پىشقەدەم شائىر ھاجى ئەھمەد كۆلتىگىن تۇيۇقلىرىدىن
1 رازىمەن سۆيگۈم ئۈچۈن ئوت كەچ دىسەڭ، تەرك ئېتىپ ئۇيقۇڭنى كۈندۈز-كەچ دىسەڭ. رام قىلالمايدۇ بىراق سېھرىڭ مېنى، سۆي مېنى، ئەل سۆيگىسىدىن كەچ ، دىسەڭ.
2 ئۆز ئاتاڭ، تۇققان ئاناڭغا يانغىنىڭ، زاتى ھايۋانلىق خۇيىغا يانغىنىڭ. ئاقلىيالماي بۇرچى پەرزەنتلىكنى سەن، نە كېرەك پەرزەنت ئوتىدا يانغىنىڭ. 3 مەرىپەت شامىنى دىلغا ياققىنىڭ، ئەزگۈلۈك ھەم قۇتقا كۆكرەك ياققىنىڭ، بەرمە رايىڭنى ئەمەلگە، ئەلگە باق، شاھلىقىڭدۇر ئەل دىلىغا ياققىنىڭ.
4 بىر سەمەندەر ئەيلە -ئوتقا سال مېنى، تاشلا دەرياغا، قىلىپ بىر سال مېنى. بولسىمۇ ئاشىققا ھەر مۈشكۈل ئاسان، تەس يېشىش بوينۇمغا چۈشكەن سالمىنى.
5 تالى-مەجنۇندەك ئۆسۈپ، بوي تارتقىنىڭ، ئەركە كۆڭلۈمنى ئۆزۈڭگە تارتقىنىڭ. پەزلى ئاشىقلىقمۇ ئېيتقىن، دىلرەبا، كۆيدۈرۈپلا، سۆيگىدىن باش تارتقىنىڭ.
مەنبە: ‹ھاجى ئەھمەد كۆلتىگىن شىئېرلىرىدىن تاللانما› دىن ئېلىندى
|