تۇرسۇن نازىردىن بارلىق تورداشلارغا خەت

زەپەر

                                        تۇرسۇن نازىردىن بارلىق تورداشلارغا خەت



    بۈگۈن << بارمۇ >> مىكروبىلوگىنى زىيارەت قىلىۋېتىپ، ئاپتونوم رايونلۇق مائارىپ نازارىتىنىڭ نازىرى تۇرسۇن ئىبىراھىم ئەپەندىنىڭ ئېلان قىلغان مىكروبىلوگى كۆزۈمگە چېلىقتى. تۇرسۇن نازىر ئۆزىنىڭ مىكروبىلوگىدا مۇنداق دەپتۇ:
تۇرسۇن ئىبراھىم: مىكروبىلوگ ئاچقاندىن بېرى تورداشلارنىڭ قىزغىن قوللىشىغا ئېرىشتىم. رەھمەت سىلەرگە! قوللىشىڭلار مائارىپىمىز تەرەققىياتىغا تۈرتكە بولغۇسى. خىزمەتلەر ئالدىراش بولغاچقا، باشقا تورلاردىكى پىكىرلەرنى كۆرۈش ئىمكانىيىتى بولمايدىكەن. شۇنداقلا بەزى مەسىلىلەر ئايرىم ئەھۋال بولغاچقا، جەمئىيەتتە ناتوغرا كەيپىيات پەيدا قىلىدىكەن. شۇڭا تورداشلارنىڭ مائارىپقا ئائىت پىكىرلەرنى مۇشۇ مىكروبلوگقا يوللىشىنى ئۈمىد قىلىمەن. مەزمۇن كۆپ بولسا، قىسقىچە ئەھۋالنى يېزىپ، تېلېفون نومۇرىنى قالدۇرساڭلار ئادەم ئورۇنلاشتۇرۇپ سۈرۈشتۈرىمەن.
    بىزدە << گەپنى قىل ئۆتەر يەرگە، سۇنى سەپ سىڭار يەرگە >> دەيدىغان گەپ بار. دېمىسىمۇ نەچچە يىللاردىن بۇيان مائارىپ توغرىسىدىكى خىلمۇ-خىل مەسىلىلەر ھەر قايسى ئۇيغۇرچە تور بېكەتلەردە، مۇنبەرلەردە ناھايىتى كۆپ كۆرۈلدى، بۇ مەسىلىلەرگە نىسبەتەن نۇرغۇنلىغان ئىنكاسلار چۈشكەن بولسىمۇ، لېكىن تورداشلار ئىنكاس قىلغان مەسىلىلەرنىڭ نەق جايىغا بارماسلىقى سەۋەبىدىن نۇرغۇنلىغان مەسىلىلەرنىڭ ئەڭ ئاخىرىدا جاۋابى چىقمىدى. شۇڭا تورداشلارغا دەيدىغىنىم، مائارىپ نازارىتىنىڭ نازىرى بىزگە يۇقىرىقىدەك گەپ قىلىۋاتسا، بىز يەنە نازىرغا ئىشەنمىسەك قاملاشماس.
    تۇرسۇن نازىرنىڭ ئۇيغۇرچە مىكروبىلوگ ئاچقىنىغىمۇ 1 ئاي ۋاقىت بولدى، لېكىن بىزنىڭ ھەر قايسى مۇنبەرلەردە مائارىپ توغرىسىدا يېزىلغان خىلمۇ-خىل تېمىلارغا مىللەت، غورۇر، ۋىجدان نۇقتىسىدىن تۈكرۈكىنى چاچرىتىپ ۋالاقلىغان << ئاشۇ >> تورداشلىرىمىزنىڭ قارىسىنى كۆرگىلى بولمىدى، مائارىپ توغرىسىدىكى خىلمۇ-خىل مەسىلىلەر گەرچە ھەر قايسى تور بېكەت، ھەر قايسى مۇنبەرلەردە ئەڭ قىززىق تېما، ئىنكاس ئەڭ كۆپ چۈشكەن تېمىلارغا ئايلانغان بولسىمۇ بىراق تۇرسۇن نازىرنىڭ 1 ئاي ۋاقىت ئىچىدىكى مەستانە سانى ئاران 249  ئىكەن. ئويلاپ باقايلى تورداشلار، ئەينى ۋاقىتتا ئۇيغۇرچە مىكروبىلوگ يوقلۇقى توغرىسىدا قاقشاپ يۈردۇق، ئۇيغۇرچە مىكروبىلوگ بارلىققا كەلدى، لېكىن ئاشۇ مىكروبىلوگدا رەھبەرلەرنىڭ يوقلۇقىدىن قاقشىدۇق، رەھبەرلەر مىكروبىلوگقا تىزىملاتتى، ئەمدى ئاشۇ رەھبەرلەرنىڭ ئىش بېجىرىش ئەھۋالىدىن گۇمان قىلىۋاتىمىز، دېمەك، بىزنىڭ ئەينى چاغدا مائارىپ توغرىسىدا قاقشاشلىرىمىز، تۈكۈرۈكلىرىمىزنى چاچرىتىپ ۋالاقلاشلىرىمىز ئەمەلىيەتتە شەكىلۋازلىقتىن باشقا ھېچنەرسە ئەمەس.
    ھەر قانداق بىر شەيئىنىڭ يوقلۇقتىن بارلىققا كېلىش، كىچىكلىكتىن زورىيىش، تەرەققىي قىلىپ گۈللىنىش جەريانى بولىدۇ، ئۇيغۇرچە مىكروبىلوگلىرىمۇ ھەم شۇنداق. لېكىن مېنىڭ نەچچىمۇ يىللاردىن تور دۇنياسىنى كۈزىتىشىمچە، قارا-قويۇق، نادانلارچە باشقىلارنىڭ كەينىگە ئەگىشىىپ ۋالاقلاش، مەسلىنى ئوتتۇرىغا قويغاندا پاكىتقا ھۆرمەت قىلماسلىق، قىزىققانلىق قىلىپ مەسلىنى ھەر نۇقتىدىن كۈزىتىشكە ئېتىبار بەرمەسلىك قاتارلىق ئەھۋاللار بىزنىڭ تورداشلىرىمىز ئىچىدە ناھايىتى ئومۇملىشىپ كېتىپتۇ. بىز ۋارقىراشقا، جارقىراشقا، مەسلىنى باشقىلارغا دۆڭگەشكە ناھايىتى ئۇستا. مەسلىنىڭ ماھىيىتىنى چۈشىنىپ ئۇنىڭغا ئوبېيكتىپ باھا بېرىشكە سەل قارىغانلىقىمىز سەۋەبىدىن نەچچە كۈن ۋالاقلاپ شۇ تېما كەينىگە ئۆتۈپ كەتكەندىن كېيىنلا ئۇنىڭ بىلەن كارىمىز يوق ئەھۋال شەكىللەندى. بۇ خۇددى << بولسا ھالى يوق، بولمىسا كارى يوق >> دېگەندەكلا ئىش. خەنزۇچە مىكروبىلوگلارغا قارايدىغان بولساق، مىكروبىلوگ كۆڭۈل ئېچىش، پاراڭلىشىش دەرىجىسىدىن ھالقىپ، مەسىلە ھەل قىلىدىغان، خەير-ساخاۋەت ئىشلىرىنى ئېلىپ بارىدىغان، كىشىلەرنى تەربىيەلەيدىغان شۇنداقلا ئادەمنى مېغىزلىق، كونكېرت، پاكىتلىق گەپ قىلىشقا يىتەكلەيدىغان ھالەتكە يېتىپ، تورداشلارنىڭ كۈندىلىك تۇرمۇش، ئۆگىنىش ۋە خىزمەتلىرىدە مۇھىم رول ئويناۋاتىدۇ.
    مەن بۇ يەردە نېمىگە قايناپ سۆزلەپ كېتىمەن دېسە، تور دۇنياسىدىكى تورداشلار ئەڭ كۆپ كۆڭۈل بۆلۈۋاتقان مائارىپ مەسلىسىنى ھەل قىلىشتا ئاساسلىق رول ئوينايدىغان نازىرنىڭ ئۇيغۇرچە مىكرو بىلوگىغا مەستانە بولغانلارنىڭ سانىنىڭ ئاران 249 ئادەم بولۇشى... بۇ نېمىدىگەن كىشىنى ئويغا سالىدىغان سان ھە؟ ئەجىبا بىزدە تورغا چىقىۋاتقانلار شۇنچىلىك ئازمۇ؟ ئەجىبا مائارىپقا كۆڭۈل بۆلىدىغان تورداشلار شۇنچىلىك ئازمۇ؟ بۇ ئەھۋال بىزگە زادى نېمىنى چۈشەندۈرىدۇ؟ نېمە ئۈچۈن ئارتسىت، سەنئەتچىلەرنىڭ مىكروبىلوگىغا مەستانە بولغانلار شۇنچىلىك كۆپكى، تۇرسۇن نازىرغا ئوخشاش، مەسلىنى ئىنكاس قىلساڭلار مەن سۈرۈشتۈرىمەن دەيدىغان رەھبەرلەرنىڭ مەستانە سانى شۇنچىلىك ئاز؟ ئويلىنايلى تورداشلار، ياخشىراق ئويلىنايلى، توردىن، مىكروبىلوگدىن ئۈنۈملۈك پايدىلىنايلى، چۈنكى بىزنىڭ مائارىپىمىز سىزنىڭ، بىزنىڭ شۇنداقلا ھەممەيلەننىڭ ئورتاق كۆڭۈل بۆلۈشىگە، ئورتاق مەسئۇل بولۇشىغا شۇنداقلا ئورتاق قوللىشىغا مۇھتاج!!!   
    مائارىپقا كۆڭۈل بۆلىدىغان ھەر بىر مەسئۇلىيەتچان تورداشنىڭ بۇ ئۇچۇرنى تارقىتىشىنى ئۈمىد قىلىمەن.
تۇرسۇن ئىبرايىم نازىرنىڭ بىلوگ ئادرىسى:http://barmu.cn/index.php?m=blog&uid=29265

asrar

سىز ۋە باشقىلار ،مەن ۋە سىز مۇشۇنداق تەشۋىق قىلساق بۇ مىكروبلوگنى بىلىدىغانلاركۆپىيىدۇ.بەلكىم بۇرۇن بۇ ۇچۇرنى باشقىلار  كۆرمىگەنلەر بۇلۇشى مۇمكىن.

ئەنقەر

ھازىر نۇرغۇن تورداشلار ۋە قېرنداشلار بۇ مىكروبىلوگنىڭ ئېچىلغېنىنى بىلمەسلىكى مۇمكىن، ھەممىمىز تەڭ تەشۋىق قىلساق ئۈنۈمى ياخشى بۇلارمىكىن.

ئويغان1

ياخشى قلىپسز.ھەممىمىز تەڭ تەشۋىق قىلساق ئۈنۈمى ياخشى بۇلىدۇ.

tarhanbag

تەشۋىقاتنى كۈچەيتەيلى. مەسىللەرنى ئىنكاس قىلايلى. ئىنكاس قىلغاندا ئۇسۇلغا، گەپ-سۆزگە دىققەت قىلايلى.
بىراق، يەرلىك ھۆكۇمەت خاندىن يامانراق.......

سىرداش

شۇنچە چوڭ  بىر نازىر     بىلوگ ئېچىپ   مائارىپىمىزغا قارىتا پىكىر بىرىڭلا دىسە  بىز  جىمجىتلا  ئولتۇرۇپتىمىزغۇ،  بەلكىم  بىرەر  تەشۋىش  بارمۇدۇ.......

ئالىم

ياخشى تىما يوللاپسىز بۇرادەر! بولسا تۇرسۇن ئىبرايىم نازىرنىڭ  بىلوگ ئادرىسىنىمۇ قالدۇرغان بولسىڭىز.كەڭ تەشۋىق قىلغان بولساق.

alimjan

[ھازىر نازىر تۇرسۇن ئىبرايىمنىڭ مىكرو بىلوگ ئاچقىنىنى مەنمۇ تەشۋىق قىلدىم .بىراق ھازىر پارتىيە 18-قۇرۇلتاي ئېچىلىۋاتقان مەزگىلدە مۇقىملىققا تەسىر يىتىپ قالمىسۇن دەپ ،مائارىپىمىزدا ساقلىنىۋاتقان بەزى مەسىلىلەرنى يوللىمىدىم .يوللىسام ،سۇ كىتىپ تاش قېلىشتىن ،ئوسما كىتىپ قاش قېلىشتىن ئەنسىرىدىم .....بۇ ھەرگىزمۇ نازىرغا ئىشەنمىگىنىم ئەمەس.]