توي تەكلىپى

زەپەر

                                                        توي تەكلىپى

                                                ئەزىز نەيسىن (تۈركىيە)
                                                         
                                                          ھېكايە


    — سۆيۈملۈكۈم، شۇ تاپتا ئۆزۈمنى تولىمۇ بەختلىك ھېس قىلماقتىمەن. چۈنكى سۆيگۈمنى ئاخىر قوبۇل قىلدىڭىز – دە! شېرىن ئېيىمىز يەنە ئۈچ ئاي داۋاملىشىدىغان بولدى. مەن ھەممە ئارزۇيىڭىزنى قاندۇرىمەن. بىراق، سىزگە دېسەم، ئۈچ ئاي بەك ئۇزاقمۇ قانداق؟... مەن پەقەت پىكرىڭىزنى ئاڭلاپ باقماقچى.
    — قوشۇلدىڭىزمۇ، ئامرىقىم. قەلبىمنى چۈشىنىدىغانلىقىڭىزنى بىلەتتىم. مېنىڭچە، ساياھەتكە چەت ئەللەرگە چىقىشىمىزنىڭ ھاجىتى يوق، دۆلىتىمىزدىمۇ كۆرگۈدەك گۈزەل جايلار كۆپقۇ؟ بىلەمسىز سۆيۈملۈكۈم، دېڭىزنى تاماشا قىلىش بەكمۇ كۆڭۈللۈك، قوشۇلامسىز؟
    — بارىكاللا، قەدىرلىكىم، قوشۇلىدىغانلىقىڭىزنى بىلەتتىم. بىر ھەپتە ۋاقىت چىقىرىپ بۇرسقا بېرىپ كېلەيلى. ئۇ يەرگە بارساق، دېڭىز تاماشىسىغا بارغاندىن كۆپ ئەرزان. بۇ پەقەت مېنىڭ ئويۇم، سۆيۈملۈكۈم....
    — ئامرىقىم، ئۇ يەرگە بارغاندا مېھمانخانىلاردا يېتىشىمىزنىڭ نېمە پايدىسى؟ ئۇ بىر ئىسىراپچىلىققۇ؟ شۇنىڭغا خەجلىگەن پۇلغا سىزگە چىرايلىق بۇلاپكا سېتىۋالساق ياخشى ئەمەسمۇ؟ ئۇ كۆكرىكىڭىزدە ۋالىلداپ، سىزگە بىر ئۆمۈر ھەمراھ بولىدۇغۇ!
    — ھە، راست، ئوبدانراق ئويلاپ بېقىڭ، بۇلاپكا ئالغاننىڭ نېمە ئەھمىيىتى، ئۇنىڭدىن كۆرە، شۇ پۇلغا تەنتەنىلىك توي مۇراسىمى ئۆتكۈزسەك ياخشى ئەمەسمۇ؟
    — ئەمەلىيەتتىغۇ توي مۇراسىمى ئۆتكۈزۈشىمىزنىڭمۇ ھېچقانچە ئەھمىيىتى يوق. بۇ پەقەت باشقىلارنىڭ ئويناپ – كۈلۈشى ئۈچۈن پۇل خەجلىگەنلىك. ئەقىللىق كىشىلەر ھەرگىز ئۇنداق قىلمايدۇ.
    — رەھمەت، جېنىم، قوشۇلىدىغانلىقىڭىزنى بىلەتتىم. سىز دۇنيادىكى ئەڭ ئەقىللىق قىز – دە.سىز بىلەن يەنە بىر ئىشنى مەسلىھەتلەشمەكچىمەن. مېنىڭچە، بىرلا قېتىم كىيىدىغان توي كۆڭلىكى سېتىۋېلىشىمىزنىڭ نېمە ھاجىتى؟ بولدى، شۇ كۆڭلەكنى كىيمەيلا قويۇڭە! ئاشقان پۇلغا ئۆي سېتىۋالايلى.
    — ھازىرقى ئۆي باھاسىغۇ ئادەمنى چۆچۈتىدۇ. ئۆي ئالغان بىلەن، ئۆي جازانىخورلىرىنى باي قىلىدىغان گەپ. بىزگە بىر ئېغىز ئۆي بولسىلا كۇپايە ...
    — سىز توي خېتى ئېلىپ، دوستلىرىڭىزنى چاقىرىپ كۆز – كۆز قىلماقچىمۇ؟ بىر – بىرىنى ھەقىقىي ياخشى كۆرىدىغان بىزدەك ئاشىق – مەشۇقلارغا بۇنداق قىلىشنىڭ نېمە ھاجىتى؟ شۇ پۇللارغا دۇنيا بويىچە ئەڭ ئۇستا تىككۈچىنى تەكلىپ قىلىپ، سىزگە دۇنيا بويىچە ئەڭ چىرايلىق مۇراسىم كىيىمى تىكتۈرسەك ياخشى ئەمەسمۇ؟
    — سۆيۈملۈكۈم، ھازىر ياز تۇرسا، مۇراسىم كىيىمى كىيسىڭىز قاملاشماس. سىزگە ھازىر نېپىز، يەڭگىل كۆڭلەك تازا باپ. شۇڭا تۆت مېتىر رەخت سېتىۋالايلى. ھە راست، پۇل خەجلەپ نەدىكى بىر تىككۈچىنى تەكلىپ قىلىشنىڭ ھاجىتى يوق. قولىڭىز شۇنداق چېۋەرغۇ، ئۆزىڭىز قاملاشتۇرۇپ تىكىۋالالايسىز – ھە، جېنىم.
    — تۆت مېتىر رەخت بەك ئۇزۇنمۇ قانداق؟ ئۆزىڭىزگە ماس كەلگۈدەك كۆڭلەكتىن بىرسىلا كۇپايە. ئۇنىڭغا بىر يېرىم مېتىر رەخت بولسىلا يېتىدۇ. ئامرىقىم، سىز بار جاي ماڭا جەننەتتەكلا بىلىنىدۇ. شۇنداق ئىكەن، يەنە ئۆي سېتىۋېلىپ نېمە قىلىمىز؟ كۆڭلەك تىككۈزۈشنىڭ نېمە ھاجىتى؟ سۆيۈملۈكۈم ...
قەدىرلىكىم، بىز توي قىلايلى!

asrar

توي قىلىش پۇل،مال-دۇنيا ئۈستىگە قۇيۇلمىسۇن ،مۇھاببەتمۇ شۇ...

◤pari◥

توي تەكلىپى دىگەننى كۆرۈپلا  بۇ زەپەر ئەپەندىم يەنە كىمگە  توي تەكلىپى قويغاندۇ دەپ كىرىپتىمەن دىسە ؟؟؟؟
بۇ ئەسلىدە بىر ھىكايە ئىكەن ئەمەسمۇ؟؟؟
رەھمەت .

admin

بۇ ئەر گەپكە بەكلا ئۇستىكەن. دەريا بۇيىغا ئاپىرىپ سۇ ئىچۈرمەي ئېلىپ كەلگۈدەك...

دىلكەش

ياخشى ھىكايىكەن .