تاڭ ئالدىدا(ھېكايە)[ئەختەم ئۆمەر]

guzalaslima

	سالىم كېچىچە ھاراق سورۇنىدا يېتىپ ئۇخلاپ قالغانىدى. تاڭ سەھەردىلا ئويغىنىپ ئەتراپقا قارىدى، بىر قانچە دوستلىرى ئاخشام ئىچىشكەن داستىخانغىلا يىقىلىپ خورەك تارتىپ يېتىشاتتى. ئۇ ئورنىدىن تۇردى-دە، پەم بىلەن دەسسەپ ئىشىكتىن چىقىپ موتوسىكىلىتقا مىندى. سۈبھى ۋاقتى ، كوچىدا كوچا تازىلاۋاتقان تازىلىق ئىشچىلىرىدىن باشقا ئادەم كۆرۈنمەيتتى، ئاخشام ئىچكەن ھاراقنىڭ كۈچى تېخى كەتمىگەنىدى، يول پىرقىرايتتى، شۇنداقتىمۇ ئۇ موتسىكىلىتنى يۇقىرى سۈرئەت بىلەن چاپتۇرۇپ ماڭدى. چۈنكى ئۇ ئاتا-ئانىسى ئويغىنىپ بولغۇچە ئۆز ھۇجرىسىغا كىرىپ يېتىۋالمىسا يەنى ئۇنىڭ سىرتتا قالغانلىقىنى ئاتا-ئانىسى بىلىپ قالسا، تاپا-تەنىگە قالاتتى. دادىسى ئۇنى يەتكۈچە قارغاپ تىللايتتى. "ۋايجان " دېگەن ئېچىنىشلىق ئاۋاز بىلەن تەڭ سالىمغا بىر نەرسە سۇقۇلغاندەك ، نېمىدۇر يېقىلغاندەك  تويۇلدى. سالىمنىڭ يۈرىكى "قارت" قىلىپ قالدى. ئۇ موتوسىكىلىتنى قاتتىق تورمۇزلاپ توختۇتۇپ، ئارقىسىغا بۇرۇلۇپ قارىۋېدى، ئۆزىدىن ئالتە-يەتتە مېتىر نېرىدا بىر كىشىنىڭ ئېڭراپ ياتقانلىقىنى كۆردى. ئۇ دەرھال موتوسىكىلىتنى ئىزىغا دەسسىتىپ قويۇپ، ئۇ كىشىنىڭ يېنىغا يۈگۈرۈپ كەلدى. ئۇ كىشى دۈم يىقىلغان بولۇپ، يېنىدا ئۇزۇن سۈپۈرگە تۇراتتى. سالىم ئۇ كىشىنى ئوڭدا قىلىپ يۆلىدى-دە، قورقۇپ ۋاقىرىۋېتىشكە تاسلا قالدى. ئۇ ھەر كۈنى سەھەردە كوچا سۈپۈرىدىغان تونۇش، ئۆزى بىلەن تەڭ دېمەتلىك ياش يىگىت ئىدى. ئۇنىڭ پىشانىسى يولنىڭ بېتون قىرىغا قاتتىق تەگكەن بولۇپ، يېرىلغان جايدىن قان تەپچىپ چىقىۋاتاتتى. يىگىت ھوشسىز بولۇپ ئىڭراپ ياتاتتى. سالىم يانچۇقىدىن يوغان قول ياغلىقنى چىقىرىپ ، يىگىتنىڭ پىشانىسىنى چىڭ تاڭدى. لېكىن قان توختىمىدى. ئۇ ئۇچىسىدىكى چاقماق كۆڭلەكنى يىرتتى-دە، يىگىتنىڭ بېشىنى ئۈستى-ئۈستىلەپ چىڭ تېڭىپ قويدى. يولنىڭ ئالقاندىن چوڭراق يېرىنى قىپقىزىل قان بويىغانىدى. يىگىت يەنىلا ھۇشسىز ئىڭىرايتتى. ئۇنىڭ يېنىدىكى ئىستولبىغا بېكىتىلگەن لامپوچكا يورۇقىدا ئۇنىڭ چىرايىنىڭ سارغىيىپ كەتكەنلىكى، قاتتىق ئازابلىنىۋاتقانلىقىنى كۆرىۋالغىلى بولاتتى. كوچا تىمتاس بولۇپ، ئۈچ ئىستولبا يىراقلىقتا كوچا سۈپۈرۈۋاتقان بىر كىشى بار ئىدى ، ھوشسىز ياتقان يىگىتنى ئىستولبىغا يۆلەپ ئولتۇرغۇزۇپ قويدى-دە، يانچۇقىدىن ئون يۈەنلىك قەغەزدىن ئۈچنى چىقىرىپ ئۇنىڭ قولىغا سىقىمدىتىپ قويدى، كېيىن ئەتراپقا ئەنسىزگىنە قاراپ قويۇپ، ئادەم كۆرۈنمىگەندىن كېيىن موتوسىكىلىتنى مىنىپ كېتىپ قالدى.... ئارىدىن ئۈچ كۈن ئۆتكەندە ئۇ ئاغزىغا ماسكا تارتىپ كۆزەينەك تاقاپ، ۋېلسىپىت بىلەن ھىلىقى كوچىغا سەھەردىلا كەلدى. بېشىنى ئاق داكا بىلەن ئورىۋالغان ھېلىقى يىگىت يەنىلا شىرتىلىدىتىپ كوچا سۈپۈرمەكتە ئىدى. سالىمنىڭ يۈرىكى جايىغا چۈشۈپ يىراقتىنلا ئەگىپ قايتىپ كەتتى. ئارىدىن يەنە قانچىلىك ۋاقىت ئۆتتىكىنتاڭ، بۇنى مەنمۇ بىلەلمىدىم، بىر ئەتىگىنى سالىم ئويغۇنۇپ ئۆزىنى كېسەل كارۋىتىدا كۆرۈپ چۆچۈپ كەتتى. ئۇنىڭغا ئاسما ئۇكۇل سىلىنغانىدى. ئۇ يانغا قىيسىيىپ قاراپ، ئۆزىگە تەبەسسۇم بىلەن قاراپ ئولتۇرغان ھېلىقى كوچا تازىلىغۇچى يىگىتنى كۆرۈپ يۈرىكى سېلىپ كەتتى. "ئۇ مېنى تۇنۇۋالغان بولسا مەستلىكىمدىن پايدىلىنىپ ....." ئۇنىڭ خىيال يىپى ئۈزۈلۈپ قالدى، چۈنكى بىر پىشقەدەم دوختۇر كىرىپ كەلدى. -ھە، نوچى يىگىت، ساقىيىپ قالدىڭىزمۇ؟ دوختۇرخانىغا كىرىپ قالارىڭىزنى بىلسىڭىز ئازراق ئىچكەن بولاتتىڭىز ، شۇنداقمۇ؟- دوختۇر سۆزلەۋېتىپ تىڭشىغۇچ بىلەن ئۇنىڭ يۈرەك ھەرىكىتىنى تىڭشاپ باقتى، - مۇشۇ ياخشى يىگىتكە ئۇچراپ قاپسىز، كوچىدا يەنە قىرىق مىنوت يېتىپ قالغان بولسىڭىز بۇ ۋاقىتقىچە ئۆزىڭىزنى دوختۇرخانىدا ئەمەس مازارلىقتا كۆرەتتىڭىز. تەلىيىڭىز بار ئىكەن. مۇنۇ يىگىت سىزنى شۇنچە يەردىن يۈدۈپ ئەكەپتۇ. ئەمدى سىز ئۇنى يۈدۈپ ھەرەمگە ئاپارسىڭىزمۇ ياندۇرۇپ بولالمايسىز. سالىمنىڭ يۈزى خىجىللىقتىن ئوت ئېلىپ كەتكەندەك بولدى،، ئۇنىڭ لەۋلىرى تىتىرەپ گەپمۇ  قىلالماي قالدى. -مەن قايتاي، تېخى كوچىنى تازىلاپ بولالمىغانىدىم-دېدى يىگىت ئورنىدىن تۇرۇپ. ئۇ سالىمنىڭ قولىنى چىڭ سىقىپ دوختۇرخانىدىن بالدۇرراق ساقىيىپ چىقىشىنى تىلەپ خوشلاشتى-دە، چىقىپ كەتتى. -يىگىت، ئۇ چىقىپ كەتسە "مۆ" دەپ بىر ئېغىزمۇ گەپ قىلمايسىزغۇ؟ سىز ئۈچۈن ئۇ دوختۇرخانىغا پۇل تۆلىدى -دېدى دوختۇر. سالىم ئەمدى ئۆزىنى تۇتالماي ھۆركىرەپ يىغلىۋەتتى.

xahri~zat

	ئوخشاش بىر ئىش، ئوخشاشمىغان ئادەملەر تۈپەيلى ئوخشاشمىغان نەتىجىلەر كىلىپ چىقتى. يىغىپ ئىيتقاندا يەنىلا ۋىجداننىڭ ئۆزىگە باغلىق. ئەختەم ئۆمەرنىڭ ئەسەرلىرى ھەقىقەتەن ياخشى.

naway

	بۇنداق ئەسەرلەر    دۇنيا ئەدەبياتى ۋە تەرمىلەر زورنىلىدا كۆپ ئۇچرايدۇ.  ۋەقەلىك ئىنتايىن ئاددى.   بۇنى ئەختەم ئەپەندىم يازغان بىلەن دۇنيا ئەدەبىيات ساھەسىدە   بىر تىيىنغا ئەرزىمەيدىغان نەرسە.  ئىشەنمىسەڭلەر   تەرمىلەر زۇرنىلنىڭ   1997يىللىق توپلىمىنى كۆرۇپ بىقىڭلار!

sadakatguli

	بۇ ئەسەر بىر قىسقا فىلىم قىلىپ ئىشلەنگەنغۇ دەيمەن.‹قاراقچى ھەمرا›ناملىق بىر قانچە قىسقا فىلىم كىرشتۈرۈلگەن پىلاستىنكىدا بار ئىدى.

radeka

	ناھايتى ياخشى ئەسەركەن بۇ،شەھرىزاتنىڭ دېگىنىدەك ئوخشاش ئىش ئوخشاشمىغان ئادەم تەرىپىدىن ئوخشاشمىغان نەتىجە يارىتىپتۇ.تېمىڭىزغا كۆپ رەھمەت.

tiwip

	بۇ 2قەۋەتتىكىnaway يوللىغان 2011-06-22 19:17 غا قارتىلغان  : بۇنداق ئەسەرلەر    دۇنيا ئەدەبياتى ۋە تەرمىلەر زورنىلىدا كۆپ ئۇچرايدۇ.  ۋەقەلىك ئىنتايىن ئاددى.   بۇنى ئەختەم ئەپەندىم يازغان بىلەن دۇنيا ئەدەبىيات ساھەسىدە   بىر تىيىنغا ئەرزىمەيدىغان نەرسە.  ئىشەنمىسەڭلەر   تەرمىلەر زۇرنىلنىڭ   1997يىللىق توپلىمىنى كۆرۇپ بىقىڭلار!   قىنى سىز ئاشۇ بىرتىينغا ئەرزىمەس دەپ قارىغان ئەسەردىن بىرەرنى تەۋەللۇت قىلىپ بىقىڭە ...

noshirwan

	بۇ ھېكايە ئەختەم ئۆمەرنىڭ ھېكايىسى بولسا، مەنبەسىنى ئەسكەرتىپ قويسىڭىز بوپتىكەن. مەشق ھېكايىسى بولسا كېرەك، كونا قېلىپتا يېزىلغان.

sat喜欢

	ھىكايە يازغۇچىنى باھالىمىساڭلارمۇ بولار ئەمدى؟!  بۇ يەردە ئەسەر باھالاش ئېلىپ بېرىلمايۋاتقاندىكىن.....يازغۇچى جەمىيەتتە يۇز بەرگەن ئىشلارنى ماتىريال قىلىش ئارقىلىق ئوقۇرمەنلەرگە قايسىنىڭ توغرا قايسىنىڭ خاتالىغىنى ۋىجدانى ئارقىلىق ھۆكۇم قىلىشقا،ئۆزىدد بار بولغان ئىللەتلەرنى تۇزۇتۇشكە ھەيدەكچىلىك قىلىدۇ...مانا بۇ  يازغۇچىنىڭ مۇددۇئاسى!

guzalaslima

	بۇ 2قەۋەتتىكىnaway يوللىغان 2011-06-22 19:17 غا قارتىلغان  : بۇنداق ئەسەرلەر    دۇنيا ئەدەبياتى ۋە تەرمىلەر زورنىلىدا كۆپ ئۇچرايدۇ.  ۋەقەلىك ئىنتايىن ئاددى.   بۇنى ئەختەم ئەپەندىم يازغان بىلەن دۇنيا ئەدەبىيات ساھەسىدە   بىر تىيىنغا ئەرزىمەيدىغان نەرسە.  ئىشەنمىسەڭلەر   تەرمىلەر زۇرنىلنىڭ   1997يىللىق توپلىمىنى كۆرۇپ بىقىڭلار! سىز ئۆزىڭىز بىر ئەسەر يېزىپ بېقىپ ئاندىن باشقا ئاپتورلارنىڭ ئەسىرىنى كەمسىتىڭ .باشقىلارنىڭ ئەمگەك مىۋىسىنى قەدىرلەيلى...........

guzalaslima

	بۇ 6قەۋەتتىكىnoshirwan يوللىغان 2011-06-23 02:11 غا قارتىلغان  : بۇ ھېكايە ئەختەم ئۆمەرنىڭ ھېكايىسى بولسا، مەنبەسىنى ئەسكەرتىپ قويسىڭىز بوپتىكەن. مەشق ھېكايىسى بولسا كېرەك، كونا قېلىپتا يېزىلغان. سىز يىڭى قىلىپتا بىرەر ئەسەر يېزىپ باقامسىز؟  بىز كۆرۈپ باقايلى ،،،،،،