ئۈچبۇلۇڭلۇق جاھاندارچىلىق

mahsat

	ئۈچبۇلۇڭلۇق جاھاندارچىلىق ھەرقانداق ئادەم مەلۇم بىر ئورۇندا مەلۇم ئىشنى قىلىپ مەلۇم كىرىمگە ئېرىشىدۇ. يەنى ئۈچبۇلۇڭلۇق جاھاندارچىلىققا باغلانغان بولىدۇ. بۇ ئۈچبۇلۇڭلۇق جاھاندارچىلىقنىڭ شەكلى : نەدە ئىشلەيسىز؟ نېمە ئىش قىلىسىز؟                                     نېمىگە ئېرىشىسىز؟ بۇ ئۈچبۇلۇڭلۇق مۇناسىۋەت سەۋەب-نەتىجىلىك ھالەتتە بولىدۇ. بىر-بىرسىدىن ئايرىلالمايدۇ. ئۆز-ئارا بىر-بىرسىگە بېقىنىدۇ، ئاكتىپ ياكى پاسسىپ تەسىر كۆرسىتەلەيدۇ. جەمىيەتتە ھەر خىل كەسپىي ساھەلەر بويىچە ئوخشىمىغان ئۈچبۇلۇڭلۇق مۇھىت شەكىللەنگەن بولۇپ، كىشىلەرنىڭ ئادەتتە خىزمەت تاللىشى- كەسپ بىلەن شۇغۇللىنىشى قانداق مۇھىتتىكى ئۈچبۇلۇڭنى تاللىشىدۇر. بەزىلەر بىرلا ئۈچبۇلۇڭغا كۆنۈپ قالىدۇ، بەزىلەر ئۆزىنىڭ ئۈچبۇلۇڭىنى يارىتىدۇ. بۈگۈنكى جەمىيەتتە ھەرقانداق ئادەمنىڭ مەلۇم بىر خىل ئۈچبۇلۇڭلۇق جاھاندارچىلىق مۇھىتى تەرىپىدىن تاللىنىشى ھەرگىزمۇ پىشانىسىگە پۈتۈۋېتىلگەن ئەمەس. يەنى ھەرقانداق ئادەمنىڭ خالىغان ئەمگەك بىلەن شۇغۇللىنىش تەبىئىتى ھەم ئىجتىمائىي ھوقۇقى بولىدۇ. كىشىلەرنىڭ ئەمگەك قىممىتى قانچە يۇقىرى بولسا، ئۇلارنىڭ سېلىشتۇرۇش، ئىجادچانلىق، تەۋەككۇلچىلىك، مۇستەقىللىق، ئۆزىگە ئىشىنىش، باراۋەرلىك قىممەت ئېڭى شۇنچە يۇقىرى كۆتۈرۈلىدۇ. شۇڭا ھەرقانداق بىر ئەمگەكچى ئالدى بىلەن ئۆزىنىڭ جاھاندارچىلىق ئۈچبۇلۇڭىنى ئويلىشى، تاللىشى يەنى نەدە ئىشلەيمەن، نېمە ئىش قىلىمەن، نېمىلەرگە ئېرىشەلەيمەن دىگەننى ئويلاپ، ئۆزىنىڭ قىزىقىش-ئارتۇقچىلىقى، خاراكتىر ئالاھىدىلىكى، تەربىيىلىنىش ئەھۋالى،ھاياتلىق مەسئۇلىيىتى بويىچە نىشانلىق، پىلانلىق ھالدا ئۈچبۇلۇڭلۇق مۇھىت تاللاپ ھەم شەكىللەندۈرۈپ، ھاياتلىق قىمممىتىدىن بەھرىمان بولۇشى ۋە ئۇنى نامايەن قىلىشى كېرەك. ئۈچبۇلۇڭلۇق جاھاندارچىلىقتا ئادەمنىڭ پوزىتسىيىسى، كەسىپچانلىقى ناھايىتى مۇھىم ئورۇندا تورىدۇ. چۈنكى ئوخشاش ئۈچبۇلۇڭ-بىر خىل كەسىپتە بەزىلەر ئۇتۇق قازىنىدۇ، بەزىلەر ئەل قاتارى ھالغا چۈشۈپ قالىدۇ. ئەمما ھەممە ئادەمنىڭ بىر سوتكىلىق، بىر ئايلىق ۋاقتى ئوخشاش بولىدۇ. ئادەمنى قىممەتكە ئىگە قىلىدىغان ئەمگەكنىڭ قىممىتى ئادەمنىڭ تاللىشى، ۋاقتى، ئىقتىدارى، ئەمگەك قىلىش ئۇسۇلى، تاينىش ۋاستىسى، ئەمگەك قىلىش نىشانى، پىلانى، ئەمگەك مىقدارى قاتارلىق تەرەپلەرگە مۇناسىۋەتلىك بولىدۇ. شۇنداقلا ئادەممنىڭ تەربىيىلىنىشى، مۇھىتى، يېتەكلىنىشى، قىممەت ئېڭى قاتارلىق تەرەپلەرنىڭمۇ تەسىرىگە ئۇچرايدۇ. لېكىن بۇلارنىڭ ھىچقايسىسىنى ئۆزگەرتكىلى بولمايدىغان نەرسىلەر ئەمەس. ئادەمنىڭ ئۆلۈمدىن باشقا ھەممىگە ئىمكانىيىتى بولىدۇ. كىشىلەرنىڭ ئەمگەك ھەققىنىڭ-پۇلنىڭ كېلىش مەنبەسى ئۈچبۇلۇڭلۇق جاھاندارچىلىق ئىچىدە بولىدۇ، شۇنداقلا ئوخشاش بولمىغان ئۈچبۇلۇڭلۇق جاھاندارچىلىق مۇھىتى كىشىلەرنىڭ ئەمگەك قىممىتىگە تەسىر كۆرسىتىدۇ. شۇڭا ئادەم ئەمگىكى قىممەتكە ئىگە بولىدىغان مۇھىتنى تاللاش كېرەك. ئەمگەك قورساق بېقىشلا ئەمەس، بەلكى ئادەمنىڭ قانچىلىك قىممەتكە ئىگە بولۇشىنى بەلگىلەپ قويىدۇ. ئەمگەك ئادەمنىڭ ئالدىغا تاشلانغان ھەرخىل ھالەتتىكى لوق گۆش، ئەمما بۇنىڭدىن قانداق پايدىلىنىش ئەمگەكچىنىڭ سۈپىتى، پوزىتسىيىسىگە باغلىق بولىدۇ. ئوخشىمىغان ئۈچبۇلۇڭلۇق مۇھىت ئادەمگە-ئەمگەكچىگە ئوخشىمىغان تەسىر كۆرسىتىدۇ. دىمەك، جاھاندارچىلىق ئۈچبۇلۇڭىنى تاللىغاندا ئادەمگە ئاكتىپ تەسىر كۆرسىتەلەيدىغان، يېتەكلىيەلەيدىغان، تەربىيىلىيەلەيدىغان، خاراكتىرىنى ئەلا قىلىپ ئۆزگەرتەلەيدىغان، رىقابەت، خۇشاللىق ئاتا قىلالايدىغان، ئەمگىكىنى قىممەتكە ئىگە قىلىپ قەدىر-قىممىتىنى قىلىدىغان، جۈملىدىن ئادەمنى نادانلىقتىن قۇتۇلدۇرۇپ، ئۆسۈپ يېتىلەلەيدىغان كەسىپچانلىقى يۇقىرى مۇھىتنى تاللاش كېرەك. كەسىپچانلىققا تەلىپى يۇقىرى بولمىغان، ئىجادىيلىق، ئاكتىپلىقىنى قوللىمايدىغان، ئىزىدا چۆرگىلەپلا يۈرىدىغان جاھاندارچىلىق ئۈچبۇلۇڭى ئەمگەكچىنىڭ ئېچىلمىغان ئىچكى كۈچلىرىنى قېزىپ چىقالمايدۇ. يەنە بىر تەرەپتىن ئۈچبۇلۇڭلۇق جاھاندارچىلىق ئەمگەكچىدىن، خىزمەتچىدىن بەدەل تۆلەشنى تەلەپ قىلىدۇ. جاھاندارچىلىق ئۈچبۇلۇڭىدا بەدەل تۆلەشنى خالىمىغان ھورۇن ئەمگەكچى قولى قىسقىلىقتىن، بىچارىلىقتىن خالى بولالمايدۇ. جاھاندارچىلىقتا قىيىنچلىقنى يەڭمىسە قېچىپ قۇتۇلغىلى بولمايدۇ. قىيىنچىلىقتىن قاچقانسىرى قىيىنچىلىق ئادەمگە تېخىمۇ كۆپ چاپلىشىۋالىدۇ. ئادەمنىڭ مۇھىتقا تەسىر كۆرسىتىش كۈچىدىن مۇھىتنىڭ ئادەمگە تەسىر كۆرسىتىش كۈچى دائىرە ئىچىدە يۇقىرىراق بولغاچقا، ئالدى بىلەن ئادەم مۇھىت ئالماشتۇرۇپ بېقىپ ئاندىن ئۆزىنى ئۆزگەرتسە، ئادەمنىڭ مۇھىتقا تەسىر كۆرسىتىش كۈچى ۋاقىت مۇساپىسىدە يۇقىرى ئورۇنغا چىقىدۇ. دېمەك، ئۈچبۇلۇڭلۇق جاھاندارچىلىق ئادەمگە بېقىپ ئۆزگىرىدۇ ھەم بىر ئىزىدا توختاپ قالىدۇ. شۇڭا ئەمگەكچىلەر ئەمگەك قىممىتى يۇقىرى بولمىغان جاھاندارچىلىق ئۈچبۇلۇڭىدا بىر ئۆمرىنى زايا قىلىۋېتىشنىڭ ئالدىنى ئېلىپ، ئۈچبۇلۇڭلۇق جاھاندارچىلىق مۇھىتىنى تەۋەككۇلچىلىق بىلەن ئۆزگەرتسە ئۆزلىرىنى ئۆزگەرتىش پۇرسىتىگە ئېرىشەلەيدۇ. نەتىجىدە ئۆزىنى ئۆزگەرتەلىگەن ئادەم ئۆز ئۈچبۇلۇڭىنى ئۆزگەرتەلەيدۇ. باھا بېرىش، تاللاش ئېلىپ بارالايدىغان ئادەم ئۆز ئۈچبۇلۇڭىنى گۈللەندۈرەلەيدۇ. جاھاندارچىلىق ئۈچبۇلۇڭىدىكى ئەمگەكچى ئىش ئورنىنى ئۆزى تاللىۋالغان، ئۆزىنىڭ ئارزۇ قىزىقىشى ئەمەلگە ئاشۇرغان، ئىش ئورنىدىن رازى بولغان بولسا، ئىشنى-خىزمەتنى كۆڭۈل قويۇپ ئەستايىدىل تىرىشىپ قىلىدۇ. ھەرگىزمۇ قاخشاپ ۋايسىمايدۇ. ھورۇنلۇق پۇرسەتپەرەسلىك قىلمايدۇ. ئىش ئورنىدىن پەخىرلىنىدۇ، قىلغان ئىشىنى ياخشى كۆرىدۇ. كەسىپچانلىقنى ئۆگۈنۈپ مەسئۇلىيەتچانلىقىنى جارى قىلدۇرىدۇ. ئاكتىپلىق بىلەن قىلىۋاتقان ئىشىغا ئاتلىنىپ كىرىشىپ كېتەلەيدۇ. ئىجادىيلىق بىلەن يېڭىلىق يارىتىپ يېڭى ئۇسۇل- چارىلەرنى تېپىپ چىقالايدۇ. ئىش ئورنى، قىلىۋاتقان ئىشنى پىلان-نىشانلار بىلەن ئەقىل ئىشلىتىپ تەرەققىي قىلدۇرۇشقا تۆھپە قوشالايدۇ. نەتىجىدە شۇ ئادەم ئىش ئورنى تەرىپىدىن قىممىتى ئېتراپ قىلىنىپ، قەدىرلىنىشكە ئېرىشىپ ئەمگەك قىممىتىمۇ يۇقىرى كۆتۈرۈلۈشكە باشلايدۇ. كىرىمىدىن رازى بولغان، خۇشال بولغان ئادەمنىڭ كەسىچانلىقى تېخىمۇ ئېشىپ، ئىش ئورنىغا مىھرى كۈچىيىپ ئىخىيارسىز ھالەتتە ئۆزىنىڭ ئىقتىدارىنى نامايەن قىلىشقا باشلايدۇ. نەتىجىدە ياخشى سۈپەتلىك ئايلىنىش كېلىپ چىقىپ، ئۈچبۇلۇڭلۇق مۇناسىۋەتنىڭ تەرەققىياتى بارلىققا كېلىدۇ. ئەگەر ئۈچبۇلۇڭلۇق جاھاندارچىلىقتىكى ئەمگەكچى، خىزمەتچى ئىش ئورنىنى، قىلىدىغان ئىشنى ياقتۇرمىسا، كەسپىگە قىزىقمىسا، كۆڭۈل قويمىسا بۇنداق ئەمگەكچى ئاكتىپ بولمايدۇ، ئەستايىدىل بولمايدۇ، مەسئۇلىيەتچان بولمايدۇ، كۈچ چىقارمايدۇ، بەدەل تۆلىمەيدۇ، تۆھپە قوشمايدۇ. قاقشايدۇ، ۋايسايدۇ، نارازى بولىدۇ. كەسىپچانلىقىنى يۇقىرى كۆتۈرۈشنى خالىمايدۇ. ھورۇنلۇقتا ئۈلگە بولغۇدەك خاسلىق يارىتالايدۇ. نامراتلىقتىن قوتۇلالمايدۇ. ئەمگەكنىڭ ئۆز ھاياتىنىڭ ئىنىرگىيە كۈچەيتكۈچىسى ئىكەنلىكىنى چۈشەنمەيدۇ. ئەمگەككە دۈشمەنلىك بىلەن مۇئامىلە قىلىپ، چۈشكۈنلۈك، ئۈمىدسىزلىك، ئىشەنچسىزلىك بىلەن ھاياتلىق ئىنىرگىيىسىنى بېكىرىغا خورىتىپ تۇرمۇشنىڭ قۇلىغا ئايلىنىپ قالىدۇ. ئەمگەكچى خىزمەتچىلەرنىڭ ئۈچبۇلۇڭلۇق جاھاندارچىلىق ئەھۋالى ئۇلارنىڭ ئەمگەك قىممىتىنىڭ، پۇلىنىڭ كېلىش مەنبەسىنىڭ ئوخشىماسلىقىغا بېقىپ پەرقلىق بولىدۇ. ھەرخىل كەسىپتىكى ئۈچبۇلۇڭلاردىكى ئەمگەك قىممىتى، ۋاقتى، ئەركىنلىكى، ئۈنۈمى، ئېھتىياجى، تېخنىكا مەشغۇلاتى ئوخشىمىغانلىقىدىن كىشىلەر ئۆزلىرى تاللىغان، تاللانغان، يۈزلەنگەن، مەجبۇرىي بولغان ئەمگەك مۇھىتلىرى ئارقىلىق ئەمگەك ھەققىنىڭ كېلىش مەنبەسىنى شەكىللەندۈرىۋالىدۇ. ئەمگەك، خىزمەت ھەققى-پۇل ئادەم ئەمگىكىنىڭ جەمىيەتتە ئىشلەتكىلى بولىدىغان قىسمى. دىمەك، ئادەم ئەمگىنىڭ قىممىتى قانچە يۇقىرى بولسا جەمىيەتتە تاپىدىغان، خەجلەيدىغان پۇلىمۇ شۇنچە كۆپ بولىدۇ. خىزمەت دىمەك-ئەمگەك قىلىش دىمەكتۇر. ئەمگەك قىلىش يالغۇز دېھقانچىلىقتا كەتمەن چېپىشلا ئەمەس، مەيلى جىسمانىي ئەمگەك ياكى ئەقلى ئەمگەك بولسۇن ئوخشاشلا قىممەت يارىتىش مەقسەت مەسئۇلىيىتى بولىدۇ. شۇڭا ھەرقانداق ئەمگەكنىڭ ئىجتىمائىي-ئىقتىسادى قىممىتى بولىدۇ. ئادەمنىڭ جىسمانىي-ئەقلى جەھەتتىن كۈچ ، زېھىن سەرپ قىلىپ ئەمگەك قىممىتى ھەققى-پۇلغا ئېرىشىشى نورمال ئەھۋال. ئەمما جەمىيەتتە ھەممە ئادەم ئەمگەك قىلغان بىلەن بەزىلەر كۆپ پۇل تاپالايدۇ، بەزىلەر كۆپ پۇل تاپالمايدۇ. چۈنكى ئادەملەرنىڭ ئەمگىكىنىڭ قىممىتىدە پەرق بار. يەنى چوڭ جەھەتتىن ئېيتقاندا ھەرخىل ئەمگەكچى، خىزمەتچىلەرنىڭ ئەمگەك ھەققى، پۇلنىڭ كېلىش مەنبەسى ئوخشىمايدۇ. بەزىلەرنىڭ پۇلىنى باشقىلار بېرىدۇ، بەزىلەرنىڭ پۇلىنى باشقىلار تېپىپ بېرىدۇ، بەزىلەر پۇلىنى ئۆزلىرى تاپىدۇ، بەزىلەرنىڭ پۇلىنى پۇل تېپىپ بېرىدۇ، يەنى مائاش ئالىدىغانلارنىڭ پۇلىنى باشقىلار، ئىدارە –ئورگان، كارخانا، شىركەتلەر بېرىدۇ. قانچىلىك بېرىدۇ؟ قانداق ئىشلىتىدۇ؟ ئىشلىتەمدۇ، ئىشلەتمەمدۇ؟ بۇنى خىزمەتچى، باشقىلاردىن پۇل ئالغۇچى بېكىتەلمەيدۇ. پۇلنى باشقىلار بېرىدىغانلىقى ئۈچۈن تاپماقچى، ئېرىشمەكچى بولغان پۇلنى ئۆزلىرىنىڭ ئىرادە، ئارزۇسى بويىچە بولۇپ كېتەلمەيدۇ. نەتىجىدە بەرگەنگە شۈكرى دەپ ئۆتىدىغان گەپ. دېھقانلار، تىجارەتچىلەر پۇلنى-ئەمگەك ھەققىنى ئۆزلىرى تاپىدۇ. بۇلارغا ھىچكىم مائاش بەرمەيدۇ. ئۇلارنىڭ ئىشىنى بىركىم باشقۇرۇپ كەتمەيدۇ،ۋاقتىغا بىر كىم ئارىلاشمايدۇ. ئاز تاپامدۇ، جىق تاپامدۇ ئۆزلىرىنىڭ ئىختىيارىدىكى ئىش. ئۇلارنى بىرەر ئۇرۇن دېھقانچىلىققا ياكى تىجارەتكە ئورۇنلاشتۇرۇپ قويمايدۇ ياكى ئىشتىن قالدۇرالمايدۇ. بۇ ئۇلارنىڭ ئۆزلىرىنىڭ تاللىشىدىن بولىدۇ. بۇلاردا پۇرسەت، ئۇسۇل مۇھىم ھېسابلىنىدۇ. كارخانا ، شىركەت، ئىدارە ئورگانلارنىڭ پۇلىنى باشقىلار تېپىپ بېرىدۇ. ئۇلارنىڭ نۇرغۇن خىزمەتچىلىرى ھەم دۆلەت ھاكىمىيىتىنىڭ باج تۆلىگۈچىلىرى، پۇل مالىيە سېستىمىسى بۇلىدۇ. باشقۇرۇش،نىشان، پىلان، تەمىنات، كاپالەت ياخشى بولسىلا نۇرغۇن كىشىلەر ئۇلارغا ئىشلەپ پۇل تېپىپ بېرىدۇ. پۇلىنى باشقىلار تېپىپ بېرىدىغانلار مالىيە ئەركىنلىكىگە ئېرىشكەن بولىدۇ. ئۇلارنىڭ ئەمگىكىنىڭ قىممىتى ناھايىتى يۇقىرى بولىدۇ. پۇلى پۇل تېپىپ بېرىدىغانلار-ئىجارىگە بەرگۈچى، بانكىر، پايچېك، مەبلەغ سالغۇچى قاتارلىقلار بولۇپ، پۇل پۇلنى تېپىپ ئىگىسىنى مالىيە ئەركىنلىكىگە ئېرىشتۈرىدۇ. مالىيە ئەركىنلىكى-ئەمگەك قىلمىسىمۇ خەجلەيدىغان، تاپىدىغان پۇلى ئۈزۈلۈپ قالمايدۇ دىگەنلىك. بۇ چاغدا ئادەم پۇل ئۈچۈن خىزمەت قىلماي پۇل ئادەم ئۈچۈن خىزمەت قىلىدۇ. ئادەمنىڭ ئەمگىكىنىڭ ھەققى-قىممىتى يۇقىرى بولغاندا ئادەم پۇلنى ئۆزى ئۈچۈن خىزمەت قىلدۇرالايدۇ، ئەكسىچە ئەمگىكىنىڭ ھەققى-قىممىتى تۆۋەن ھالەتتە كېتىۋاتقانلار پۇل ئۈچۈن خىزمەت قىلغۇچىلارغا ئايلىنىپ قالىدۇ. چۈنكى بىرسىگە تاپسا بىرسىگە يوق، ئاي بېشىدا بار ، ئاي ئاخىرىدا يوق. خەجلەي دىسە يەتمەيۋاتقان، پۇل ئادەمنى قىينايدۇ. ئەمما پۇل دىگەن جانسىز نەرسە. كىم قانچىلىك ئىگەللەيمەن دىسە ئەمگىكىنىڭ قىممىتى ئارقىلىق ئېرىشەلەيدۇ. ئادەم ئەمگىكىنى قىممەتكە ئىگە قىلالايدىغان يول ئادەم ئۆزىنىڭ جاھاندارچىلىق ئۈچبۇلۇڭىنى تاللىشى كېرەك. نەدە،نېمە ئىش قىلىش، نېمىگە ئېرىشىش تاللانمىسا، نىشانلىق،پىلانلىق ئويلانمىسا ئادەم ئەمگىكىنىڭ ھەققىنى ھەم ئۆزىنىڭ قەدىر-قىممىتىنى يۇقىرى كۆتۈرەلمەيدۇ. ئادەمنىڭ خىزمەت قىلماسلىق ئەركىنلىكى بار. ئەمگەك تاللاش ئەركىنلىكىمۇ بار. ئەمما بىر ئۆمۈر جاپادا ياشاش مەجبۇرىيىتى يوق. بازار ئىگىلىكى دېگىنىمىز ئادەم ئۆزىنى بازارلىق قىلىش يەنى قىممىتى بار ئادەمگە ئايلاندۇرۇش دىگەنلىك. يول ئېچىپ ئىلگىرلەپ قىممەتلىك ئەمگەك بىلەن شۇغۇللانغاندا ھەم ئەمگىكىنىڭ ھەققى- قىممىتىنى يۇقىرى كۆتۈرەلىگەندە ئاندىن ئادەم قەدىر – قىممىتىدىن خۇشاللىققا چۈمەلەيدۇ. نامراتلىق ئەمگەك ھەققى قىممىتىنىڭ تۆۋەنلىكىدىن باشقا گەپ ئەمەس. نەمراتلىقمۇ ئۈچبۇلۇڭلۇق جاھاندارچىلىقتا كېلىپ چىقىدۇ. باي-باياشاتچىلىقمۇ ئۈچبۇلۇڭلۇق جاھاندارچىلىقتا يۈز بېرىدۇ. ئەمما نامراتلار بىلەن بايلارنىڭ تاللىغان ئەمگىكى ، كەسپى، پوزىتسىيىسى، ۋاقىت ئېڭى، تۆلىگەن بەدەللىرى، نىشان، مەقسەتلىرى ئوخشىمايدۇ. بۇ جاھانغا ھىچكىم باي، نامرات بولۇپ توغۇلمايدۇ. پەقەت ئەمگەك قىممىتى تۈپەيلىدىن ئادەملەر باي نامراتلىق پەرقىنى كەلتۈرۈپ چىقىرىدۇ. دىمەك جاھاندارچىلىق ئۈچبۇلۇڭىدىكى ئىش ئورنىنىڭ ئېھتىياجلىق ھەم ئىتراپ قىلىنغان قىممىتى قانداق، قىلىدىغان ئىشنىڭ باھا قىممىتى قانچىلىك، ئېرىشىدىغان ھەق ئادەمنى يىتەرلىك رازى قىلالامدۇ دېگەنلەرنى ئويلىغاندا ئاندىن ئادەم ئۆزىگە ، ئەمگىكىگە ھەم ئۆزى بىلەن ئەمگىكىنىڭ مۇناسىۋىتىگە قايتىدىن نەزەر سېلىپ باقسا، ھەرخىل كەسىپتىكى ئەمگەكچى، خىزمەتچىلەرنى سېلىشتۇرۇپ باقسا، شۇ چاغدا ئۆزىنى ئۇنتۇلۇپ قالغانلىقىنى ھېس قىلىپ يىتەلەيدۇ. ئۆزىنى ئۇنتۇلۇپ قېلىش ئادەمنى كۈنۈككەك، پەرۋاسىز،تەقدىرچى كىشىگە ئايلاندۇرۇپ قويىدۇ. بۇنداق روھى ھالەت ئۈچبۇلۇڭلۇق جاھاندارچىلىقنى تۇرغۇن ھالەتكە چۈشۈرۈپ قويۇپ، يىللارنىڭ ئۆتۈشى بىلەن كەينىدە قېلىشنى كەلتۈرۈپ چىقرىدۇ. قىسقىسى ئۇتۇق قازىنىمەن دىگۈچىلەر، ئۇتۇق قازىنىشقا تىگىشلىكلەر ئۆزلىرىنىڭ ئۈچبۇلۇڭلۇق جاھاندارچىلىق ئەھۋالىغا باھا بېرىپ، سەۋەبنى ، مەسلىنى تېپىپ چىققاندىن كېيىن ئۆزلىرىنىڭ قىممىتىنى ئىشلىتەلەيدىغان ئەمگەك مۇھىتى- جاھاندارچىلىق ئۈچبۇلۇڭىنى تاللىشى كېرەك. چۈنكى يولنى تاللىغاندا ھەم  تاپقاندا ئاندىن ئالدىغا ئۆتكىلى بولىدۇ. ھەربىر ئادەمنىڭ يولى ئايرىم يېڭى بولىدۇ.

zulpiqar

	رەھمەت!

jiuxing

	ياخشى ھېكمەتلىك سۆزلەركەن بولۇپمۇ  ........... ......پۇل دىگەن جانسىز نەرسە. كىم قانچىلىك ئىگەللەيمەن دىسە ئەمگىكىنىڭ قىممىتى ئارقىلىق ئېرىشەلەيدۇ. ئادەم ئەمگىكىنى قىممەتكە ئىگە قىلالايدىغان يول ئادەم ئۆزىنىڭ جاھاندارچىلىق ئۈچبۇلۇڭىنى تاللىشى كېرەك. نەدە،نېمە ئىش قىلىش، نېمىگە ئېرىشىش تاللانمىسا، نىشانلىق،پىلانلىق ئويلانمىسا ئادەم ئەمگىكىنىڭ ھەققىنى ھەم ئۆزىنىڭ قەدىر-قىممىتىنى يۇقىرى كۆتۈرەلمەيدۇ. بەك ئورۇنلۇق بوپتۇ

turditohti

	ياشاش قىسمەتلىرى ئادەمنى ئىزدىنىشكە يىتەكلەيدۇ،مەيلى نىمىلا دىمەيلى ئىنساننىڭ پۈتكۈل ھەركىتى ياشاشنىڭ ئىچىدە ،ئۇنىڭ قۇمانداللىغىدا بولىدۇ.بۇنداق ئۈچ بۇلۇڭلۇق مۇناسىۋەت ھەرقانداق ئىنساندا ياشاش كاتۇگۇرىيەسىنىڭ تۈرۈتكىسىدە ياكى يۇقىرى ياكى تۈۋەن ھالەتتە نەتىجىلەنگەن بۇلۇدۇ.ئىنساننىڭ ئىرشىدىغىنى بولمىسا ئىنسان،مۇھتاجلىق ئىچىدە ھالەك بۇلۇدۇ.

urukjan

	بەلكىم يەرشارىمىز  بىر قىسىم جاھاندارچىلىقلاردىن ئېتىلىپ كېتەي دەپ قالغان بولىشى مۇمكىن.

lostba

	بەش بۈرجەكلىك بىنا يۇمۇلاق جوزا يىغىنى

kalgen

	ياشاش بۇلۇڭلىرى كوپلەپ كەتتى .

mahsat

	ياشاش بۇلۇڭلىرى كوپلەپ كەتتى . ياشاش بۇلۇڭلىرىمۇ مۇشۇ ئۈچبۇلۇڭلۇق جاھاندارچىلىقنىڭ سىرتىغا چىقىپ كىتەلمەيدۇ.  ئوغۇرلۇق قىلسىمۇ، بۇزۇقچىلىق قىلسىمۇ، تىلەمچىلىك قىلسىمۇ، خىيانەتچىلىك قىلسىمۇ، كارخانا قۇرسىمۇ، گاداي بولسىمۇ ئوخشاش . ئۈچبۇلۇڭنىڭ ئۈچىلا چوققىسىغا ئەھمىيەت بەرمىسەك ھايات كۆڭۈلدىكىدەك بولمايدۇ. قىممىتى بار، قىممەت ياراتقىلى بۇلىدىغان، قىممەتكە ئىرىشكىلى بۇلىدىغان ئىش بۇلىشى كېرەك.

umitwarmualim

	ئۈچبۇلۇڭنىڭ ئۈچىلا چوققىسىغا ئەھمىيەت بەرمىسەك ھايات كۆڭۈلدىكىدەك بولمايدۇ. قىممىتى بار، قىممەت ياراتقىلى بۇلىدىغان، قىممەتكە ئىرىشكىلى بۇلىدىغان ئىش بۇلىشى كېرەك. بۇ جۈملە ناھايىتى توغرا ئىيتىلىپتۇ،لېكىن بۇ ئۈچ بۇلۇڭنىڭ چۇققىسىنى كۆرەلەيدىغان كىشلەر، بىزنىڭ ئارىمىزدا كۆپىرەك بارلىققا كەلسە دەيمەن.