،قان سېستىمىسى توغرۇلۇق بىرەر نەرسە يوللىغانلىقىنى تاپالمىدىم،لېكىن ئەگەر كاللامدا مەددى ئۇيغۇر دېگەن گەپ بولمىغان بولسا مەن مەددىدە فىلىپپىن قان سېستىمىسى بار ئىكەن دەپ قالغان بولاتتىم ،چۈنكى تۋىتترىدا مەددى فىلىپپىن توغرۇلۇق ئېيتقان سۆزلەر ھەم ئۇنىڭ فىلىپپىنلىق مەستانىلىرى ناھايىتى جىق، مەددى بۇنى بىرقانچە يەردە تىلغا ئالغان) .

ئۇنىڭدىن باشقا مەددى جەيىن ئۇنىڭ myspace,tumblrلاردىكى بەتلىرىدىمۇ ئوخشاشلا ئۆزىنى ئۇيغۇر دېمىگەن ھەم (مەددى بەلكىم ئۇيغۇر بولۇشى مۇمكىن)دېگەن خىيالنى شەكىللەندۈرىدىغان ئۇيغۇرلار ياكى شىنجاڭ ۋە ياكى باشقا ئۇيغۇرلار يۇرتىغا مۇناسىۋەتلىك ھېچقانداق نەرسە يوللىمىغان(مەن يۇقىرىدا دېگەندەك ئۇنى ئاسانلا فىلىپپىنلىق ئوخشايدۇ دەپ قىلىشىڭىز مۇمكىن).

 

ئەمدى دىققىتىمىزنى يەنە باشقا نوقتىدىن چىقىش قىلىپ تۇرۇپ يەنە بىر ئويلىنىپ باقايلى: مەددى تېخى ھەقىقىي تونۇلغان داڭلىق شەخىس ئەمەس،ئۇ تېخى ئالبۇم چىقارمىدى ۋە ياكى بىرەر شېركەت بىلەن توختام تۈزگەنلىكى توغرۇلۇقمۇ خەۋەر يوق،ۋىكىپىدىيە قاتارلىق بىرقەدەر ئىشەنچىلىك تورلاردا ئۇنىڭ تەرجىمىھالى  ھەم يوق،بۇنداق ئەھۋالدا مەددى جەيىننىڭ ئىجتىمائىي ئالاقە تورلىرى يېزىپ قالدۇرغان سۆزلىرىلا بىزنىڭ ئۇنى يۈزەكى چۈشىنىشىمىزنىڭ مەنبەسى بولالايدۇ.

ئۇنىڭ دادىسى ئۇيغۇر ئىكەن دەپ گەپ توغرۇلۇق .(ھېلىقى سۆھبەت پروگراممىسىدىكى دادىسىنىڭ سۈرىتىنى كېسىپ چاپلاپ)سۈرەتتىن مەددىنىڭ دادىسىنى ئۇيغۇر ياكى ئەمەس دەپ بەلگىلەش تەس .مەددى ئۆزىنىڭ تولۇق ئىسىمىنى ئېنىق ئېيتمىغان، لېكىن ئۇنىڭ تولۇق ئىسىمنىڭ مەددى جەيىن گۇزمان موراتو بولوشى ئېھتىمالغا بىرقەدەر يېقىن،مۇشۇ ئىسىمدىكى بىر facebook بار.ھەم توردىمۇ خېلى كۆپ يەردە ئۇنىڭ فامىلىسى گۇزمان موراتو دەپ ئېلىنغان.ھەممىمىزگە موراتونىڭ ھېچقاچان ئۇيغۇرلارنىڭ ئىسمى بولۇپ قالمايدىغانلىقى ئايان. موراتو دېگەن ئىسىم بەلكىم پورتوگالچە ئىسىم بولۇشى مۇمكىن.سىتاتىسكىدىن قارىغاندا بۇ ئىسىم بىرازىلىيەدە ئۇندىن قالسا فىلىپپىندا كۆپ ئۇچرايدىكەن.

 

بەلكىم بەزىلەر ئۇنىڭ بەيدۇ بەيكىغا يېزىلغان ماتىرىيالىنى ئىسپات قىلىشى مۇمكىن،لېكىن تورداشلارغا ئايان بولۇشى كېرەككى، بەيدۇ بەيكىنى بەيدۇ تورىغا ئەزا بولغان ، ئەزالىق دەرىجىسى مەلۇم ئۆلچەمگە يەتكەن كىشىنىڭ ھەممىسى يېزىپ تولدۇرالايدۇ،ئۇنىڭ توغرۇلۇق،ئىشەنچىلىك ماتىريال مەنبەسى بولۇش دەرىجىسى ئانچە يۇقىرى ئەمەس.

يۇقىرىقىلاردىن كۆرىۋىلىشقا بولىدۇكى، ھازىرچە تېپىلغان ئىشەنچىلىك مەنبەلەردىن مەددى جەيىننىڭ مىللىي تەۋەلىكىگە ئېنىق ھۆكۈم قىلغىلى بولمايدۇ،مۇشۇنداق ئەھۋالدا كىملەرنىڭ نېمە ئۈچۈن ،ئۇنى ئۇيغۇر دەپ گەپ تارقاتقانلىقى كىشىنى ئەجەپلەندۈرىدۇ. ھازىرغىچە ئۇنىڭ ئۇيغۇر ئېكەنلىكىگە ئىسپات بولغۇدەك بىرەرمۇ ئادەم ئەنسىرىمەي سۆزلىگۈدەك پاكىت يوق؟! ئۇنداق بولسا ئۇنى ئۇيغۇر دېگەنگە ئىشەنچىلىك ئىسپات زادى قەيەردە؟ بۇ خەۋەر دەسلەپتە زادەى كىمنىڭ قولىدىن چىقتى،ئىشەنچىلىك ئىسپاتىچۇ ؟ ھازىر جوڭگۇدىكى ھەممە تورلاردا مەددى جەيىن ئۇيغۇر دەپ تونۇلۇپ بولدى،ئەلۋەتتە ئۇيغۇرچە تور بېكەتلەردىمۇ بۇ ئەھۋال ئوخشاش.(بەيدۇ بەيكى،بەيدۇ چاپلىمىخانا،رېن رېن تورى،سىنا مىكرو بىلوگ ھەم كۆپلىگەن ئۇيغۇرچە تور بېكەتلەردە ....).

تىۋىتتىردا ناخشا مەستانىلىرى قالدۇرۇپ قويغان خەتلەر سىتاستىكىسى

 

ئەمدىلا 13ياشقا كىرگەن،دۇنيانىڭ ھەرقايسى جايلىرىدا مەستانلىرى بولغان (تىۋىتتىردا ناخشا مەستانىلىرى قالدۇرۇپ قويغان خەتلەردىن كۆرىۋىلىشقا بولىدۇ)،ئىستىقبالى ئىنتايىن پارلاق بۇ ناخشىچى قىز ئەگەر راستىنلا ئۇيغۇر پەرزەنتى بولسا،بۇ ھەقىقەتەن كىشىنى پەخىرلەندۈرىدىغان ھەم خۇشال قىلدىغان ئىش بولغان بولاتتى.لېكىن ئەگەر ئۇنداق بولماي قالسا،بىز ئۇنى توردا ئۇيغۇر ئىكەن دەپ داۋراڭ سېلىپ قويساق، كېيىنچە باشقا كىشىلەر ئالدىدا بەك ئوسال ئەھۋالغا چۈشۈپ قېلىشىمىز ھەم ئۆزىمىزمۇ ئۈمىدسىزلىنىپ قېلىشىمىز مۇمكىن.

شۇڭا مەن خېلى ئوزۇن ۋاقىت ماتىريال كۆرۈش ۋە رەتلەش،تەھلىل قىلىش ئارقىلىق ئەلكۈيى تورىغا مەددى جەيىن(Maddi Jane) ئۇيغۇرمۇ؟ ناملىق بۇ تېمىنى يوللاش ئارقىلىق كەڭ ئۇيغۇر قېرىنداشلارنىڭ ئېنىق ئىشەنچىلىك ئىسپاتى بولمىغان ئەھۋال ئاستىدا داڭلىق شەخسلەرگە،ئىش ھەرىكەتلەرگە ھاياجانلىنىشتىن بەكرەك سوغۇققانلىق بىلەن ئويلىنىپ تۇرۇپ قارار چىقىرىشىنى سوراپ مەزكۇر تېمىنى يوللىدىم،

 

تېما تەكرارلاپ،شاخ-شاخلارغا ئايلىنىپ كىتىشىنىڭ ئالدىنى ئېلىش ۋە پىكىر قالايمىقانلىقى بۇلۇشنى توسۇش ئۈچۈن ھەرقانداق سەۋەب بىلەن بۇ تېمام ئەلكۈيىدىن باشقا تور بېكەتلەرگە يۆتكەلسە بولمايدۇ.

guldurmama

گۇزمەن موراتو( گۇمىلىق مۇرات) موراتو دېگەن مۇرات دېگەنلىك ئېنگىلىزىچە ئۆزىمىزىنى خۇش قىلغىلى ئامراق ئوخشايمىز شۇ

@qawandaz@

ھازىر نۇرغۇنلىغان كىشىلىرىمىز ئۆزىمىزنىڭ باشقىلاردىن قېلىشمايدىغانلىقىمىزنى ئىسپاتلاش ئۈچۈن بولسا كېرەك تولۇق ئىسپاتى يوق ئەھۋال ئاستىدا مەشھۇر شەخىسلەرنىڭ مىللەت تەۋەلىكىنى ئۇيغۇر قىلىپ تورلاردا ئۆزلىرىنىڭ <<ھاياجان>>لىرىنى تارقىتىپ يۈرىيدۇ. ئەكسىچە بۇنداق تېخى مىللىي تەۋەلىكى ئېنىق بولمىغان ئەھۋال ئاستىدا ئۆز ئالدىمىزغا مىللەت تەۋەلىكىنى <<پىچىۋېتىش>> ئەخمىقانىلىق دەپ قارايمەن.

بېشىدا شۇنداق ھاياجانلانغان خەلقىمىزنى بەزەنلەرنىڭ يالغاي-ياۋداق سۆزلىرى، <<پەرەز>> لىرى قايمۇقتۇرۇپ بىلىپ بىلمەي تۇيۇق يولغا كىرگۈزۈپ قويماقتا. ئاخىرىدا بولسا مىللەت تەۋەلىكىنىڭ خاتا <<پىچىلغان>>لىقىنى بىلگىنىمىزدە بۇ مىللىتىمىزنى بىلىپ-بىلمەي چۈشكۈنلۈككە ئېلىپ بارىدۇ. بولۇپمۇ ئۆزلىرىنى <<ئالىم>>، <<مۇتەخەسىس>> چاغلايدىغان كىشىلىرىمىز ھېچ بىر ئاساسىي يوق قىسقىسى ھېسيات بىلەن ۋە ئۆزىنىڭ ئاللا قانداقتۇ مىكرو بىلوگلاردىكى، ئاۋام تورلىرىدىكى ئابرويىنى، تەسىر كۈچىنى ياكى ئاللا قانداقتۇر زىيارەت قېتىم سانىنى ئاشۇرۇشنى مەقسەت قىلىپ بىر پۈتۈن مىللەتنىڭ ھېسياتىغا ئازار بېرىپ قويۇشنى ئويلىماي ياكى ئويلىيالماي ئۆزىنىڭ بۇ ھەركەتلىرىدىن ۋاز كېچەلمەي كېلىۋاتىدۇ.

تېخى يېقىندىلا بىرەيلەن شىنلاڭ مىكرو بىلوگىدا ئۇيغۇرلار 1900-يىلى قەشقەردە ئاتۇش ئىكساق كوماندىسى ئەنگىلىيە، گىرمانىيە، ئىسپانىيە قاتارلىق دۆلەتلەرنىڭ <<چولپانلىرى>> نى يېڭىغان دەپ سەپسەتە تۇغدۇرۇپ خەلقىمىزنىڭ ھېسىياتچانلىق پىسخىكىسىدىن پايدىلىنىپ ئۆزىنىڭ نېمە مەقسىتى بارلىقىنى بىلگىلى بولمايدىغان سۆزلىرىنى تارقاتتى ۋە نۇرغۇنلىغان ئۇيغۇر داڭلىق كىشىلىرىنىڭمۇ بىلىپ بىلمەي تارقىتىش ئوبىكتىغا ئايلىنىپ قالدى ۋە يامان تەسىر ئېلىپ كەلدى.  ئەسلى توغرىسى بولسا 1927-يىلى قەشقەردە ئاتۇش ئىكساق كوماندىسى بىلەن ئەنگىلىيە، شىۋىتسىيە كونسۇل كوماندىلىرى مۇسابىقىغە چۈشۈپ 2:1، 7:0 نەتىجە بىلەن كونسۇل كوماندىلىرىنى ھەيران قالارلىق ھالدا مەغلۇپ قىلىپ خەلقىمىزنى ۋە ئۇلارنى ھاڭ-تاڭ قالدۇرغان ئىدى. لېكىن بۇ ئەمەلىي پاكىتقا ئېغىر دەرىجىدە خىلاپلىق قىلىنىپ يېزىلغان ئويدۇرما سۆز تېخىچە ئۆچۈرىۋېتىلمەي كەلدى.

يەنە بىرسى بولسا روسىيە تەۋەلىكىدىكى قىرغىزىستاندا تۇغۇلغان سالىجان شەرىپوفنىڭ مىللەت تەۋەلىكى بولۇپ تېخى ئېنىق پاكىت يوق ئەھۋال ئاستىدا ئۇيغۇرغا تەۋە قىلىۋەتكەنلىكى بولدى ۋە بۇنىڭغا چۈشكەن ئاچچىق كۈلكىلىك ئىنكاسلارنىڭ ئاساسىنىڭ ئاجىزلىقى بىزنى يەنە بىر قېتىم نومۇسقا قويىدىغان ئىش بولدى دەپ قارايمەن. بەزى مەنبەلەردە قىرغىزلىكى قەيىت قىلىنغان بولسا ئۆزبىكلەر BBC نىڭ ئۆزبىك رىياسەتچىسىنىڭ ئاللا بۇرۇن تونۇلغان ۋاقىتتا زىيارەت قىلغانلىقىنى ۋە ئۆزبىكىستاندىكى بەزى مەسىلىلەرگە قانداق قارايدىغانلىقىنى سورىغان زىيارەت خاتىرىسى بار ئىكەنلىكىنى كۆرسۈتۈپ ئۆتكەن مەنبەلەرمۇ ئۇچرىدى. لېكىن ئۇيغۇر ئىكەنلىكى توغرىسىدىكى خەۋەر مەنبەلىرىنى ئۇچراتمىدىم. بەزەنلەر ئۈرۈمچىلىك ئىدى دەپمۇ يېزىپتۇ. مۇشۇنداق مىللىي كىملىكى بىزگە ئېنىق بولمىغان ئەھۋال ئاستىدا دېيىلگەن <<ھاياجان>> سۆزلىرىمىز بىزنىڭ ئۆزىمىزگە بولغان ئىشەنچىمىزنى ئاستا-ئاستا سۇسلاشتۇرۇپ ماڭىدۇ. خەلقىمىزنىڭ بۇنىڭدىن كېيىن بۇنداق ئاساسسىز، پاكىتسىز ھالدا دېيىلگەن سۆزلەرگە شۇ سۆزلەرنى دېگۈچىلەرگە ئىسپات كۆرسۈتۈش كېرەكلىكىنى ھەرگىزمۇ ھاياجان بىلەن باشقىلارنىڭ ھەرخىل مۇددىئادا يوللىغان سۆزلىرىنىڭ <<ئاكتىپ>> قوللىغۇچىسى بولۇپ كەتمەسلىكىنى قىسقىسى ئەقلىي بىلىش بىلەن خەلقىمىزگە ياخشى بىلىملەرنى يەتكۈزىشىنى ئۈمىد قىلىمەن.

abdulla204

      ئەسسالامۇ ئەلەيكۇم!

شۇنداق ئورۇنلۇق پىكىر بوپتۇ.
ئادەتتە كىچىككىنە بىر نەرسىلەرنى بىلىپلا بىر ئۇيغۇر مىللىتىگە تەۋە گەپ قىلىش تولىمۇ گۆدەكلىك.
تورداشلار تەمكىن، سالماق، سەگەك، ئاقىل بولايلى!

دەلىل ئىسپاتلار تولۇق بولغاندا، ئۇلارمۇ ئۆزى مەن ئۇيغۇر دەپ پەخىرلىنەلىسە، ئاندىن بىز پەخىرلەنسەكمۇ يىتەر...............

      ئەلۋەتتە مىللىتىمىز ئىچىدىن داڭلىقلار تەرەپ - تەرەپتىن چىقىۋاتىدۇ، چىققان ۋە يەنە تىرىشساق يەنە تېخىمۇ  كۆپلەپ چىققۇسى، ئۇلارنى بار كۈچىمىز بىلەن قوللايلى مەدەت بېرەيلى! ئۇلارنىڭ ۋە ھەممىمىزنىڭ ئىشلىرى ئوڭۇشلۇق بولسۇن!
   
     ئاساسسىز گەپ قىلمايلى! كونىلار " توۋلىغان ناۋايىنىڭ، نېنى كىچىك " دەپ بىكار دېمىگەن.

dilkayip

ھەي .....   
بىرزامانلا < شەكىرا > نىمۇ ئويغۇركەن دەپ يۇرگەنلەمۇ چىققان .    دىمىسمۇ ئۇنى-بۇنى دەپ ئوزىمىزنى خوش قىلىپ يۇردىكەنمىزغۇ -تاڭ !

nimjan

نېمانداق قاملاشمىغان خەق بىز ئۇيغۇرلار - ھە!
كىم ئۆزىنى ئۆزى ئۇيغۇر دېسە شۇ ئۇيغۇردۇر، بولمىسا ئۇيغۇر نەسىللىك، ئۇيغۇر ئەسلىلىك ئادەملەر ئۆزىنى ئۇيغۇر دېمىسە ئۇ ئۇيغۇر ئەمەس! بىر زامانلاردا كەرىم مەسۈموۋنى ئۇيغۇركەن، دەپ تالاش-تارتىش بولدى نەدىكى بىر پۇللۇق پايدىسى يوق ئىشلارغا، يەنە بىر ئالەم ئۇچقۇچىسى ئۇيغۇرمىش، دەپ خۇش بولۇپ يۈردى، يەنە تېخى "ئۇيغۇر" دېگگننىڭ نېمىلىكىنى بىلمەيدىغان ماۋۇ قىزچاقنى شۇنداق دەپ قالغان بولسا-ھە ... ھەي بىچارە بايقۇشلىقىمىز!

baburxah

دىيارىمىزدىن چىققان ھەر ساھا،ھەر كەسىپتىكى سەرخىللىرىمىزنى كۆزىمىزگىمۇ ئىلىپ قويمايمىز،ئۇلارنىڭ ئەمگەكلىرىنى،نەتىجىلىرىنى ئاللا قانداق چەتئەلنىڭ سەرخىللىرى بىلەن سىلىشتۇرۇپ چۆكۈرۈشكە ئاران تۇرىمىز،ياراتمايمىز.لىكىن چەتئەلدىكى مۇنداقلا كۆزگە كۆرىنىپ قالغانلارنى بولسا قارغۇلارچە تالىشىپ كىتىمىز.ئۇلار ئۇيغۇرنى بىلەمدۇ،بۇ مىللەت نامىدىن پەخىرلىنەمدۇ ؟ بۇنىڭ بىلەن ھىساپلاشمايمىز.
  مەن ئۇيغۇرۇمنى سۆيىمەن!ئۇيغۇرلۇقۇمدىن چەكسىز پەخىرلىنىمەن!!!!!!!!!

yawuzbag

ئوكرائىنانىڭ سابىق پرېزىدېنتى لېئونىد كوچمانىڭ ئالاﻫىدە تەكلىپى بىلەن كەلگەن ئۇيغۇر يىگىتى مۇراد ناسىروف بۇ ناخشىنى مۇﻫەببەت ۋە ئىشتىياق بىلەن ئاخىرلاشتۇردى ۋە تاماشىبىنلارغا "بۇ ناخشا سىلەرگە ياقتىمۇ؟ سىلەر مېنىڭ قايسى مىللەتتىن ئىكەنلىكىمنى بىلەمسىلەر؟ كىمدە كىم توغرا جاۋاب بېرەلىسە كاتتا مۇكاپات بىلەن تارتۇقلايمەن" دېگىنىچە مېرسىدىس ماركىلىق ئېسىل پىكاۋىنىڭ ئاچقۇچىنى پۇلاڭلاتتى.
-‏-‏- قازاق - ؟ - رۇس - ؟
- ياق، مەن ئۇيغۇر يىگىتى، ﻫازىر ئېيتقىنىم ئۇيغۇر خەلق ناخشىسى.
سەﻫنىگە گۈل ئېلىپ چىققان ئىككى نەپەر ئۇيغۇر پولكوۋنىك كۆزلىرىگە ياش ئالغىنىچە، مۇرادنى باغرىغا باستى .
مۇراد ناسىروف ناخشىلىرىنىڭ مۇخلىسى، پرېزىدېنت كوچما ئەپەندى بۇ مەنزىرىدىن تەسىرلەنگەنلىگىدىن ئاتايىن سەﻫنىگە چىقىپ، مۇرادقا يۇقىرى باﻫالارنى بەردى.

0991sumruh

ئورۇنلۇق پىكىر ! ئۇ قىزچاقنى ئۇيغۇر دەۋالمىساقمۇ،بىزدە كام ئەمەسقۇ.

مۇبارەك

بۇ قىزنىڭ ئۇيغۇر ياكى ئەمەسلىكىگە مەن ئەزەلدىن قىزىقمىغان، بىراق ناخشىسىنى ياقتۇرۇپ ئاڭلايدىغانلارنىڭ بىرى.

ئىكراندا غىل-پال كۆرۈنۈپ ئۆتۈپ كەتكەن دادىسى...قاتارلىق سەۋەبلەرنى ئاساس قىلىۋېلىپ «ۋاي ئۇيغۇركەن» دەپ جار سېلىپ يۈرسە قاملاشماس. كەينىگە بېرىپ ئۇنداق بولماي قالسىچۇ. شۇ قىز ئۆزى مەن ئۇيغۇر دېسە ھېساب. ئۇنىڭ ئۈستىگە بۇ قىزنىڭ دادىسى راست ئۇيغۇر بولسىمۇ، ئاپىسى ئۇيغۇر ئەمەس، بۇ ئارىلاش قان سېستىمىسىغا تەۋە دېگەن گەپ.

مەددىنىڭ كىيىنىشىگە ھەر قېتىم قارىسام تولۇق ئوتتۇرىدىكى ۋاقىتلىرىم ئېسىمگە كېلىدۇ. ئەلۋەتتە، مەن ئۇ چاغلاردا 13ياش ئەمەستىم.

ھاززىر ئېيتىۋاتقان ناخشىلىرى ھەرگىزمۇ ئۆزىنىڭ ئەمەس، پەقەت تەقلىد قىلىپ ئېيتىۋاتقان ناخشىلار. مەن مەددىنىڭ ئۆزىگە خاس بولغان ئېيتىش ئۇسلۇبى يارىتىپ، ئىجادىي ناخشىلارنى مەيدانغا كەلتۈرۈپ، يېڭى-يېڭى ناخشا پلاستىنكىلىرىنى چىقىرىشىغا تىلەكداشمەن.