بۆلۈم باشلىقىنىڭ قىزىقىشى(فىليەتۇن)

Ziba

  

   بۆلۈم باشلىقىنىڭ قىزىقىشى(فىليەتۇن)
ۋاڭ ۋېيفىڭ

   ھەممە ئادەمنىڭ ئۆزىگە تۇشلۇق قىزىقىشى بولغىنىدەك، بۆلۈم باشلىقىمىزنىڭمۇ كەڭ دائىرىلىك قىزىقىشى بار. ئون يىل ئىلگىرى خىزمەتكە قاتنىشىپ بۆلۈمگە ئىشقا چۈشكىنىمدە، بۆلۈم باشلىقىمىز ۋاسكېتبول ئويناشقا ئامراق ئىكەن. ئۇ چاغدا ھازىرقى بۆلۈم باشلىقىمىز مۇئاۋىن بۆلۈم باشلىقى ئىدى. ئەمەلىيەتتە بۆلۈم باشلىقىمىزنىڭ ۋاسكېتبول ئويناش سەۋىيەسى ئانچە يۇقىرى بولمىسىمۇ، ۋاقتى بولسىلا تەنتەربىيە سارىيىغا بېرىپ ۋاسكېتبول ئوينايتتى. ئۇ ھەمىشە ۋاسكېتبول ئويناش بىلەنلا بولۇپ كېتىپ، ئائىلىسى بىلەن كارى بولمىغاچقا، ئايالى دائىم ئۇنىڭغا تاپا – تەنە قىلاتتى. ئەمما بۆلۈم باشلىقىمىز ئايالىنىڭ گېپىگە پەرۋامۇ قىلماي، بۇرۇنقىدەكلا ۋاسكېتبول ئويناۋېرەتتى.
   بىر قانچە يىل ئۆتكەندىن كېيىن، تەنتەربىيە ئوقۇتقۇچىلىقىدىن ئىدارىمىزگە باشلىق بولۇپ ئۆسكەن جاڭ xx يۆتكىلىپ كەتتى. ئىدارىمىزنىڭ مۇئاۋىن باشلىقى لى xx مەسئۇل باشلىق بولىدىكەن، دېگەن گەپ تارقالدى . لى مۇئاۋىن ئىدارە باشلىقى شاھمات ماھىرى بولۇپ، ئىلگىرى شەھىرىمىزدە ئۆتكۈزۈلگەن شاھمات مۇسابىقىسىدە چېمپىيونلۇققا ئېرىشكەن ئىدى . لى مۇئاۋىن ئىدارە باشلىقىمۇ بوش ۋاقىت تاپسىلا شاھمات ئويناتتى . ئىدارىمىزدە شاھمات ئويناشتا ئۇنىڭغا تەڭ كېلەلەيدىغانلار يوق ئىدى. شۇڭا لى مۇئاۋىن ئىدارە باشلىقى ‹‹شاھماتتا مەن بىلەن تۇتۇشالايدىغانلار بولسا، تازا تۇتۇشۇپ باقسام نېمىدېگەن ياخشى بولاتتى›› دەپ ئويلايتتى.
   جاڭ ئىدارە باشلىقى ئىدارىمىزدىن يۆتكىلىپ كەتكەندىن بۇيان، بۆلۈم باشلىقىمىزنىڭ قىزىقىشى تۇيۇقسىزلا ئۆزگىرىپ، شاھمات ئويناشقا ھېرىسمەن بولۇپ قالدى. ئۇنىڭ شاھماتقا بولغان قىزىقىشى ئەينى چاغلاردىكى ۋاسكېتبولغا بولغان قىزىقىشىدىن پەرقلىنىپ كەتمەيتتى. بىر قانچە كۈن ئىلگىرى، مەن بۆلۈم باشلىقىمىزنىڭ ئىدارىنىڭ قىرائەتخانىسىدىن شاھمات بىلىملىرىگە ئائىت بىر مۇنچە كىتابنى ئارىيەتكە ئالغانلىقىنى كۆرگەنىدىم.
   ئۇزاق ئۆتمەي شەھەرلىك مەدەنىيەت – تەنتەربىيە ئىدارىسىنىڭ باشلىقى جاۋ xx ئىدارىمىزگە باشلىق بولۇپ كەلدى. ئىككىنچى كۈنى تەشكىلات بۆلۈمىنىڭ مۇئاۋىن باشلىقى ئىدارىمىزگە كېلىپ، شەھەرنىڭ ۋەزىپىگە تەيىنلەش ئۇقتۇرۇشىنى ئوقۇدى. مەن بۆلۈم باشلىقىمىزنىڭ دەرھال بازاردىن بىر يۈرۈش نەپىس ياسالغان قارماق، چىغ شىلەپە، قاتلىنىدىغان ئورۇندۇق سېتىۋېلىپ، تەييارلىقنى پۇختا قىلغانلىقىنى كۆرۈپ، كۆڭلۈمدە: ‹‹بۆلۈم باشلىقىمىزنىڭ قىزىقىشى ئەمدى بېلىق تۇتۇشقا ئۆزگەرگەن ئوخشايدۇ›› دەپ ئويلاپ قالدىم. خىزمەتداشلىرىممۇ پىخىلداپ كۈلگىنىچە ماڭا: ‹‹ئىدارىمىزگە يېڭىدىن كەلگەن جاۋ باشلىقنىڭ شەھەرلىك بېلىق تۇتۇش جەمئىيىتىنىڭ مۇئاۋىن باشلىقلىق ۋەزىپىسىنى قوشۇمچە ئۆتەيدىغانلىقىدىن خەۋىرىڭىز يوق ئوخشىمامدۇ››؟ دېدى.
مەخمۇت مۇھەممەد تەرجىمىسى