پۇرىۋال، بەختىڭدۇر ئاناڭنىڭ ھىدى

مەرىپەت

          پۇرىۋال، بەختىڭدۇر ئاناڭنىڭ ھىدى

            ئاۋايلاپ توققۇز ئاي كېچە- كۈندۈزى،
             مېھرىنى بىر ساڭا ئاققۇزۇپ ئۆزى،
             پەپىلەپ جاھانغا ياراتتى سېنى،
             شۇ ئانا ئەجرىگە باققىنىڭ قېنى؟
             پۇرىۋال، بەختىڭدۇر ئاناڭنىڭ ھىدى.      

              تۇغۇلۇپ تۇنجى رەت كۆرگىنى ئاناڭ،
              ئاۋايلاپ مەڭزىڭگە سۆيگىنى ئاناڭ،
              مېھرىنى زەمزەمدەك تۆككىنى ئاناڭ،
              ئۇۋادەك باغرىغا چۆككىنى ئاناڭ،
              پۇرىۋال، بەختىڭدۇر ئاناڭنىڭ ھىدى.

              تەرلىسەڭ سايىۋەن تۇمۇزدىن توسقان،
              چاڭقىساڭ بۇلاق ئۇ شىلدىرلاپ ئاققان،
               توڭلىساڭ جۇدۇندا ئۇ ساڭا گۈلخان،
               قۇياشتۇر بى مىننەت نۇرىنى چاچقان،
               پۇرىۋال، بەختىڭدۇر ئاناڭنىڭ ھىدى.

               ئاچ قالساڭ ئۇ ساڭا مىزلىككىنا ئاش،
               ھالۋىدۇر ئۇ سىلاپ قويغان تاغۇ-تاش،
               كارۋانسەن، ئۇ ساڭا مۇڭداش، سەپەرداش،
               يېقىلساڭ يېنىڭدا مادار، يۆلەكداش،
               پۇرىۋال، بەختىڭدۇر ئاناڭنىڭ ھىدى.

               ئۇ بولغاچ سەن يەكتا جاھان ئەركىسى،
               سورۇننىڭ، مەشرەپنىڭ بېشى، سەركىسى،
              دوستلارنىڭ ھۆرمىتى ئاشنىڭ تۇنجىسى،
              ئاناڭ ئۇ سۇلماس گۈل، سەن بىر غۇنچىسى،
              پۇرىۋال، بەختىڭدۇر ئاناڭنىڭ ھىدى.

              ئۇ بولغاچ يېنىڭدا دىلىڭ، باغرىڭ توق،
             ئوينايسەن،يايرايسەن ئەسلا غېمىڭ يوق،
             رەقىبىڭ گىدىيىپ قىلالمايدۇ دوق،
             مەزمۇتسەن تاغلاردەك، تېشەلمەيدۇ ئوق،
             پۇرىۋال، بەختىڭدۇر ئاناڭنىڭ ھىدى.

   
            ئۇ ماڭغان يوللاردىن ئىپار گۈپۈلدەپ،
           ياشىدىڭ بەختتە جېنىڭ چېچەكلەپ،
           ئۇ ماڭدى ئالدىدا سېنى يېتەكلەپ،
          ئەگەشتىڭ كەينىدىن كىيىكتەك سەكرەپ،
           پۇرىۋال، بەختىڭدۇر ئاناڭنىڭ ھىدى.

            يىتىلدىڭ ،ئەشۇنداق كۆيۈش سۆيۈشتە،
           چانمىدىڭ مۇشكۇلات، ئۇزۇن سەپەردە،
           تىك تۇرۇپ غۇرۇردا خەۋپ-خەتەرگە،
           باشلىرىڭ يەتسىمۇ ئەرىشكە،كۆككە،
           پۇرىۋال، بەختىڭدۇر ئاناڭنىڭ ھىدى.

          چوڭ بولدۇڭ، چوڭ بولۇپ ئىشلىرىڭ تولا،
          ھەركۈنى بەزمىدە ياڭرىتىپ ناۋا،
          دىمىدىڭ بىرەر رەت قايدىسەن ئانا؟
          يۈرەكنى تۇتۇپ باق سەن قانداق بالا؟
          پۇرىۋال، بەختىڭدۇر ئاناڭنىڭ ھىدى.

          ئۇ پۈتۈن ئۆمرىدە بىر سېنى دىدى،
          نەدە بول ھەركۈنى غېمىڭنى يىدى،
          سەن ئۈچۈن يىغدىيۇ ئۆزى يىمىدى،
         سەن پۇزۇر بايۋەتچە، ئۆزى كىيمىدى،
         پۇرىۋال، بەختىڭدۇر ئاناڭنىڭ ھىدى.

         دەم ئېلىش يات ئاڭا باقار بالاڭنى،
         سۇغۇرۇپ، يەم بېرىپ ھېيتلىق كالاڭنى،
         تۈگۈتەر بىر ياقتىن ئىشىڭ چالاڭنى،
         كۆرسە خوش شۇندىمۇ سېنىڭ قاراڭنى،
         پۇرىۋال، بەختىڭدۇر ئاناڭنىڭ ھىدى.

         ئويلاپ باق چوڭ بولۇپ ئاناڭغا بىر رەت،
        چاڭقىسا سۇندۇڭمۇ سوغۇق سۇ ،شەربەت...
        يېلىنىپ باشقىنى قىلغاندەك ئىززەت،
        يۈكۈنۈپ ئالدىدا قىلدىڭمۇ ھۆرمەت،
        پۇرىۋال، بەختىڭدۇر ئاناڭنىڭ ھىدى.

         ھاياتلىق چەكلىكتۇر مەڭگۈلۈك ئەمەس،
         دۇنيا بىر قونالغۇ، ئۇ قايتا كەلمەس،
         ئۇنۇتۇپ ئاناڭنى يۈرمە مەس-ئەلەس،
         ئانىسىز بەندىنىڭ بەختى كۆلىمەس،
         پۇرىۋال، بەختىڭدۇر ئاناڭنىڭ ھىدى.

         ئۇ ھايات بارىدا سۆيگىن قولىغا،
        تۇزانلار ئۆچمىسۇن سۇ سەپ يولىغا،
        بالىلىق مېھرىڭنى تۆككىن باغرىغا،
        ئۇ ساڭا مۇھتاجدۇر، ئەمەس ئاش-نانغا،
        پۇرىۋال، بەختىڭدۇر ئاناڭنىڭ ھىدى.

        سۆزىنى ئاڭلىغىن ،كايىپ سۆزلىمە،
        تەكرارلاپ سۆزلىسە گەپنى، تىرىكمە،
        ھەمرا بول ئۇزاقراق يېنىدىن كەتمە،
        سېنى دەپ مۈكچەيدى، ئۇنى خار ئەتمە،
        پۇرىۋال، بەختىڭدۇر ئاناڭنىڭ ھىدى.

        قېرىدى، تىنىدىن ماغدۇرى كەتتى،
       چاڭقىدى، ھاياتنىڭ يامغۇرى كەتتى،
       جەلىپكار خۇش ناۋا كۈيلىرى كەتتى،
       چۆللەرنى باغ قىلغان چاغلىرى كەتتى،
       پۇرىۋال، بەختىڭدۇر ئاناڭنىڭ ھىدى.

       تۇتۇپ قوي پۇتىنى مەڭزىڭنى يېقىپ،
       سۆيۈپ قوي مەڭزىگە مېھرىڭدە بېقىپ،
       ئۇتىغا ئۇتان بول، سۈيىدە ئېقىپ،
       ۋايسىماي ھاپاش قىل مۆرەڭگە ئېلىپ،
       پۇرىۋال، بەختىڭدۇر ئاناڭنىڭ ھىدى.

       ئۇ كەتسە يىتمىسۇن، چىگىلگەن بەختىڭ،
       ئۇ كەتسە غېرىپسەن، لىڭشىغاي تەختىڭ،
       ئۇ كەتسە مەجرۇھسەن، سارغىيار چېھرىڭ،
       ئۇ كەتسە گاچا سەن، ئۆتمەيدۇ تىلىڭ،
       پۇرىۋال، بەختىڭدۇر ئاناڭنىڭ ھىدى.

        ئانا ئۇ مۇقەددەس بالا جەننىتى،
        ئانىسىز نەدە ئۇ بالا راھىتى،
        ئانىسىز نەدە ئۇ بالا شەۋكىتى،
        ئانىسىز نەدە ئۇ بالا سۆلىتى،
        پۇرىۋال، بەختىڭدۇر ئاناڭنىڭ ھىدى.

        شەيتانغا ئالدىنىپ ئۇنىڭدىن چانما،
        كۈتمەستىن، كەتكەندە ئازاپقا قالما،
        ئۇ ھايات بارىدا باققىن، ۋايسىما،
        ئانا ئۇ بالىچۈن بايلىق بىباھا،
        پۇرىۋال، بەختىڭدۇر ئاناڭنىڭ ھىدى.

        مۇڭداش بول تۈنلەردە كېلىپ باغرىغا،
        قۇشۇق بول ئۇنىڭكى ئىچەر ئېشىغا،
        تارغاق بول كۈمۈشتەك ئاپئاق چېچىغا،
        ياغلىق بول كۆزىدىن ئاققان يېشىغا،
        پۇرىۋال، بەختىڭدۇر ئاناڭنىڭ ھىدى.

        ئىزىنى سۆي ئۇنىڭ سەجدىگاھ بىلىپ،
        ئۇ كەتسە كەلمەيدۇ بالام دەپ يېنىپ،
        يېتىۋال پۇتىدا باغرىغا قېنىپ،
        غۇربەتتە قالمىسۇن كۆزى ياشلىنىپ،
        پۇرىۋال، بەختىڭدۇر ئاناڭنىڭ ھىدى.

        چېھرىنى قاپلىغان قورۇقلار تامام،
        يەر سۆيۈپ ھەركۈنى قىل ئاڭا سالام،
        ئۇ دەيدۇ شۇندىمۇ ئوينا جان قوزام،
        ئۇ شۇنداق سېنى دەپ كۆيگەن يۇرۇق شام ،
        پۇرىۋال، بەختىڭدۇر ئاناڭنىڭ ھىدى.

                 

    مەنبە:توردىن يىغىپ ساقلىۋالغانلىرىم.
   

سىرداش

يا خشىمۇ سىز   مەرىپەت خانىم!

يوللىغان شىئېرىڭىزنى كوزلىرىم خىرەلەشكەن ھالدا ئوقۇپ چىقتىم،     قايسى كۈنىدىكى تىمامدا دىگىنىمغا ئوخشاش مىنىڭ ئانام   ئۇ ئالەمگە كەتكەن، ئۈزى بىلەن قۇشۇپ مىنىڭ يۈرۈگۈمنىمۇ  بىرگە  ئېلىپ كەتكەن، مەن ھەرقانداق ئۇرۇندا‹‹  ئانا››  دىگەن   مۇشۇ ئىككى بۇغۇملۇق سۆزنى ئاڭلىسام  قاتتىق ئازاپلىنىمەن،   تىمىڭىزنى ئوقۇپ شىئېر مىنىڭ ئتىلىمدىن تۇقۇلغاندەك ھىسياتتا بولدۇم، كۆز ياشلىرىم  كۇنۇپكا تاىتىسىنى ھۆل قىلىۋەتتى،...............   سىزگە ككپ رەھمەت.

مەرىپەت

سىرداش يوللىغان ۋاقتى  2012-12-27 18:15
يا خشىمۇ سىز   مەرىپەت خانىم!

يوللىغان شىئېرىڭىزنى كوز ...

مەن بۇنى بىلمىگەچكە بۇ شئېرنى يوللاپ ساپتىمەن...كۆڭلىڭىزنى يېرىم قىلىپ قۇيۇپتىمەن، كەچۈرۈڭ...

سىرداش

مەرىپەت يوللىغان ۋاقتى  2012-12-27 18:33
مەن بۇنى بىلمىگەچكە بۇ شئېرنى يوللاپ ساپتىمەن...كۆڭلى ...

خاتا  چۈشەنچە بىرىپ قويغان ئوخشايمەن    مەن  شىېردىن بەكمۇ سۈيۈندۈم.

ئامان

بۇ شېئىرنى ئوقۇۋاتقان ۋاختىمدا تەلەپچان ئۇستاز، كۆيۈمچان ئانامنىڭ مېھىرلىك سىماسى شېئىرنىڭ ھەر بىر مىسرالىرى ئارىسىدا نامايەن بولدى، كۆز چاناقلىرىم ياشقا تولۇپ، كۆزلىرىم خىرەلەشتى، مەڭزىمدىن سىرغىپ چۈشكەن ياش كونۇپكا تاختىسىنى ھۆل قىلىۋەتتى، ئاۋازام بۇغۇلدى.... بەلكىم ئانىسىزلار مۇشۇنداق ھىسسىياتتا مۇڭلىنىۋاتساق كېرەك، مەن ۋە سىرداش بۇرادەرگە ئوخشاش. بار ئاۋازىمنى قويۇۋېتىپ توۋلىغۇم كېلىۋاتىدۇ:
ئانىلار ئۆلمىسۇن!
ئانىلار ياشىسۇن!
ئانىلارنى قەدىرلەڭلار ئادەملەر!.....
رەخمەت خانقىز، مۇشۇنداق ئېسىل تېمىلىرىڭىز ئۈزۈلۈپ قالمىغاي!

مەرىپەت

ئامان يوللىغان ۋاقتى  2012-12-27 19:55
بۇ شېئىرنى ئوقۇۋاتقان ۋاختىمدا تەلەپچان ئۇستاز، كۆيۈ ...

ھەممىڭلارنىڭ كۆڭلىنى يېرىم قىلىپ قۇيۇپتىمەن، كەچۈرۈڭلار...

ئامان

مەرىپەت يوللىغان ۋاقتى  2012-12-28 10:43
ھەممىڭلارنىڭ كۆڭلىنى يېرىم قىلىپ قۇيۇپتىمەن، كەچۈرۈ ...

نىمىگە كەچۈرۈم سورايسىز خانقىز؟ يوللىغان تېمىڭىز شۇنداق ئېسىل تۇرسا. بۇ شېئىر مەرھۇم ئانامغا بولغان سېغىنىشىمنى تېخىمۇ كۈچەيتىۋەتتى، شېئىرنى ئوقۇۋاتقان ۋاقىتتىكى ھىسسىياتىمنى بىۋاستە ئىپادىلەپ بەردىم شۇ.
سىزنىڭ كەچۈرۈم سورىشىڭىزنىڭ ئورنى يوق، شېئىر دىگەن مۇشۇنداق ئادەمنىڭ يۈرەك تارىنى چېكەلىسىلا ئاندىن ھەقىقى شېئىر بۇلالايدۇ ئەمەسمۇ؟!.....

مەرىپەت

ئامان يوللىغان ۋاقتى  2012-12-28 10:53
نىمىگە كەچۈرۈم سورايسىز خانقىز؟ يوللىغان تېمىڭىز شۇن ...

ياقتۇرۇرۇپ ئوقۇغىنىڭلارغا  رەھمەت...