ئاتا-ئانىڭىز ئۆيىڭىزگە كەلگەندە
ئاتا-ئانىڭىز ئۆيىڭىزگە كېلىپ بىرنەچچە كۈن تۇرغاندا بەلكىم تۇرمۇش تەرتىۋىڭىزدە ئۆزگۈرۈش بولۇپ،سىزگە بەزىبىر قولايسىزلىقلارنى ئېلىپ كېلىشى مۇمكىن.
كۆرىۋاتقان تېلىۋىزىيە تىياتىرلىرىڭىزنى كۆرەلمەيسلىگىڭىز مۇمكىن،دادىڭىز ئۇرۇش كىنولىرىنى ياخشى كۆرىشى مۇمكىن،بۇنىڭدىن بىزارلىق ھېس قىلماڭ،بەلكىم كىچىك ۋاقتىڭىزدا كارتون فىلىملىرىنى كۆرۈپ تۇرىۋېلىپ،ئاتا-ئانىڭىزمۇ ئۆزلىرى كۆرىدىغان فىلىملەرنى كۆرەلمەي سىزگە ھەمرا بولۇپ،زېرىكمەي-تېرىكمەر بىللە كۆرگەندۇر.
ئەتىگەن تاڭ يورىماستا ئورنىدىن تۇرىۋېلىپ تاراڭ-تۇرۇڭ قىلىپ،ئۇيقىڭىزغا دەخلى قىلىپ،سىز ئىشقا ماڭغاندا بولسا خورەك تارتىپ تاتلىق ئۇيقىغا كەتكەن بولسا ئۇھ تارتماڭ،ئۇلار سىزنى چوڭ قىلىپ قاتارغا قوشقىچە قانچە-قانچە كېچىلەرنى ئۇيقۇسىز ئۆتكۈزگەندۇر.
ياشانغاندا قۇلاق ئېغىرلاپ قالىدۇ،ئىنكاس ئاستىلايدۇ،گەپ قىلسىڭىز ئاڭلىيالماي،بىرنەچچە قېتىم تەكرارلىىشڭىزغا توغرا كەلسە ھەرگىز تېرىكمەڭ،تېرىكسىڭىزمۇ چاندۇرماڭ،سىزمۇ كىچىك ۋاقىتلىرىڭىزدا،توختىماي سوئال سورايتتىڭىز،گەپ چۈشەنمەي توختىماي «ھە؟»دەيتتىڭىز،بۇ قىلىقىڭىزدىن ئاتا-ئانىڭىز ھەرگىز تېرىكمەيتتى،بەلكى ئامراقلىق قىلىپ كۈلۈپ كېتەتتى.ئەگەر بالىلىق بولغان بولسىڭىز بۇنى بىلىسىز،چۈنكى بالىڭىز قىلىۋاتقان قىلىقلارنىڭ ھەممىسىنى سىزمۇ كىچىك ۋاقتىڭىزدا قىلغان،بۇنى ئۇنۇتماڭ.
ئۆيدە تاماكا چېكەلمىدىم،خالىغىنىمچە يۈرەلمىدىم،دەپ ئويلىماڭ،ئاتا-ئانىڭىز سىزنى چوڭ قىلىپ قاتارغا قوشقىچە بەلكىم،نۇرغۇن ھوزۇر-ھالەۋەتلەردىن ۋاز كەچكەندۇر.
ئاتا-ئانىڭىز ئۆيىڭىزگە كەلگەندە،ئۆيڭىزنىڭ قىبلە-كۈنچىقىش تەرەپلىرىنى كۆرسىتىپ قويۇڭ،ياشانغاندە بىر يەردىن،بىر يەرگە بارسا بېشى قېيىپ،مەغرىپ-مەشرىقنى پەرقلەندۈرەلمەي قالىدۇ.
تازىلىق ئۆيى،ئاشخانا ئۆيدىكى سۇ تۇرۇببىسى،ئىسسىق-سوغۇق سۇ چۈشۈش جۈمەكلرىنى ئېنىق قىلىپ چۈشەندۈرۈپ قويۇڭ،بۇرۇنمۇ كەلگەنغۇ ، بىلىدىغۇ،دەپ ئويلىماڭ،ئادەم ياشانغاندا ئۇنۇتقاق بولۇپ قالىدۇ،ئۇنىڭ ئۈستىگە ھازىر ئۆيلىرىمىزدە ئۆزگۈرۈشلەر تېز،ئۇلار يېتىشىپ بولالمايدۇ. شارائىت يار بەرسە يۇيۇندۇرۇپ قويۇڭ،تاھارەتكە سۇ تەييارلاپ بېرىڭ.
ئۇلار بىلەن كۆپرەك مۇڭدىشىڭ،گەرچە گەپلرىڭىز بىر يەردىن چىقمىسىمۇ،سىزگە سىز تۇغۇلماستىكى ئىشلار،سىز تونۇمايدىغان ئادەملەر توغرىلىق سۆزلەپ بەرسىمۇ كۆڭۈل قويۇپ ئاڭلاڭ، ئادەم ياشانغاندا مۇڭداشقاق بولۇپ قالىدۇ،ئۆتمۈشنى ئەسلەشنى ياخشى كۆرىدۇ.
ئۆزىڭىز توغرىلىق ئۇلارنى خوشال قىلىدىغان ئىشلارنى سۆزلەپ بېرىڭ،بىر ئىشلاردا ئۇلاردىن مەسلىھەت سوراڭ،ئۆزىڭىزنىڭ يەنىلا ئۇلارغا مۇھتاج ئىكەنلىكىڭىزنى،ئۇلاردىن ئايرىلالمايدىغانلىقىڭىزنى،ئۇلارنىڭ سىز ئۈچۈن ئىنتايىن مۇھىم ئىكەنلىكىنى ھېس قىلدۇرۇڭ.
ئۇلار ئۈچۈن بىرنەچچە ۋاقىت تۇرمۇش ئادەتلىرىڭىزنى ئۆزگەرتىپ،ئاچچىق-چۈچۈك تاماقلارنىڭ مەرىدىن كېچىپ،ئۇلارغا
سىڭىشلىق،سۇيۇق-سەلەڭ،قىيمىلىق تاماقلارنى ئېتىپ بېرىڭ.
ئۇلارنىڭ خىرەلەشكەن كۆزلىرىگە،ئاقارغان چاچلىرىغا، شەكلى ئۆزگەرگەن بەدەن تۇرقىغا،تاققا-تۇققا گەپلىرىگە،غەلىتە بولۇپ قالغان مىجەز-خۇلقىغا قاراپ تېڭىرقىماڭ،ئۇلارمۇ بىر چاغلاردا ئوماققىنە بالا ئىدى،قىران يىگىت،بەرنا قىز ئىدى،سالاپەتلىك ئەر،سۈلكەتلىك جۇۋان ئىدى...
ئۇلارنىڭمۇ بالىلىقى بولۇپ ئۆتكەن،ياشلىق قىرانلىق مەزگىللىرى بولغان،شۇنىڭغا ئوخشاش ئاللا ئامان قىلسا بىزمۇ قېرىيمىز،ئۇلاردەك بولىمىز،ئۇلارچىلىك بولالسىاق شۇنىڭ ئۆزى چوڭ ئىش.
مەنبە:تۇرمۇش تەجرىبەم
يوللىغان ۋاقتى 2011-7-28 12:55:21
