جۇڭگو تۈركولوگىيەسىنىڭ ئاتىسى ئالەمدىن ئۆتتى

mamatjan74

جۇڭگو تۈركولوگىيەسىنىڭ ئاتىسى ئالەمدىن ئۆتتى
ئۇلۇغ تۈركولوگ، جۇڭگۇ ئۇيغۇرشۇناسلىقىنىڭ بەرپا قىلغۇچىلىرىنىڭ بىرى، مەشھۇر ئالىم، تىلشۇناس گېڭ شىمىن 2012-يىلى 12-ئاينىڭ 17-كۈنى كەچ ئالەمدىن ئۆتتى. بۇ ئېلىمىزنىڭ شۇنداقلا دۇنيا تۈركولوگىيەسىگە نىسبەتەن زور يوقۇتۇش.
گېڭ شىمىننىڭ قىسقىچە تەرجىمھالى:
     گېڭ شىمىن 1929-يىلى جىياڭسۇ ئۆلكىسىنىڭ شۈجوۋ شەھىرىدە تۇغۇلغان. مەركىزىي مىللەتلەر ئۇنىۋېرسىتېتى پىروففىسورى. 1952-يىلى بېيجىڭ ئۇنىۋېرسىتېتى شەرق تىللىرى فاكۇلتېتىنى پۈتتۈرگەن. ئۇ ئېلىمىزنىڭ تۇنجى ئەۋلات ئاز سانلىق مىللەتلەر تىلشۇناسى، جۇڭگۇ ئۇيغۇرشۇناسلىقىنىڭ بەرپاچىسى ئىدى. ئۇ كۆپ خىل تىللاردا ئەسەر ئېلان قىلغان ۋە كۆپ خىل تىللار ئارا ئىلمىي تەرجىمە بىلەن شۇغۇللانغان، گېرمانىيە ھۇمبۇلت فۇندى خەلقئارا ئالىملار مۇكاپاتىغا، شۇنداقلا دۇنيا ئالتاي شۇناسلىقىدىكى ئەڭ بۈيۈك مۇكاپات PLAC مۇكاپاتىغا ئېرىشكەن.
     ئۇ ئۇيغۇر، قازاق، تۈرك قاتارلىق تۈركىي تىللارنى پىششىق بىلگەندىن تاشقىرى، ئېنگىلىز، رۇس، نېمىس، فرانسۇژ، ياپۇن تىللىرىنى بىلەتتى. ئۇنىڭ ئاساسلىق ئەسەرلىرىن: ‹قەدىمكى تۈرك تىلى گىرامماتىكىسى›، ‹قەدىمكى ئۇيغۇر مەدەنىيىتى ۋە ئەسەرلىرى ھەققىدە ئومۇمىي بايان›، ‹قەدىمكى ئۇيغۇر تىلىدىكى قومۇل نۇسقىسى مايىترى سىمىت تەتقىقاتى›، ، ‹دۇنخۇاڭ تۈرك-ئۇيغۇر ھۆججەتلىرىگە كىرىش›، ‹شىنجاڭنىڭ تارىخى ۋە مەدەنىيىتى ھەققىدە ئومۇمىي بايان›، ‹قەدىمقى ئۇيغۇرتىلى ۋەسىقىلىرى دەرسلىكى›، ‹ئۇيغۇر ۋە قازاق ئەدەبىياتىغا دائىر ماقالىلەر توپلىمى›، ‹قەدىمكى ئۇيغۇر ۋەسىقىلىرى تەتقىقاتى›، ‹قەدىمكى تۈرك مەڭگۈ تاشلىرى تەتقىقاتى›، ‹قەدىمكى ئۇيغۇر يېزىقىدىكى ئىقتىسادىي-ئىجتىمائىي ھۆججەتلەر تەتقىقاتى›، ‹ياۋرو-ئاسىيا تارىخ مەدەنىيەت ئامبىرى_ غەربىي يۇرت تارىخ مەدەنىيىتى تەزكىرىسى›، ‹ھازىرقى زامان قازاق تىلى گىرامماتىكىسى›، ‹قازاق تىلى تەزكىرىسى›، ‹قەدىمكى ئۇيغۇر شېئىرلىدىن تاللانما›، ‹قەدىمكى ئۇيغۇرلارنىڭ تارىخىي داستانى ئوغۇزنامە›  قاتارلىقلار بار.
   بىز شەۋقىي تورى ۋە ئۇيغۇر تىل-ئەدەبىيات فاكۇلتېتى ئوقۇغۇچىلىرى ئۇستاز گېڭ شىمىننىڭ ۋاپاتىغا چوڭقۇر قايغۇرىمىز.



شەۋقىي تورى
مەركىزىي مىللەتلەر ئۇنىۋېرسىتېتى ئۇيغۇر تىل-ئەدەبىيات فاكۇلتېتى ئوقۇغۇچىلىرى
2012-يىلى12-ئاينىڭ 18-كۈنى

مەنبە: شەۋقىي تورى http://shewqiy.com/thread-1690-1-1.html