ئىبرەتنامە

سىرداش

ئبىرەتنامە


ئاپتورى : قادىر بۇلاق


ئەزىز پەرزەنت بۇ جاھاندا ئۆتكەنلەردىن ئىبرەت ئېلىڭ،

ئادەم كېلىپ مايمۇن سۈپەت كەتكەنلەردىن ئىبرەت ئېلىڭ.


زامانداشلار،تەقدىرداشلار،دوست يارەنلەر،قەدىردانلار،

ئەخلاقسىزلىق گىرداۋىغا يەتكەنلەردىن ئىبرەت ئېلىڭ .


ئاتا-ئانا خىزمىتىدە بولماي،رەھمەت دۇئا ئالماي،

نەسىھەتكە باقماي،قاپاق تۈرگەنلەردىن ئىبرەت ئېلىڭ.


ئۆز ئكيىنى تاشلاپ كېتىپ،نادانلىقتىن غەمگە پېتىپ،

تالا تۈزدە ئۇخلاپ يېتىپ يۈرگەنلەردىن ئىبرەت ئېلىڭ.


بىرەر ئوقەت ھۈنەر قىلماي،ئەل ۋەتەنگە خىزمەت قىلماي،

ئۆز مەيلىچە شېرىن خىيال سۈرگەنلاردىن ئىبرەت ئېلىڭ.


بۇلاڭچىغا قېتىلغاندىن،بۈچەك پۇلغا سېتىلغاندىن،

تاپقان پۇلنى قىمارغا دو تىككەنلەردىن ئىبرەت ئېلىڭ.


قاۋاقلاردا ھاراق ئىچىپ،ئاڭا قوشۇپ ئاقنى چېكىپ،

بىر بىرىگە كىپەن پىچىپ بەرگەنلەردىن ئىبرەت ئېلىڭ .


يېرىم يالىڭاچ كىيىنىپ،قولتۇقلىشىپ غىلجىڭلىشىپ،

ھاياسىزلىق بىلەن سۆيگەن كۆيگەنلەردىن ئىبرەت ئېلىڭ.


قانۇن بىلەن پۇت تېپىشىپ،ئۆز جىنىنى دو تىكىشىپ،

ياش ئۆمرىنى خار ئېتىشكە كۆنگەنلەردىن ئىبرەت ئېلىڭ.


ئادەم ئېلىپ ساتقانلاردىن،جىنايەتكە پاتقانلاردىن،

زىندان ئارا يېتىپ ئازاپ چەككەنلەردىن ئىبرەت ئېلىڭ.


گۇناھ قىلىپ جازالانغان،ئەل دۈشمىنى باھالانغان،

جەمىيەتتىن ئادالانغان،يىتكەنلەردىن ئىبرەت ئېلىڭ.


يۈرەك باغرى قانغا تولۇپ،رەڭگىرويى سۇنۇپ سۇلۇپ،

ھەق جازاغا مەھكۇم بولۇپ ئۆلگەنلەردىن ئىبرەت ئېلىڭ.


ئۆز پۇتىغا پالتا چېپىپ،يامانلارغا چاپان يېپىپ،

ھەر بالانى ئۆزى تېپىپ كەلگەنلەردىن ئىبرەت ئېلىڭ.


مەغرۇرلىنىپ پۇلۇم بار دەپ،توساقسىز كەڭ يولۇم بار دەپ،

تېرىسىگە سىغماي مەيدە كەرگەنلەردىن ئىبرەت ئېلىڭ .


بىر بىرىگە غەيۋەت قىلىپ،ياخشىلارغا تۆھمەت قىلىپ،

پۇرسەت كۈتۈپ مۆكۈپ ياتقان » مەرگەن «لەردىن ئىبرەت ئېلىڭ.


رەزىل تۈلكە يالغانچىدىن،ھىلىگەر شۇم ئالدامچىدىن،

ئەل بەختىگە شۇملۇق تىلەپ كۈتكەنلەردىن ئىبرەت ئېلىڭ.


مەنبە : بۇلاق ژورنىلى

زەپەر

ياخشى يېزىلغان ئىبىرەتنامىكەن ياريسىز . رەخمەت سىزگە

tarhanbag

ھەقىقەتەن ياخشى ئىبرەتنامە بوپتۇ. مەنمۇ ئىبرەت ئالاي، سىزمۇ ئىبرەت ئېلىڭ، ئۇمۇ ئىبرەت ئالسۇن، ھەممىمىز ئىبرەت ئالايلى.