شاھزادە خاررى ھەربىي سەپتىن چېكىنىدىغانلىقىنى ئېلان قىلدى

گىراف

يېقىندا، شاھزادە خاررى سىرتقا ئۆزىنىڭ بۇ يىل 6-ئايدا 10 يىللىق ھەربىي ھاياتىنى ئاخىرلاشتۇرىدىغانلىقىنى، بۇنىڭدىن كېيىن نېمە قىلىشنى تېخى بېكىتمىگەنلىكىنى بىلدۈردى. ئەنگلىيە تاراتقۇلىرى بەس-بەستە شاھزادە خاررىنىڭ ئۇزۇن مەزگىل ھەربىي بولۇشى ئۇنىڭ سىياسىي ئوبرازىنى كۆپ ياخشىلىدى، دەپ ئىپادە بىلدۈردى.
شاھزادە خاررى 1984-يىلى تۇغۇلغان بولۇپ  ۋەلىئەھدى چارلىز بىلەن مەلىكە دىئاننانىڭ ئىككىنچى ئوغلى، ھازىر خانلىق تەختىنىڭ تۆتىنچى ۋارىسى. 17-مارت، ئۇ بايانات ئېلان قىلىپ، ھەربىي سەپتىن چېكىنىشنى ناھايىتى «مۈشكۈللۈك ئىچىدە قارار» قىلغانلىقىنى بىلدۈردى. ئۇنىڭ دېيىشىچە ئۇ بۇ 10 يىللىق ھەربىيلىك سەپىرىدىن ناھايىتى مىننەتدار ئىكەن، ئۇنى ھاياتىدىكى ئۇنتۇلماس ئەسلىمە دەپ قارايدىكەن. 2005-يىلدىن باشلاپ، شاھزادە خاررى ئەنگلىيەدىكى داڭلىق قۇرۇقلۇق ئارمىيە ھەربىي مەكتىپى سانخۇرستا ھەربىي تەلىم ئالغان. 2007-يىلدىن 2012-يىلىغىچە ئىككى قېتىم ئافغانىستانغا ھەربىي ۋەزىپە ئۆتەشكە بارغان. 2009-يىلى 1-ئايدا، خاررى خان جەمەتى قۇرۇقلۇق ئارمىيە ھاۋادا جەڭ قىلغۇچى قىسمىنىڭ ئۇچقۇچىسىغا ئايلانغان. 2012-يىلى، ئۇ ئاپاچى قوراللىق تىك ئۇچار ئۇچقۇچى سالاھىيىتىگە ئېرىشكەن. بەزى تاراتقۇلار بۇنىڭغا قارىتا ئىلگىرى «ئەسكى ئوغۇل بالا» «ھەربىي قەھرىمان»غا ئۆزگەردى، ئەنگلىيە ئاممىىسى ئارىسىدىكى قوللاش نىسبىتى يۇقىرىلىدى دەپ قارىدى. شاھزادە خاررى ئۆسمۈرلۈك دەۋرىدە زەھەر چېكىش، قاۋاقخانا جېدەل چىقىرىش قاتارلىق مەسىلىلەرنى پەيدا قىلغان.
ھەربىي سەپتىن چېكىنىشتىن بۇرۇن، شاھزادە خاررىنىڭ ۋاقىت جەدۋىلى ناھايىتى جىددىي ئورۇنلاشتۇرۇلغان. ئەنگلىيە رادىئو شىركىتىنىڭ خەۋەر قىلىشىچە، ئۇ 4-ئايدا ئاۋسترالىيەگە بېرىپ ھەربىي قىسىمنىڭ مەشقىگە قاتنىشىدىكەن. 4-ئاينىڭ ئاخىرى دادىسى ۋەلىئەھدى چارلېزقا ھەمراھ بولۇپ بىرىنچى دۇنيا ئۇرۇشى گاللىپولى جېڭىنىڭ يۈز يىللىقىنى خاتىرلەش پائالىيتىىگە قاتنىشىدىكەن. بۇيىل يازدا، ئافرىقىغا بېرىپ خەير-ساخاۋەت پائالىيتىگە قاتنىشىدىكەن.
كەلگۈسىدە نېمە ئىش قىلىدىغانلىقىغا قارىتا شاھزادە خاررى «داۋاملىق ئويلىنىش ئۈستىدە» دېدى. لېكىن يەنە كەلگۈسىگە نىسبەتەن «ئۈمىدۋار» ئىكەنلىكىنى بىلدۈردى. بەزى خەۋەرلەردە دىيىلىشىچە، شاھزادە خاررىنىڭ دۆلەت مۇداپىئە مىنىستىرلىقىدا ئىشلىشىدىن ئۈمىد بار ئىكەن.