سىنى قانداق ئۇنتىمىز - ئوغلان (نەسىر )

زەپەر

تارىخىمىزدا كىشى قەلبىنى لەرزىگە سېلىپ ئۇنتۇلماس " قەلب ئابىدىسى " تىكلەپ ياشىغان ئوغلانلىرىمىز ئاز ئەمەس . ئۇلارنى ئەسلەش ، ئۇلارنىڭ جەڭگىۋار ، شانلىق ھاياتىدىن مەنە ئىزدەپ ،مەدەت ئېلىپ ياشاش بىزنىڭ ھاياتلىقتىكى بۇرچىمىز بولۇپ قالدى . گەرچە ئۇلارنىڭ ھاياتى ناھايىتى قىسقا بولغان بولسىمۇ ئەمما قىسمەتكە ، ھېكمەتكە تولغانلىقى بىلەن ھەرگىزمۇ قىسقا ئەمەس . خۇددى شائىر ئابابەكرى توختى مەمتىلى تەۋپىق ئەپەندىگە ئاتاپ يازغان :           ئادەمگە ئارتۇقچە بىر ئەسىر ياشاش ،
                                بىر ئەسىرگە تەڭدۇر ئوتتۇز ئالتە ياش .
                               مۇزلىغان زېمىننى ئىللىتقان نېمە ؟
                               قەبرىگە كۆمۈلۈپ ياتقان شۇ قۇياش !
   دەپ خۇلاسە قىلغاندەك .  مانا شۇ تاپتا خەلقىمىزنىڭ نامى ئۆلمەس ئوغلى ، ئىنقىلابىي شائىرى لوتۇپۇللا مۇتەللىپنىڭ تەۋەللۇتىغا ئەتە يەنى 11-ئاينىڭ 16- كۈنى نەق 90 يىل بولىدىغان قۇتلۇق كۈن . بۈگۈن دىيارىمىزدا نەق 1922- يىلى تۇغۇلۇپ، 90 يىلدا ھاياتلىقنىڭ سانسىز سىناقلىرىدىن ئۆتكەن ، ھاياتقا ئاجايىپ مۇستەھكەم ئېتىقاد بىلەن مۇئامىلە قىلىدىغان ، ئۆتكۈر پىكىرلىك ، ئۈچ ۋېلايەت ئىنقىلابىنىڭ جەڭ مەيدانلىرىدا زەپەر مارشىنى ياڭرىتىپ ئۆتكەن بىر مۆتىۋېرىمىز باقىيغا سەپەر قىلدى .(مەن مەرھۇم بىلەن ئىككى، ئۈچ قېتىم دىدار مۇلاقەتتە بولۇپ سۆھبەتلىشىپ باققان . ئۇنىڭ سۆزلىرى مېنى ئاجايىپ كۈچلۈك ھاياجانغا ، تەربىيىگە ئىگە قىلغانىدى .) شۇنداق ئويلىدىم ، ئەگەر لۇتۇپۇللا مۇتەللىپكە بۇ ھايات نېسىپ بولسا بىز ئۇنى بۈگۈنگىچە كۆرەركەنمىز . ئەپسۇس ئۇ تېخى 23 كىمۇ تولۇق كىرمىگەن يەنى 22 يىل 8 ئايلا ياشىيالىدى . ئەمما ئۇ خەلقىمىز قەلبىدە بىر كۈنمۇ ئۇنتۇلۇپ باقمىدى . ئۇنىڭ قىسقىغىنە ھاياتىنىڭ ۋەزنىنى خۇلاسىلاپ بېقىشمۇ ئۇنچە ئوڭاي ئەمەس . ھەر قېتىم ئۇنىڭ ھاياتىنى ئويلىغىنىمدا مېنى تەگسىز خىياللار چىرمىۋالاتتى . ئايىغى چىقماس خىياللارغا غەرق بولاتتىم . ( مەنىلىك خىيال سۈرۈشمۇ كىشىنى تولىمۇ روھلاندۇرىدۇ .) مېنىڭ قولۇمدىن خىيال سۈرۈش بەك كېلەتتى . ئويلاپ باقسام 22 ياش ۋاقىتلىرىمنىڭ ئۆتكۈنچى ھەۋەسلەر بىلەن ئۆتۈپ كەتكەنلىكى ئېنىق ئىدى . 32 يېشىمنىڭمۇ قانداقتۇر تۇرمۇشنىڭ قىلسام ساۋابى ، قىلمىسام سورىقى بولمايدىغان ئايىغى چىقماس ، نەتىجىسى ھېرىپ - چارچاش بىلەن ئاخىرلىشىدىغان ئىشلار بىلەن ئۆتۈپ كەتكەنلىكىنى
چۈشەنگەنىدىم . لۇتۇپۇللا مۇتەللىپ " يىللارغا جاۋاپ " بېرىپ بولۇپلا قالماي ئەشۇ يېشىدا پۈتكۈل خەلقىگە ، ھاياتىغا جاۋاپ بېرىپ بولغانىكەن . ئەمما مېنىڭ جاۋاپ بېرىشىمنى كۈتۈپ تۇرغان سۇئاللار نۇرغۇن - نۇرغۇن ئىدى . ئەڭ يامىنى مەن قايسىسىگە ئالدىدا جاۋاپ بېرىشىمنىمۇ بىلمەيتتىم .  " يىللار مەيدەڭنى تۇتۇپ قاقاخلاپ كۈلمە، ئالدىڭدا قىزىرىشتىن ئارتۇق كۆرىمەن ئۆلۈمنى " دېگەن يالقۇنلۇق مىسرالارنى ھەر قېتىم ئوقۇسام يۈزلىرىمنىڭ بىر يەرلىرى چىمىلدايتتى ، يۈرۈگۈم قاتتىق ئازابلىناتتى . ئۇ شېئىرنى ئوقۇپ يادلىۋېلىش ، چۈشىنىۋېلىش ئاسان بولغان بىلەن تېرەن  چاقىرىقىنىڭ ھۆددىسىدىن چىقماق تەس ئىدى . چۈنكى مېنىڭ يۈزۈم يىللار ئالدىدا تولا قىزىرىپ بەزلىشىپ كەتكەنىدى . ئەڭ يامان ئىش كۆنۈپ قېلىش . بولۇپمۇ مۇشۇنداق چۈشىنىپ تۇرۇپ ، بىلىپ تۇرۇپ كۆنۈپ قېلىش. كالېندارنىڭ تالاي ۋاراقلىرى ھاياتلىقىمنىڭ تىنىقى بىلەنلا يېرتىلىپ تۈگىدى . يىللار شامىلى يەلپۈپ سۇس قالدۇرغان ئىزلىرىمنى كۆممەكتە . ئەي لۇتۇن سېنىڭ ھاياتىڭ نېمىدىگەن ئۇلۇغ ھايات ھە!.. سېنىڭ سىمايىڭنى ئويلىساملا روھلىنىپ كېتىمەن . سېنى بىر كۈنمۇ ئۇنتۇپ باقمىدىم ، مەنلا ئەمەس پۈتكۈل خەلقىڭ ، سېنى قانداق ئۇنتۇيمىز - ئوغلان ...
مەنبەسى  :مىسرانىم            

سىرداش

ناھايىتى     ياخشى  يەكۈنلىنىپتۇ.