ئالتۇن ھەپتىدە ئۇقتۇرۇشلۇق پۇل ئامانەتنى ئويلىشىپ قويۇڭ

سىرداش

ئالتۇن ھەپتىدە ئۇقتۇرۇشلۇق پۇل ئامانەتنى ئويلىشىپ قويۇڭ

مەنبە : شىنجاڭ گېزىتى


   بۇ يىل تاۋۇز چاغىنى بىلەن دۆلەت بايرىمى بىللە كەلگەچكە سەككىز كۈن قويۇپ بېرىلىدىغان بولدى. بۇ سەككىز كۈنلۈك دەم ئېلىشتا نۇرغۇن كىشى ساياھەتكە چىقىشنى، ئاتا – ئانا، ئۇرۇق –تۇغقانلىرىنى يوقلاشنى پىلانلىماقتا. مەيلى باشقا جايغا بېرىڭ ياكى ئۆيىڭىزدە ئارام ئېلىڭ، ۋاقتىنچە ئىشلەتمەيدىغان مەبلىغىڭىز ئارام ئېلىپ قالمىسۇن.

   ئالتۇن ھەپتىلىك دەم ئېلىش مەزگىلىدە ئېشىنچا مەبلەغنىڭ قىممىتىنى ساقلاش ۋە قىممىتىنى ئاشۇرۇشنىڭ ئۈنۈملۈك ئۇسۇلى بارمۇ – يوق؟ بار، ئۇ بولسىمۇ ئۇقتۇرۇشلۇق پۇل ئامانەتتۇر. جۇڭگو بانكىسى شىنجاڭ ئۇيغۇر ئاپتونوم رايونلۇق شۆبە بانكىسى مەبلەغ كەسپىي بۆلۈمىنىڭ روزغارچىسى ئەسقەر جاپپار بۇ ھەقتە توختىلىپ مۇنداق دېدى: ئالتۇن ھەپتىلىك دەم ئېلىش مەزگىلىدە پاي چېكى، فوند بازىرى قاتارلىق مەبلەغ بازارلىرى تاقىلىدىغان بولغاچقا، مەبلەغ سالغۇچىلارنىڭ نۇرغۇن نەق پۇلى ئاكسىيە ھېسابىدا ساقلىنىپ تۇرىدۇ، كىچىك كارخانىلار دائىملىق خىراجەت مەبلىغىنى، شەخسلەر ۋاقتىنچە ئىشلەتمەيدىغان ئېشىنچا پۇللىرىنى بانكىغا قەرەلسىز ئامانەت قويۇشقا مەجبۇر بولىدۇ. ھازىر ئاپتونوم رايونىمىزدىكى بانكىلار ئۇقتۇرۇشلۇق پۇل ئامانەت مۇلازىمىتىنى يولغا قويغان بولۇپ، ئۇ دەل يۇقىرىقى كارخانا ۋە شەخسلەرنىڭ تاللىشىغا باپ كېلىدۇ.

   ئۇقتۇرۇشلۇق پۇل ئامانەت مۇئامىلىدارلار پۇلنى ئامانەت قويغاندا بانكا بىلەن ئامانەت قويۇش قەرەلىنى ئالدىن بېكىتمەيدىغان، لېكىن پۇلنى ئېلىشتىن ئىلگىرى بانكىغا ئۇقتۇرۇش قىلىپ بەلگىلەنگەن كۈنى ھېساب بوغۇپ ئۆسۈم ھېسابلايدىغان پۇل ئامانەت تۈرىدۇر. بۇنداق پۇل ئامانەت ئادەتتە ئەمەلىي ئامانەت قويۇلغان قەرەلى قانچىلىك بولۇشىدىن قەتئىينەزەر، مۇئامىلىدارلارنىڭ پۇلنى ئېلىشتىن بۇرۇنقى تەلىپى بويىچە بىر كۈنلۈك ۋە يەتتە كۈنلۈك، دەپ ئىككىگە بۆلۈنىدۇ. يەنى بىر كۈنلۈك ئۇقتۇرۇشلۇق ئامانەتنى ئېلىشتىن بىر كۈن بۇرۇن، يەتتە كۈنلۈك ئۇقتۇرۇشلۇق ئامانەتنى ئېلىشتىن چوقۇم يەتتە كۈن بۇرۇن ئۇقتۇرۇپ قويۇشقا توغرا كېلىدۇ. ئەگەر ئەمەلىي ئامانەت قويۇلغان ۋاقىت يەتتە كۈنگە توشمىسا، قەرەلسىز ئامانەتنىڭ ئۆسۈم نىسبىتى بويىچە ئۆسۈم ھېسابلىنىدۇ.

   ئەسقەر جاپپارنىڭ تونۇشتۇرۈشىچە، شەخسلەر ھېسابىدىكى ئۇقتۇرۇشلۇق پۇل ئامانەتنىڭ باشلىنىش سوممىسى 50 مىڭ يۈەن، كارخانىلار ھېسابىدىكى ئۇقتۇرۇشلۇق پۇل ئامانەتنىڭ باشلىنىش سوممىسى 500 مىڭ يۈەن بولىدىكەن. تور بانكىسى مۇلازىمىتى ئاچقان مۇئامىلىدارلار ئۇقتۇرۇشلۇق پۇل ئامانەتنى بانكىغا بارمايمۇ تور بانكىسى ئارقىلىق بېجىرەلەيدىكەن. نۆۋەتتە بانكىلار بېجىرىۋاتقان بىر كۈنلۈك ئۇقتۇرۇشلۇق پۇل ئامانەتنىڭ يىللىق ئۆسۈم نىسبىتى % 0.8، يەتتە كۈنلۈك ئۇقتۇرۇشلۇق پۇل ئامانەتنىڭ يىللىق ئۆسۈم نىسبىتى % 1.35 بولۇپ، قەرەلسىز ئامانەتنىڭ % 0.35 لىك ئۆسۈم نىسبىتىدىن ئۈچ – تۆت ھەسسە يۇقىرى ئىكەن. بايراملىق دەم ئېلىش مەزگىلىدە ۋاقتىنچە ئىشلەتمەيدىغان ئېشىنچا مەبلەغنى ئۇقتۇرۇشلۇق ئامانەتكە قويغاندا مەبلەغنىڭ قىممىتىنى ئاشۇرۇش مەقسىتىگە يەتكىلى بولىدىكەن.

   ئەگەر بۇ يىلقى سەككىز كۈنلۈك دەم ئېلىش مەزگىلىدە ئىشلەتمەيدىغان 100 مىڭ يۈەن مەبلىغىڭىز بولسا، ئۇنى بانكىغا سەككىز كۈنلۈك قەرەلسىز ئامانەتكە قويسىڭىز 7.67 يۈەن ئۆسۈم كىرىمىگە ئېرىشىسىز؛ يەتتە كۈنلۈك ئۇقتۇرۇشلۇق پۇل ئامانەت بېجىرسىڭىز 25.89 يۈەن ئۆسۈم كىرىمىدىن سىرت يەنە بىر كۈنلۈك قەرەلسىز ئۆسۈم كىرىمى 0.96 يۈەنگە ئېرىشىسىز. يەنى سەككىز كۈنلۈك پايدىڭىز قەرەلسىز ئامانەتنىڭكىدىن 3.5 ھەسسە كۆپ بولىدۇ. بۇنىڭدا ئامانەت قويىدىغان مەبلەغ قانچە كۆپ بولسا ئېرىشىدىغان ئۆسۈم كىرىمىمۇ شۇنچە كۆپ بولىدۇ. ئېسىڭىزدە بولسۇنكى، ئادەتتە ئۇقتۇرۇشلۇق پۇل ئامانەتنىڭ ئۆسۈم ھېسابلاش قەرەلى يەتتە كۈن بولۇپ، پۇلنى يەتتە كۈن توشماي تۇرۇپ ئېلىۋالسىڭىز، يەنىلا قەرەلسىز پۇل ئامانەتنىڭ ئۆسۈم نىسبىتى بويىچە ئۆسۈم ھېسابلىنىدۇ.