ئەتلەس كۆينەك لەپەڭشىگەچ DJ غا

tursunjan

قايسى بىر چاغ سىڭىپ كىردى بىزلەرگە ،
DJ دىگەن بۇ ئاتالغۇ ئۇقۇمى .
يۇقامدىكىن دەيمەن بىزگە بەك تىزلا ،
باشقىلارنىڭ ‹ مەدەنىيەت › يۇقۇمى .

بەلنى تولغاپ ، باش لىڭىشتىش ئاساسلىق ،
شەرتى ئىكەن بۇ يىڭىلىق DJ نىڭ .
كۈندۈزلىرى ئارام ئېلىپ ئۇخلىسا ،
قىززىپ كىتەر شاھى بولۇپ كىچىنىڭ .

ۋاي تۇنۇگۇن  تەكلىپ بىلەن يول ئېلىپ ،
بارار بولدۇم بىر قاتار چاي نۆۋەتكە .
ئۇ يەردىكى چاقىرىلغان مىھمانلار ،
لايىق ئىدى بىر كىشىلىك ھۆرمەتكە .

شۈنچە رەڭدار كۆركەم ئىدى قورۇما ،
كەلتۈرۈلگەن داستىخانغا يىيىشكە .
قۇلاق گاستۇر ئەمما سورۇن - ئەلئارا ،
ئاڭلىماق تەس ، قالدۇرۇلغان دىيىشكە .

كەلگەن ئىدى ئالدىمىزغا لىقمۇ - لىق ،
دىدۇق ، يىدۇق ئۈستەل يۈزى بەكمۇ مول .
جار سالىدۇ تىترەپ تۇرۇپ  ياڭراتقۇ ،
ئولتۇردۇق ھەم ئۆزىمىزنى قىلىپ گول .

قېنى ئۇسسۇل ، تەكلىپ ئەتتى بىراۋلار ،
بوپتۇ مەيلى : چۈشتۈم ئارا مەيدانغا .
ئەتراپىمدا كۆز يۈگۈرتۈپ تۇرغانغا  ،
نوقتا بولدۇم بەلكىم كۆزى ، ھەيرانغا .

مەشرەپ دەيىتتى ئوينا سورۇن سىنىڭكى  ،
دۇتتار ، غىجەك ، داپ ، راۋاپتىن نەزمىگە .
بولۇپ قالدىم شۇ سورۇندا ئەكىسچە ،
ئوخشىتىلىپ ‹ كىسەل چىۋىن › ئەزمىگە .

ئادەم جىقمۇ ياكى سەھنە كىچىكمۇ ؟
پاتمايدىكەن بىز ئوينىغان ئۇسسۇللار .
‹ قولۇڭ تەگدى ، يىغىپ ئوينا پۇتۇڭنى › ،
بولدى پەيدا ھەرخىل ، تۇيغۇ قۇسۇرلار .

ئارقىدىنلا جاراڭلىدى گۆپۈلدەپ ،
DJ دەيدۇ قىسقىغىنا ئىسمىنى .
خۇشاللىق دەپ دەسسىگەنلەر ئۇنىڭغا ،
بىلىپ ، بىلمەي قىينايدىكەن جىسمىنى .

‹ ئۇھ › ئۇ كىمدۇ دىدىم ئۆزۈم - ئۆزۈمگە ،
سىياقىدىن ‹ ئۇيغۇر قىزى › بىلىنەر .
بىراق ئۇنىڭ شوخ DJ نى ئوينىشى ،
كىم ، كىملەرنىڭ كۆزلىرىگە ئىلىنەر .

ئۇچىسدا زەرچە ئەتلەس كۆينىكى ،
پارقىرايدۇ رەڭلىك چىراق نۇرىدا .
بىر خىل تونۇش پۇراق كىلەر ئۇنىڭدىن ،
ھەر بىر گۈلى ، ھەربىر يولى قۇرىدا .

زاڭىقىغا چۈشكەن چېچى ئۇ قىزنىڭ ،
بىر چۇۋۇلۇپ ، بىر تۈزىلىپ يايرايدۇ .
كۆينەكلىرى ھەم ماسلىشىپ DJ غا ،
قالايمىقان لەپەڭىشىپ  ھارمايدۇ .

ئىززەت ئىدى ئۇ كۆينىكى قىزچاققا ،
ئۇ سورۇنغا كىيدىمۇ يا بىلمەستىن .
ھەي مەيلىدى كىيسىغۇ ئۇ يارىشار ،
ئوينىدى ئۇ كۆينەكتىن ئەيمىنمەستىن .

تەرلەپ ، پىشىپ ھۆل بولۇپتۇ يۈز - كۆزى ،
بىر چاغلاردا  DJ  دىنمۇ توختىدى .
ئەتلەس بىلەن ئويناشلىرى تولغىما ،
خۇددى توكۇر بولغان توزغا ئوخشىدى .

داۋاملاشتى سورۇن ئەنە ئاشۇنداق ،
بىردە ئۇسسۇل ، بىردە DJ مۇزىكا .
ئوينايدىكەن ئارىمايلا چوڭ - كىچىك ،
ئاچا - سىڭىل ، ئاغىنە ، ئاكا - ئۇكا .

‹ ئەتلەس كۆينەك يارالمىغان  DJ غا ،
بىلىپ قويۇڭ › دىدىم ئاستا ئۇنىڭغا .
دىدى قىزمۇ ‹ ئەمسە چىمەن دوپپىچۇ ؟
قاراق ئەنە نىمە دەيسىز بۇنىڭغا › ؟

راسىت دىگەندەك قاراپ باقسام بار ئىكەن ،
نەچچە يىگىت ، نەچچە ئەرنىڭ بېشىدا .
دوپپا كىيىپ شۇنداق ئويناپ يۈرگىنى ،
ماس كەلمەيىتتى ھەرگىز مۇنۇ يېشىدا  .

تەنبىھ يىدىم تەربىيەمگە قىزچاقتىن ،
چۈشتۈم ئاستا ئۆزگىرىپلا پەسكويغا .
كىچىك ئىشتى ئەسلى مۇنداق ئىش دىگەن ،
بىراق سالار ۋاختى كەلسە چوڭ ئويغا .

ئەتلەس كۆينەك لەپەڭشىگەچ  DJ غا ،
يازدىم بۇنى تىما قىلىپ مۇنبەرگە .
مازاق ئەتمەڭ بۇنى كۆرگەن ئوقۇرمەن ،
چالا ساۋات مەن نائۇستا شىرلارغا› .

بىر ئادەمنىڭ ئۆزگەرگىنى كۆرۈنمەس ،
ئۇنى كۆرگەن نەچچەيلەنلا ئۇقىدۇ .
تۈزەلمىسە بىرى ئەگەر ۋاختىدا ،
بىرى ئونغا ، ئونى مىڭغا يۇقىدۇ .

قەلبىمىزدە گۈللىتەيلى ئەخلاقنى ،
جىسمىمىزدا چاقنىسۇن ھەم ئەنئەنە .
قەدىرلىسەك مۇشۇ ئالتۇن چاغلارنى ،
قەدىرلىنىپ ئۆتەرمىز بىزمۇ يەنە .

ئويلىنايلى مىنۇت ۋاقىت چىقىرىپ ،
بۇنداق كىچىك ، كىچىك ، كىچىك ئىشلارنى .
سالالمىساق كۆزىمىزدىن ھەي ، نەزەر ،
ئەتە - ئۆگۈن كۆرۈرمىز نىمىشلارنى ؟ . . .


دىمەكچى بولغان كىچىككىنە مەقسىدىمنى بىر مۇنچە قاپىيەلەرگە قاش ئاتقۇزۇپ ، بىر مۇنچە بوغۇملارغا بوغدۇرۇپ ئاران دىگەندە مۈشۈنچىلىك ئەپلەشتۈرەلىدىم .
شۇڭا كەم - كوسا جايلىرى بولسا ئاكتىپلىق بىلەن تولۇقلاپ قويساڭلار قارشى ئالىمەن ، ئەمما تىمىنى ماڭا باغلىۋىلىپ ۋە ياكى باشقا بىر ئىشلارغا چېتىشتۇرۇپ ئىنكاس قالدۇرماسلىقىڭلارنى ئۈمىد قىلىمەن !

مەنبە : رىئاللىقتىكى كۆرگەن  ، بىلگەنلىرىم ، تەسىراتلىرىمدىن

سىرداش

بۇ  شىئېرىڭىز  قالتىس  بەلەن  چىقىپتۇ،  رەھمەت  سىزگە.

قەسىر

    خاتالىقنى سۆزلەپسىز«د ج»نى ئىنكار قىلىپ،
          تالانت بىلەن كەلتۈرۈپسىز مارجاندەك تىزىپ.
            ھەق سۆزلىسە سىزگە ئوخشاش ئەركەكلەر،
        يامانلىقتىن ياناتتى قىزلار بەلكى، ئەقلىگە كېلىپ.   

ئامان

ئىسلاھات، ئېچىۋېتىش سىياسىتى يولغا قويۇلغاندىن كېيىن، بىز ئىچكىرى ئۆلكىلەر ۋە چەتئەللەردىن نۇرغۇن نەرسىلەرنى،.... مېغىزنىمۇ، شاكالنىمۇ  قۇبۇل قىلدۇق، بولۇپمۇ مىللى خاسلىقىمىزغا، مىللى ئەنئەنىلىرىمىزگە يات بىر قىسىم ئەخلەت-شاكاللارغا مەپتۇن بۇلۇپ، ‹‹زامانىۋى مەدەنىيەت›› دەپ ئاتىۋالدۇق. نەتىجىدە ئاتالمىش ‹‹زامانىۋى مەدەنىيەت››نىڭ تەتۈر قويۇنلىرىغا پىرقىراپ، يىمەك-ئىچمەك، كىيىنىش، ئىجتىمائى ئالاقە، ئۆرۈپ-ئادەت، توي-تۆكۈن ..... قاتارلىق جەھەتلەردە ئەسلىمىزدىن، خاسلىقىمىزدىن ياتلاشتۇق. رەخمەت ئىنىم، گەرچە شېئىرىڭىزدا ۋەزىن، تۇراق جەھەتتە قىسمەن مەسىلىلەر كۆرۈلگەن بولسىمۇ، ئۆزىمىزدە ساقلىنىۋاتقان رىيال مەسىلىلەرنى دەك جايىدا ئەكس ئەتتۈرۈپسىز. قەلىمىڭىز تېخىمۇ بەرىكەتلىك بولغاي.  

umid0998

ئامان يوللىغان ۋاقتى  2013-1-14 21:03
ئىسلاھات، ئېچىۋېتىش سىياسىتى يولغا قويۇلغاندىن كېيىن ...

راست ئىيتىسىز، بىزلەر ئۆزىمىزنىڭ بىباھا گۆھەرلىرىمىزنى ئەخلەت قاتارىدا چۆرۇپ تاشلاپ، گەندىگە ئولاشقان چىۋىنگە ئوخشاش غەربنىڭ مەدەنىيەت ئەخلەتلرىگە ئۆزىمىزنى ئاتتۇق، ئۇنى گۆھەر بىلىپ بىشىمىزغا ئالدۇق.ئۆزىمىزنىڭ ئىسىل ئەنئەنىلىرىمىزنى غەربنىڭ ئۆلچەملىرى بىلەن باھالاپ، «كىرەكسىز،تەرەققىياتقا پۇتلىكاشاڭ بولىدىغان نەرسە»لەر قاتارىغا چىقاردۇق........

زەپەر

تۇرسۇنجان ئەپەندىم يېقىندىن بۇيان بايقاش مۇنبىرىنى ئۈزىڭىزنىڭ مۇنبىرىدەكلا كۈينۈپ ئىجادىي تىمىللىرىڭىزنى يوللاۋاتىسىز . سىزنىڭ يازغان شىئېرلىرىڭىزدىن بايقاشتىكى ھەەر بىر ئەزا تۇلىمۇ  مىننەتدار  رەخمەت سىزگە

دىلكەش

بەك ياخشى يېزىپسىز .داۋامىلق مۇشۇنداق ئىسل ئەسەرلىڭىزنى كۆرۈشكە تەشنامىز .

نونى

ئۆزىمىزنىڭ بىر بەلەن مىللى ئۇسۇللىرىمىزنى تاشلىۋېتىپ ، باشقىلارنىڭ مەدەنىيىتىنى قارىغۇلارچە قوغلىشىدىغانلارنىڭ ..................ئاغزىمغا بىر گەپ كەپتى ، دىمەي بولدى.